Le Roman du Renart - D. M. Méon — 1826/34
La Mort Renart.[1]
Où mois de mai qu’esté conmence,
Que cil arbre cueillent semence,
Que cler chantent parmi le gaut
Loriol et le papegaut :
A icel tens que vos dison
Estoit Renart en sa meson,
Qui por le biau tens qui revint,
Moult liez et moult joianz devint,
Que moult ot l’hiver mal souffert.
De son chastel vit l’uis ouvert,
Si s’en issi sanz demourée
Et regarda aval la prée
Se nus vendroit de nule part.
Atant de sa meson se part,
Que nule ame à Dieu ne conmande :
Poignant s’en vet parmi la lande
Por sa viande porchacier.
Il ne fu ne clop n’eschacier,
Ainz s’en vet poignant toz les sauz :
Parmi un plesséis de saus
S’en vet Renart tot eslessié,
Esperonant le col bessié.
Dedenz cel plesséis avoit
Un parc qui noviaus i estoit ;
Dedenz avoit à granz foisons
Connins, gelines et chapons
Qui sont d’une Abaïe blanche.
Renart monte par une branche
Sor les pieus et sor le paliz,
Tantost est en la cort sailliz
Des pieus à terre qui sont haut.
As chapons vient et les assaut,
Conme desvez et enragié
Un chapon prent, si l’a mengié
A grant léesce et à grant ese ;
Puis s’en issi par une hese.
Mès ainssi con il s’en issoit,
Uns des Blans Moines l’aparçoit,
S’a pris un baston en sa main,
Après Renart s’en vet au plain,
Tot correcié et tot plain d’ire
Maintenant li a pris à dire :
Renart, vos estes atrapé.
Lors l’a si du baston frapé
Que tote l’eschine li ploie,
Et Renart n’ot ne ris ne joie.
Vers le Rendu s’en est alez,
Entre ses jambes s’est coulez ;
Conme cil qui fu d’ire espris ;
Renart l’a par la c… pris
As denz et si forment le sache
Que uns des pendenz li arrache.
Li Moines fu moult esperduz,
A la terre chiet estenduz,
Et Renart torne les talons,
Del paliz ist à reculons ;
A la fuie se met le trot,
Le Moine ot bien tenu à sot,
Qu’il li ot la c… tolue,
Si en a moult grant joie éue.
Mès n’a mie granment alé
Que il a Coart encontré
Qui venoit desor son destrier.
Sor son col tint un Peletier
A qui il ot tolu s’espée,
Par les jarrez li ot boutée
Une verge d’un vert plançon ;
Vers Renart vint sanz contençon.
Sitost con Renart l’aparcut,
Merveilla soi, si s’arestut
Et le regarda une piece,
A cui que il desplese ou siéce,
L’a salué et dit itant :
Coart, bien soiez-vos venant !
Dites moi, se vos amandez,
Qui cist hom est que vos portez ;
Savoir le veil sanz nule faille :
Avez le vos pris en bataille,
Et conment et par quel raison
Li faites-vos tel mesprison ?
Savoir le veil, que il est droit.
Coart respont, bien le sauroiz
Moult volentiers puisqu’il vos siet.
Atant le met jus, si s’asiet,
Et Renart s’assist joste lui.
Sire, fet-il, il m’avint hui
Matin que joer m’en aloie
Par cel bois si con je soloie,
Si encontrai par aventure
Cest Vilain qui me fist ledure
Moult grant, que s’espée sor moi
Sacha, par la foi que vos doi,
Et sachiez que feru m’éust
Moult volentiers se il péust.
Quant je le vi vers moi venir,
Adonques ne me poi tenir,
Ainz ving à lui toz ademis,
Si li crachai enmi le vis
Et escopi par grant vertu.
Li Vilainz en fu esperdu,
De paor à terre chaï
Et je maintenant li sailli
Sor le ventre sanz demorer,
L’espée li alai oster
Hors de la main et vistement.
Ore en voiz querre jugement
Por savoir que de lui feron
A la Cort Noble le Lion.
Renart qui la parole oï,
Moult durement s’en esjoï,
Si li respont sanz demorée :
Coart, folie avez pensée,
Ce seroit folie et outrage :
N’afiert à home de parage,
Por que il tiengne honor et terre,
Qu’aillors aille jugement querre ;
Mès s’il prent home en son forfet
Il méismes justise en fet.
S’il m’éust meffet, par ma foi,
Venjance en préisse par moi.
Sire, dist Coarz, entendez,
Or sai de voir que vos m’amez,
Mès s’il vos estoit à plesir,
A Cort iroie por oïr
Le jugement et por savoir
Quele amende j’en doi avoir.
Se il vos plest, o moi vendroiz.
Par foi, dist Renart, ce est droiz
Que g’i voise puisqu’il vos siet.
Lors se lieve de là où siet
Renart et Coarz à grant joie.
Atant se metent à la voie,
Et Coarz son Peletier porte.
Ne finerent jusqu’à la porte
Mon seignor Noble le Lion,
Endui i vienent li baron
Sanz deffenz et sanz contredit.
Coarz si a à Renart dit :
Renart, dist-il, biax douz amis,
Le Vilain que je port m’a mis
En grant travail, en grant ahan,
Et Dex le mete hui en malan
Qui en avant le portera !
Ore orrons que li Rois dira
Et li baron du jugement,
A quel paine et à quel torment
Nos ferons ce Vilain morir.
Et dit Renart, moult le desir
Que vos soiez de lui vengié.
Maintenant montent le planchié
Li dui baron sanz nul delai,
En la sale truevent le Roi,
Et ot entor lui mainte beste.
Cel jor celebroit une feste
D’une haute Dame honorée,
La suer Pinte, Dame Coupée
Qui fu ocise en traïson.
Le jor en fesoit mencion
Li Rois Nobles et son barné,
Que iluec erent assemblé.
Maint Prince i ot et maint baron,
Il n’i ot se hauz homes non
Qui estoient, ce vos devis,
Vestuz ou de vair ou de gris.
Li Rois qui tenoit Cort pleniere,
Séoit joste ma Dame Fiere
Et li baron environ eus.
Es-vos les conpaignons andeus,
Renart et Coart qui aporte
Le Vilain où il se deporte.
Mesire Renart vint devant,
Le Roi salue hautement,
Con cil qui fu bien enseigniez
S’est devant lui agenoilliez,
Et li Rois qui moult chier l’avoit,
Le redresce con il le voit,
Et dit : bien soiez-vos venuz !
Amis, bien vos estes tenuz
De moi véoir ; ne vos vi mès
Puis que nos féismes la pès
Entre vos et vostre conpere ;
Foi que je doi l’ame mon pere,
Or sui-je moult hetié et liez
Qant à moi estes reperiez,
Sachiez que bon gré vos en sai.
Renart ne fu pas en esmai
De respondre, si dit briefment :
Sire Rois, cil Diex qui ne ment
Vos otroit de vostre voloir
La moitié, que je sai de voir
Que vos m’amez et je vos aim,
Foi que je doi à Saint Germain ;
Mès d’un afere vos requier
Conseil, qar bien en ai mestier
Moi et mon conpaignon Coart.
Diex aïde sire Renart,
Fet li Rois, qu’est-ce que vos dites ?
Ainsi m’aïst Sainz Esperites,
Conseil vos donrai volentiers ;
Mès or dites, biax amis chiers,
De quoi vos demandez conseil.
Sire, fet-il, dire vos veil.
A cest mot apela Coart
Qui s’estoit trez à une part,
Qui encore le Vilain tint,
Et maintenant au Roi en vint
Iriez et de corroz espris,
Et Renart par la main l’a pris
Et li fist geter erraument
Le Vilain sor le pavement
Qui n’estoit mie granment mol,
A pou ne li a rout le col,
Si en fu le Vilain plain d’ire,
Et Renart li a pris à dire :
Biau sire, conseil vos queron
Que nos de cel Vilain feron
Qui vostre baron assailli ;
Ferir le quida, si failli.
Sire, dit Coart, entendez,
Se je di mal si l’amendez.
J’ai cel Vilain ci pris de guerre,
Si en vieng jà jugement querre :
Je le vos rent conme laron,
Esgardez que nos en feron.
Qant li Vilain ot et entent
Que l’en demande jugement
De lui, si fu moult esbahiz.
Maintenant est en piez sailliz
Et dist au Roi : Sire, merci,
A vos me rent jointes mainz ci ;
Sachiez que je sui loiaus hom,
S’il vos plest, bon renon avon
De mes voisins les plus féaus
Qui diront que je sui loiaus
Des plus preudomes de la terre,
Si les fetes envoier querre.
Li Rois respont, moult volentiers,
Que il nos en est granz mestiers.
Mander les fist sanz plus atendre
Dis et huit furent mainz de trente ;
Douze vinrent por tesmoigmer,
Tuit loial home peletier
Estoient, à Cort sont venuz.
Qant li Vilainz les a véuz,
Si ot grant joie et grant léesce,
Maintenant en estant se dresce
Et dit au Roi sanz delaier,
Cist ci me vienent tesmoignier.
Sire, font-il, vos dites voir,
Se verité volez savoir,
Par tens vos sera enseignié.
Il avoit un œf gaaignié
Où il nos fist moillier ensemble
Tos treize, por ce si nos semble
Qu’il est loiaus homs et de foi.
Qant ce ot entendu le Roi,
Moult durement s’en esjoïst
Et maintenant au Vilain dist
Qu’il s’en alast, qu’il n’avoit garde ;
Et li Vilainz plus ne se tarde
Si s’en revet o ses vilainz.
Li Rois remest de joie plainz,
Tuit firent joie par la sale.
Renart n’ot pas la coulor pale,
Dejoste le Roi s’est assis,
Ne fist pas chiere de pensis.
Li Rois a dit as conestables
Que il facent metre les tables,
Et il si firent sanz targier.
Lors asistrent tuit au mengier,
Delez le Roi sistrent maint Conte ;
Des mès qu’il orent ne faiz conte,
Mès qant mengié orent assez,
Jeuent as tables et as dez.
Au chief du palès d’une part
S’asist Ysengrin et Renart,
Devant eus deus un eschequier.
Lor gieu prenent à arengier,
Et dist Renart à Ysengrin
Que venir face un marc d’or fin
A metre au jeu, et il si fist,
Tantost sor l’eschequier le mist.
Un autre en i a mis Renart,
Si jouerent par grant esgart.
Ysengrin fu du jeu apris,
Del paonnet a un roc pris ;
Après le roc a pris la fierce.
Tant jouerent c’ainz qu’il fust tierce
Gaaigna Ysengrins cent livres
Dont Renart se tint bien por ivres
Que il n’ot mès que metre au jeu.
Il en a apelé le Leu ;
Ysengrin, fet-il, entent moi,
Par cele foi que je te doi
Je n’ai de quoi mon jeu envit
Se n’i met ma c… ou mon v… ;
Encor joueroi volentiers
S’encontre veuz metre deniers.
Si ferai, fet-il, par mon chief.
Lors reconmencent de rechief
A jouer et tot erraument
Perdi Renart son garnement.
Ysengrin qui ot gaaignié
En ot le cuer joiant et lié.
Tantost sans plus de demorer
A fait un grant clo aporter,
Parmi la c… li ficha
Et à l’eschequier l’atacha,
Puis s’en torna et si le let.
Renart remaint qui crie et bret
Toz correciez et toz plainz d’ire,
Que il soffroit si grant martire.
Ma Dame Fiere oï le cri,
Maintenant cele part guenchi.
Qant vit Renart, si fu marrie,
Cele part vient, si li aïe ;
A grant paine d’iluec l’estort.
Dedenz sa chambre le repost
Et le coucha dedenz son lit,
Mès il n’i ot point de delit,
Que de doulor ert si destroit
A pou le cuer ne li partoit.
Del corroz qu’il ot sanmella,
Malades fu, si se pasma.
En pamoisons jut longuement,
Qu’ele cuidoit veraiement
Que il fust mort, si s’escria :
Sire Renart, ce que sera,
Me volez-vos ainsi guerpir ?
Adonques a fait un souspir.
Renart qui le souspir oï,
Un petitet les iex ouvri,
Si parla et dist, à quoi fere,
Dame, vos voi-je tel duel fere ?
Faites un baing apareillier
Que je me veil un pou baignier.
Sire, fet-ele, volentiers
Ferai ce qui vos est mestiers.
Atant conmande qu’en li face
Un baing chaufer, et sanz espace
Fet fu qant el l’ot conmandé.
Mon seignor Renart ont porté
En la cuve et dedenz l’ont mis.
Dame Fiere li dist, amis,
Jà n’en quiert raençon avoir ;
Cest mal ai-je par mon savoir
Dont je crien morir à dolor,
Si m’en poise por vostre amor,
Que je cuit de vos departir,
Je ne verrai jà l’asserir.
Dame Fiere l’ot et entent,
A pou que li cuers ne li fent
Tant est dolente et correciée :
Lasse ! jamès ne serai liée.
A icest mot sanz autre plet
Ont Renart de la cuve tret,
En un lit l’ont couchié et mis
Con home qui moult est malmis.
Demandé a confession,
S’aura s’ame remission.
Sachiez, fet-il, que moult m’est tart,
Faites moi parler à Bernart
L’Arceprestre, si me ferai
Confès et mes pechiez dirai.
La Dame li respont atant
Que ele fera son conmant.
Maintenant a Bernart mandé
Et il n’i est plus demoré,
Ainçois i vint sanz atargier
O tot ce qui li ot mestier.
Desus un banc as piez Renart
S’estoit assis sire Bernart,
Si a Renart mis à reson.
Renart, voulez confession ?
Se vos vos volez repentir
A bone fin poez venir :
Lessiez ester les mauvestiez
Et les vices dont entechiez
Avez esté si longuement,
Qui sages est, si se repent.
Sire, fet Renart, entendez
Se vos à droit m’amonestez,
Que preudons ferez et loiaus.
Vos m’alegerez de toz maus,
Que je n’ai pas meffet granment.
Se je croissi Dame Hersent
Ma comere, ne mespris rien,
Ençoiz li fis léesce et bien.
Qant je croissi ma Dame Fiere
Qui si est orgueilleuse et fiere,
Ne mespris pas envers ma Dame
Que je avoie prise à fame
Et espousée par solaz :
Li prestres fu Tibers li Chaz
Qui volentiers la m’espousa,
A tieus i ot qui en pesa.
Que diroie ? De voir sachiez
Je ne fis onques nus pechiez
Fors qant je donai garison
Mon seignor Noble le Lion ;
Mès bien sai que lores pechai
Qant je garison li donai.
Renart, Renart, ce dit Bernart,
Par mon seignor Saint Liénart,
Moult es ore de pute orine
Qant tu connois que la Roïne
As croissue, tu as mespris,
S’à bone fin veus estre pris
A forjurer la te convient.
Conment, fet Renart, s’il avient
Que je aie respassement
Je fausserai le serement,
Et vos poez de fi savoir
Que por la repentance avoir
Le serement otroi-je bien,
Mès por ce n’en ferai-je rien
Se je del mal puis respasser.
Mès por ce que ne voil passer
Voz conmandemenz ne deffere,
Veil je bien le serement fere.
Tot maintenant sanz plus d’espace
Firent aporter en la place
Les Sains, si a juré Renart
Devant l’Arceprestre Bernart
Tot ce qu’il li ot devisé.
Qant le serement ot juré,
Renart remest qui moult se plaint,
Que l’angoisse moult le destraint.
Un plaint a geté, si se pasme ;
Dame Fiere d’un pou de basme
Li frote le poux et le vis :
Si conme je pens et devis,
Del froter durement s’esforce,
Mès Renart avoit si sa force
Perdue, c’onques ne se mut,
Mès ainssi en pamoisons jut
Si que tuit cuident que soit mors :
Lors i fu granz li desconfors.
Ma Dame Fiere la Roïne
Por Renart fet chiere lovine,
Dolante et mal aventurée.
Li Rois a la noise escoutée,
Si est tot maintenant venu
En la chambre, si a véu
Renart qui fu en pamoison.
Moult se merveilla le Lion :
Qui li donast trestot l’avoir
Que Rois ne Quens péust avoir,
Ne se péust sor piez ester,
Einçoiz le convint adenter
Et dist : Renart, perdu vos ai,
Jamès si bon baron n’aurai.
Adonc sanz plus de delaier
A fet tote la gent huichier
Qui le confortent durement
Et dient que n’est mie gent
A home de si grant renon
Que tel duel face d’un baron ;
Mès qant mors est sanz detenir,
Faites sa mesniée venir.
Tot maintenant et sanz targier
A fait venir un messagier,
Si a Hermeline mandée
A Malpertuis sanz demorée,
Et ses troiz filz qui moult preu sont.
Qant le message entendu ont
Si sont parti devant le Roi,
Si chevauchent par grant desroi
Tant qu’à Malpertuis sont venu.
De lor chevax sont descendu,
Si ont Hermeline trovée,
La novele li ont contée
Si con Renart est en peril.
A itant montent tuit si fil,
Tant ont alé qu’il sont venu
Au chastel où Dant Renart fu.
Qant Hermeline en la chambre entre,
Si li fremist li cuers el ventre
Et conmença un duel si grant
Que l’en n’i oïst Dieu tonant,
Et disoient à haute alaine :
Sire, n’a pas encor quinzaine
Que de Malpertuis vos partistes
Liez et joianz, puis n’i venistes ;
Or a ci grant duel et apert.
Encore nel’ set pas Grinbert,
Fere li convient à savoir
Vostre mort, si sera savoir.
Fet li Rois, si soit dont mandé.
Un messagier a apelé,
Et cil est venuz maintenant.
Va, fet-il, tost et vistement
Droit à Malbuisson, si me di
Grinbert que il viengne à moi ci,
Et si li conte l’aventure.
Cil s’en torne grant aléure,
Dedenz la cort de Malbuisson
A trové Grinbert le Tesson.
Qant le message entre en la cort,
Grinbert à l’encontre li cort
Et dit, que alez-vos querant ?
Amis, bien soiez-vos venant !
A qui estes ? Dites le moi.
Sire, fet-il, je sui au Roi
Qui de par moi saluz vos mande
Et encor vos prie et conmande
Que à lui vegniez sanz delaie.
Grinbert l’oï, moult s’en esmaie,
Puis si dist, g’irai volentiers,
Or me dites, biaus amis chiers,
Porquoi me mande l’Emperere.
Sire, fet li més, par Saint Pere,
Mors est Renart vostre cousin,
Vos n’aviez meillor voisin.
Qant Grinbert entent la novele,
Sachiez ne li fu mie bele,
Ainz en ot à son cuer grant ire :
Au messagier a pris à dire,
Amis, par cel Dieu qui ne ment
Ici a mauvès mandement,
Qant morz est mes cousins germains ;
Du plus estoie, or sui du mainz,
Que par lui, ce sachiez de voir,
Estoie montez en avoir.
A icest mot s’en sont torné
Endui et sont acheminé :
Tant ont alé qu’à la Cort vindrent.
De lor venue lié devindrent
De tieus ot à la Cort assez.
Grinbers qui si estoit lassez,
S’estoit delez la biere assis,
Moult par est dolanz et pensis ;
Son visage enbrunché tenoit,
Lez le cors moult li avenoit
La chiere qu’il fet et la lipe.
D’eures en autres se defripe,
Il crie et pleure durement,
Si le regarde doucement
Que nus ne le pot conforter.
Et li Rois fist le cors porter
En la sale par grant deduit :
Iluec furent jusqu’à la nuit.
Dame Fiere par grant afere
Fist cierges aporter et fere,
A grant plenté et à foison
Les alument par la meson.
Tant i en ot n’en sai le conte,
Onques mès por Roi ne por Conte
Ne fu tel luminere fet.
Grinberz qui avoit son duel fet,
S’estoit delez la biere assis,
Et dist au Roi : Par Saint Denis
Ne foi que vos devez Saint Gile,
Qar faites chanter la vegile
Orendroites et sanz delai.
Li Rois respont, par Saint Eloi,
Grinbert, vos avez bien parlé.
L’Arceprestre en a apelé :
Bernart, fet-il, avant venez
Et vos conpaignons amenez,
Si chantez vegiles des mors
Por Renart qui ici est mors
Dont je sui iriez durement.
Sire, à vostre conmandement,
Ce li a respondu Bernart.
Tot maintenant du Roi se part,
S’en a o lui mené Tibert
Le Chat et mon seignor Hubert
L’Escofle, et mon seignor Tardis
Qui moult fu por Renart pensis.
Ceus amena o lui Bernart,
Et li Heriçons d’autre part
Qui moult ert cointes et apers,
Et li Gresillons Dant Frobers
Si en a mené Chantecler
Tot por les vegiles chanter,
Et Dant Roonel le mastin,
Et sire Ferrant le Roncin,
Et Brun l’Ors et Bruiant le Tor,
Et si fu avec eus encor
Ysengrins et Dant Brichemer
Et sire Baucent le Sangler.
Revestu sont et atorné,
Puis sont arriere retorné
Devant le cors enmi la sale.
Grinbers ot le vis taint et pale
Por Renart que forment amoit.
Lui et ceus que il amenoit
Ont les vegiles conmenciées,
Maintes temples i o sachiées
Et maint poing ensemble feru.
Roonel qui sages hons fu,
A léu la leçon première,
Mès por Renart fist laide chiere.
Le respons dit le Limaçon
Trestot sans noise et sanz tençon ;
Puis distrent eus deus le verset,
Li uns en gros, l’autre en faucet.
La seconde leçon après
A léu Brichemers li Cers,
Le respont a chanté Tiebert
Entre lui et sire Frobert,
Et puis ont le verset chanté
Doucement, ne sont pas hasté.
Et puis lut la tierce leçon
Sire Espinart le Heriçon
Belement et sanz contençons,
Et Grinbers chanta le respons,
Et empris le verset un d’eus,
Ysengrin lor aida li Leus.
Puis à la qarte leçon dite
Ysengrins qui bien s’en aquite,
Et Baucenz le respons chanta
Tot soef, pas ne se hasta,
Et Brun l’Ors chanta le verset.
Qant il l’ot dit, si fist un pet.
Et après lut la leçon quinte
Dant Chantecler le baron Pinte,
Et li respons, con nos lisons,
Chanta Frobert li Gresillons.
Li vers chanta Pelez li Raz,
Et Mesire Tibert li Chaz.
Brun li Ors qui s’en efforça,
La siste leçon conmença ;
Bien la conmença et feni.
Et maintenant en piez sailli
Rousel l’Escuirel qui chanta
Le respons, biau se deporta ;
Le verset chanta simplement
Petit pourchaz et sagement.
La setisme leçon conmence
Doucement par grant sapience
Le Paon sire Petitpas,
Et sachiez que ne failli pas,
Ançoiz la lut et bien et bel ;
Le respons chanta Roonel,
Et le verset par grant deport
Chanta por celui qui est mort
Droïn le Moinel à grant joie
Si haut que il velt que l’en l’oie.
L’uitiesme leçon sanz desroi
Lut Dant Ferrant le palefroi,
Et Coart chanta le respons
Qui o les autres ert enbrons.
Li Conins sire Sauteret
Conmença l’uitiesme verset.
La nuesme leçon lut Bernart
Qui estoit dolanz por Renart ;
Le respons chanta Brichemer
Qui Renart soloit tant amer,
Et le Sengler chanta le vers
Et al endroit et al envers.
Qant les leçons furent chantées
Et vegiles furent finées,
Desvestir se vont maintenant
Tuit arengié en un tenant.
Qant il furent desvestu tuit,
En la sale, qui qu’il anuit,
S’en sont venu, si con moi semble,
Devant le cors trestuit ensemble,
Furent assis conmunement.
Grant luminere et bel et gent
Avoit laiens à tel foison
Que tote en reluist la meson.
Icele nuit firent tel joie
Ne cuit que nus mès si grant oie :
Non fera-il, si con je cuit.
As plantées jeuent la nuit ;
Le pié leva premierement
Ysengrin moult joieusement,
Et Tyberz li Chaz i feri
Si doucement et si seri,
Que d’autre part le fist chaoir.
Lors s’est Tyberz alez séoir,
Dont retendi Primaut le pié,
Mès onques n’ot de lui pitié
Brichemer qui tel li assist
Que trestot li piez li fremist :
Vosist ou non, d’autre part chiet,
Et Brichemers tantost s’assiet,
Si a le pié en haut tendu,
Adonc a son cop atendu.
Bruiant li Tors qui moult s’efforce
De ferir, que tote sa force
I mist, mès por ce ne se mut :
Qant ce vit, la color li mut
Brichemer et fu si destroiz,
Mès il se tint à cele fois
Qu’il ne se mut pour cop qu’il doinst :
Ne quit mie qu’il li pardoinst.
Mesire Frobers qui se test
A véu le cop qu’il a fet ;
Envers Bruiant vint aïrié,
Et cil li a le pié haucié
Tot ainssi con à lui affiert,
Et Frobert un grant cop i fiert :
A pou le cuir ne l’en a fret.
De maintenant ariers se tret
Bruiant le Tor tot esbahi,
Et Danz Froberz le pié tendi,
A grant joie et à grant léesce
Isnelement à lui s’adresce,
Qanqu’il onques puet i a point
Baucent li Sangler à cel point,
Et fiert Frobert le Gresillon
Si qu’il l’abat agenoillon ;
Mès tost en estant resailli
Et dit, vos n’avez pas failli,
Sire Baucent, ce dit Frobert,
Foi que je doi sire Robert :
Moult durement vos lo et pris
Qant vos tel chevalier de pris
Avez devant moi abatu,
Moult en sui de joie esbatu.
Sire Frobert, ce dit Baucens,
Par la foi que doi Saint Laurens
Riens se jeu non n’i entendi,
Lors s’assiet et le pié tendi,
Si a feru sans demorée
Tardiz qui a sa chape ostée.
A ferir mist tot son pooir,
Si bien sot son cop aséoir
Qu’il l’abat sus le pavement.
Cil del angoisse que il sent
Le vis et la color mua,
Plus tost qu’il pot se remua,
Qu’il estoit dolanz et plainz d’ire,
Et Tardis li a pris à dire,
Baucent, ne vos corrociez pas.
Atant vint avant Petitpas
Li Paons à qui il dessiet,
Et Tardiz maintenant s’assiet
Qui lor corroz petit redote.
Li Paons mest sa force tote
A ferir, et si s’esvertue,
Mès por le cop ne se remue
Mesire Tardiz de la place ;
Tote li vermeillist la face
Por le cop qu’il ot recéu.
Li Paons s’est aparcéu
Qu’il l’ot blecié, si li escrie :
Tardif, ne vos correciez mie,
Mès bevez, si ne vos anuit,
Encore est bien longue la nuit,
Si joueron plus liement.
Sire, vostre conmandement,
Fait Petitpas. Lors fist venir
Du vin, si burent à loisir,
Et autresi i ot cervoise,
Tant ot béu que il s’envoise.
Qant béu ont à lor voloir,
Si ala Petitpas séoir.
Pelez li Raz s’est avant tret
Tot belement et tot à tret,
Et fiert Petitpas sanz atendre
Tot belement sanz pié estendre,
Et tant i a de force mise
Que li bastons en son poing brise
En deus moitiez par le mileu.
Cel cop vit Ysengrin le Leu,
Si li anuie, ce sachiez,
Envers le Rat s’est avanciez
Et li a dit par grant desroi
Si que bien l’entendi le Roi :
Sire Pelez, grant tort avez
Que vos si durement ferez ;
Grant ire en ai éue au cuer.
Je ne lesseroie à nul fuer
Que n’i fiere, se Diex me gart,
Qui si vodra garder si gart
De mon pooir, se Diex m’aït.
Et mesire Pelez li dist :
Sire Ysengrin, sachiez de voir
Que blecié nel’ vorroie avoir
Por la pelice de mon dos ;
Mielz vorroie que trusqu’à l’os
Me fusse tranchiez en un doit.
Dist Ysengrin, vos avez droit,
Or lessiez le jeu à itant.
Maintenant est sailliz avant
Petit Pourchaz, si li escrie :
Ysengrin, si n’ira-il mie,
Ainz jouerons de si au jor
Tot soavet et par amor.
Pelez, fet-il, avant venez,
Asséez-vos et si jouez.
Il tent le pié sanz demorée.
Atant es-vos de randonée
Mon seignor Pourchaz sanz atendre,
Et vint Pelez le pié estendre
Et li a si grant cop doné
Que il l’a trestot estoné.
Que vos iroie-je contant ?
Tant vont lor euvre demenant
Que le jor vint, adonc finerent
Les plantées et si lessierent.
Sitost conme il lor ajorna
Chascun endroit soi s’atorna,
Et l’Arceprestre Dant Bernart
Fist les sainz soner por Renart.
Au soner sont moult deporté,
Le cors ont au moustier porté ;
Asis l’orent devant l’autel,
Ne cuit qu’el mont éust autel.
L’autel ma dame Pinte estoit
Qui desoz en fiertre gisoit,
Qui en traïson fu ocise.
Iluec fesoit-on son servise
Le jor que ele devia,
Dont tel i ot grant anui a
Qu’el fu mise si richement.
Chantecler ovra sagement
Qant en itel leu fist poser
Le cors de Pinte et reposer :
Ce fu par le congié le Roi
Qu’ele i fu mise sanz desroi.
Miracles apertement fet
Por lui, si que tuit li contret
Garissent qui entrent laienz,
Et autres de goute et de denz ;
Maint très bel miracle i avint
Qant le cors Renart laiens vint.
Devant l’autel fu mis à terre,
Et li Rois a envoié querre
Toz les barons de son empire.
Tuit i vinrent meillor et pire,
Que ne le sorent refuser.
Maintes foiz les ot fet muser
Celui por qui il sont venu.
Devant l’autel paisible et mu
Se sont entor le Roi assis,
Revestir s’en alerent sis
Qui estoient riche et greignor
Por faire au cors Renart honor.
Li un fu Bernart l’Arceprestre
Qui de la Cort fu sire et mestre,
Bruiant le Tor et le Roncin ;
Li quarz Roenel le mastin,
Brun l’Ors et le Cerf Brichemer
Qui moult souloit Renart amer.
Revestu furent à devise
Cil sis por faire le servise
De Renart qui gist en la biere.
Hermeline et ma Dame Fiere
Meinent grant cri et grant dolor.
Bernart qui pale ot la color
De jéuner et de mal trere,
Lors prist un sarmon à retrere
Un petit devant l’evangile.
Biaus seignors, fet-il, par Saint Gile,
Forment me puis esmerveillier,
Renart estoit toz hetiez hier,
Et or est alez à sa fin.
Bien devroit estre net et fin
Qui vodroit estre en ceste vie
Où chascun se muert et devie :
Cist examples devroient prendre
Cil qui adès weulent emprendre
Les mauvestiez et les malices.
Jà ne les garra torz ne lices,
Ne forteresces ne mesons,
Chascuns morra, c’est l’achoisons
Por quoi chascun se doit pener
De bone vie demener.
Renart qui la vie a finée,
Si a en son temps demenée
Vie de martyr et d’apostre :
Autel fin aient tuit li nostre
Et aussi bone repentance,
Que de lui ne sui en dotance
Qu’il ne soit en bone fin pris.
Onques ne fu Renart repris
De mauvestié ne de folie ;
Il a esté sanz felonie
Et sanz malice et sanz orgueil.
Onques jor ne virent mi œil
Prince qui fu de sa vertu :
Se il a volentiers croissu
L’en n’en doit tenir plet ne conte ;
Il n’a où monde roi ne conte
(De ce ne sui-je pas en doute)
Qui n’ait f… ou qui ne f….
F… convient, si con moi semble,
Por ce vos di à toz ensemble
Que croistre n’iert jà deffendu,
Por croistre fu le c… fendu,
Si conmant à toz orendroit
Que qui a le v… dur et roit,
S’il a le c… abandoné,
Le croistre li est pardoné,
Que jà ne li ert reprochié.
Ne il n’est de croistre pechié
Puis que v… soit parti de c…les,
Ne que il fait de faire endoilles
Qu’en met de bouel en bouel,
Tuit se jeuent de ce jouel.
Renart a croissu volentiers,
A Hersent a esté entiers
Ses cuers et à ma Dame Fiere :
Mors est, n’ai paor qu’il me fiere
Por chose que je racont ci.
Biau sire Roi, por Dieu merci,
Fetes crier par vostre Empire
Que qui croistra jà n’en iert pire ;
Le pechié en veil pardoner,
Et se lor pooie doner
Rantes, volentiers lor donroie,
Et lor pechiez lor pardonroie ;
Ne lor pramet pas en pardon
Ci et devant Dieu lor pardon
Qanque por croistre mesprendront :
Tele penitance emprendront
Qu’il en mengeront à estraine
Char toz les jors en la semaine,
Et qui de mon conmant istroit
Et qui volentiers ne croistroit,
Soit home, soit feme ou soit beste,
Et piez et mainz et cors et teste
Li soit de chaenes de fer
Lié es granz tormenz d’enfer ;
Et cil qui mon conmant feront
A joie en paradis seront.
Qant l’Arceprestre ot afiné
Tot son sarmon et terminé,
De son servise s’avança.
Son confiteor conmença
Le bon Arceprestre Bernart,
Puis dist l’oroison por Renart.
Ahi ! Renart, fist-il, amis,
En maint peril vos estes mis
En bois, en forest et en plain
Por avoir vostre ventre plain,
Et por porter à Hermeline
Vostre fame coc ou geline,
Chapon ou oe ou cras oison
Toz jors estoient en seson
Qant les poïez or tenir.
Or estuet à néant venir
Les granz hardemenz qu’avez fez
Et les biens dont estes refez ;
Jà mès tel baron ne morra
Sire Renart : or demorra
Hermeline povre esgarée,
Jamès n’aura de bien denrée.
Bien le saviez procurer,
Or li convient metre curer
Et tremper son ventre et ses mainz,
Du plus estoit, or est du mainz ;
N’ara mès vaillant une alie
Puis qu’ele a perdu vostre aïe.
Qant Bernart ot en sa reson
Bien definée s’oroison
Et aproprié son chapitre,
Brichemer conmença l’epistre
Que bien l’oïrent toz et totes,
Renart, fait-il, sanz nules dotes
Por vos ont esté esbaïes
En granches et en abaïes
Mainte geline et mainte oe,
Maintes foiz vos en est la joe
Remuée et le grenon tors ;
Maint cop en avez sor le dos
Et sus le crepon recéu ;
Maint blanc moine avez decéu
Et fet (dont moult lor doit grever)
Tart couchier et matin lever
Por agaitier ton larrecin.
Meinte geline et maint poucin
Lor as emblé conme felon,
Mès de tot ice t’asolon :
De tot qanque lor as tolu,
Renart, soies-tu asolu.
Li péchiez en soit sor moi mis,
Ainssi absoil-je mes amis.
Brichemer l’espitre fina
Et Ferrant le Roncins qui n’a
Conpainz qui tant sache de guile,
Conmença en haut l’evangile.
Et a dit, hari grascia
Euvangile sequencia
Secondum le Gorpil Renart,
Entendez i, sire Bernart,
Arceprestre estes et seignor,
Entendez i, grant et menor,
Le Roi et trestoz les barons.
Renart, que de voir le savons,
Est morz, vez le ci en present,
Dolante en est Dame Hersent
L’espousée Ysengrin le Leu,
Que maintes foiz en privé leu
Renart l’a tenue adossée.
Meint grant cop et mainte dossée
Li a doné sor la crevace :
Maudite soit cele fendace
Où cop ne pert que l’en i fiere.
Si a-il à ma Dame Fiere
Aussi sovent batu son tro,
Il ne li poise fors du po :
Onques son cul, s’entendu l’as,
Por cop de c…le ne fu las,
Le cul déust avoir cospé,
Qant ele a le Roi acoupé,
Et Hersent a la crope lée,
Déust la Keue avoir ullée.
Renart, n’en soit mis en dotance,
En a fete sa penitance.
S’ame en ira à reculons
En paradis o les mulons
Iluec où les asnes iront
Qant de cest siecle partiront.
Renart, je l’en faz bien promesse,
Sera assis delez l’anesse
A grant joie et à grant delit.
Les gelines feront le lit
En coi il devra reposer ;
Mès itant vos veil-je gloser,
Jà n’i osera le doit tendre
A oison n’à geline prendre.
Autre penitance n’aura,
Por ce qu’en sa vie en ara
Mainte occise par son pechié,
Por ce iert en paradis trichié.
L’Arceprestre sire Bernart
Chanta la messe de Renart :
Qant ele fu tote finée,
Li Rois par bone destinée
En haut devant trestoz parla,
Et Brun l’Ors à soi apela
Et li dist, amis, vos iroiz
Desoz cel pin et me feroiz
La fosse, biaus très douz amis,
Où le cors Renart sera mis ;
A grant honor iert mis en terre,
Si vos weil prier et requerre
Que vos faciez isnelement
Mon bon et mon conmandement.
Et cil respont, vostre voloir,
Quiconques s’en doie doloir,
Ferai, que ne le weil lessier.
Chanteclers, prenez l’encensier
Dont vos le cors encenseroiz :
Brichemer et vos porteroiz
La biere au baron defunt lin
Entre vos et sire Belin ;
Ysengrin se deportera
En la croiz que il portera.
Chascun fera de son labor,
La Chievre prendra un tabor
De quoi ele ira taborant,
Et le Roncin sire Ferrant
Harpera, tiex est mon plesir,
Un son galois tot à loisir,
Ne veil pas que se voist tardant.
Les cierges porteront ardant
Coart li Lievres et Tibert
Li Chaz et l’Escofle Hubert ;
Qant le cors enterrer iront
Les Souriz les sains soneront
Ainssi con mon conseil le loe,
Et li Singes fera la moe.
Bernart metra le cors en terre,
Meillor de li n’i convient querre.
Ainssi con li Rois le conmande
Le font, nus respit n’i demande :
Le cors aportent à grant feste
Qui descoverte avoit la teste.
Brun l’Ors qui la poe avoit grosse,
Ot apareilliée la fosse,
Qui moult bien i ot entendu.
Le cors ont iluec descendu
Qui covert iert d’un paile vert,
Et qant il l’orent descovert
Brichemer par le chief le prist
Ainssi con Bernart li aprist
Que maint mis en terre en avoit ;
A Belin que devant lui voit
A fet Renart par les piez prendre.
En la fosse sanz plus atendre
L’ont mis et couchié doucement,
Et l’Arceprestre isnelement
Geta sus l’eve benéoite
Por ce que chose maléoite
Ne se péust au cors bouter.
Qant vint à la terre giter
De coi Brun l’Ors le voult covrir,
Renart prist les iex à ovrir ;
Merveilla soi que ce estoit,
Paor ot et si se dotoit
Qu’en la terre ne fust enclos.
Il ne tint mie les iex clos,
Que tens n’en estoit ne seson.
Moult ot géu en pamoison,
Ne sot où il avoit esté,
Moult cuida bien estre enchanté.
Qant vit le Roi et le barnage,
Cuer prist en soi et vasselage,
A li garir mist cuer et cors,
Joinz piez saut de la fosse hors.
Chantecler qui tint l’encensier,
Prist as denz, ne le volt lessier,
A tot s’en va tot eslessié
Et se feri en un plessié.
Qant li Rois a aparcéu
Que Renart l’avoit decéu,
Corocié en fu et plein d’ire,
Tot maintenant a pris à dire :
Ore après, franche gent loée,
S’il estoit loins une loée,
J’aroie perdu mon baron :
Qui porra prendre le larron
A toz jorz mès aura m’amor.
Adont s’eslessent sanz demor
Trestuit à grant esperonée
Après Renart de randonée
Qui Chantecler en va portant.
Jà ot erré et foï tant
Qu’el plessié se fu embatu :
Vi chetis, laz ! por coi fuis-tu,
Fet Chantecler, c’est grant outrage ?
Di lor que tu emportes gage
Du tort que l’en t’a fet à Cort :
Il ne te tienent pas si cort
Que tu ne lor puisses mostrer
Et tot apertement conter
Que maugré eus m’emporteras
Et de moi ton voloir feras
Maugré tote la conpaignie.
Me font ore grant vilanie
Qant ainssi me veulent rescorre,
Nus d’eus ne t’aprendroit à corre
Tant séust bien du pié aler.
Di lor, ne lor dois pas celer,
Que por néant te vont sivant.
Renart qui fu aparcevant
De Chantecler qui l’aparole,
Que par engin et par parole
L’avoit autre foiz engingnié,
Si a à parler resoingnié,
Ne volt mot dire, et cil s’escrient
Que tuit de la Cort le deffient
Se il ne lor rent Chantecler.
Certes moult te déust grever,
Fet Chantecler, ceste huée ;
Di lor sanz nule demorée
Qu’il s’en retornent orendroit,
Tu iras à Cort faire droit
De ce qu’en te demandera ;
Que que li Rois conmendera
Feras de gré et volentiers
Conme cil qui est siens entiers.
Ainssi les feras remanoir,
Puis t’en iras à ton manoir
Où tu te porras deporter,
Et moi avecques toi porter
A anuit à bone cuisine.
Se ta fame fust en gesine,
Si eusses-tu por vitaille.
Lors choisi un Vilain qui taille
Ramille por son four chaufer :
A une chaaine de fer
Ot à sa coroie lié
Dont li cloet sont delié,
Un gaignon grant et merveilleus,
Meigres estoit et fameilleus.
Le Vilain qui le chien tenoit,
Choisi le Gorpil qui venoit :
Le chien deslace, si li huie.
Renart le voit, moult li anuie ;
Tant fu corociez et plain d’ire,
Ne sot que faire ne que dire.
Il n’ose vers le chien torner
Ne vers les réaus retorner
Que grant pas le vienent sivant,
Tardiz ù premier chief devant,
Qui tint la baniere levée.
Adonc a sa regne tornée
Renart au travers d’un plessié,
Ne n’a pas Chantecler lessié,
Ainz l’emporte moult esmaiez.
Li mastins ne s’est delaiez,
Ainçois le suit de grant eslès.
Lors pense Renart, se je lès
Chantecler aler, que ferai ?
Car anuit mès ne troverai
Chose dont me puisse souper ;
Et se cil me puet acouper
Qui si me chace por moi prendre,
Il me fera encui aprendre
Conme ses denz savent tranchier.
Je ne doi pas avoir tant chier
Ce Coc conme mon cors demeine ;
D’autre part vint Tardis qui meine
Un moult grant peuple à sa baniere,
Et se il me meinent arriere,
Je serai moult mal atirié,
Que li Rois iert vers moi irié
Por Chantecler qu’il aime et prise ;
Moult me poise de ceste prise,
Seur moi en venra le meschief.
Lors dist Chantecler, par mon chief,
A force convient que vos lesse,
Cist mastin a esté en lesse,
Que trop me suit delivrement :
Va-t’en tost et isnelement,
Je ne t’ai blecié ne malmis,
Et se tu viens à Cort, amis,
Ne me saye par ton desroi
En nuisance devers le Roi.
Non ferai-je, fet-il, biau mestre.
Lors saut desus un arbre à destre,
Si a grant joie demenée,
Et Renart de grant randonée
S’en va fuiant et à grant corse.
Mès li chiens saut qui li reborse
La pel du dos jusqu’au crepon :
Jà fust en male souspeçon
Li Gorpilz de perdre la vie
Qant Tardiz qui a grant envie
De lui prendre i est seurvenu.
De ce li est bien avenu
Que il l’a au mastin rescous,
Mès ainz i ot feru mainz cous
Que il en éust la baillie.
Tantost est entor lui saillie
La conpaignie bele et noble
Que li riche Emperere Noble
I envoia por Renart prendre.
Pris et lié l’ont sanz atendre,
Si l’ont devant le Roi mené,
Qui aussi conme forsené
Jure qu’il le fera deffaire,
Ardoir, escorchier ou detraire,
Ou livrer à cruel torment,
Et Chantecler isnelement
Se plaint de la desconvenue
Qui li est par li avenue.
Li Rois dit que droit en aura
Tel con il demander saura,
Que trop li fist grant mesprison.
Jà ne sera mis en prison,
Ainçois le ferai escorchier,
Ne m’en porrai plus bel vengier.
Sire, fet Renart, entendez,
Jugement de moi entendez,
Au jugement me contendrai
Et vostre merci atendrai :
Onques ne fu nul home né
Sanz léal jugement mené.
S’en puet en vostre Cort trover
Nus qui veille vers moi prover
Que j’aie fet desléauté
Ne traïson ne fauseté,
Aprestez sui de moi deffendre.
Trop voldrent envers moi mesprendre
Cil qui en terre me metoient,
Mon esperance petit dotoient :
Por quel forfet, ce veil oïr,
Me faisoit-l’en vis enfoïr ?
Or me dites vostre semblant,
Estoie-je pris emblant ?
La Cort en fet moult à blasmer,
Bruiant li Tors et Brichemer,
Et les autres que j’aim et prise,
Seront blasmé de ceste emprise.
Chantecler, n’en sui pas en dote,
Avez ceste traïson tote,
Ce m’est vis, quise et porchaciée ;
Mainte mauvestié as braciée,
Ceste li doit-l’en reprover.
Encontre son cors veil prover
Que par lui m’est hui avenue
Icest grant desconvenue
De moi tot vif en terre metre :
Jà ne s’en déust entremetre
De moi faire honte et anui ;
Se recréant ne l’en rent hui,
A qui que il doie grever,
Fetes-moi les deus iex crever.
Renart, dit Chantecler, Renart,
Par la foi que je doi Bernart
L’Arceprestre que je voi là,
Onques en tel guise n’ala
Li afaires con vos le dites :
Ne vos en iroiz pas si quites
De cest jor d’ui con vos cuidiez.
Ahi ! sainte Pinte, or m’aidiez
Si voirement con je recort
Que Renart vos ocist à tort,
Et si conme je n’i ai coupe
Du blasme de coi il m’encoupe.
Vos mentez, fet Renart, traïstres,
Par vostre mençonge féistes
Qu’en terre fui, ce vos créant,
Si vos en rendré recréant
Ainçoiz que li jors soit passez,
Ou à mort plaiez et quassez
Ne poez faillir, ainssi vaille.
Sire, otroiez moi la bataille,
Fet Chantecler à l’Emperere,
Et celi qui recréant ere
Faites ou pendre ou desmembrer.
Il vos devroit bien remembrer
Des anuiz que il vos a fez ;
Par Dieu, penduz iert ou deffez
Iceli qui vaincu sera,
Jà autrement n’en passera,
Et c’est droiz et reson, me semble.
Maintenant les metent ensemble,
N’i vont plus d’aloigne querant.
Tardif, l’Escofle et Ferrant,
Le Gresillon et le Fourmi
Qui moult estoient bon ami
Et preuz et vaillanz sanz desroi,
Cil garderent de par le Roi
Moult très bien et moult sagement.
Qant fet furent li serement,
Si les ont ensemble lessié,
Lors s’est l’un vers l’autre eslessié,
Et Renart qui premier l’assaut,
Enprès Chantecler fet un saut ;
Granz cos li done de la poe.
Et Chantecler delez la joe
Li fet de son bec une roie
Si grant que li clers sans en roie,
Que jusqu’au talon va la gote,
Et des iex ne vit nule gote
De l’erréure d’une live.
Il pert bien la char avez vive,
Fet Chantecler qui le tint cort,
Que li sans toz vermaus en cort :
Folie vos fist à moi prendre,
Je vos ferai encui aprendre
Conment je me sai maintenir.
Se por outré te veulz tenir,
Je lo que te cleimes vaincu,
Pendre te fai, trop as vescu.
Renart qui entent la menace,
Tert le sans contreval sa face
Qui les iex li avoit covers :
Lors a les iex à descovers,
Et dist à Chantecler : traïtres,
Si m’aït Diex, mar le déistes
Que je recréant me rendisse.
Se sein ne sauf de cest jor isse,
Je vos cuit encui doner tele
Mès ne metrez en fu astele.
Lors li cort viguereusement,
Si le feri iriéement
De la poe parmi la hanche,
Qui li derompi la char blanche ;
Trop li a fet dolereus merc,
Parmi la plume del aubert
Fist de sanc saillir plein boisel,
Par le champ en cort le ruisel
Si c’un molin en péust moldre.
Mès bien le cuide rendre et soldre
Chantecler iceste bonté.
Lors li est sus le dos monté
Si le fiert des esperons fort,
Et de son bec le pince et mort,
Que jusques au test li embat.
La destre oreille li abat,
Et l’ueil senestre li creva,
Puis li dist, malement vos va,
Sire Renart, au mien avis,
Jà de cest champ n’estordrez vis,
Que il du cors ne vos meschiée,
Bien est Dame Pinte vengiée
Et Dame Coupée s’entein,
De lancelée et de plantein
Se vodra en vos plaies metre ;
S’Espinart se veult entremetre
Qui est fisicien le Roi,
Bien vos garra ; mès je deroi,
Qui en vos est honnira
Qant la bataille fenira
De vos, et vengiée arai m’ire,
N’arez, ce croi, mestier de mire.
Renart qui la response entent,
Au miex que il set i entent
La grant honte et la vilenie
Que Chantecler par felonie
Li fet, n’encor n’en est lassez.
Adonc s’est Renart porpensez
Que la morte vieille fera,
N’a Chantecler n’adesera
Qui tant li fet et honte et let.
Atant seur li chéir se let,
Et Chantecler le pince et mort
Et Renart fet semblant de mort,
Qu’il ne se crole ne remue,
Ainz tint la boche close et mue
Que voiz n’aleine n’en issi.
Qant Chantecler le vit ainsi,
Lors conme lierre repris
Au bec parmi la keue pris,
En un fossé le traïna.
Or voit bien Renart que il n’a
De nului secors ne aïe,
Car c’est la beste plus haïe
Du monde et de tote gent.
Bien set por or ne por argent,
Por promesse ne por avoir
Ne porroit raençon avoir
Se il estoit aparcéu.
Por son savoir a decéu
Chantecler qui por mort le lesse.
Entor lui ot aussi grant presse
Conme se il fust gent develle.
Rohart et Brune la Corneille
Vindrent au Roi tot pié estant
Et li distrent : Sire, à itant
Lessiez Renart, mors iert sanz faille,
Moult li est de ceste bataille
Hui vilainement meschéu ;
Or est en ce fossé chéu
Tot mort aussi conme une coche.
Blasme i auriez et reproche
Se l’en metoit plus seur li mein,
Males choses l’aront demein
Tot despecié et devouré,
Et vos avez ci demouré
Que son conpaignon a outré.
Li Rois Nobles vint à son tré
Et li barnages s’en torna
En son hostel. Cil qui torna
S’en entra joie demenant,
Renart lessierent remanant
U fossé la gueule baée
Si con l’ame s’en fust alée,
Que ses anemis en fu bel.
Du Roi se départ le Corbel
Et la Cornille dame Brune,
C’onques nel’ sot beste nesune :
U fossé s’en vindrent corant
U Renart iert de fein morant
Qui l’orille ot perdue et l’ueil.
Rohart, fet la Cornille, or veil
Que nos aillons veoir Renart
Encore anuit, ce famelart,
Par les Sainz qu’en quiert en Galice
Li afaiterons sa pelice,
Mors est, nos n’avons de li garde.
Renart les ot et les regarde
Qui blecié fu et se feingnoit,
Ne à elz parler ne daignoit :
Tant se cuidoit iluec tenir
Que il véist la nuit venir ;
Mès cil soffrir nel’ voldrent pas
Qui li vindrent plus que le pas,
Qui de noient ne se doterent.
Ambedui desus lui monterent ;
Rohart primerainz s’avança,
Le bec avant primes hanta,
En la char li embat dedenz,
Et Renart a geté les denz ;
Si le prist par la cuisse et tret
A soi si con l’escrit retret,
Que cil li a lobée toute,
Et la cuisse emprès le cul route,
Vileinement l’a afolé.
Rohart est d’autre part volé
Seur le fossé moult angoisseus.
La Cornille vit Renart seus,
Avecques li tressailli,
Et Renart est en piez sailli,
La cuisse prent, à tot s’en torne,
Et Rohart lessa tristre et morne.
Aussi conme beste esperdue,
Fuiant s’en va sanz atendue
L’ueil crevé, l’oreille cospée.
Il ne trova pas estoupée
La porte de sa forteresce,
Ainz s’i feri à grant destresce.
Qant Hermeline le choisi,
Qui li donast quite Choisi,
N’éust tel joie, ne tel feste.
Qant ele aparcéu la teste
Qu’il avoit si mal atornée,
Adonc a grant dolor menée ;
Ausi firent les Renardiax,
Grant fu la criée et li diax :
En un lit l’ont couchié et mis.
Et Rohart qui moult fu maumis,
A la Cornille se demente :
Dites, fet-il, amie gente,
Conment porrai aler à Cort ?
Trop durement m’a tenu cort
Renart, ne sai que j’en ferai.
Entre mes braz vos porterai,
Fet la Cornille, par mon chief ;
De l’anui et du grant meschief
Sui moult dolente et correciée.
A tant s’est Brune rebraciée,
Si s’en ala triste et dolente
Au Roi qui se sist en sa tente,
Criant : A sire Roi, merci,
Tot mahaignié vos aport ci
Rohart vostre ami le Corbel,
Et si ne m’est mie encor bel
Du larron Renart deputere
Qui à Malpertuis sen repere
S’est mis et a fermé sa porte,
Que la cuisse Rohart emporte,
Mengiée l’a et devourée.
Frans Rois, ne fetes demourée,
Vengiez la honte et la laidure
Que Renart vos fet, qui trop dure.
Vostre baron a desmembré,
Se vos estes bien amembré,
Destroiz quatre foiz vos a fez,
Detranchiez sera et deffez
Li traïtres de ceste emprise.
Rohart a la parole emprise
Et dist : Sire, merci aiez
De moi, car à mort sui plaiez ;
Le pié et la cuisse ai perdue
Dont j’ai la pensée esperdue,
Morir en cuit procheinement.
Mès se je n’en ai vengement
Du desléal, du traïtor
Par qui sui en ceste tristor,
Blasmé en seroiz et à droit.
Li Rois se leva en piez droit
Qant la parole ot et entent,
Et respont, que plus ni atent :
Rohart, vos estes mehaingnié,
Ne cil n’i a riens gaaingnié
Qui ainsi vos a atorné.
Tantost conmande qu’atorné
Soient si baron et si home,
Que par les Sains qui sont à Rome
N’en atendra yver n’esté
Tant qu’aie à Malpertuis esté.
A terre abatre le ferai
Et Renart par force en trerai :
Pendu sera conme larron,
Si que le verront mi baron,
N’en puet partir par autre part.
Biau sire, si n’ira-il pas,
Fet le Tesson sire Grinbert,
Entre moi et frere Hubert
Irons, mès qu’il ne vos desplese,
De Malpertuis passer la hese,
Et à Renart conme home sage
Raconterons vostre mesage
Et li dirons, sel’ conmandez,
A vos viengne, ce li mandez,
Et selonc ce que entendron
Response de li vos rendron.
Li Rois qui fu en piez drecié,
Respondi conme corrocié :
Alez i tost, ainssi le vœil,
Et li dites seur son destre œil
Qu’il me viengne rendre reson
Por coi et por quele achoison
Il a mon baron mehaignié.
Cil n’ont le conmant desdaingnié,
Ainz s’en tornent sanz plus atendre.
Au devant por bon hostel prendre
Ala li Limaçons Tardis :
Cil chevauchent après tandis
Qui ne s’i voldrent arrester.
Ne vos veil totes aconter
Lor jornées, ne qu’il devindrent,
Tant errent qu’à Malpertuis vindrent
Où Renart jut sans nul delit
A grant dolor dedenz son lit.
Hubert, qui le mesage aporte,
Et Grinbert vindrent à la porte,
Si huchierent par grant desroi,
Ovrez au mesage le Roi.
Renart qui entendi la noise,
Conmande qu’à la porte voise
Li portiers qui n’est pareceus,
Et maintenant parole à ceus
Qui si huchoient fierement.
Li portiers vint isnelement
Qui torse et velue ot la keue,
D’en haut desus la barbakeue
Lor escria con preu et sage,
Qui estes-vos ? Somes mesage
Mon seignor Noble le Lion,
Que Renart parler volion.
Qant li portiers l’ot, de volée
La porte qui estoit coulée,
Amont à trere conmença.
Grinbert qui d’entrer s’avança,
I est à reculons entré.
Qant le premier huis ot outré,
Si dist à l’Escofle Grinbert,
Venez avant, sire Hubert,
Bessiez-vos, que basse est l’entrée.
Dit Hubert, je dot que ventrée
Ne face, par Saint Lienart,
De moi encore anuit Renart,
Ici iluecques me tendré,
Tant que vos viengniez atendré,
Miex meing au large qu’à l’estroit.
A Grinbert convient qu’il otroit
Ce que frere Hubert conmande ;
Ainz vint et Renart li demande,
Conme cil qui moult se doloit,
Que il queroit et qu’il voloit.
Grinbert li a dit : Biau voisin,
Je sui vostre germain cousin,
Si vos devroie moult amer.
A Cort vos est venuz blasmer
Mon seignor Rohart le Corbel,
De son domage n’est pas bel
Au Roi ne à sa baronie :
Ne le tenez à vilanie,
Par moi vos mande, et il a droit,
Que viengniez à li orendroit
Por vos de ce blasme escuser,
Ne devez mie refuser
Qu’à Cort ne viengniez por droit faire.
Cousin, de ce n’ai-je que faire,
Ne veil or plus aler à Cort,
Que trop mi a-l’en tenu cort :
Ceste parole me rendroiz
Au Roi qant devant li vendroiz,
Qu’à la mort m’a mis le Corbel,
Et là dehors soz ce tombel,
A cele Croiz, soz cele espine
Me fist enfoïr Hermeline
Vostre amie, vostre parente.
Qui iriée en est et dolente.
Qant hors de la porte seroiz,
Un tombel iluec troverez
D’un Vilain qui Renart ot non,
Desus verrez escrit le non,
Et ainsi au Roi le diroiz
Qant de ci vos departiroiz.
Hermeline vos menra droit
Véoir le tombel orendroit
Qui est tot frès et tot novel :
O lui ira mon filz Rovel.
Ausi, fet Grinbert, l’otroi-je,
Si m’en voiz à vostre congié.
Atant s’en departi Grinbert,
Et avec l’Escofle Hubert
Et Tardis, plus conpaignons n’a.
Tot droit au tombel les mena
Hermeline et Rovel son filz,
Et distrent, Renart le Gorpilz
De qui il ne vos est pas bel,
Biaus seignor, gist soz ce tombel.
Lisiez les letres et l’escrit,
Et si priez à Jhesu-Crist
Que il ait de s’ame merci.
Lasse ! esgarée ! remein ci,
Et mi enfant sont orfelin :
N’ai robe de lange ne de lin,
A grant povreté sui remese.
Atant est entrée en la hese
De Maupertuis, et cil s’en torne
Qui de ci au Roi ne sejorne.
Trové l’ont en ses paveillons,
Et devant lui agenoillons
S’est maintenant agenoillié.
Grinbert qui le vis ot moillié
Du plorer que il fet avoit.
Et qant li Rois Nobles le voit
Plorer, si en fu toz pleinz d’ire,
Et l’Escofle li prist à dire :
Sire, de Malpertuis venons
Dont à engingniez nos tenons ;
Renart est morz et enfoui,
Qant Rohart céans a estui,
Si durement estoit malmis
Renart, qu’il est en terre mis.
La fosse et le tombel avons
Véue, tot de voir savons
Que le Corbel le partua
Qui ore pou de vertu a :
Mehaingniez en est, et periz
Est Renart. Li Sainz Esperiz
De la seue ame s’entremete
Tant qu’en paradouse la mete,
Deus lives outre Paradiz
Où mis n’est povre ne mandis.
Qant li Rois oï la novele
Tot son corroz li renovele,
De Renart fu moult corrociez.
Tantost s’est en estant dreciez
Et dist dolenz et esperdu,
Par grant pechié avons perdu
Le meillor baron que j’avoie,
Ne ne cuit mie que j’avoie
Que je venjance en puisse avoir,
Por la moitié de mon avoir
Ne vousisse qu’il fust ainsi.
Atant fors de son tref issi
Et s’en monta en son palès.
Ici luec de Renart vos lès
La vie et la procession.
Ci fine de Renart le non.
FIN DU ROMAN DU RENART.
- ↑ Le titre de cette branche m’a décidé à la mettre la dernière, quoiqu’on y voie reparoître plusieurs personnages qui sont censés morts d’après les branches précédentes.