Le Roman du Renart - D. M. Méon — 1826/64
Si conme Renart envoie Roi Noblon ses letres.
Nous Renart sires de Maupietrui et dou païs entour, maistres dou conseil des grans signeurs et gouverneres de lor regnes, prisiés, amés et honorés où monde dou Clergiet et des laies gens, li qui miens nous vole par tout en essauçant ; conme il soit ensi que vous m’assesissiés en Malpertuis et l’aiiés pris si que on m’a fait entendant, je vous fai assavoir que je le r’arai et dou vostre autant avoec, par quoi me perte ert bien restorée, et Dieu merchi, je ne sui mie ore enclos en Malpertuis, ains sui au larghe et vois par mer et par tiere quant il me plaist, cum cius ki poi crient ne vous ne les vos ; et vous fai asavoir que je sui od Ceraste le sierpent mon signeur et à cui je sui de lignage, et m’a douné un castiel en Orient que on apiele Passe-Orguel, et n’i puet-on aler fors par mer, et ont les apendances dou castiel douze journées de tiere et de larghece autant. Plantevius est de tous biens, de cités, de bours, et de viles plaines de boines gens apris de batailles, et espris de hardiece et desirant dou maintenir, et jou pour çou que je croi que vous soiés tel vous et li vo, vous fai-je asavoir ù je sui, pour çou que vos et vo gent nous vigniés véoir. Et saciés que nous vos receverons desiramment au droit d’armes, au fier des glaives et au taillant de nos espées si conme nos morteus anemis, et al hounour d’amors, ki desirant sommes dou maintenir, et saciés que j’aim par amours et tout li plus grant de mon hostel, et ce nos a douné hardement de mander çou que vous avés oï, et le vous mandons desiramment pour çou que nous puissons tant faire d’armes que celes que nous amons en oient teles nouvieles par quoi eles nous enricissent dou savereus otroi d’amors ; et ce vous doit esmouvoir de venir i, s’en vos cuers a point de hardement ne d’amours, et vous en semong ke vous i venés sour le droit et le signourie k’amors et celes ke amés ont sour vous, et si puissé-je joïr de celi que j’aim, que nous vos atenderons conme gens amoureus, espris d’armes et d’amours en espoir de victore, pour le raison ke nous avons droit, et c’on ne puet tant faire por amors k’amours ne renge doublement. Et saciés que les dis prisonniers que je pris, il sont devenu de mon acort, et Cointeriaus li singes, et Martins ses fius viers qui vous avés moult mespris si conme d’eaus banir, que faire ne déussiés, et avoec tout ce batus et ferus sans raison. Je vous fai assavoir que jou les vengerai se je puis, et si vous fai asavoir que Waukés mes messagiers doit prendre a espeuse Mehaut l’agache, et li corbiaus Tiesselins se marie à Cornille le corneille. Et bien voel que vous saciés que de le guerre qui est entre moi et vous li tors est vos par le raison de çou que vous orés avant. Conme il soit ensi que j’amoie me Dame Harouge feme au lupart, encore n’en séussiés mie, et je pourquis par mon sens que j’en joï ; la coupe en est à tort sour moi ; mais on en doit amors plus demander que moi, ensi conme un home ki a plus béu dou vin que besoins ne li fust, s’il fait aucun visce, on le doit demander le vin, non lui ; et toutes voies le conpere cieus à le fois ausi com je fac ore de çou c’amours me fist faire. Et vous fai assavoir que li meffais est plus grans à vous c’à moi de la guerre, se vous i volés adroit regarder, ki depuliastes à moi de vos amours et m’i menastes. Ki s’en fust tenus ? Ki ? Je ne sai, et sour çou je vous en ai offiert à faire juise et offre encore à venir en Court par sauf conduit que je n’i aie garde ne li mien. Je m’en offre à deffendre en camp mellé conme gentis hom et nobles doit faire, au jour et as eures que mi per qui sunt home de vo Court ensegneront. Ces lettres furent faites et kierkies l’an ke les wesples et li tahon se conbatirent sour le Mont de Liban nonante et un el mois que les ruines foursent.
Quant le letre oïe ot li Rois,
Si s’en est bien sainiés cent fois,
As messagiers dist plains d’ireur :
Messagiers, dites vo signeur
K’en mer ains un mois enterrai,
A Passe-Orguel me gent menrai,
Et sace bien tant k’iere en vie
A le guerre ne faura mie,
Et li dites je le deffi.
Or tost departés vous de chi,
Que devant moi plus ne vous voie ;
Or tost tout troi alés vo voie.
Tout troi s’esbatent et s’en vont
Tant qu’en le grande foriès ont
Encontré le feme le Roi,
Le luparde et le leuve od soi.
Les troi Dames ont saluées
De par Renart, et puis dounées
A cascune unes letres closes
Là ù ens avoit moult de coses.
L’une de l’autre ne savoit
Des letres que cascune avoit,
Dont dist Orghilleuse li noble,
Ki feme ert à mon signour Noble,
As messagiers, ains k’en alés,
De matin à moi revenrés.
Il respondent, nous le ferons,
Prest somes de faire vos bons.
Des Dames sont lors departi
Li messagier, s’avint ensi
Que Dame Orgilleuse apiela
Dame Harouge et dit li a,
Se vous me volés dire voir,
Je vous jure par le pooir
Dieu je vous dirai voir ausi,
Ançois que je parte de chi.
Ausi di-je à Dame Hiersent
K’ele le nous ait en couvent.
Toutes trois se sunt acordées,
Si en ont lor fois afiées.
Hiersent à la Roïne a dit :
Hé ! Dame, c’or dites vo dit.
Volentiers : or me dites dont
Se letres dounées vos ont
De par Renart cist messagier.
Oïl, se Dieus me puist aidier.
Et vous, Harouge ? Oïl, par Diu,
Harouge li dist, d’autel giu
Que nous jués vous juerons,
Car tout ausi vos demandons.
Ele respont, unes en ai,
En haut les moies vous lirai,
Mais c’apriès me lirés les vostres.
Voire par tous les douze Apostres.
Lors ataint de son sain le letre,
K’ele n’i volt plus longhes metre ;
Le sael esgarde et puis rist,
Les Dames le moustre et puis dist :
Je ne lairai jà pour angoisse
K’en haut ne lise. Esramment froisse
Le saiel et la letre ouvri,
Puis conmença à lire ensi.