Le Roman du Renart - D. M. Méon — 1826/59
Ainssi conme Ysengrin li leus, et li Quos et Tybers li chaz se vindrent plaindre au Roi.
Ensi qu’il parloient entr’eus,
Estes-vous k’Ysengrins li leus
Vint à Cort, de Renart se plaint
Tout de plain dist, c’aime ne se faint,
Conment il le fist despillier
As mastins et le fist cacier,
Et conment Renart le houni
De se feme. Faisant grant cri
Estes-vous le coc Cantecler
Ki de Renart se vint clamer
Pour son fil que mourdri li ot.
N’ot mie bien pardit sen mot
Quant Tibiers li cas miauwant
Vint devant le Roi et criant :
Venjance, Rois, venjance, Rois ;
Tout ensi uslé conme vois
Sui par Renart le traïteur.
Et dist li Rois, vés ci doleur
De cel laron, mais par Saint Pol
Il en pendera par le col.
Lors fist li Rois ses os crier
Et les banieres fors bouter.
As viles, as bours, as castiaus,
As armoiiers est cis geus biaus,
Et as povres gens est moult lait,
Car parmi eaus vont tot li frait.
Ki lors vist venir chevaliers,
Sierjans d’armes et escuiers,
Dus, Contes, Princes et casés,
Bourgois, citoiiens et fievés :
Ains quinsaine ot li Rois gent tant
K’il n’est ki les alast nombrant,
Dont fist li Rois en haut crier
A demain movoir et aler
Viers Malpertruis sans nule atente.
Là péussiés vir mainte tente,
Mainte aucube et maint pavillon,
Onques puis le tans Pharaon
N’ot en un jour Rois autant gent,
Et ce fu Roi Noblon moult gent,
A lendemain bien très matin
Péussiés oïr grant tintin
Al esmouvoir et au tourser :
Véissiés pignons venteler
Et reluire et azur et or,
Et hanir tant boin destrier sor.
Li Rois Tardius le limeçon
Bailla le roial gonfanon,
Et li conmanda l’avant-garde,
Et le lupart l’arriere-garde.
Tout ensi en ordre arouté
Dusqu’à Malpertuis n’ont cessé,
Dont prendent tiere et vont logier.
Par le païs vont li fourier,
Reubent, ardent, talent et prendent,
Ensi tout le païs porprendent.
Le païs ont si net préé
Que moult poi i a demouré,
Et Renart est en son castiel
C’on ot assis, cui n’est pas biel.
Las ! dist Renart, con sui hounis
Par ma feme et con sui traïs !
Mais on dist qui a mal voisin,
Que il a souvent mal matin,
Dont Marcous mie ne mesprist,
Ki à Court en oiant tous dist
Ke sa ferme ert ses anemis.
Tot si puet par moi estre dis
Cis dis : vous ki femes avés,
Gardés trop ne vous i fiés ;
Las ! mon païs voi escillier,
Si ne li ai pooir d’aidier,
Et m’a li Rois assis çaiens.
Hélas ! de lui ne de ses gens
Ciertes garde ne m’en dounoie :
Pris m’a au pet enmi la voie
Sans pourvéance : n’ai pooir
De longuement chi remanoir,
Car tantost seriens affamé.
Çaiens à poi car, vin et blé,
Pain, besquit et autre vitaille.