| ◄ Laisse CCCCXLVII | Laisse CCCCXLVIII | Laisse CCCCXLIX ► |
— Sire », dist Oliver, « par vestre cortoisie
« La citez me donez, si ne la refus mie ;
« Mon ploisir en ferai, se nus nel contrelie. »
Felidés en apelle devant la baronie :
« Vasal, ne moi mentir : dont fu t’anceserie ?
— Par foi, sire, de Noble ja n’avrent la bailie ;
« Mon piere en fu rois, mais a grant felonie
« L’en deseisi Marsile a pri de l’Augalie,
« Si la dona en feu Gilares d’Orqenie :
« Veez le la gesir et senz dras et senz vie.
« Pués moi dona l’avoir d’une conestablie ;
« Anc ne m’en donerent nule autre manantie.
— Certes », dist Oliver, « ce fut gran vilanie ;
« Por mauvais seignor est bone gient maubailie.
« Grant tort te fist Marsile ; gerpis sa drüerie
« E crois en Jesu Crist, le filz sainte Marie ;
« Fais nos le palés rendre e la sale voltie ;
« Se la gient que la sont ert a Diex convertie,
« D’els e de la cité te donrons segnorie. »
Quant le Paiens l’oï, ne seit com l’en mercie ;
Le piez lui veit baser con lee ciere et pie.
De l’amor des François et de lor compaignie
Fu enpris maintenant sains point de leçerie.