Le Livre des oraisons/XXVI
XXVI
Quant aux pechiez que iay fais Sire vray Dieu omnipotent ie regarde, et aux peinnes et tourmens que pour ceulz ie doy souffrir, ie nay pas petite paour. Aincois consire et pense sien nulle maniere ie retrouveray consolation. Maiz helas doulent ie nen treuve nul. Car non seulement ay ie courroucie a toy qui es mon createur, maiz toy et toutes tes creatures, et ainsi ie nay a qui recourre ne ou aler. Que feray ie doncques en quieu part yray ainsi triste et ainsi desole par les malices de mes pechiez. Si a celluy qui ma fait ie vueil retourner et a sa inexplitable pitie, ie craing moult quil se vueille vengier sur moy des deshonnestes pechiez que iay faiz senz regarder ne amour ne paour de luy. Que feray ie doncques demourray ie desespere senz conseil et senz ayde, encore mon doulz createur soustient que ie vive et fay mes besoignes honnourables et proufitablement, ne encore par mes pechiez ie ne puis vaincre sa grant bonte qui me vueille confondre du tout ne destruire ainsi comme iay grant temps a deservi. Cest donc Sire certainne chose que trop es tu piteux envers moy qui tant de biens mas donnes et me donnes, ne encore de mes mauvaisties vengance ne frequiers. Iay ouy dire moult de foys que notre Sires est trop piteux ; maiz certes ore le tesmoingne par moy meismes, et comment Sires ie voy tant de misericordes et de pities en toy et tant de pecheurs pardonner que nulz ne delaisses, maiz touz les recoys, ie ne me doy pas desesperer, car ie say bien que cil qui pardonne les autres me puet bien pardonner, car il est tout puissant, maiz entre pecheurs a grant difference. Donc ie pensant de quans pechiers et de quantes ordures la desaventureuse de marme est tachiee. Se ne me met pas avec les pecheurs maiz ie me tiens plus pecheur que nul. Trop de gens ont pechie et apres repenti, et trop de gens ont fait maulx et moult de biens. Maiz ie maleureux et sur tout pecheur entendant et sachant a quante perdicion me tiroit mon pechie, de pechier ne cessay maiz touz iours adioustant pechiez sur pechiez, et ainsi dolent de mon gre ay use toute ma vie en pechiez, ie donc qui en tele maniere ay vescu, et qui tant de maulz ay fais, et qui en toutes iniquitez me suy envelope, en quele maniere oseray avec les autres pecheurs courre à la fontainne de misericorde.
Ayde donc Sire dieu à ta creature, car par grandesce de pechiez ne te puet vaincre si le pecheur donc ne vient en desesperation.
Sueffre donc, sire mon dieu, et soustiens moy à regarder ta inexplicable pitié et mottroye, sil te plaist, que je mastieigne de tant de maulx comme iay fais, de cy en avant, car par ma vertu senz toy ie ne le puis faire, Sire, si mottraye, sil te plaist, que en ceste vie aincoys que ien parte, ie me puisse amender vers toy mes pechiez et parvenir en ta grace.