◄ Laisse DLII | Laisse DLIII | Laisse DLIV ► |
Comant qu’il fust, dou bon detrer d’Arage
Est Pellias versés in més l’erbaige ;
Non mais airee fu plus beste saovage.
Chum il leva amont en sun estaige,
Rollant vers lui ha dricé sun visage ;
A pié le voit et dist en son chouraige :
« Ja non havrai de cestuy avantaige. »
Alor dessis dou grant destriers sauvaige.
Non i a Païns que mervoille non age ;
Dissent plusor : « Il non soit que il fayge,
« S’il est a pié, ce li vient par irage. »
Molt s’an mervoille Pellias li Aufage,
Maomet jure et sue saintisme image :
« Cist n’est villain ne de foible lignaige,
« Mais voiremant civalers de paraige
« Que por mostrer proesche et vassalage
« Vait ensi soul por estrainge regnaige.
« Chant est dessis, o il n’est mie saige,
« O plus soi tient valloir d’un imperage ;
« Mais tost porroit avoir fait sun domage. »
Chant ha ce dit, si torne suen vissage,
Vers le niés Karles s’an vait agrant corsage,
Grant cols li done entre schuz et la targe :
Boine est la spee et d’aispre seignorage,
Que fu prouvee dou tems anzïenaige ;
Mais li clavains stoit de tiels avantage,
Sor lui non fist ingonbrier ne doimage ;
Mais le fiers cols dou Sarracin Aufaige
Fist chanceller le duch, a tel ballaige
Chel villain fait chant trop vins il incarge,
L’ardiz Paiens li eschrie en sun lengage :
« Trop par avez, dan glot, fait grant folage
« Que m’avés mort mon destrer de Cartage :
« Vos in avrois ja mantinant le gage. »