Le Roman du Renart - D. M. Méon — 1826/65
La letre d’amors ke Renart envoie la Roïne Dame Orgilleuse feme au Roi Noblon.
A Dame biele et boine et sage, bien amée de mon cuer, salus sans nombre et boine amour sans fin, de par celui dont vos savés que cis escris vient, et qui vos bontés fait valoir s’il riens vaut, ki est et sera tant qu’il vivera vos loiaus amis. Très douce amée de men cuer, il n’est riens que je desire tant con de parler à vous, et sans faille jou i ai plusieurs fois parlé ; mais onques je ne vous osai men cuer dou tout descouvrir, pour çou que je ne sui mie assés souffisans pour si haute Dame amer conme vous iestes ; mais com petis que je soie, amors est grande, et boine volentés hierbierghe en mon cuer, ki ne me laissent à autre cose penser c’à vous loiaument amer por paine ne pour travail que j’en aie ; ne encore ne sui je mie si hardis que j’aie mis vo non ne le mien en ceste letre, pour çou se aucuns le trouvoit par aventure, c’on ne séust mie dont ele venist. Si vous pri mierchi come amis, que vous me faciés si grant courtoisie come il afiert à vo bonté. Laissiés me savoir vo volenté, s’il vous plaist, par escrit, et le kierkiés mon messagier qui ceste letre vous donra. Dieus vous gart !
Quant la Roïne ot definée
Se letre, dont i ot risée,
Et nonporquant amé avoit
Renart, mais refroidie estoit
De l’amor Renart : mais remetre
Li fist un poi son cuer la letre.
Souvent oï dire l’avés,
Tost se reprent tisons arsés.
De le letre ont moult de solas
Les Dames, et en font lor gas,
Et en dient mainte parole.
Lors une cançon de carole
La Roïne dist et canta :
Amours me font brisier mon maria—ge
Por l’amor a tel y a.[1]
Puis dist à la louve Hiersent,
Dame, oiiés mon conmandement,
C’est que je voel que vous lisiés
Vo letre en haut et l’ataigniés.
Ele l’ataint sans plus riens metre,
Et puis si lit en haut le letre.
Cascune de cuer l’escouta,
La letre ensement conmença.
- ↑ 7615 J’ai pensé à tel i a.
2736 Se Deu plaist miex m’en venra.