Le Livre des oraisons/XXVII
XXVII
Ayde moy le mien dieu le quel ie quier, le quel ie ayme, le quel de cuer et de bouche et de toute la force que ie puis ie loe et aour, ma pensée à toy devote par tamour eschaufee, à toy souspirant, de toy veoir desirant, riens nest doulz fors toy, de toy parler, de toy ouyr, de toy escrire, ta gloire souvent dedanz le cuer penser, par quoy ta mémoire se ne soit entre ceste vie de tempestes ma recreation, tu donc ie appelle, tresdesire, à toy ie crie de grant clamour en tout mon cuer. Quant ie sire me recors de toy ie me delite en toy duquel sont toutes choses, par lequel sont toutes choses. Tu le ciel et la terre remplis portant toutes choses senz charge, tout remplis senz estre enclos, tous temps en euvre et tousiours en repos, recevent et non fraitureux, demandant et riens ne te fault. Amant senz eschaufer, repentant senz desplaisir, courroucie et trespaisible, remuant euvres et non pas conseille ; recueures et rien nas perdu ; rien ne te faut, et as ioye du gaing ; tu nes pas avaricieux et veulz avoir usures ; tu rens debtes et riens à nul ne dois ; delaisses ce que on te doit et riens ne pers ; tu qui es par tout, et en chascun lieu tout ; tu puez estre sentu et non pas veu ; tu es tousiours touz temps present et tresloing ; tu es par tout present et on ne te puet trouver ; toutes choses environnes, toutes choses surmontes, toutes choses soutiens, toutes choses enseignes que par lieux ne testens ; ne par temps ne te varies ; ne ne vas ne retournes, tu qui habites en lumière le quel nul homme ne puet veoir ; tu ne te peuz separer, car tu es un tout trestout illuminez, tout est en ta main. Se livres on escript de toy, on ne puet raconter ta grandeur, car tu es inexplicable grant certainnement ; es senz quantité, senz mesure ; tu es bon senz qualité, et nul fors toy seul nest bon ; du quel la voulente est euvre, du quel le vouloir est povoir, car toutes choses as faites par ta seule voulente. Tu gouvernes toutes choses senz travail et senz annuy, tu es par tout et si nas point de lieu. Tu puez faire toutes choses fors que mal, par la bonté du quel sommes faiz, et par la justice du quel plourons les pechiez et par la clemence sommes delivré de ceulz. Tu es en toutes choses et toutes choses en toy, du quel nul ne puet eschapper par nulle voye, car certainnement qui nara toy a peinne en nulle guise neschapera de toy courroucie, et donc doulz Sire puis que si grant et puissant et si misericors es, a toy corps et arme ie donne, quil te plaise que par ton doulz plaisir me vueilles adrescier en ton doulz service.