Le Roman du Renart - D. M. Méon — 1826/29
C’est la Branche come Renart parfist le c…
Mains hons puet tel chose tesir
Qui autrui venroit à plesir
S’ele ert conue et descoverte :
Por ce est cil fous qui done à perte
Bone aventure qant il l’ot,
Estraire en doit aucun bon mot
Dont il puise ces resbaudir
Qui son conte volent oïr.
G’en di por ce une avanture
Où ge ai mis toute ma cure ;
Ge l’oï dire à un veillart
Qui sages iert et de grant art.
Li contes est traiz d’un Gorpil,
Ne l’aiez pas por ce plus vil,
Car toute en est l’estoire voire
Si on en le nos fait acroire.
Ce fu li voirs que Chanteclers
Et Ysengrins et Brichemers
Et Dant Renart, si con moi sanble,
Firent un grant essart ensanble.
Brichemers as cornes agues
En a les coiches esméues ;
Chanteclers grata les racines
Et Ysengrin as forz eschines
Et as espaules qu’il ot fors,
En a gité les coiches hors.
Renart qui tot le mont deçoit,
Qui de mal faire ne recroit,
Esta selonc, si les semont :
Or tost, seignor, faites grant mont,
J’esgarderai que nus ne veingne
Qui baston ne espée taingne
Dont il nos puisse faire mal.
Lors garda amont et aval,
Bien sot son cul ariere traire,
Que il n’ot cure d’ovre faire.
Qant il orent par lor pechié
Le bois deront et despecié,
Renart parla tout premerains
Qui n’estoit pas fous ne vilains.
Seignor, ci a grant chanp de terre,
Or avons mestier de bien faire :
Or devrions panre tel porpens
Chascuns de nos selon son sens,
Que nos tel chose i semisiens
Dont nos raparisent fusiens.
Qu’en dites-vos, Dant Brichemer,
Et vos, biau sire Chantecler ?
Dites que vos en est avis.
Chantecler en gita un ris,
Si respondi assez briément,
Sire Renart, mien escient,
Moult drue chanvre i croistroit
Qui chanevis i semeroit :
Li grainz en est douz à mengier,
Maintes foiz m’a éu mestier,
Et de la tile a-on argent.
Brichemer dist par maltalent
Que jà chanvre n’i ert semée,
La terre est de novel sartée,
Bien i puet-on orge semer
Se vos le volez créanter,
Et je l’otroi de moie part.
Ysengrin l’en fist un regart,
Si li a dit iréement,
Dant Brichemer, à vo talent,
Ce sachiez-vos, n’ira-il mie,
Maudahez ait qui si l’otrie !
Q’ainz cele foiz ne mengai d’orge
Que n’éusse mal en ma gorge ;
Mès se Renart deçà l’otroie,
Semons froment en ceste roie :
C’en est le mieuz, quar toute rien
Vit de froment, ce set-l’on bien.
Renart respont, biaux douz conpere,
Bien ait l’ame de vostre pere !
Jà n’en seroiz par moi desdiz,
Ce est le mieuz, jel’ vos pleviz.
Or pensons donc de tost semer,
J’ai oï les grues chanter
Qui nos tesmoingnent par raison
Que de semer avons saison.
Qui dont véist gens esploitier,
L’un semer et l’autre hercier,
L’autre ces coiches aüner
Et les ramilles fors porter,
Et puis après bien rasteler,
De bones genz li puet menbrer.
Tost fu la chose à droit point mise
Qui de tel gent fust entreprise.
Qant semez fu toz cist essarz
Et bien enclous de toutes parz,
Renart qui moult estoit soutis,
Sus un estoc s’estoit asis,
Dont apele ses conpaignons
Et si fu tele sa raisons.
Seignor, ceste gaaignerie
Ne sera jà à droit partie,
Tuit ensenble la cuellerons
Et ensenble la mengerons
En iver qant il gelera,
Qant viende ne trovera
A chanp n’en bois oisiaus ne beste.
Ysengrin a guré sa teste
Que jà par lui n’iert destorné :
Lors l’ont li autre créanté.
Dant Brichemers grant aléure
S’en repaira en sa pasture ;
Et Ysengrin s’en est tornez,
En la forest s’en est entrez
Nuit et jor por querre viande,
Car autre deduit ne demande ;
Et Chanteclers revint volant
A ses gelines maintenant
Qui moult l’avoient atendu,
Ne l’avoient pieça véu.
D’autre part vint Renart sa voie,
Par ces essarz va querant proie.
Si departent li conpaignon
Sanz mautalent et sanz tançon.
Qant vint en guing qu’il fait grant chaut,
Que cil blez sont créu en haut
Et espié et tuit grenu,
Et Ysengrin qu’ot poil chenu
S’en vint traiant à un mainil,
Bestes vit paistre en un cortil.
Tresaut la haie, s’en prent une,
Mès el li a fait tel rancune
Et si le va esperonnant,
La pel dou dos li va suant,
Car il ne volt laissier sa proie.
Tant a alé que toutevoie
Parvint la nuit à son recest.
Qant il fu emi la forest,
Là a sa proie deschargié,
Isnelement l’a despecié
Qu’il n’i laissa ne pel ne os.
Si fu enflez, bargis et gros
Q’à poine puet un pas passer.
Lors se conmence à porpanser
Jà ne porroit dou pas issir
Se besoing avoit de fouir.
Tout souavet ist dou bouchel,
Par une sente d’un vaucel
S’en vint tout droit à cel essart
Où il avoit la quarte part ;
Porpensa soi qu’en cel froment
Prendra-il son reposement
Tant que la chaleur soit chéue
Et la viande descréue
Dont il avoit si plain le ventre.
Ala avant, où froment entre,
Si se couche toz estandu,
Defolé l’a et abatu,
Lors conmença haut à uller.
Atant este-vos Brichemer,
Moult se merveille qui c’estoit.
Cela part est venu tout droit,
Ala avant, si l’aresna :
Por le cuer bieu que voi-ge là ?
Sire Ysengrin, par quel congié
Avez cest blé si despecié ?
Est-ce donc chose abandonée ?
Li Leus a la teste levée,
Si respondi en soupirant,
Biau conpere, venez avant
Et si véez ma maladie :
Je sui touz plains d’idropisie,
Se m’orine aviez véue
Et m’anfermeté connéue,
Vos savez tant de la fuisie,
Bien me guerriez d’idropisie.
Brichemer respont maintenant,
Jà Dame Dex mon cors n’ament
Se je sai onques rien d’orine,
Ne ne sai rien de medecine,
Ne de plaie ne de poison
Dont donne à autrui garison.
Jà par moi garison n’aurez,
Mès s’un poi iere desgéunez,
Plus en seroie un poi haitiez.
Ysengrin dist, alez, paissiez
De cel froment enz où plus dru,
Jà ne sera par moi séu
Que jà i aiez atouchié,
De moi avez-vos bon congié.
Lors en menja tant Brichemers
Que il fu gros et bien enflez,
Puis vint gesir lez Ysengrin,
Qu’il n’avoit pas ventre frarin.
Cel jor avint par avanture
Que Chanteclers queroit pasture :
Cele part vint tout droit volant,
Ysengrin a véu gisant
Et Brichemer dejoste lui ;
Moult par li vint à grant anui,
Et plus li fu de son damage,
Car il n’avoit plus d’eritage
Q’an icel essart seulement.
Il lor a dit par maltalent,
Seignor, ce n’est mie par moi
Ne par Renart, si con je croi,
Que vos avez fait cest outrage :
Onques mès jor de mon aage
Ne vi faire tel desraison.
Erré avez conme larron
Vers moi, dehaiz vo conpaignie !
Vos i avez vo foi mentie.
Se je les cos tant ne doutasse,
De traïson vos apelasse ;
Certes bien l’avez deservi
Selonc l’uevre que je voi ci.
Ysengrin l’ot, si s’en ira,
De maltalent se heriça
Qant il s’ot tenir por pargure,
Entre ses denz forment en jure,
S’il puet as mains le Coc tenir
Il li fera les denz sentir.
Ne mostra pas son mautalent,
Einz respondi senéement :
Çhantecler, fait-il, par Saint Jorge,
Je ne voil pas que nus s’amorge
A moi reter de felonie ;
Se vos avez dit voz gorgie,
Miauz vos venist par Saint Omer
Q’ancore fust à porpenser.
Bien le cuit encore merir
Se je en puis en leu venir ;
Mais or n’avez-vos de moi garde :
Maus feus et male flambe m’arde
S’onques vers vos ne vers Renart
Quis tricherie ne barat,
Desloiauté ne traïson ;
Mais por itant que conpaignon
Avons esté de cest essart,
Or en prenez vo droite part
Endementiers que il vos loist,
Ne cuidiez pas que il m’en poist.
Lors descendi li Cocs à pié,
Qui du froment a tant mengié
Q’ainz ne se pot d’ileuc partir,
Lez Ysengrin s’ala gesir.
Atant es-vos Renart batant
Parmi la sente d’un pendant ;
Ses conpaignons cuidoit noncier
Qant lor blez seroit à soier.
Qant il le vit si defoulé
Et abatu et estrepé ;
D’autre part véoit çaus gesir
L’un delez l’autre fer dormir,
Iriez en fu, maz et dolenz,
En bas a dit entre ses denz,
Se vif eschaper m’en cuidasse
Et que dou mien plus n’i laissasse
Que de mes quises les braons,
Jà océisse cez gloutons
Qui vers moi se sont perjuré.
Ysengrin a le chief levé,
Si a Renart aparcéu
Willecome bien veigne-tu,
Renart, qar vos venez séoir,
Moult vos desirroie à véoir.
Renart ne pot un mot soner,
De maltalent prist à tranbler
Et dist, je ne vos salu pas,
Sire Ysengrin, par Saint Thomas,
Ne ces autres qui ici sont
Qui domage et honte me font.
Menti m’avez de covenance
Et trespassé vostre fiance,
Fil à putains, desloiaus cous.
Renart, ce n’est mie de vous,
Dist Ysengrin, que je cous soie,
Un serement vos en feroie
Que à Hersent ma douce amie
N’éustes part ne conpaignie,
Si vos en iestes-vos vantez ;
Mès par mon chief vos i mantez,
Q’en ceste terre, Dieu merci,
N’a plus loial dame de lui,
Ele en a bien le tesmoignage ;
Mais se je vos ai fait domage,
Si en querez vostre droiture
Isnelement grant aléure.
Je ne sui pas en voz dangier
Ne ne vos ai mie si chier
Que vos en face droit n’amende,
Ne nul escondit vos en rende,
Foi que doi Noble le Lion,
Ne Maupertuis, ne fort donjon
Vers moi ne vos garentiroit
Se por la pès ne remenoit
Que li Rois m’a fait fiencier ;
Se ne li quidasse avoier,
Dou pliçon n’enportisiez mie.
Mar m’apelastes foi mentie,
Fil à putain, rous venimeus,
Mes anemis iestes mortieus,
Onques n’arez vers moi fiance ;
Foi que je doi Hersent la franche,
Je vos ferai un saut saillir
Ainz que voiez aoust venir.
Renart voit Ysengrin irié
Et de maufere encoragié ;
Si respondi asez par sen
A letare Jerusalem,
Je vos envi, sire compere,
Droit à la Cort à l’Emperere,
Vos et voz autres conpaignons,
Là nos departira raissons.
Ysengrin dist, maldahez ait
Cil qui cest envial vos lait
Por droit faire et por prendre droit
Voil-ge bien que chascuns i soit.
Einsi l’ont tuit acréanté.
Es-vos Renart d’ileus torné,
Einz puis n’ot gaires de sejor,
Ne ne fina ne nuit ne jor
Des qu’il vint à la Cort le Roi.
Là trova-il, si con je croi,
Ysengrin et sa conpaignie
Qui là defors s’estoit logie.
Onques un soul n’en salua,
Par un guichet léanz entra,
Le Roi salue hautement
Si conme cil qui sagement
Savoit bien dire sa raison.
Sire Rois, grant benéiçon
Vos doint le Fil Sainte Marie
Et toute vostre conpaignie !
Li Rois ne tint mie peresce,
Contre Renart moult tost se dresce,
Si l’a dejoste lui asis,
Car il estoit moult ses amis.
Li Rois une beche tenoit
Qui d’autre mestier ne servoit
Que de c… faire seulement,
Mais nes fesoit ne bel ne gent,
Que qant la ploie avoit fendue
De la beche grant et molue,
Si remenoit hideuse et grant
Ne jà ne reclousit nul tens,
Que demie aune à grant mesure
Ne parut bien la fandéure.
Renart moult s’en esmerveilla,
Li Rois Nobles en apela,
Demanda de cele overture
Qui si estoit laide et oscure
Por coi l’avoit faite si grant,
Qar onques mès à son vivant
N’avoit véu plaie sanz fonz,
Ne ne resanbloit mie c…
Renars, ce respondi li Rois,
N’iestes pas sages ne cortois
Qui blasmez ce que toz li monz
Sert et requiert agenoillons :
Ce est uns c… que j’ai ci fait.
Sainte Marie ! sont si lait
Tuit li autre conme cist est ?
Oïl, se Diex santé me prest,
Car tuit sont en un coing feru
Et de ceste beche fandu.
Renart respont en souriant,
Sire, je m’en terai atant,
Que nus hom ne doit-en blasmer.
Moult i porriez amender,
Sire, se vos m’en créiez.
Conment, Renart ? Vos préissiez
Un col de Cerf fort et tendant
Qui escorchiez fust maintenant,
Sel’ méissiez tout au travers
A poiz et à gluz bien aers,
Que la ploie fust departie
Et de cest cuir estroit lacie,
Ne fussent mie si hideus
L’un des pertuis conme li deus :
Cil de deseure fust li c…,
Et cil desoz li plus réonz
Fust cus par autele maniere
Que li cus doit aler derriere.
Li Rois estut, si l’esgarda,
Enz en son cuer se porpensa
Que se li c… aloit desus
Par coi desoz refust li cus
Si com Renart li enseignoit,
La chose moult amenderoit.
Renart, dist-il, tu me diz voir,
Moult par ies plains de grant savoir :
Qant que tu diz est veritez,
Mès je ne sai où fust trovez
Li cous de Cerf qui là fust mis,
Q’ainz n’en vi nul en cest païs.
Renart l’entent, moult en fu liez :
De folie vos esmaiez ;
A cele porte là defors,
En vi-ge un et grant et gros,
Pieça qu’il fust céenz entrez
Se li postiz fust desfermez.
Li Rois moult très tost se dreça
Et vers la porte s’en ala
Si l’a overte isnelement.
Brichemer, qui son plait atent,
Voit que delivre estoit l’entrée,
Se fiert léenz teste levée,
Ainz conpaignon n’i atendi.
Li Rois les trives li rendi,
Par les cornes as mains le prent,
Une grant maçue destent,
Si l’en dona parmi la teste.
Renart li rous en ot grant feste
Qant il le vit agenoillier :
Tuez, dist-il, ce pautonier
Qui onques jor de son aage
Ne vesqui sanz autrui domage ;
Pieça qu’il déust estre ocis
Se droit alat par ce païs.
Li Rois tint un coutel à pointe,
Dou col a la teste desgointe,
S’entailla fors dou chaaignon,
A travers l’a mis sor le c… :
Bien l’atacha à fort ciment,
Bien est mestier que toujors tent
Si durement que par un peu
Ne revient à un li partreu.
Renart, fait li Rois, biaus amis,
Fait ai ce que tu m’as apris :
Or sai de voir qu’en mon vivant
Ne fis chose qui vausist tant.
Qant Renart vit que au Roi pluet,
Dedenz son cuer grant joie en eut
De ce que li Rois s’acordoit
A ce que il li ensaingnoit.
Sire, bien avez esploitié
Qant vos avez estroit lacié
Le cuir à la forte corroie,
Or n’est mie si grant la roie
Ne si hideuse à esgarder ;
Por ce poez-vos bien prover
Q’ovré avez moult sagement ;
Fait avez le conmencement
Del c…, mais moult i a à faire
Encore einçois que cist c… pere.
La fouse est moult grant et parfonde,
N’a si hideuse en tot le monde.
Qui orandroit desor vanroit
Et dedanz aboesteroit,
N’i a chose ne destornast
Que de ci au fonz n’esgardast,
Se il le fonz poïst véir ;
Mès ce ne porroit avenir,
Sire, ce n’est marliere viez
Ne grant fousez ne parfont biez,
Ainz est abimes vroiement,
Car nule chose fonz n’i prent.
Je ne sai que je vos en die,
C’est li goufres de Satenie
Qui tout englout et tout reçoit ;
Mais or sachiez qui prenderoit
Une creste de Coc vermeille,
Si l’atachast en cele reille
Que vos avez ileuques mise,
Qui le cul et le c… devise,
Un poi estouperoit l’entrée,
Dont ne seroit pas si baée
Cele fouse qui toujors ovre
Por ce que nule riens nel’ cuevre :
N’i osera nus aprochier,
Car il cuideroient noier.
Li Rois Nobles entent et voit
Que Renart bien le conseilloit,
Merveilla soi moult durement
En quel maniere ne conment
Renart se puet de ce manbrer :
Car toujorz poïst-il penser
Que il de ce s’aparcéust
Se li consauz Renart ne fust.
Renart, fait-il, moult par ies sages,
Je sai de voir que mes ovrages
Amenderoit se c’iert tenu
Que tu m’as ci amentéu ;
Mais je ne sai où prenderoie
La creste, que point n’en auroie,
Ne je ne la sauroie où querre
Q’ainz ne vi Coc en ceste terre.
Renart parla qui fu senez,
Sire, se croire me volez,
De ce bon conseil vos donroi.
Hui main quant je céenz entrai
Vi Chantecler là fors logier
Desor la branche d’un pomier :
Durement coloioit céenz.
Je sai de voir à escient
Que volentiers i enterroit
Qui la porte li overroit.
Renart, va li donques ovrir,
Et se il viaut céenz venir,
Garde que n’i soit destorné,
Qu’il n’i entre à sa volenté.
Maintenant saut Renart en piez
Qui moult en fu joient et liez,
Q’adonc sot-il bien sanz faillance
Qu’auroit de Chantecler vengence.
Lou postiz va desverroillier,
Et Chantecler cuida plaidier,
Voit que la porte estoit overte,
Ne s’aparçut point de sa perte,
Laienz se fiert tout à bandon,
N’atendi per ne conpaignon.
Renart a le postis reclos
Dont primes s’aparçut li cos
Que traïz iert qant Brichemer
Vit à la terre péester ;
Autretel atendi de lui,
Bien set de voir que sanz anui
Ne partira de Cort huimais,
Car il n’auroit trives ne pais
De Renart qu’a ileuc véu
Qui tout le plait li a méu.
De morir a moult grant péur,
Ne Renart n’iert mie aséur
Qui se doute de l’eschaper :
Volentiers li alast doner
Un coup ou deus de livroison
Parmi la teste d’un baston,
Car moult doute chose volant.
Li Rois se dressa en estant,
Chantecler par la teste prent,
Vasal, fait-il, sanz jugement
Ferai de vos ma volenté
Qant je vos ai si près trové :
Si vos en poise ne me chaille.
Renart un rasouer li baille
Dont il a la creste coupée
Qui grant estoit et cretelée.
Enmi le c… asise l’a
Si com Renart li devisa ;
Et qant il l’ot ileuc assise
Par grant sen et par grant devise,
Si fu la creste grant et lée
Qu’ele estoupa toute l’entrée.
Vos qui en c… véu avez
Et de c… vos entremetez,
Savez bien que ce senefie.
Les dames l’apelent lendie
Por ce qu’ele est enmi le c…,
Encor adonc n’avoit nul non,
Mais puis li ont les dames mis
Qui le non nos en ont apris.
Moult fu li Rois Nobles haitiez
Qant li c… fu apareilliez
De la creste et du chaaignon
Qu’adonc primes senble ce c… :
Renart, dist-il, en tot le monde
Qui cercheroit à la réonde,
N’i troveroit home si sage
Conme tu es de ton aage ;
Moult me mervoil dont si grant sens
T’est venuz ne si grant porpens
Conme je t’oi ci deviser.
Sire, tout ce laissiez ester,
Qu’asez avez de ce parlé :
Un c… avez ci conmencié,
Mais il n’est mie encore faiz.
Conment, Renart, n’est-il donc faiz ?
Nanil d’assez. Di moi por coi.
Volentiers, Sire, par ma foi.
Barbe li faut ; se barbe éust,
Plus biaus et miauz séenz en fust.
Or me di donques que vaudroit
La barbe qui la li mestroit.
Sire, ele coverroit le c…
C’on voit emi tout à bandon,
Et cele creste et cel coueigne,
Sire, conment que il avaingne,
Se mes consauz en iert créuz,
La barbe iert mise par desus :
Vilain qui ne s’i connoistroit,
Por sa barbe bien cuideroit
Que ce fust d’un haut puis l’entrée
Qui d’un buison soit estoupée :
Car maintes foiz avons véu,
Qant en un puis est-on chéu,
Li païsent d’entor le haient
Que les bestes léenz ne chaient ;
Autel quideroit ci trover ;
Jà ni oseroit abiter
Cortoise gent qui ce sauront,
Jà por la barbe nel’ leront,
Einz l’en auront assez plus chier
Clers et Borjois et Chevalier.
Renart, je voi bien et entent
Que me conseilles loiaument,
Or saches bien de verité
Que ainz m’aura dou cors osté
La barbe qu’ele n’i soit mise,
En quel terre qu’ele soit prise.
Se la barbe volez avoir,
Jà ne vos covient à movoir
De ci dedanz vostre maison.
Se croire volez ma raison ;
Foi que je doi Hersent m’amie
Çaienz ainz eure de conpluie
Vos amenroi Dant Isangrin.
Je le vi séoir hui matin
Là defors devant cele porte,
Une grandime hure aporte,
Bone esteroit à cest mestier.
Diex, dist li Rois, quel conseillier !
En tot le monde n’a son per,
Va li la porte deffermer.
Volentiers, sire, dist Renarz
Qui n’iert mie lenz ne coarz :
Lors li desserre le postiz.
Ysengrin n’iert pas endormiz,
Saut sus, ne fist pas chiere morte,
Qant vit qu’overte fu la porte,
Laienz se fiert tot à eslais,
Devant le Roi vient où palais.
Qant sanz creste vit Chantecler
Et sanz chaignon vit Brichemer,
Paor ot grant, n’en dotez mie :
Par tot l’or qu’éust en Pavie
N’i vosist-il estre enbatuz,
Miauz vosist estre avec les Turs
Qu’avec Renart son anemi.
Renart, fait-il, tu m’as traï
Et toz ces autres que ci voi ;
S’or ne dotasse autre que toi,
Foi que je doi Dame Hersent,
Il alast jà tout autrement.
Ta traïson ferai paroir,
Ce vos lairai-ge bien savoir.
Par ma teste, Dant Ysengrin,
Vos parlerez d’autre Martin
Ainçois que vos vos eschapoiz :
Cele hure que vos portez
Nos lairez-vos au mains en gage.
Renart, j’auroie grant domage
Se je la hure ici laissoie,
Mais à Hersent ne parleroie ;
Bien quideroit, jel’ vos plevis,
Qu’à larrecin fusse repris.
Sire Ysengrin, de vostre honte
Por le cuer bieu à moi que monte ?
Se vos estiez vis escorchiez
Dès les oroilles jusqu’as piez,
N’esteroit mie asez vangance,
Tant m’avez fait duel et pesence :
Ne sai beste fors que Brun l’Ors
Que je tant hace conme vos,
Mais vos hai-ge de fine mort.
Avoi ! Renart, vos avez tort,
Ai-ge dont riens vers vos mespris ?
Je cuidoie estre vostre amis.
Mes amis ! Diex, et vos conment ?
Par vos perdi-ge mon froment
Où j’avoie la quarte jarbe ;
Mais par iceste moie barbe
J’en aurai encor hui tot droit,
Ou mal vos sache ou bien vos poit.
Par Saint Romacle où ainz ne fui,
Renart, se j’ai par vos anui
Et je vos puis tenir çà fors,
Je pranderai de vostre cors
Tel vengence qui grevera
Celui qui miauz vos amera.
Moult par iestes outrecuidiez,
Isengrin, qui me menaciez
Devant le Roi enz en sa Cort,
Je cuit qu’autre bien vos acort.
Non, dist le Roi, par Saint Senson
Ainz que il part de ma maison
Laira-il moult de son genglois :
Ce n’est pas la premiere foiz
Qu’il s’est ventez et aatiz
De faire honte à mes amis.
A cest mot saut li Rois en piez,
Vers Ysengrin vint touz iriez,
Si le saicha par les oreilles
Si que totes les fist vermeilles ;
Enpaint et fiert et sache et boute,
La couleur li fait tantost trouble,
Puis le prent par le cribunel,
La hure avec toute la pel
Li a de la teste sevrée,
Et entor le c… si plantée
Q’ainz puis ne la pot nus oster
Por engin c’on péust trover :
Ne gluz ne chauz ne poilec…
N’i valent mie troi boston,
Melléure n’autre pelains
Que metre i vuelent ces putains
Ne lor vaut riens, que touz jorz croit
Plus dru après qu’avant n’estoit.
Seignor, einsi fu atornez
Li c… com vos dire m’oez,
Par le conseil Renart le sage.
Bien se venga dou grant domage
Que li firent si moitaier,
Moult lor en fist grant encombrier
A toz troi : premier Brichemer
Et Ysengrin et Chantecler.
Renart al estorer le c…
Brichemer mist le chaaignon,
Et la landie i mist li Cos ;
La barbe qui croist par defors,
Qui fu mise au daerains
I mist Ysengrin li forains
Qui toz en fu déaornez,
Jà ne sera mès onorez.
Li Rois regardoit son ovrage,
Moult li plesoit en son corage,
C’onques nule chose n’i mist
Que par raison ne covenist.
Sanz plus metre ne riens oster
Ici puis-ge bien reposer
Et laissier dou conte don c…,
Nus n’en doit dire se bien non,
Qu’el monde n’a si douce rien
Com est li c…, ce set-l’en bien.
Ici parfine la chançon
Conme Renart parfist le c…