◄ Laisse DCXXVII | Laisse DCXXVIII | Laisse DCXXIX ► |
Or chevauchent li troi sens le qarte compagne,
Dolans et esgarés ; ja n’ont oil qi non plangne.
E jurent Damediés e sainte glorie magne,
Se il ancontrassent tut le Paien de Spagne,
Si feriront entr’aus, ce qi puet en avagne.
Por veoir ou il sunt poient une montagne
Aute a monter et aspre : n’a teil en Alemagne ;
Ne verent entor aus fors qe grant desertagne.
Des chevaus descendirent ; cescuns le sien amagne
Derer aus por les frans en une val sotagne
O l’erbe est fresche e drue, qi en fontane bagne.
Pomer savajes i a e la poingnant chastagne.
« Segnor, atendés ci », dit le niés Carlemagne,
« Tant qe je revenrai ses longue demoragne ;
« Desor cist autre poi me metrai en gaagne
« Por veoir d’autre part s’il i a point de champagne
« Ou il avist cités Crestïene ou estragne.
« Procein somes de Carles : tot le cor le m’ensagne.
« Or vos repouserés andui en ceste plagne,
« E vos e vos chevaus, a tan qe je revagne. »