◄ Laisse DXVI | Laisse DXVII | Laisse DXVIII ► |
Le roi qi menechoit mout par estoit pusant :
Les Turs e les Roseus e des Greçois auquant
E celor de Baudaqe i erent apendant,
Estier les Esclavons e Blach e Nobiant.
Sis rois apendoient a lui, senz li parant ;
Car ses neveu estoit Pelias le valant
Qe tenoit le païs qe fu roi Esperant ;
Si estoit son cuisins Henestor le jaiant ;
Le Viel de la Montagne le sert por convenant ;
Plus de cinquante prences, ester li amirant
E qens e dus ausi, i erent enclinant.
Ne vos merveilés donqe se grant onte le esprant
Quant il le refusoit nulle fame vivant.
Il dist au rois de Perse : « Oiés apertemant.
« Nos somes retornei au premer mautalant,
« A la premere gere a tot le priz ahant ;
« Bon acord in quidoie, mais unqe nel domant.
« Se tu ne veus ton reigne veoir dou fou ardant
« Espris et alumés ains les dis mois pasant,
« Vange moi de ta file a tot tes gens veant ;
« E se cose que non, nul bon acordemant
« Jamais n’ert entre nos se toi e tes enfant
« N’avrai deseritei et oncis ensemant :
« La folie de li ert sor vos declinant.
« Mais feites li ardoir, si en sara garant
« A tot cels qi nos somes ami et bienvoilant. »
Quant roi Soldan l’oï, si se dreçe en estant.