Iconologie (Cesare Ripa, 1643)/II/Inſpiration
Inspiration.
E ieune Garçon, dont les cheueux ſont heriſſez, &
qui regarde le Ciel, d’où s’eſlancent des rayons qui luy
percent le Cœur ; outre que de ſa main droite
il tient vne Eſpée nuë, & de la gauche la Fleur qu’on
appelle Tourne-ſol, eſt icy pris pour l’Inſpiration. Par le Ciel
ſerain & ſemé d’Eſtoiles, eſt repreſentée l’infinie bonté de
Dieu, qui par vne grace particuliere inſpire & enflame le Pecheur :
les cheueux heriſſez figurent les apprehenſions & les
alarmes continuelles que ſe dõne l’homme quand il eſt plongé
dans le vice : la veuë tournée en haut ſignifie que ſans la grace
Diuine l’eſprit ne peut s’attacher qu’aux choſes de la terre ;
l’Eſpée nuë, que pour auoir de veritables inſpirations, il faut
ſe deſnuer de toutes les choſes qui peuuent bleſſer noſtre ame ;
et le Tourne-ſol, qu’à l’imitation de cette Fleur, qui ſuit toûjours
le Soleil, le Pecher conuerty, & embraſé de l’amour diuine,
ouure ſon cœur à Dieu, & ſe tourne ſans ceſſe vers luy.