Le Roman du Renart - D. M. Méon — 1826/58
Einsi conme uns Bouchers qui menoit un buef et un tor et deus chiens, avisa Renart, si le fist pillier au chiens qui moult le domagerent.
Lors atant es-vous un boucier ;
C’acaté ot por gaaignier
Au marcié un buef et un tor
Ki cousterent cinc florins d’or.
Dou marcié s’en venoit par là,
Deus mastins o lui amena.
Sitost con li bouciers coisi
Renart, si cria, or à li,
Voi-le, Taket, pren le, Volant.
Quant Renart l’ot, si vait fuiant.
Li cien l’atainsent et pillierent,
Et navrerent et desakierent,
Mais en le fin lor escapa
Dont notre Signor grascia.
Viers Maupertruis vait son castiel,
Ens est entrés, moult li fu biel :
Tout le bienviegnent fors se feme
Ki durement le mesaesme,
Car jalousie son cuert art
Pour Harouge feme au lupart ;
Pour çou Renart tence et laidist.
Mais Renart esranment le prist,
Si le bati et li copa
Ses treces et fors le bouta.
Ele s’en va et lors dist tant
K’ele se plaindra pié estant
A la Court devant Roi Noblon,
Et li dira la traïson
K’il fist viers lui de le luparde.
A la Court vint que ne se tarde,
Au Roi Noble dist tout ensi
Dont grant gerre mut puissedi,
Car là vint li lupars Hardis,
Et quant il a oï des dis
De Dame Emme feme Renart,
De grant courous esprent et art.
En ce courous et en cele ire
Vint au Roi et li prist à dire :
Rois, je te renc fiez et oumage
Ke tieng de toi et yretage,
Car viers moi as ouvré que faus
De ma feme dont point ne faus ;
A grant gerre si te deffi.
Rois Nobles voit et set de fi
K’il a tort et li lupars droit ;
Viers le lupart li Rois vint droit,
Pardon li prie et offre amende.
Tuit crient que Hardis la prende,
Et il respont, je le ferai
Par un convent que vous dirai,
C’à ost voist sour Renart le rous
Par cui sui de ma feme cous :
Semonre li Rois ses os face,
Si qu’il soient enmi le face
Renart à Malpertruis es près
A quinsaine, et me laist men oès
Faire de ma feme et ardoir.
Et li Rois dist, non ferai voir,
Mais je vous pri por Dieu pardon
Par si que je vous fai ci don
De mon pooir et de ma gent,
Par quoi vous arés vengement
De Renart, se jou onques puis,
K’à ost irai sor Malpertruis,
Et de matin ferai crier
Et oste à saint et oste à per
Et oste sour oste, biaus sire,
Mais que vous pardounés vostre ire
A le Dame et vo mautalent.
Par si l’ot au Roi en convent,
Et li pardouna cel meffait
Par si se jamais en cel fait
Enciet, que cis pardons est nus.
Et li Rois dist, ne vous quier plus.