| ◄ Laisse DXXIX | Laisse DXXX | Laisse DXXXI ► |
Tut se trairent qant Rolant s’est drecé.
En le lengaje Persans a encomencé :
« Rois e barons, se tuit me pardoné,
« Je pur dirai, quant tuit sunt aqoisé.
« Por trop mus estre n’est nul home sené
« E por trop dir ne vient il pais lohé.
« Home qi veult parlant estre honoré
« Dou poi, dou trop doit estre amesuré.
« De ces dous chouses croi mal adotriné
« Cil jantils home qi samble corocé
« Contre le droiz, se je ai bien noté.
« Voulez, segnor, conoistre un tort prové ?
« Quant cil qi a droiz oul tort vient apelé,
« Il senpre parle paisible et atempré,
« E le tort huche con se fust forsené :
« Senefiance est qu’il se sent dané. »
Quant a ce dit, Soldan a appelé :
« E vos, biaus sire », feit il, « me resenblé
« Avoir de gient bone grant poverté.
« S’il ont raisons vers vous, ce ne sai jé.
« Seignor aver et cruaus et ingré,
« Quant devroit estre acheris et amé,
« Par son defaut vient dou sers esloigné :
« Maint de aut homes n’ont estez debasé.
« Se je di voir, Daire l’a tesmoigné,
« Vos ancesor, qi en fu mont reté.
« Savez por qoi sui en cist diz entré ?
« Par vos barons qi tant sont esgaré
« Quant por defandre vos droiz, se vos l’avé,
« Grant ne petit n’i a un mot soné.
« Mais pués qe sui por destin arivé
« E armei sui, il me seroit vilté
« Se je teisise, et grant chativeté.
« Dont je vos di qe je sui apresté
« De la bataile de bone volunté,
« E proverai por vive verité
« Que mariage qui se feit contre gré
« D’om ni de fame revelle la loi Dé.
« N’en dirai plus, qar dit en ai asé. »
Atant se taist, mais n’est mie crolé
De son estant, tant ni quant remüé.