Le Grand voyage du pays des Hurons/00/07
PRIVILEGE DV ROY.
ovs par la grâce de Dieu, Roy de
France et de Nauarre,
A nos amez et feaux conseillers, les gens tenans nos Cours de Parlemens, Maistres des Requestes ordinaires de nostre Hostel, Preuost de Paris, Baillifs, Seneschaux, et autres nos Iusticiers et Officiers qu’il appartiendra, salut. Nostre bien amé Fr. Gabriel Sagard, Recollet, nous a faict remonstrer qu’il a composé vn liure intitulé : Le grand Voyage du pays des Hurons, situé en l’Amérique, vers la mer douce, és derniers confins de la Nouuelle France, auec vn Dictionnaire de la langue Huronne. Lequel il desireroit mettre en lumiere, s’il auoit sur ce nos lettres. A ces causes, desirant bien et fauorablement traicter ledit suppliant, et qu’il ne soit frustré des fruicts de son labeur, luy auons permis, permettons et octroyons par ces présentes ; de nos grâces spéciales, d’imprimer ou faire imprimer en telle marge et caractere que bon luy semblera ledit liure, iceluy mettre et exposer en vente et distribuer durant le temps de dix ans, deffendant à tous Imprimeurs et autres personnes, de quelque qualité et condition qu’elle soient, d’imprimer ou faire imprimer, mettre ny exposer en vente ledit liure, sans le congé et permission dudit exposant, ou de celuy ayant charge de luy, sur peine de confiscation d’iceux liures, d’amende arbitraire, et à tous despens, dommages et interests enuers lui ; à la charge d’en mettre deux exemplaires en nostre Bibliotheque publique. Si vous mandons que du contenu en ces présentes vous fassiez, souffriez et laissiez iouyr et vser ledit exposant pleinement et paisiblement, et à ce faire souffrir et obeyr tous ceux qu’il appartiendra, en mettant au commencement ou à la fin dudit liure ces presentes, ou bref extraict d’icelles, voulons qu’elles soient pour deuëment signifiées : Car tel est nostre plaisir. Donné à Paris le 21. iour de Iuillet, l’an de grace 1632, et de nostre regne le 23.
Par le Conseil.
I’ay sous-signé, consens que le sieur Denys Moreau, lequel i’ay choysi pour mon Imprimeur et Libraire, puisse imprimer mon liure, intitulé le Grand Voyage du pays des Hurons, à la charge de receuoir de moy, vn nouueau consentement, toutes les fois qu’il voudra le reimprimer. Et à ces conditions ie luy remets mon Priuilege que i’ay obtenu du Roy, pour imprimer mondit liure.
Fait à Paris ce 29. Iuillet I632.
d’Aoust I632.
APPROBATION DES PERES DE L’ORDRE.
Nous soussignez, Professeurs en la saincte Theologie, Predicateurs et Confesseurs des Peres Recollets de la Prouince de S. Denys en France,
Certifions auoir leu vn liure intitulé, Voyage du pays des Hurons, situé en l’Amerique, vers la mer douce, és derniers confins de la Nouuelle France, dite Canada : où il est traité de tout ce qui est du pays, et du gouuernement des Sauuages, auec vn Dictionnaire de la langue Huronne ; composé par Fr. Gabriel Sagard Theodat, Religieux de nostre mesme Ordre et Institut ; auquel nous n’auons rien trouué contraire à la Religion Catholique, Apostolique et Romaine : ains tres vtile et necessaire au public.
En foy de quoy nous auons signé de nostre main.
Fait en nostre Couuent de Paris le cinquiesme iour de Iuillet I632.
Couuent des Recollets de Paris.
