Iconologie (Cesare Ripa, 1643)/II/L’Amerique
L’Ameriqve.
Ette Femme qui a le teint oliuaſtre, le viſage
effroyable à voir, & vn voile de pluſieurs couleurs
qui luy couure le corps à demy, repreſente
l’Amerique. Outre qu’vne eſcharpe de plumes
tres-agreables, artiſtement jointes enſemble, la fait particulierement remarquer, par ce biſare ornement : elle porte en
vne main vne fleſche, en l’autre vn arc, & vn carqois à ſes
coſtez. A quoy l’on peut adjouſter qu’elle a ſur la teſte vne
guirlande de pluſieurs plumes eſtranges, & à ſes pieds vn eſpece
de Lezard reſſemblant à peu pres à vn Crocodyle. Comme
encore vne teſte humaine arrachée de ſon corps, & trauerſée
d’vn dard.
Cette derniere partie du Monde nouuellement deſcouuerte par Americ Veſpuce Florentin, dont elle a pris ſon nom, eſt dépeinte preſque toute nuë, pource que ſes habitans ont accouſtumé d’aller tous nuds, ſi ce n’eſt qu’ils ſe couurent les parties honteuſes d’vne ceinture faite de plumes & de coton, en forme de frange.
La guirlande de plumes eſt vn ornement dont ils ſe parent d’ordinaire. Outre qu’en certain temps de l’année, ils en portent vn habillement qu’ils font eux-meſmes auec beaucoup d’art pour des Sauuages, comme le remarquent les meilleurs Autheurs qui ont eſcrit de ce Pays-là.
L’art & les fleſches ſont les Armes, dont, non ſeulement les hommes, mais encore les femmes ont accouſtumé de ſe ſeruir en allant combattre leurs ennemis.
La teſte qu’elle a ſous les pieds, y eſt miſe exprés auec beaucoup de raiſon, pour monſtrer que ces Peuples inhumains ſe repaiſſent ordinairement de chair humaine : Car ils ne manquent iamais de manger enſemble ceux qu’ils ont pris à la guerre.
Et d’autant qu’entre diuers Animaux que produit ce Pays-là, les Lezards ſont remarquables, ce n’eſt pas ſans ſujet qu’on les peint icy, veu que dans ces terres neufues, il y en a de ſi grands & de ſi cruels, qu’ils deuorent les autres animaux, & les hommes meſmes.