Le Livre des ballades/Plourez, plourez, flour de chevalerie
de sire Bertran Duguesclin
Eſtoc d’Oneur, & arbres de vaillance,
Cuer de lyon eſprins de hardement,
La flour des preux & la gloire de France,
Victorieux & hardi combatant,
Saige en voz fais, & bien entreprenant,
Souverain home de guerre,
Vainqueur de gens & conquerrez de terre,
Le plus vaillant qui oncques fuſt en vie,
Chaſcun pour vous doit noir veſtir & querre :
Plourez, plourez, flour de chevalerie !
Ô Btetaingne, ploure ton eſperance !
Normandie, fay ſon entierement,
Guyenne auſſi & Auvergne, or t’avence,
Et Languedoc, quier lui ſon monument ;
Picardie, Champagne & Occident,
Doivent pour plourer acquerre
Tragediens, Arethuſa requerre
Qui en eaue fut par plour convertie,
Afin qu’à tour de ſa mort les cuers serre :
Plourez, plourez, flour de chevalerie.
Hé ! gens d’armes, aiez en remembrance
Voſtre pere ; vous eſtiez ſi enfant.
Le bon Bertran, qui tant ot de puiſſance
Qui vous amoit ſi amoureuſement,
Gueſclin crioit. Priez dévotement
Qu’il puiſt paradis conquerre.
Qui dueil n’en fait, & qui n’en prie, il erre,
Car du monde eſt la lumière faillie ;
De toute honneur eſtoit la droicte ſerre :
Plourez, plourez, flour de chevalerie !