Iconologie (Cesare Ripa, 1643)/II/l’Equinoxe du Printẽps
L’eqvinoxe dv printemps.
Et Equinoxe nous eſt figuré par vn jeune Homme
de moyenne taille, veſtu d’vne robe blanche d’vn
coſté, & de l’autre noire. La ceinture qu’il porte eſt
de Bleu Turquin, vn peu large, ſans nœud, & ſemée
de petites Eſtoiles. Il a ſous le bras droit vn Mouton, en
la main gauche vne Guirlande de fleurs, & à ſes pieds deux
Aiſlerons, dont l’vn eſt blanc & l’autre noir.
Par le nom d’Equinoxe eſt ſignifié le temps qui marque l’egalité du iour & de nuict. Ce qui arriue deux fois l’année, à ſçauoir le vingt-vnieſme de Mars, quand le Soleil entrant dans le Signe du Mouton, nous ramene le Printemps, & le vingt-troiſieſme de Septembre, où l’Automne nous donne ſes fruicts en leur maturité.
Il eſt peint ieune, à cauſe qu’il ſe rencontre à l’entrée de Mars, qui eſt le mois par où les Anciens commençoient l’année.
Quelques-vns tiennent encore que ce fut alors qu’aduint la Creation du Monde, & la Paſſion de noſtre Sauueur ; A quoy ils adjouſtent qu’en ce meſme temps & au premier degré du Mouton, fut creé le Soleil Autheur du meſme Equinoxe. A raiſon dequoy les Anciens n’ont pas dit hors de propos, que ce mois donnoit comencement à l’année ; car en effet il a des plus grands priuileges que tous les autres, non ſeulement pour les cauſes que nous venons d’alleguer, mais encore pource que de luy-meſme l’on tire les Epactes, les Lettres Dominicales, & les autres ſupputations Celeſtes.
Il eſt repreſenté de iuſte taille, pource qu’il rend eſgaux les iours & les nuicts, eſtant veritable que le Cercle Equinoxial diuiſe la Sphere par le milieu, & pareillement les Poles du Monde.
La couleur blanche de ſon habillement nous marque le iour, & la noire la nuict, qui vient apres pour eſtre moins noble.
Sa ceinture de couleur celeſte où ſe voyent quelques Eſtoiles, repreſente le Cercle qui fait le meſme Equinoxe, & qui enuironne le premier mobile.
Le Mouton qu’il tient ſur ſon bras droit, ſignifie que le Soleil entrant dans ledit Signe forme l’Equinoxe du Printemps ; comme il eſt demonſtré par la guirlande de fleurs, qu’on a miſe en main à cette Figure.
Quant aux Aiſlerons qu’il porte à ſes pieds, ils ſont les Symboles de la legereté du Temps, & de la courſe des meſmes Signes, l’Aiſleron blanc du pied droit marquant la viſteſſe du iour, & le noir du gauche celle de la nuict.