| ◄ Laisse DLXIV | Laisse DLXV | Laisse DLXVI ► |
Con ces parole rois Malquidant depart ;
Il vint au port, si entre an uns chanart.
Par sun chier niés de duel li cors li art.
Un braz de mer paserent d’autre part,
Pué civaucent por mi le grant desart,
Pasent li poi et les vaus de Guimart,
E chant il fu dedens la grant Baudart,
Pellias enfuïrent a uns grant temple de Mart ;
Pué fait eschrire et ses brief et ses zart,
Les Turs invoie d’outre Mont Melliart,
Li Blach, li Ros, les Nors, les Acoppart.
De soi vengier molt i resenble tart ;
Se ce non fait, molt s’en tinra musart.
Plus orguelous jamais non fu Girart
Chant a Paris ficha sun estendart
Et mut les host o fu mort Guinimart,
Le bailis Karle, niés au conte Bernard.
Hor est le roi de Perse in grant regart
Se nel secort Roulant et Durindart ;
Par autre aïe non poit fuïr la art.