◄ Laisse DCLXIII | Laisse DCLXIV | Laisse DCLXV ► |
Por le roi conforter, qi mout estoit dolant,
S’en torne le vasal a esperon pongant
E leise le faucon sor ses eles estant ;
Plan de paor s’en fuit aveq lui son sergiant.
Rolant le mostre Sanses, si li dit en riant :
« Tu poras, frer, veoir, non ira piece grant,
« Comant je sui aïs de la franchoise giant. »
O tref l’anpereor le duch Rainer desant ;
N’a soigne dou cheval, se sens valet remant,
Ou pavaillon entra, de joie soupirant.
Segnor, or entendrois, se Diex vos soit eidant,
S’il fu de grant profit le retorner Rolant.
Devant l’enpereor estoient en estant
Plus de .cc. barons, disans apertamant :
« Roi, servis vos avons plus qe n’ert convenant ;
« Torner nos en volons de cist jor en avant
« A reveoir nos teres, nos fames, nos enfant.
« En Espagne venimes por conquir solemant
« Por coroner dou regne le fiuz Mille d’Anglant :
« Le saigremant est qite por un ferir de guant.
« Se Rolant ne nos mostres encué sans e vivant,
« Afïés sunt de nos Marsile e Baligant.
« Se cist païs vos pleit, si li soiés menant,
« Qe ja roi Salamon ni le sir de Normant,
« Por lor raisons mostrer ni aler meneçant,
« Doman ne nos tindra jusque solel chouchant ;
« E quant nos en irons, il n’a hom si pusant
« Qu’il ne façe folie, s’il nos vient au devant.
— Por mon chief », dit Hostous, « vos avés de droit tant,
« Qui de ce vos ahete, ja Diex n’i soit aidant,
« Car nul ne doit secore qi soi meiesme ofant. »