◄ Laisse DLVIII | Laisse DLIX | Laisse DLX ► |
« Cevallers frere », ce a dit Pelliais,
« Si Sarracins, Crestians o Judais
« Is, nel sai ; més par la loi que tu ais
« Et par cil ordre dont civaler te fais,
« Par tot l’amor de l’ami plus verais
« Ch’ais en ces mont, se tu le voies mais,
« Chuntente moi de voir dir, non de gais,
« De quel lignaze es tu nez et estrais,
« De roi, de quens, de duch ou de plus bais ?
« Non te creroie, se tu le moi jurais.
« Quele oqueisun, qel penser, quel forfais
« Te cunduit ci servir uns Satenais
« De qui merit dou servis non avrais ?
« Bien sai tun peres non vit de vendre drais.
« Les crüels chols que insent de tun brais
« Me fait counostre ce que pués et que sais. »
Rollant l’oï ; un grant souspir ha trais,
Char d’Olliver li menbre et dou rois d’Ais ;
Et pué a dit : « Dans civaler, tu m’ais
« Par l’eschunjur si destroit en tun lais
« Mon non dirai, més tu le chunperais,
« Char d’encuser moi loisir non penrais,
« Que toi o moi morunt eneilepais.