Le Roman du Renart - D. M. Méon — 1826/30
Comment Renart et Tiberz li Chaz chanterent
vespres et matines, par Richart de Lison.
Oez une novele estoire
Qui bien devroit estre en mémoire ;
Lonc tens a esté adirée,
Mès or l’a uns mestres trovée
Qui l’a translatée en romanz,
Oez comment je la comanz.
Ce fu en mai au tens novel
Que Renart tint son fil Rovel
Sor ses jenouz à un matin :
Li enfès ploroit de grant fin,
Por ce que n’avoit que mengier.
Renart le prant à apaier,
Si li a dit : filz cuers de roi,
Ge vois où bois de Veneroi
Porchacier à ton cors viande.
Atant se met parmi la lande
Et s’en entre en la voie errant
Et moult sovent vet coloiant
Savoir s’il poïst acrochier
Qui à son filz éust mestier,
Ou coc, ou geline ou oison,
Mestier en auroit en meson
Que il n’i a point de cuisine,
Et sa feme gist de gesine,
S’est moult ses hostez desgarniz.
Atant li sont devant sailliz
Cinc que jelines, que chapons,
Et Renart se mist el trotons
Tot droit vers elz grant aléure
Tant qu’il vit venir l’ambléure
Huon l’Abé et sa mesniée.
Renart maudit la chevauchiée
Qui sor lui a fet itel taille,
Fuiant s’en torne, si baaille,
Qu’il n’i ose plus demorer
Por les levriers qu’il voit mener.
Vers la forest s’en va corant
Et Huon l’Abé devorant :
Ahi ! fet-il, Huon l’Abé,
Mal jur vos soit hui ajorné !
Moult m’as hui fet grant destorbier,
Qu’entre ma boce et ma cuillier
As hui proie sor moi sesie ;
Maudite soit la toue vie !
Que trop me par as hui grevé,
G’en éusse jà un levé
Se ne fusses sitost venu ;
Et qant ne m’as apercéù
Ge m’en irai que bien que mal,
Meuz m’en vient partir par egal
Trestot sauz perte et sanz mehaing,
Que recovrer morlel gaaing.
Atant s’en vet toz eslessiez
Moult est dolanz et corochiez
De ce qu’il n’a riens conquesté
Q’à son ostel éust porté
Par sa mesnie desjuner.
Tote jur ne fina d’errer
Jusqu’à tant que vint vers midi
Que il garda, si a coisi
Tybert le Chat qui se gisoit
Sor une roche et rostissoit
Sa pance encontre le soleil.
Ce dist Renart, moult me merveil
Se c’est Tybert qui là s’acoste.
Oïl voir, ce sui-ge, baus hoste ;
Et por ce que ci estes-vos,
Ge me voil desresnier o vos,
Ce dist Renart, et reposer,
Que ge ne finai hui d’aler.
Si alez dormir en un angle,
N’ai que fere de vostre jangle
Ne de vos falordes oïr :
Fuiez, si me lessiez dormir,
Ge n’ai or de noise mestier,
Fuiez de ci, alez billier.
Avoi, sire Tybert li Chaz,
Por ce s’ore avez vos degraz
Et se vostre pance est or plaine,
Ne durra mie la semaine
Cist orgoulz que vos ore avez ;
Por ce s’ore estes saolez,
Si me faites chiere lovine,
Ge conterai à Hermeline
La foi et la reconissance
Dont vos estes et la provance,
Et ge l’ai en meson lessiée,
Que de novel est acochiée
D’un moult bel filz et d’une fille.
Par foi n’i donroie une bille,
Ce dit Tybert, en els n’en toi.
Avoi ! sire Tybert, par foi
Ge n’en puis mès se me dement,
Que desgarniz sui malement ;
Ge ne laissai hui à l’ostel
Ne pain, ne vin, ne car, ne sel
Dont ele se poïst disner.
Si m’avint hui à l’encontrer
Huon l’Abé, un vis Déable.
Renart doit-il donc dire fable,
Qui jéune et fet penitance ?
Nenil, mès estre en repentance,
Si doit aler paisiblement
Ne mie jangler à la gent
Qu’il trovera par les cemins,
Ainz se doit tenir toz enclins
Qant il vet en pelerinage,
Ne doit mie demener rage.
Avoi ! Tybert, or est assez,
N’estes-vos mie encor lassez,
Fet soi Renart, de me gaber ?
Jà nel’ vos déussiez penser :
Por ce se je sui or frarins,
Assez set Deu quex pelerins
Nus somes, Renart li a dit.
Et Tybert dist, se Dex t’aït,
Renart, di moi où est l’Iglise
Où tu vas oïr le servise :
Jà ne sez-tu pas messe entendre.
Ge t’ai véu carité prendre
Deus foiz sanz aler au mostier ;
Moult ies religieus dès ier
En petit d’ore devenuz,
Conment dont t’est ice venuz ?
Par Deu, Tybert, vos avez tort,
Tex est febles qui devient fort.
Tybert, ce dist Renart, merci,
Au besoing voit-on son ami ;
Mès faites le conme cortois,
Venez o moi en cel defois
El plaïssié Guillaume Bacon
Savoir se jà i troveron
Aucune chose à oez ma feme.
Non ferai, dist Tybert, par m’ame,
N’ai or mestier de traveillier.
Gel’ di por vos esbanoier
Et por mei feire conpaingnie,
Si ferez moult grant cortoisie
Se vos venez o moi esbatre.
Voire mès se tu me fez batre
Par ton engin et fere honte.
Avoi ! Tybert, ice que monte ?
Par la foi que je doi Rovel
Ne vodroie por le mantel
Qui orendroit au col me pent,
Qu’en vos i forféist noient,
Ne que éussiez se bien non
Tant con serion conpaingnon ;
Et puis dist en bas belement,
Tybert, Dex t’envoit marement,
Que moult m’auras hui ramponé,
Mès il t’ert bien gerredoné
Se je puis et engin i vaut.
Et après a parlé plus haut :
Sire Tybert, Renart a dit,
Ge vos aim moult, se Dex m’aït.
Ce dit Tybert, bien vos en croi.
Atant sont essu del moloi
Vers le Vernoi tuit eslessié,
Si se ferent enz el plessié
Loing del chastel desoz la vile,
Et Renart qui moult sot de gile,
Avoit Tybert mis à raison.
Tybert, par ta confession,
Fet soi Renart, di moi verté,
S’or venoient ci aroté
Tuit li chen Guillaume Bacon,
Se Dex te face veir pardon,
Quar me di ore que feroie,
Fuiroi mès tu, si me lairoies ?
Ainz m’en monteroie lasus,
Ce dist Tybert, n’i auroit plus,
Si esgarderoie lor force,
Se je trovoie cruez ou fosse
Où ge me péusse mucier,
Ses leroie outre chevauchier,
Que trop par est ma pance plaine,
Au core me faudroit l’alaine.
Et vos, Renart, que feriez ?
Bien sai que vos fuïriez,
Si me leriez convenir.
Atant voient avant venir
Guillaume Bacon o ses chiens.
Ici ne voi-ge nul des miens,
Sire Tybert, ce dist Renarz,
Or face chascuns de ses arz
Et tot au miex que il porra,
Que Renart plus n’i demorra.
Sire Tybert, or del monter,
Ne vos tiengne pas de gaber,
N’estes or mie sor la roche
Où ore me dist vostre boche
Les foles paroles cuisanz.
Là parlerez avec ces genz,
Il vos voudront jà decroer,
Si conmenciez à sarmoner ;
Se vos lor i tréez sarmon
Vos vos i tendrez à bricon,
Que jà ne monterez si haut
Qu’à la terre de l’eschafaut
Ne vos metent de lor bastons,
De lor arz et de lor bojons,
Et se vos estes entrepris,
Jà par moi ne serez requis
N’il n’en prendront jà raençon
S’il n’ont vostre gris peliçon.
Lors se mist Renart au travers,
Et Tybert s’est au chesne aers,
Si est montez sanz demorance,
Que au core n’avoit fiance,
Trop se sentoit pesanz et lenz.
Sovent disoit entre ses denz
Sa credo et sa paternostre :
Ha ! Dex, fait se il, pere nostre,
Abandonez à totes genz,
Garissiez mes piez et mes denz
Et ma santé et ma proesce,
Que je n’i muire par perece,
Mon chief, mes euz et ma feture,
Et si donez male aventure
Renart qui çà m’a amené.
Atant ont Renart escrié
Li braconnier qui l’ont véu,
Et li brachet sont esméu,
Si vienent soz le chesne droit
Où Dant Tybert li Chaz estoit.
Iloc conmencent à glatir,
Ne s’en veulent por riens partir
Devant que tuit li poignéor
Sont venu et li coréor.
Merveillent soi que li chien ont
Tant qu’il gardent el chesne amont,
Si ont choisi Tybert li Chat.
S’or ne se chevist par barat
Jà i porra tost escoter,
Quar il conmencent à giter
Que pieres, que bastons en haut,
Et il lor guenchist et tressaut,
Si li est bien de ce venu
Que il n’i ont nul arc éu.
Mès o les bastons en gitant
Le font sovent saillir avant,
Mès il ne l’en est à néent,
Ainz les tient à mavaise gent :
Ne prise rien tot lor ruer,
Il ne s’en fesoit que gaber,
Que jà par eulz n’éust nul mal
Qant uns prestres vint à cheval
Qui ses livres ot fet troser
Por ce que il devoit chanter
A Blaangni por le Provoire
Qui estoit alez à la foire.
Ne savoit d’autres livres rien,
N’i conéust ne mal ne bien ;
Ce qu’il en set, c’est par autrui,
Por ce les portoit avec lui.
Le Prestre del Bruel avoit non.
Cele part vint à esperon
Où vit cels qui gitent au chat.
Tot prestement sor euls s’enbat ;
Cil li dient, se Dex vos voie,
Danz Prestres, où en ert la voie ?
A Blaangni[1] voloie aler,
Mès a vos vodrai demorer
Tant que cist Chaz soit abatuz.
Lors est li Prestres descenduz
Tot meintenant, et met le frein
Desor le col de son polein,
Sel’ laisse tot sanz atachier.
Bastons aquelt moult à trenchier,
Et Tybert li Chaz le regarde :
Ha ! Prestres, male flambe t’arde !
Ce dist Tybert, de ton venir
Me poïsse-ge bien sofrir.
Atant vient li Prestres au chesne,
Et Danz Tybers li Chaz l’aresne :
Sire Prestre, que me volez ?
Sachiez bien que pas ne venez
Vers moi à raison ne à droit
Si conme Prestres fere doit
A doner moi confession ;
Jà ne sui-je mie laron
Qu’en doie asallir ne tuer.
Je me volroie confesser
Se vos eussiez vostre estole,
Mès vostre feme n’est pas fole,
Qu’ele en a lié son véel ;
Mès foi que doi Saint Israel
Vos faites moult grant vileinie
Qui venez par tele estoutie
Vers moi qu’en velt ici destruire :
Il vos porroit encor bien nuire.
Or déussiez avoir proié
Icil qui m’ont ci asegé
Que il se tressissent ariere
Tant qu’éussiez à cest pechiere
Privéement un poi parlé
Et que m’éussiez confessé.
A cest mot li Prestres pris a
Un des bastons que il trencha,
Si fiert Tybert desor l’eschine
Que sor une branche l’encline.
Avoi ! Dant Prestre, dit Tybert,
Feru m’avez à descovert,
Vos n’estes mie leax Prestre :
Pastor d’ames déussiez estre,
Mès vos estes li plus rapiax
Qui fet à tot son pooir max.
Se fussiez pastor ovium,
Ne me féissiez se bien non.
Pou entendez de l’Escriture,
Que Dex vos doinst male aventure !
Qui à Prestre vos ordena
En sa vie tant ne fola.
Danz Prestres, fuiez-vos de ci,
Par vos sera Dex mal servi.
Dahait ait qui poor en a !
Atant li Prestres regita,
Et Tybert moult bien li guenchist
Et puis après itant li dist :
Por quoi me volez-vos abatre ?
Jà vois-je jus ma corpe batre,
Il a en vos mal confessor.
Et li Prestre rejete encor
Un des bastons qui iert chéuz,
Et Tybert est aval venuz
De branche en branche belement.
Apensez s’est d’un hardement,
S’il pooit sallir el cheval
Au Prestre qui tant li fet mal,
Qui ses livres avoit trossez,
Lors auroit de ses bons assez ;
Aler l’en feroit à ses piez.
Tant par est Tybert abessiez
Que tuit quident qu’à terre voise.
Lor chiens huient et font grant noise
Qu’il quident qu’il voille descendre,
Mès il voudra à el entendre.
Tant se tret envers le polein,
Qu’il ot bien véu que le frein
Ot sor le col tot à delivre ;
Li Prestres s’en tendra por ivre
De ce qu’il n’estoit atachiez,
Et Tybert s’est tant aprochiez
Et tant tret envers le roncin,
Et li Provoire Malvoisin
Son chien apele : or çà, or çà ;
Jà cestui ne eschapera,
Fet soi li Prestres, gel’ vos di,
Puis qu’à la pel l’aura sesi :
Or l’abaton entre les chiens,
Si verron que fera li miens.
Lors ont tuit de rechief hué,
Et Tybert s’est tant avalé
Que il ruerent lor bastons,
Qu’il sailli entre les arçons
Del polein qui fu effréez.
Les granz galoz s’en est tornez
Tot le chemin de Blaangnié ;
Et li braconier tuit irié
Por le chat qu’il orent perdu,
Ont le Provoire bien batu,
Puis apelent lor chiens batant,
Et li Prestres s’en vet plorant
Après Tybert tot le chemin,
Toz seus fors que de Malvoisin
Son chien qui après vait trotant,
Et Tybert vet esperonant
Et galope et retient son frein :
Moult par siet bien sor le polein.
Tybert le Prestre regardant
Qui après lui vient tressuant,
Avoi ! Dant Prestre, dit Tybert,
Tex cuide gaaignier qui pert,
Et autre enborse le gaain.
Mal dol li sorde et mal mehain
De son chatel et de son cors
A Provoire quant il vet fors
Par le mestier Dam le Deu fere
Qui velt les bestes contrefere !
Dahez ait Prestre venéor !
Il doit vivre d’autre labor,
Puis qu’il est à prestre sacrez
Et tant fet qu’il est ordenez,
Del mestier Dam le Dieu doit vivre.
Et vos, Danz Prestres, estiez ivre
Qui lessiez vostre mestier
Por aller un chat dechacier,
Mès c’ert por metre el peliçon
A votre putain de meson.
Vos ne féistes pas que sages,
Or en est vostre li damages
Et la perte et la meschéance.
Et je sui en ferme créance
S’irai mès oan el mostier,
Si ferai por vos le mestier.
Moult vos en est bien avenu,
Tot vostre sen avez perdu,
Vos livres avez adirez,
Moult estes or maléurez,
Ne savez mès plus une letre,
D’el vos convendra entremetre
Que de cures d’ames tenir.
Bien vos devoit mesavenir
Qui derere aviez trossez
Et à vostre dos adossez
Les sainz livres Nostre Seignor
Dont en le sert et nuit et jor ;
Mès por ice le fesiez
Qu’en autre rien ne saviez.
Vos n’estes pas de mon savoir,
Quar je cuit autretant savoir
En trestot le pior qui soit,
Conme en ceus que j’ai orendroit.
Ahi ! Tybert, ce dist li Prestres,
Beax dous amis et beax dous mestres,
Rent moi mes livres, je t’afi
Contendrai moi à ta merci,
Et si me rent mon palefroi.
Or n’en soiez jà en esfroi,
Ce dit Tybert, par Saint Martin
Anchois m’arez dit en latin
Con l’en dit fable, se volez.
Faba, dist li Prestre, or l’avez.
Ce dit Tybert, ce ne pot estre,
Faba c’est feve sanz areste,
Et fabula ici est fable.
Alez, fox Prestres, au Déable
Qui vos puisse le col brisier,
Si apernez autre mestier,
Que la premiere question
M’avez solu conme bricon.
Mès dites moi ici endroit
Se savez par où chievre poist.
Par le cul quant il est overt.
Mès par la corne, dit Tybert.
Or me respondez de gramaire,
Savez rien de celui afere
Que li maistres fait as clerçons
Quant il lor pernent les leçons ?
Par foi j’en soel savoir assez.
Bien vos en croi, mès trop venez
Si près de moi que il m’ennuie ;
Mès savez-vos nule alleluie
Ne douz chant por moi endormir ?
Vos me vodriez or tenir
Parmi les resnes de cest frein,
Lessier m’estovroit li polein
Et trestote la trosséure ;
Mès Dex li doinst male aventure
Qui le vos en verra mener !
Lors aquelt à esperoner
Tant que de lui pert la véue.
Lors a Tybert grant joie éue,
Et le Prestre tristre et dolens
Va après demandant as gens
Qu’il encontre parmi la voie,
Dites, fait-il, se Dex vos voie,
Véistes-vos par ci mener
Un cheval et esperoner
Qui or se departi de nous ?
Cist Prestres qui ci vient toz soulz,
Font soi cil à qui il parole,
Bien pot estre que il afole
Ou il a espoir trop béu.
Seignor, dist-il, en m’a tolu
Mon cheval à trestoz mes livres.
Oez, font-il, est-il bien ivres,
Dant Prestre, il est la feste as fox
Si fera-on demain des chox
Et grant departie à Baieus,
Alez i, si verrez les jeus.
Li Prestre ot qu’il le vont gabant,
Si s’en est retornez atant,
Il et son chien droit en meson.
Et Tybert s’en vait le troton
Et les galoz et l’anbléure
Tant qu’il garde par aventure
Lez une haie entre deus blez,
Si voit Renart qui fu lassez
Tant par avoit le jor coru ;
Et de la fein qu’il ot éu
Si n’avoit en li qu’aïrer.
Et Tybert prist à devaler
Le val et Renart l’aperçoit.
Trois foiz se seigne quant le voit,
Moult le regarde apertement,
N’ose pas croire fermement
Que ce fust Tybert qu’il voit là.
Et Tybert qui bien véu l’a,
Ne fait pas semblant qu’il le voie,
Ainz chevauche moult bel sa voie.
Einsi s’en vait moult cointement,
Ses piez regarde moult sovent
Et puis son cors de chief en chief.
Un chapel ot mis en son chief
Qu’ert d’esglantier et de cerfeil,
Et Renart regarde à un œil,
Bien voit tote sa contenance,
Et dit Renart : par la membrance,
Par les plaies, par la mort beu
Ne sai où sui ne en quel leu,
Ne sai que c’est que je voi là,
Se c’est Tybert, qui l’adoba ?
Il me resemble chevalier,
Vois por le cuer beu mès cloistrier,
De livres porte grant plenté,
Il est esléuz à Abé.
Hé ! Diex, et de quele Abaïe ?
De Clervaus ne seroit-ce mie ?
Nenil, qar il i a Abé.
Moult sui honis par le cuer bé,
Que je n’en ose à lui parler,
Il me feroit tost afoler
Et laidir à son palefroi.
Il le meine par grant effroi,
Ce soit par sa male aventure !
Si sera-ce, g’i metrai cure
S’à lui me puis acompaigner,
Mès nel’ sai conment aresner.
Gel’ corroçai jà hui matin,
Por ce ne m’os en son chemin
Metre, n’à lui abandoner.
Et Tybert conmence à chanter
Une chançon tote de Rome,
Onques si bele n’oï home,
Et quant lessié ot à chanter,
Si conmença à regreter
Renart qui hui main l’ot lessié.
Dex ! fet-il, tant sui corrocié
De Renart que ne puis trover ;
Se ge le poïsse encontrer,
Moult le méisse or en grant pès.
Mes escuiers fust oan mès.
Lors se raquelt à esbagir,
Son cheval fet avant saillir
Et dist, qu’est Renart devenuz ?
Ce poise moi qu’il est perduz.
Et Renart qui bien l’ot oï
Est maintenant en piez salli
Et dist : ge ne sui pas perduz,
Sire, que bien soiez venuz
Et que benéoit jor aiez !
Et Tybert s’est lors afichiez
Sor les estriers, si le regarde,
Et de parler un pou se tarde ;
Et Renart est avant venuz
Et li dist, sire, bons saluz
Et bon jor vos soit hui donez !
A qui est-ce que vos parlez,
Fet soi Tybert, à vos que tient ?
Sire, je di que Dex vos maint
Et doint joie et bone aventure.
De vostre salu n’ai-ge cure,
Fet soi Tybert, ce que ge voil
Ai-ge trestot, et si me doil
De Renart que ne puis trover.
Ge le voloie o moi mener
A Saint Martin, à Blaangnié
Que g’ai de li moult grant pitié,
Et g’i vois la messe chanter,
L’Iglise m’estuet deporter
Jusqu’à huit jors por le Provoire
Qui est alez à une foire
A Dol, ce dient, en Bretaingne,
Jà Dex ne doint que il reviengne !
Robe va querre à sa putein.
Si m’estuet la chanter demein
Et ge n’ai clerc qui me respoingne.
Ge ferai bien ceste besoingne,
Le mestier sai de chief en chief,
Bien vos aiderai, par mon chief,
Fet soi Renart, se vos volez.
Ge sui celui que vos querez,
Renart vostre bon conpaingnon.
Va ta voie, fet-il, bricon !
Tu es Renart ? Voire par foi.
Mentiroies en tu ta foi ?
Oïl voir, ce a dit Renart.
Va ta voie, fet-il, musart,
Renart ne se feroit véoir
Devant moi por nul estovoir,
Quar il m’a hui moult ramproné
Et moult corocié et gabé.
Jà n’i ot se paroles non.
Si ot, il fist grant mesprison
Que illec me lessa par moi
Où iere alez en bone foi
O li esbatre en conpaignie,
Il ne fist mie cortoisie.
Mès or me di, se Dex te gart,
Se tu véis anuit Renart.
Nenil certes jor de ma vie,
Ge ne vos en mentisse mie,
Ce li a Renart respondu ;
Mès, Tybert, vos ai-ge véu ?
Avez, oïl, par le cuer bé
Con m’a or cil vileins gabé !
Gabé ? De quoi ? Encor i pert,
Dont n’estes-vos mie Tybert.
Oïl voir. Et je Renart sui,
A ces enseignes que je hui
Vos trovai sor la roche en haut
Où vos vos rotissiez au chaut.
Tybert respont : tu as voir dit,
Mès or me di, se Dex t’aït,
Se ge t’enmoine avocques moi,
Seras-me tu de bone foi ?
Certes oïl, ce dit Renart ;
Mès or me dites par quel art
Vos avez tel harnois conquis.
Jà me cuidoient avoir pris
Li garçon Guillaume Bacon
Quant un Prestres à esperon
I vint sor son cheval amblant,
Et il descendi meintenant
Et cuilli ne sai quanz bastons,
Si m’asailli conme dragons,
Et ge vi en pès le cheval
Desoz l’arbre tot à estal :
Conmençai moi à devaler,
Et il me pristrent à huer
Lor chiens, qu’il me voloient prendre,
Mès je n’oi cure de descendre,
Ainz sailli entre les arçons,
Et il con uns esmerillons
S’en va à tot moi meintenant.
Quant je m’aloie regardant,
Vi le Prestre dolant et las
Qui me sivoit plus que le pas ;
Toz lez oz li orent quassez
Por ce que lor ere eschapez.
Après moi vint, si m’aresna
Et son polein me demanda ;
Et ge si le questionai,
De gramaire li demandai,
De soffime et de question,
Ne me sot respondre un boton.
Qant ge l’oi fait dou tot conclus
Ge m’en parti, il n’i ot plus,
Et sil’ rovai aler aprendre
Et à autre mestier entendre.
Sire Tybert, ce dit Renart,
S’ore estoient tuit li set art
En ces livres que vos avez,
Bien vos auroit Dex asenez,
Escoles porriez tenir
Et riches homes devenir.
Par foi, dist Tybert, ge ne sai,
Que ainz es livres n’esgardai.
Non ? dist Renart, or i gardons,
Descendez et si destrossons.
Non ferai, quart il est trop tart,
Mès alez-en, fet-il, Renart,
Bone aléure à Blaaingnié.
Conment ! iroie-ge à pié ?
Bien, si vendrez encontre moi,
Si recevrez mon palefroi
Et as genz irez demander
S’il i a cors à enterrer,
Ne nul enfant à bautizier,
Que tost l’aportent au mostier,
Et ge i serai orendroit.
Renart dit qu’aler ne porroit,
Que trop a les piez depeciez,
Si est lassez et traveilliez,
Ne manga hui, ne puet aler
S’il nel’ laissoit un pou monter.
Montez, fet Tybert, vistement.
Atant vet Renart, si se prent,
Si est montez derere lui :
Il li dira par tens anui.
Or sont li baron à cheval,
Si chevaucherent contreval,
Si s’en fuient grant aléure
Parmi le val d’une cuture,
Tybert devant, Renart derriere
Qui se porpense en quel maniere
Il metroit Tybert à raison.
Tybert, par ta confession
Di que de cest cheval feras
Donras le tu, ou le vendras ?
Ge le vendrai, Tybert a dit.
Et por conbien, se Dex t’aït,
Le donras-tu ? Va, di le moi.
Gel’ te dirai, et ge por coi ?
Voldroies le tu acheter ?
Oïl, se tu le vels doner
A raison et à droit esgart ;
Por conbien aurai-ge ta part,
Fet soi Renart ? Or di reison,
A-il dont nul part se moi non ?
Ce dit Renart, gel’ gaaingnai,
Et je por quoi n’i partirai,
Sire Tybert, ce dit Renart ?
Par foi tu n’i auras jà part.
Fet soi Renart, male ne bone ?
Si aurai se raison le done,
Et dit Renart, par le cuer bé,
Ne sui-ge autresi monté
Con vos estes, sire Tybert ?
Trop est vostre barat apert
Qui me volez de conpaignie
Giter par vostre tricherie ;
Et es livres et el cheval
Partirai-ge tot par igal
Et mot à mot et foil à foil.
Male gote te crieve l’oil,
Diable Renart ! dont es-tu ivres ?
Que feroies-tu de mes livres ?
Jà n’i sez-tu ne c’une chievre :
Si te puisse tornoier fievre !
Con rien n’i sai, ce dit Renarz,
Je sai plus de toi les set arz.
Sez-tu riens de dialectique ?
Oïl, tote quique liquique
Respondras moi se ge t’opos.
Oïl, par derere mon dos.
Or entent dont à l’argument,
Ge di pain d’orge est de froment,
Ge di pain de froment est d’orge.
Male aventure ait ainz ta gorge !
Que pain d’orge soit de froment.
Tu l’as entendu malement,
Fet soi Tybert, ce n’i a mie :
Tu sez trop pou d’astronomie,
Se l’argument te puis prover,
Lairas m’en mon cheval mener ?
Oïl, et se je puis faillir,
Dont ne m’i lairas-tu partir.
Oïl voirs, lors i partiras :
Or orrai dont que tu diras.
Ge dirai dont, por estre quite,
Que cil n’abat pas qui ne luite.
Or entent dont à la provance,
Si apareille ta faillance.
Je pos cest point que de froment
Fet-en un pain tant solement,
N’i a orge ne autre blé.
Cel point m’avoies-tu enblé,
Ce dist Renart, or di avant,
Beax amis, et puis si di tant
Que l’en fet d’orge un autre pain
Trestot pur et sanz autre grain :
Sont-ce deus pains ? Que t’est avis ?
Nenil certes, tu as mespris,
Il ne puet estre que un pain.
Dont n’est-il qu’un filz à putain,
Fet Tybert, en trestot le monde.
Tu menz, mès tu Dex te confonde !
Ce dit Tybert apertement,
Parmi la véue qui ment
Decéus es par ta faillance,
Tu as fet trop povre semblance,
Dont ne sera que unes mains,
Se de dis blez n’i a dis pains
Fere de chascun et par soi,
Sont-ce dis par la toe foi.
Or garde con tu sez les arz,
Va ta voie, ce dit Renarz,
Dont n’est blez blez, dont n’est pain pain ?
Oïl, et vos fil à putain,
Fet Tybert, par ceste raison
N’i a nule desfension,
Mès entr’aus a grant diferance.
Avoi ! vos avez mengié tence,
Fet Renart, se volez tencier
Et mellée à moi conmencier.
Non faz, mès vos n’estes pas sage,
Et itel gré a chien qui nage.
Qant je vos ai de bone foi
Monté desor mon palefroi,
A chalengier le conmençastes :
Meintenant que vos i montastes
Vos ne féistes pas savoir,
Si ne conquiert-om pas avoir.
Ce dist Renart par son gengler,
Bien le poez laissier ester,
Fet soi Renart, ge me jooie ;
Puis dist en bas, s’en ceste voie,
Ne vos faz anui et pesance,
Dont sa-ge poi de nigromance,
Se anchois que nos departons
N’est ramendez cist peliçons,
Jà Dex ne me loist jor por vivre.
Tant ont chevauchié à delivre
Et tant ont entr’eus desputé
Qu’il sont en Blaaingni entré :
Desoz la vile enmi les prez
Si ont lor livres destrossez,
Lor cheval laissierent aler
A l’erbe pestre et saouler,
Si s’en tornent vers le mostier.
Près estoit jà de l’anuitier,
Si s’en erent alez les gens :
Al mostier vienent, s’entrent ens,
Les lampes furent alumées
Et les genz s’en furent alées.
Ce dit Renart, or conmenciez,
Par Deu trop vos estes targiez,
Sans vespres oïr s’en vont tuit.
Sire Renart, ne vos anuit,
Il lor avesprera assez ;
Mès ces chandeles alumez,
Ce dit Tybert, que le servise
Doit l’en dire à treit en l’Iglise
Et fere le mostier moult bel.
Ovrez les huis de cest chancel,
Nos i verrons encor bien cler ;
As antienes n’estuet torner,
Et vos reprenez cel sautier,
Si tornez à vostre mestier,
A ces versez et à ces saumes.
Et Renart aquelt à ses paumes
Plus menu ces fuels à torner
Que vos nes puissiez or conter.
Qant à lor mestier sont torné,
Si se sont ambedui levé
Tybert vesti le sorpeliz,
Après est vers l’autel sailliz :
Tybert son chapelez osta,
En tel maniere conmença.
Domine, labia mea…
Si t’aït Dex, con ce i a ?
Ce li a respondu Renart,
Ce sont matines, fol musart,
Que tu nos velz por vespres dire.
Et Tybert conmença à rire,
Si li a dit, que i a dont ?
Deus in adjutorium,
Fet Renart, el conmencement
Doit-en dire premierement,
Dant Tybert, ou estes-vos ivres,
Ou riens ne savez dans ces livres.
Ahi ! que ne vos ont oï
Ou l’Arceprestre ou Dant Davi,
Ou li Prestre de la folie,
Quidiez qu’il ne risissent mie
S’il vos oïssent autresi
Con gie et vos l’avons oï
En tel maniere conmencier ?
Fox, jel’ fis por toi essaier,
Ge ne quidoie pas por voir
Que tu fusses de tel savoir ;
Mès or t’ai-ge bien esprové.
Se remeindre velz cest esté
En ceste vile et séjorner,
Moult te ferai garbes doner.
Jà est-ce bien, ce dit Renart,
Mès dites vespres, qu’il est tart.
Lors aplaigne Tybert son chief,
Si reconmence de rechief,
Deus in adjutorium dit,
Et Renart les antienes lit.
Si ont chanté salmes et vers
Moult hautement à deus envers,
Les antienes mout noblement :
Le chapistre dist simplement
Sire Tybert, et Dant Renart
Redit le verset à sa part.
Si ont chanté trestout à ligne,
Tot mot à mot et tot à ligne :
Sire Renart le verset dist
Et Dant Tybert les responz fist.
L’antienne del Magnificaz
Cele dit Dant Tybers li Chaz,
Et Renart l’a bien entoné
Et gloriosement chanté.
Après chantent, si con moi semble,
Lor antienne ambedui ensemble ;
Tybert a dit après le vers,
Renart li respont à envers,
Puis dit Tybert en s’oroison
Moult bel Dominus vobiscum.
Renart li respont hautement,
L’oroison dist apertement
Tybert et le per omnia,
Devant l’autel s’agenoilla,
Et Renart respondi amen,
Puis li a dit, levez-vos en
Et si alez fermer ces huis,
Je dirai benedicamus.
Atant a Renart envaï
Un benedicamus farsi
A orgue, à treble et à deschant,
Qu’il n’i a home si vaillant
El monde, ne si mesaisié
Qui n’en éust moult grant pitié
S’il oïst Renart, que de lui
Tot le mont repéust d’ennui
Renart de son seri chanter.
Deus lives péussiez aler
Ainz que il l’éust parfiné.
Et Tybert si a l’uis fermé
Qui moult estoit de chanter las,
Si dist le Deo gratias.
Après ont conplie chantée,
Et quant l’orent tote finée
Si prist l’un l’autre à aresnier,
Et Renart a parlé premier.
Sire Tybert, a dit Renart,
Je voldroie savoir quel part
Ge aurai de tot le gaaing,
S’en ceste vile o vos remaing,
De la disme de ces porceaux,
De ces brebis et de ces veax,
De ces pocins, de ces oisons,
Dites conment les partirons,
Des oblacions et des lès,
Dites et devisez en pès
Conbien j’en aurai à ma part.
Vos en aurez trestot le qart,
Ce dit Tybert, s’en le me loe,
Et Renart li a fet la moe.
Conment, fait-il, por le cuer bé
N’ai-ge dont aussi bien chanté
Anuit à vespres conme vous,
Et autant sui religious
Et nez et prodom de ma main.
Serai-ge dont filz à putain
Con vos que n’aurai de la disme
Autretant cume vos méisme,
Et de tote l’oblation ?
Renart, tu me tiens à bricon,
Fet soi Tybert, ge le t’afi,
Ne m’as encor gaires servi
Et si velz jà à moi partir.
Partir ? non voil, ainz vol oïr
En quoi ge me porrai fier
Se ci me siet à demorer,
Jà se tu es de bone foi.
Te plevis loiaument ma foi
L’une moitié te partirai
De ce que je gaaingnerai
De morz, de vis et d’aventures,
D’ofrandes et de sepultures,
Et tu me soies bon ami.
Ge l’otroi, dist Renart, ensi,
Mès certes ge ai moult grant fein.
Se tu voloies mengier pain,
Vez en là un lez cest autel.
Ge n’en mangai onques de tel,
Fet Renart, à jor de ma vie,
Mès de formage i a-il mie ?
Par foi ne sai, Tybert a dit.
Atant garda avant, si vit
Une toueille envolepée
Enz une fenestre botée ;
Deus en i ot entortilliez,
Li uns frès et li autres viez.
Tybert les tret de la toaille,
Dex aïde ! ce n’est pas faille
Que chascun aura jà le suen.
Par foi, dist Renart, ce est buen,
Mès donez moi cel blanc, cel mol.
Conment volez-vos sambler fol,
Ce dist Tybert, sire Renart ?
Cest dur aurez à vostre part
Que il est bon à cuer tenir,
Et qui le voroit departir,
Assez durroit plus que cestui,
Volez le vos metre en estui,
Fet Renart, celui me donez.
Jà par mon chief n’en mengerez,
Ce dist Tybert, grant ne petit.
Par le cuer bé, Renart a dit,
Dont estes-vos vers moi trichieres.
Or va ta voie, fol lechierres,
Demein au soir auras cest mol.
Or m’avez encercié à fol,
Fet Renart, en la moie foi,
Et si me mentez vostre foi,
Si vos en apel à Ruen
Devant Dant Huon le doien
Au convent à la confrarie.
Que que Renart Tybert tarie,
Si a Tybert tant esploitié
Qu’il a le formache mangié,
S’en a Renart éu grant doil.
Il en éust éu son voil,
Mès ne puet ore estre autrement,
Entre ses denz dit belement,
Se hui ne sui de toi vengiez
Moult en sera mes cuers iriez.
Lors a son formace entamé
Que il estoit moult afamé,
Si en manja tant con il pot,
Et qant assez mengié en ot,
L’autre lia en son giron,
Que il portera en meson.
Mès entretant con il manja
Totes voies se porpensa
Conment Tybert conchieroit
Qui si mal parti li avoit.
Lors a Tybert à raison mis :
Sire, se j’ai vers vos mespris
De ce que ge vos laidangai,
Onques mès de tel ne menjai :
Moult a esté bon le formage,
Et vos partistes conme sage
Qant vos me donastes cestui ;
Mès il me torne à grant anui
Qu’anuit nos somes oblié
Que nos n’avons mie soné
As vespres ne à la vigile.
Vos me dites voir, par Saint Gile,
Ce dist Tybert, car i alons
A ces cordes et si traions.
Atant sont as cordes venu,
Renart qui plus veziez fu,
Dist que il soneroit avant.
As cordes s’aert maintenant,
Mès ne pot de terre soner,
Sor un banc le covint monter :
Des cordes fist un laz corsor,
A son col le mist tot entor
Et ses deus piez avec devant.
Tybert le va moult regardant,
Et il prent les cordes as denz,
Si sone tant que neiz les genz
Qui dormoient sont esveillié,
Mès le laz ot si adrecié
Qu’il ne pooit mès corre aval.
Mès trop savoit Renart de mal
Qui as denz les cordes tenoit :
Tybert garde ne s’en prenoit,
Ançois quidoit qu’o les deus piez
Sonoit, qu’avoit avec liez.
Et quant il ot assez soné,
Si s’est moult bien des laz osté ;
Et dit Tybert, or est-il droiz
Que je sone la moie foiz.
Et dit Renart, par Saint Richier
Gel veil ainz que boive un sestier
De vin cil qui pis sonera.
Dahez ait qui le véera,
Ce dit Tybert, or soit einsi.
Atant s’en est en piez sailli,
Si est desor le banc montez
Et el laz a ses piez botez
Et après i bota son col,
Je cuit qu’il s’en tenra à fol.
Les cordes a prises as denz,
Lors primes le voient les genz
Qui vindrent au mostier garder
Qui ce est qui tant puet soner.
Atant Renart Tybert aresne :
Buer montastes, fait-il, el chesne
Où li Provoires vos trova
Qui en cest leu vos envoia,
Ice, dites, ne vos plaist-il ?
Si con Tybert volt dire, oïl,
Et si conme la boche ovri,
Li laz par le col le sesi ;
Quant les denz de la corde osta
Li laz entor le col serra
Et avec furent li dui piez
De quoi auques fu aligiez,
Que meintenant fust estranglé
Se li pié en fussent osté,
Quar o les piez li laz eslesse.
Et dit Renart, estes aése,
Ne savez mie bien soner,
Estez, jel’ vos irai mostrer.
Tybert quide qu’il die voir,
Et Renart qui enviz dit voir,
Quant du laz le dut delivrer
Si li ala le banc oster
Que il avoit desoz ses piez.
Or est Tybert plus enlaciez
Et ne sait-il sor quoi ester,
Et toz jors fait les seins soner ;
Et quant il s’en quide escaper,
Renart le conmence à gaber.
Envers lui est avant passez,
Ha ! ha ! fait-il, ore est assez,
Sire Tybert, ci a anui,
Conment ne finirez-vos hui ?
Et Tybert conmença à grondre :
Conment ne me daigniez respondre,
Ce dit Renart, orgoil ! orgoil,
Male aventure aient mi oil
Se je ne vos faz sorde oreille :
Vos me faites or la dorveille
Qui ici vos vois aresnant,
Et ne me prisiez mie tant
Que vos daignier à moi parler.
Conment ! volez-vos jà monter
Lasus amont à Dam le Deu ?
Avoi ! Tybert, ce n’est pas jeu,
L’en ne monte pas si as nues :
Dont vos sont ces folors venues ?
Quidiez-vos jà estre si seinz
Que vos ailliez avec les Seinz,
Et moi volez gerpir einsi ?
Pou avez encor Deu servi
Por aler jà lasus en gloire.
Vos ne féistes pas mémoire
Ersoir as vespres de la feste,
Moult vos devroit doloir la teste
Que toz jors contremont gardez.
Et à moi por quoi ne parlez ?
Por quoi m’avez si enhaï ?
Jà n’ai-ge mie Deu trahi
Que ne daingniez parler à moi,
Vos me mentez la vostre foi.
Or la m’avez deus fois mentie
Une ore et autre à la partie
Quant vos partistes le fromage,
Vos ne féistes pas que sage,
Si vos di bien par Saint Sanson
Que ge vos en tieng à bricon.
Ne me semblez pas einsi mestre
Con vos sembliez ersoir estre
Quant vos me trovastes el val
Où chevauchiez le cheval
Qui portoit les livres trossez
Que aviez au Prestre emblez,
Et son polein par traïson :
Or en pendez conme laron
Et si avez or bon chapel.
Et qu’ert-il ore de l’apel
Que ge avoie envers vos fet ?
Conment ert del aler au plet ?
Vos n’i porrez or pas aler.
Fetes le veax contremander
A la confrarie as Noneins
Trois semeines ou un mois meins ;
Or me dites, que ferez-vos ?
Par Deu trop estes orgellox
Por estre mestre à povre gent,
Vos les menriez malement
Se sor euls aviez baillie :
Ne place Deu le Filz Marie
Que en vos aient lor atente,
Que il auroient male rente,
Ne vodriez à euls parler
Ne seul de droit œil esgarder.
Ge vois ore les huis ovrir,
Que j’ai oï les genz venir,
Qui voelent entrer el mostier :
Or déussiez vostre sautier
Tenir overt sor voz jenolz,
Et vos vos estes par trois nous
Loiez as cordes par la gole.
Là séustes-vos pou de bole,
Que diront ore li prodome ?
Or ne chantez-vos pas de Rome
Si con vos féistes ersoir ;
Vos déussiez si bien savoir
Les set arz, ce disiez ier,
Or ne vos savez deslier.
Folie vos fet tant soner,
Vos déussiez laissier ester
Le debatéis de ces cloches,
Meuz vos venist peschier as loches
Qu’entremetre de tel mestier
Dont vos ne savez provandier.
Ne vos en savez entremetre,
Mès en pris vos voliez metre
De tenir la marruglerie.
Vos féistes moult grant folie,
Ge vos di bien tot à estrox,
Certes trop estes orgellox.
Ge quidoie par Saint Givon
Qu’à la Purification
Venist ma feme à vos demein,
Mès ne porroit à vostre mein
Ateindre s’offrande à baillier
Ne vostre bele mein besier,
Que trop vos estes haut levé ;
Si vos tendroit à fol desvé
Et en auroit trop grant paor.
Mais or me changiez par amor
Deus maailles por un denier,
Qu’aillors la voldrai envoier.
Que dites-vos ? Aurai les mie ?
Voir par le cors Sainte Marie
S’il daigne à moi parler encor :
Malement parleriez or
A un povre home, quant à moi
A qui vos estes par vo foi
De mener loial conpaignie,
Ne deingniez encor parler mie.
Mès avant volez oïr tot,
Or me respondez mot à mot
Espoir de ce que je vos di,
Mès por Deu, sire, je vos pri,
N’en metez riens à vostre cuer,
Que ge nel’ vodroie à nul fuer
Que vos en éussiez nul mal.
Parmi tot ce que el cheval
Ne vousistes que ge partisse,
Si voliez que j’empréisse
A porter Hermeline à messe,
Ne vos fu onques felenesse,
Volentiers li devez prester
Et de vos chandeilles doner.
Aura le ele, baux douz sire ?
Oïl, Dam le Deu le vos mire.
C’est bon gré Deu et maugré vostre,
Ele dira sa patrenostre
Que Dex vos doinst honte en cest an
Ainz que viengne la Saint Johan,
Si aurez-vos encore anuit.
Par Deu, sire, ne vos anuit,
Ge parol volentiers à vous,
Et vos estes trop ennuious,
Et à moi ne volez parler,
Voldriez-vos toz jous soner ?
Ge vos di bien ce est folie,
Il sanble ce soit estoutie.
Atant let Renart le gangler
Qui à l’uis vit aboeter
Un fol vilein fel et enrievres,
Hardiz autresi con un lievres.
Au costé ot s’espée ceinte
Qui de roil estoit tote teinte,
Qui ne pooit issir des ès,
Ne jà par lui n’en istra mès ;
Et quant il vit Tybert le Chat
Qui si fort les cloches debat,
Et Renart vit ester vers lui,
Tel poor ot et tel ennui
Que meintenant li pristrent fievres
Et il s’en foï conme lievres.
Et Renart est avant passez,
Si li a dit : estez, estez,
Fox vileins, par ci chieroiz.
Adont fu li vileins destroiz
Quant vit que Renart l’escria,
Einsi très grant poor en a
Qu’il dut estre del sen issu.
Onc ne fina, si est venu
Lasus amont enmi la vile ;
Et Renart qui moult sot de gile,
S’en est retornez au mostier,
Si esrache un fuel del sautier,
Si l’a dedenz son sein boté,
Et Tybert a araisoné.
Sire Tybert, Renart a dit,
Ge vos di bien, se Dex m’aït,
Que ge ne demor plus o vous,
Que trop estes religious ;
Trop poez par Deu travaillier,
Ge ne porroie tant veillier :
Ge m’en irai, vos remanez,
Et vostre offrande recevez
Tel con ele est, ou mole ou dure,
Que bien sachiez je n’en ai cure
Ne de la moitié ne du quart.
Atant Renart de lui sa part,
Si en vait droit à une haie,
Et Tybert de soner s’esmaie,
Qui de soner fu si ateinz
A bien pou que il n’est esteinz,
Ne ne se pot mès preu aidier ;
Et li vileins qui du mostier
Estoit devant Renart tornez,
Si avoit tantost encontrez
Plus de dis vileins toz pleinz d’ire
Qui tuit li conmencent à dire :
Et fustes-vos à cel mostier ?
Oïl, fet-il, un aversier,
Ge l’ai véu, gel’ vos afi,
N’alez pas en avant de ci,
Que as cordes a un Diable,
Ne quidiez pas que ce soit fable,
Et uns autres s’estut lez lui.
Sachiez que il m’ont fait anui,
Qar quant ge voil laienz entrer,
Si me pristrent à escrier,
Et je m’en foui conme lievres,
Si m’en sont jà prises les fievres
Et autre mal encore assez.
Si ai esté espoentez
Que grant poor ai de mon cors,
Moult à anuiz lor sui estors,
Et encore me sivent-il.
Venez-en arere, font-il.
Atant retorne li vileins
Qui de la fievre estoit jà pleins,
S’en va avec aus el mostier
Et si lor dit : par Saint Richier
Si m’en créez, n’i enterroiz,
Quar li Diables pent tot droiz
Et par le col et par les piez,
As cordes est bien atachiez.
C’est rien, un Vilein respondi,
Or tost, fait-il, baron, hardi.
Atant sont au mostier venu,
Li Vilein qui fu esperdu
S’en vait toz jors traiant arrere,
Moult fu coarz de grant manere :
Ces autres let aler avant.
Dant Tybert troverent pendant
As cordes, moult l’ont conjuré
Que il lor die verité
Se il est bone chose ou non.
Il ne respont ne o ne non,
Et il en ont entreparlé
Et autre foiz reconjuré.
Il ne respont ne que devant.
Tierce foiz, font soi li auquant,
Le convient encor conjurer,
Et se à nos ne velt parler,
Si l’asaillon hardiement.
Lors le conjurent erraument :
Un bachelers prou et hardi
Plein pié est devant euls sailli,
Si li a dit, tu qui là pens,
Ge te conjur de totes gens
Et de l’Apostoile de Rome,
Que je ne sai nul si haut home
Fors que seul nostre sire Dex,
Ge te conjur, se tu es tex
Que tu doie parler à gent,
Parole à moi isnelement
De ta foi et de ta creance
Te conjur et del Roi de France
Et de trestote la maisnie
Qu’il meine o lui en chevauchie,
Et de par le Roi d’Engleterre,
De bois, de pré, de tote terre
Et de trestote créature,
De tes eus et de ta faiture,
Que me dies s’ies de par Dé
Ou par celui qui me fist né.
Jà te verras tot detrenchier,
Ne vois-tu ci mon branc d’acier ?
C’est noient, cil ont respondu,
Avant, font-il, baron cremu,
Assaillons à destre, à senestre.
Atant es la meschine au prestre,
Qui vint laiens conme desvée :
Avez-vos, fait-ele, rovée
Ceste Iglise par pute estreine ?
Jà est-el mon seignor demaine,
Jà conperrez, se Dex me saut
Se ma conoille ne me faut.
Lors li passa à sa quenoille,
Et cruelment le dos li roille,
Et Tybert durement tressaut,
Et por néent riens ne li vaut,
Que il ne lor puet eschaper.
Lors saut li cointe bacheler,
Celui qui s’espée avoit traite,
Fiere envaïe li a faite.
Celui qui tant l’ot conjuré
Est meintenant vers lui alé :
Entor son braz tortoille à masse
Son mantel, et puis si le passe.
Seigniez s’est et puis voit avant,
Un cop li rue en reculant,
Que les mailles de sa pelice
Li fraint et deslace et deslice,
Si le feri de grant aïr
A terre en fet un pan venir,
Mès ne l’a en char adesé
Q’el poin li est le bran torné.
En tornant descendi aval,
Ne li a fet gaires de mal.
Vez, fait-il, con trenche m’espée,
S’el ne me fust el poing tornée
Jà en éusse pris venjance.
Lors vint un vilein o sa lance,
Se li refet une envaïe,
As deux meins l’a forment brandie,
Parmi le cors le volt ferir,
Et Tybert li sot bien guenchir,
Et li vileins outre passa,
A une piere s’acopa :
Sachiez que la lance a brisée
Et une coste a peçoiée,
Et le bacheler o l’espée
Qui ot s’aleine recovrée
Et tot repris son hardement,
Li est passez hardiement.
Li bacheler ot non Guillaume,
Ferir le quida sor son heaume,
Mès à cestui cop a failli,
Que Tybert li a bien guenchi :
Ne l’a mie à cel cop ateint,
L’espée entre ses poinz li freint,
Et il li passe o le tronçon,
Si le feri el chaaingnon,
Que les laz où il ert laciez
A à cel cop outre trenchiez.
Et Tybert qui moult estoit laz,
S’en vait fuiant plus que le pas :
Parmi l’uis s’en estoit sailliz,
Et li vileins fu esbahiz
Qui de lui ocire ert engrez,
Si lor escrie, or tost après !
Si l’enchaucent moult durement,
Et il nes dote de noient
Que la nuit qui estoit oscure
Lor a fait perdre, et l’aventure
Qui li estoit à avenir,
Qu’il ne devoit mie morir.
Li Vilain s’en tornent atant,
Et Tybert s’en vait devorant
Les vilains et la pute au prestre,
Moult les maudit et tot lor estre,
Et puis Renart et s’ataïne.
Que que Tybert einsi cemine
Li est venuz Renart devant
En sa voie parfont chuant :
Ahi ! fait-il, bons ordenez,
Por amor Deu car me donez,
Que Dex li Pere le vos mire,
De vostre offrande, bauz doz sire,
Et si me contez de vostre estre
Que de vostre Ordre voudroie estre,
Que moult vos siet bien ceste estole
Qui le vostre bel col acole ;
Et por Deu, sire, qui li mist
De grant folie s’entremist,
Qu’ele resemble chaagnon
A quoi l’en ait pendu laron.
Ahi ! ce dist Tybert li Chaz,
Male aventure ait tes baraz
Et trestote la toe foi !
Dites-vos, fait Renart, à moi ?
Oïl voir, Tybert respondi.
De quoi vos ai-ge mal parti,
Sire Tybert, Renart a dit ?
Trestot avez sanz contredit,
Vostre offrande tote l’aiez,
Estes-vos ore bien paiez ?
Anuit avez parti et pris,
Et d’itant avez-vos mespris
Que cil n’en a noient éu
Qui à la vigile o vos fu,
Renart vostre bon conpaingnon.
Mès tenez vos, si oiez mon
Que dedenz cest brief ici a.
Que orendroit le m’envoia
Mi sire Huon le doien,
Et si vos mande qu’à Roen
Soiez lundi devant mangier
Tot prest à ore de plaidier
Encontre le prestre del Brueil
Qui a escrit dedenz cest fueil
Tretot quanques il i velt metre.
Orendroit le me fist trametre,
Et se vos bien ne m’en créez,
Venez avant, si i gardez ;
Et plus i a encore el brief,
Qu’il vos contredit, par mon chief,
Le mostier, ainz met en defois,
Vos n’i chanterez mès des mois,
Ne mès oan de ci que là
Que aurez de fide lesa
Respondu devant l’Archevesque
Ou en sa Cort devant l’Evesque
Mon seignor Gautier de Costances.
Sur lui avons mis noz sentances
Li prestres et je sanz mentir,
Ensemble vos volons tenir,
Fet soi Renart, se vos volez.
Lors par fu Tybert adolez,
Tristres et doleros et laz,
Que por les cox, que por les gaz,
Si s’en vait droit à sa meson.
Si departent li conpaingnon,
Ce dist l’estoire qui ci fine,
S’en vait Renart à Hermeline,
Si encontra un cras oison
Qu’il enporta en sa meson.
A sa fame atorne à mangier
Qui moult en avoit grant mestier,
Et si li a trestot conté
Conment Tybert l’avoit mené,
Conment le prist à achoison.
Ce vos dit Richart de Lison
Qui conmenchiée à ceste fable
Por doner à son Connestable.
Se il i a de riens mespris,[2]
Il n’en doit jà estre repris
Se il i a de son langage,
Que fox naïs ne verrés sage
N’il ne velt gerpir sa nature,
Que Diex nostre sire n’a cure.
Toz jorz siet la pome el pomier,
Ne vos voil avant rimoier.