Iconologie (Cesare Ripa, 1643)/II/Le Solſtice de l’Eſté
Le solstice d’este.
N le repreſente icy par la figure d’vn jeune homme
aagé de vingt-cinq ans, & qui eſt tout nud, à la reſerue
des parties honteuſes qu’il a couuertes d’vn
voile de couleur de Pourpre. Il eſt en action de rebrouſſer
en arriere, eſt couronné d’vne guirlande d’eſpics ; &
porte deſſus la teſte vn grand cercle de bleu Turquin, où ſont
grauées neuf Eſtoiles. Il tient de la main droite vn Globe aſſez
grand, qui eſt obſcur par en bas, & de la gauche vne Eſcreuice ;
où il eſt à remarquer encore qu’il a ſur les pieds quatre petites aiſles en forme de talonnieres, dont il y en a deux de
blanches au pied droit, & au gauche vne blanche & l’autre
noire.
Par le mot de Solſtices ſe doiuent entendre les deux temps, auquel le Soleil eſt le plus proche, & pareillement plus eſloigné de nous. L’vn eſt le Soſtice d’Eſté qui ſe fait le vingt-vnieſme de Iuin, & l’autre celuy d’Hyuer, qui commence le vingt-vnieſme de Decembre. On l’appelle Solſtice, pource qu’alors le Soleil ne paſſe pas plus auant, & qu’il a deux Cercles qui limitent ſa carriere, l’vn vers le Pole Arctique, & l’autre vers l’Antarctique, chacun deſquels eſt eſloigné de ſon Pole de ſoixante-ſix degrez, & de l’Equinoxial de vingt-quatre. A quoy j’adjouſte qu’ils diuiſent leur Spheres en deux parties ineſgales, qu’on appelle Cercles Tropiques, c’eſt à dire conuerſions ou retours. Car alors le Soleil ſe trouuant au premier point de l’Eſcreuice, fait le Cercle ſuſdit dans le mouuement du Firmament, & le dernier en la partie Septentrionale, qui eſt celuy que l’on appelle Cercle du Solſtice d’Eſté.
D’où il aduient qu’au lieu que par le paſſé il s’approchoit de nous, il s’en eſloigne à l’aduenir, juſques à ce qu’il arriue au point du Capricorne, faiſant l’autre dernier Cercle dans le mouuement du Firmament, & vers le Pole Antarctique, qui eſt celuy que l’on appelle Cercle du Solſtice d’Hyuer. Le propre des Cercles ſuſdits eſt de diſtinguer les Solſtices dans le plus grand declin du Soleil, comme il a eſté dit, au premier degré de l’Eſcreuice & du Capricorne. Le Solſtice d’Eſté eſt ainſi dit, à cauſe que ſe trouuant dans le premier point de l’Eſcreuice & le plus prés qu’il ſçauroit eſtre de nous, il ramene la plus chaude de toutes les ſaiſons.
Ioint qu’en ce temps-là eſt le plus grand iour & la moindre nuict de l’année. Mais lors qu’il ſe rencontre au premier point du Capricorne, il eſt nommé Solſtice d’Hyuer ; auquel temps le Soleil eſloigné de nous autant qu’il peut eſtre, eſt cauſe par cét eſloignement que la froide ſaiſon arriue. Et c’eſt alors que nous auons la plus grande nuict & le moindre iour de l’année.
On peint le Solſtice d’Eſté en jeune homme de vingt-cinq ans, pource que depuis que le Soleil eſt arriué du premier point du Mouton à celuy de l’Eſcreuice, il a fait la quatrieſme partie de ſa courſe.
Sa nudité & ſon voile de couleur de Pourpre, ſont les Symboles des plus grandes chaleurs de l’année.
Il eſt en poſture de rebrouſſer chemin, à cauſe que le Soleil ne s’arreſte point, & qu’au contraire il recule depuis qu’il a touché le Cercle Equinoxial.
Le Cercle qu’il a ſur la teſte, où ſe voyent neuf Eſtoiles, eſt nommé le Tropique du Cancer ; & c’eſt auec raiſon qu’on les luy met ſur la teſte, à cauſe que le Soleil eſt en ce temps-là plus proche de nous, & que le Solſtice ſe fait quand il vient à toucher le Cercle ſuſdit.
Il tient vn Globe de la main droite, d’autant que le Soleil eſt en ce temps-là du coſté du Septentrion, qui eſt la partie droite du Monde.
Les trois quartiers lumineux du Globe, ſignifient que les iours ſont longs & les nuicts courtes en ce temps-là. Ce qui aduient par vn particulier effet du Soleil.
Il tient vne Eſcreuice de la main gauche, d’autant que cét animal eſt vn des douze Signes du Zodiaque, & que le Soleil de meſme recule & tourne en arriere.
Les petites aiſles de ſes pieds ſignifient le mouuement du Temps. Car, ſelon quelques Philoſophes, le Temps n’eſt autre choſe qu’vn mouuement circulaire & ſucceſſif. Auſſi ramene-t’il les Saiſons conſecutiuement, comme l’Eſté apres le Printemps, & l’Hyuer apres l’Automne ; tellement que chaque Saiſon retournant ainſi par maniere de ſucceſſion, produit ſes effets particuliers.
Les trois aiſles blanches monſtrent que le iour eſt d’autant plus long, que la nuict denotée par l’aiſle noire ſe trouue courte & de peu de durée.
La Guirlande d’Eſpics n’eſt miſe au reſte que pour marquer la difference qu’il y a entre le Solſtice d’Hyuer & celuy d’Eſté.