Le Roman du Renart - D. M. Méon - 1826/11
C’est de Renart et d’Ysengrin et dou Lyon
com il departirent la proie.
Pierres qui de Saint Clost fu nez,
S’est tant traveilliez et penez
Par proiere de ses amis,
Que il nos a en rime mis
Une risée et un gabet
De Renart qui tant set d’abet,
Le puant nain, le descréu,
Par qui ont esté decéu
Tant baron que n’en sai le conte :
Dès or conmencerai le conte,
Se il est qui i voille entendre.
Sachiez moult i porra aprendre
Si con je cuit et con je pens,
Se à l’escouter met son sens.
Ce fu en mai en cel termine
Que la flor monte en l’aube-espine,
Prez reverdissent et li bos,
Et oisiax chantent sanz repos
Et toute nuit et toute jor,
Que Renart estoit à sejor
A Malpertuis sa forteresce,
Mès moult estoit en grant destrece
Que de garison n’avoit point.
Sa mesnie ert en si mal point
Que de fain crioit durement.
Sa fame Hermeline ensement
Qui estoit de novel ençainte,
Et estoit si de fain atainte
Qu’el ne se savoit conseillier.
Lors se prent à apareillier
Renart por querre garison,
Tout seus s’en ist de sa meson
Et jure qu’il ne revendra
Jusqu’à tant qu’il aportera
Viande à sa mesnie pestre.
Le grant chemin torne à senestre
Et va en travers la forest,
Que ne li siet ne ne li plest
A tenir chemin ne sentier ;
Bien savoit le bois tot entier,
Que mainte foiz l’avoit alé.
Tant ala que est avalé
Soz le bois en la praerie.
Diex ! dist Renart, Sainte Marie !
Où fu trovez icist biax estres ?
Je cuit c’est paradis terrestres,
Ici feroit bon herbergier
Qui assez aroit à mengier,
Vez ci le bois et le ruissel,
Onques voir ne vit nul si bel :
Vez con il est vers et floriz,
Issi m’aït Sainz Esperiz,
Que moult volentiers i géusse
Se je si grant besoing n’éusse :
Besoing si fet vielle troter.
A ce mot prent à galoper,
Si s’en part tristres et dolenz ;
Mès la fain qu’il avoit as denz,
Qui enchace le leu du bois,
L’en fet partir desor son pois.
Par les prez s’en vet contreval,
Moult regarde amont et aval
Por savoir s’en nul leu véist
Qui à son cuer bien li séist,
Oisel ou lievre ou conin.
Tant va qu’il entre en un chemin
Qui vers une vile avaloit.
Le chemin sieut, et qant il voit
La vile, si jure son chief,
Qui que soit bel ne qui que griet,
Droit à cele vile en ira,
Bien cuide qu’il i trovera
Chose qui li aura mestier.
Let le chemin et le sentier
Qant venuz est près de la vile.
Cil qui savoit assez de guile,
Qui ne volt pas estre véuz,
Par ces haies, par ces séuz
S’en va le pas sentant le vent.
Durement va Dieu reclamant
Qu’il li gart son cors de prison
Et li envoit tel garison
Dont il face sa fame lie
Et ses enfanz et sa mesnie.
Or ne me voil pas de ce taire,
Que en la vile ot un repaire
A un vilain riche d’avoir,
Que se li livres nos dit voir
Où je trove l’estoire escrite,
De ci à Troie la petite
N’ot un vilain si aaisié,
Sa meson sist joste un plessié
Qui estoit richement garnie
De tot le bien que terre crie,
Si con de vaches et de bués,
De brebiz et de lait et d’ués,
D’unes et d’autres norriçons
De gelines et de chapons,
De ce i avoit à plenté.
Or aura-il sa volenté
Renart s’il puet entrer dedenz ;
Mès je cuit et croi par mes dens
Qu’il fera par defors sejor,
Que clos estoit trestot entor
Et li jardins et la mesons
Di pïex agus et gros et lons :
Si coroit entor un ruissel.
Là dedenz avoit arbroissel
De maintes guises, ce sachiez,
Qui tuit erent de fruit chargiez :
Moult par estoit biax li repaires,
Sires en ert Butors[1] li Maires,
Uns vilains entules et riches
Qui moult estoit avers et chiches,
Qar de despendre n’avoit cure,
En l’amasser ot mis sa cure,
Einz lessast plumer ses guernons
Qu’il menjast un de ses chapons,
Ne qu’il éust au feu cuisine
Ne de chapon ne de geline,
Einz les fesoit au marchié vendre.
Mès se Renart i puet main tendre,
Je cuit bien qu’il en mengera,
Jà si garder ne les saura.
Li vilains fu en sa meson
Où n’avoit home se lui non :
Sa fame fu son file vendre,
Li autre furent por entendre
A lor afere trestuit fors.
Renart vint cele part le cors
Qui bien pensoit, n’en dotez mie,
Que la meson iert bien garnie
De ce dont il avoit mestier.
Entre deus blez par un sentier
S’en est venuz jusqu’à la haie,
De laiens entrer moult s’esmaie,
Qar les chapons voit au soleil,
Et Chantecler qui cline l’ueil,
Et les poucins et les gelines
Qui erent lez un tas d’espines
En un paillier où il gratoient,
Mès de tot ce ne se gardoient,
Ainz cuidoient asséur estre ;
Mès Renart qui fu pute beste,
De lecherie frist et art :
Bien voit par engin ne par art
N’i enterra, c’est por noient.
Entor le jardin va et vient
Por véoir et por esprover
Se jà péust partuis trover
Par où il se péust enz metre.
Tant va à destre et à senestre
Renart li rous, li maléiz,
Que par devant le plesséiz
Trova un pel par aventure
Qui ert usez de porreture,
Par là où li regors couroit
Del jardin qant pléu avoit.
Par là en est entrez dedenz
Tot soef, et jure en ses denz
Que quiconques il doie nuire
Si fera-il ses grenons bruire
Ou de chapons ou de geline.
Tapiz s’est desoz une espine,
Que ne volt mie estre véuz.
Ne s’est crolez, ne s’est méuz,
Coiz se tient et puis si escoute.
Chantecler qui point ne se doute
Et qui bien cuide estre aséur,
S’en va en voie de malheur
Parmi le jardin porquerant
Et ses gelines apelant ;
Et tant se porquiert et porchace
Qu’il est venuz devant la place
Là où Renart se fu muciez.
Qant Renart le vit, si fu liez,
Et jure que se Diex le saut,
Il li fera un mauvès saut.
Que que cil à grater entent,
Renart se lieve, si descent
Vers li por prendre, mès il faut,
Car Chantecler en travers saut.
Or est Renart moult malbailli
Qant il ce voit qu’il a failli,
Si n’ot en lui que corocier :
Le cos a pris à dechacier
Et çà et là, et sus et jus.
Chantecler voit qu’il n’i a plus,
A crier conmence à haut ton.
Bertoult qui fu en sa meson,
Saut por véoir que ce estoit
Qui ses gelines chanpartoit.[2]
L’uis a ouvert de son cortil,
S’a véu Renart le Gorpil
Qui ses gelines va chaçant.
En sa meson repere atant,
Si prent deus reseus enfumez
Que maufez li orent donez,
Et dist que se Renart l’atent,
Moult ert iriez s’il ne le prent :
Déable li ont amené
Cil qui bien semble forsené.
S’en revint à son cortil droit,
Et Renart qui véu l’avoit,
Desoz un chol muciez se fu,
Et cil qui pas apris ne fu
Ne d’oiseler ne de chacier,
Sor les chous a pris à couchier
Les reseus trestoz de travers,
Et jure les os et les ners
Que Renart sera engingniez.
Lors s’escrie con esragiez,
En aventure huie et huie,
Jà soit ce qu’il nel’ voie mie.
Ha ! ha ! fet-il, mar i venistes,
Filz à putain, lerres traïtres,
Par çà saudrez par Seint Germain.
Un baston tenoit en sa main
Dont il a les chous reversez
Tant que toz les a detrenchiez,
Si les reverse sus et jus.
Qant Renart voit qu’il n’i a plus
Et que n’i a mestier celée,
Un saut a fet à la volée
Si se fiert en un des reseus.
Or li croist et anuiz et deus :
Malfez l’ont en cel point tenu
Que moult mal li est avenu.
S’il eschape, ce ert merveille,
La roiz entor lui s’entorteille ;
Pris est et par col et par piez.
Or est-il très bien engingniez,
Ne li a rien valu sa guile,
Miex li venist que en la vile
Ne fust venuz ne entrez jà.
Torne et retorne çà et là,
Et qu’il plus torne, plus s’enlace.
Toutevoies tornoie et brace
Por issir, mès riens ne li vaut,
Qar li vilains a fet un saut
Qui bien l’avoit aparcéu,
Et dist qu’il li est meschéu
Qant il est chéuz en sa trape,
Merveilles ert si li eschape
Que du cors ne soit empiriez.
Vers lui s’adresce touz iriez,
Si avoit haucié le pié destre,
Desus la gorge li volt metre,
Qar miex l’en cuidoit mestroier ;
Mès Renart nel’ volt otroier,
Que tost l’auroit espoir blecié.
Si con cil rabessoit son pié,
Renart l’a pris par mi as denz
Si que toutes li enbat enz ;
Serre les denz et puis la bouche
Si que l’une dent l’autre touche :
Moult les a bien Renart serrées,
Que d’outre en outre sont passées.
Qant li vilain se sent blecié
Et vit son pié par mi percié,
Le sanc li mue et la color,
Pasmé chaï de la dolor ;
Et Renart le tint toutevoie,
Qui à son cuer avoit grant joie
De ce qu’il l’avoit si amain,
Et jure Dieu et Saint Germain
Que il ne li eschapera
Devant que son plaisir fera,
Que bien set qu’il sera frapez
Se il li estoit eschapez ;
Que ne porroit oster son cors
Des reseus s’il n’en est mis fors
Par tel qui séust la maniere :
Por ce dist que la mort le fiere
S’il li oste du pié les denz.
Et li vilain qui jut adenz
Tout issi con il estoit lons,
Est revenuz de paumoisons.
De Renart se cuide eschaper,
Si li prist le groing à taster :
La bouche li voloit ovrir,
Mès Renart ne le volt soufrir,
Ançois li va moult anuiant
Que li vilains le vet baillant
As pouces qu’il a durs et gros.
Toutes voies n’est pas tant os
Que à la bouche li adoise ;
Et Renart qui vit à malaise
Qant voit que durement le taste,
Si giete les denz, si le hape
Avec le pié par la main destre.
Or est bien li vilain à mestre,
Bien le va Renart mestroiant,
N’eschapera, c’est por noient.
Il éust fait greignor savoir
S’éust lessié, ce sai de voir,
Renart en pais querre sa vie :
Moult ot emprise grant folie
Qant le volt prendre, mar le fist ;
Tant grate chievre que mal gist.
Bien se cuida de lui vengier,
Or est chéuz en son dangier,
Car il n’en aura jà pitié.
A tout le mains n’a-il c’un pié
Et une main en se baillie.
Renart a sa geule saisie
Del pié destre et del autre main,
Moult va menaçant le vilain,
Et dist qu’il lui toudra la vie
Du cors, foi que il doit s’amie,
Que jà n’en aura raençon :
Miex li venist estre Alançon
Que il fust chéuz en ses mains.
Grant péor avoit li vilains,
Ne set que fere ne que dire,
Des eulz pleure, du cuer sopire
Et maine ileuques moult fort vie,
Tot emplorant merci li crie :
Sire Renart, por Dieu merci,
Lessiez moi, por Dieu vos en pri ;
Conmandez moi ce que vodroiz,
Et jel’ ferai, qar il est droiz,
Et vostre hom serai toz jors mès.
Filz à putain, vilain punès,
Fet Renart, qu’alez-vos disant ?
Moult m’aliez ore hui despisant,
Et moult me cuidiez bien prendre,
Que vos reseus alastes tendre
Parmi le jardin conme fox ;
Mès si me puist aidier Saint Pox,
Li jeus s’en va en autre guise,
Venus en estes à joïse,
Vos le conparrez hui moult chier.
Et cil qui ne se puet vengier,
Si pleure et crie et fet grant duel :
Sire, fet-il, à vostre voil
Feré du tout mès, conmandez.
Tessiez, dist Renart, ne jenglez,
Filz à putain, traïtres sers,
Que par mes doiz et par mes ners
Je vos metré en male paine,
Ne m’eschaperez des semaine :
Bien me cuidiez avoir pris,
Mès je vos ai à mes denz pris.
Or estes-vos en ma prison,
Jà n’aie-je mès garison
Se je ne vos faz tot anui :
Au mains jéunerez-vos hui,
N’avez pooir de vos movoir.
N’en prendroie pas tot l’avoir
L’Emperéor o tout le mien,
Foi que je doi Saint Julien,
Que je ne vos face contraire.
Renart, por amor Dieu ne faire,
Ne me fai ore pas du pis
Que tu porras, se j’ai mespris
Vers toi, moult très bien m’en recort,
Certes j’en ai éu le tort,
Mès je suis près de l’amender
Si con vos vodrez conmander :
Jà n’irai contre vo conmant,
Ançois le sachiez vraiement
Que je le voil et si l’otroi,
Que moi et tot le mien metroi
Du tot en tot en ton esgart.
Ne devez pas, se Diex me gart,
Refuser si très bele amende,
Que je sui garniz de viande
Tele con à vos est mestier,
Si vos en voudrai aaisier.
Plus en ai conme ci entor,
Por Dieu fetes moi ceste amor ;
Vostre home lige devendrai,
Jamès voir en lieu ne serai
Dont vos doie venir domage :
Por Dieu qar prenez cest homage,
Ne soiez vers moi si crueus,
Liez poez estre qant hons tieus
Qui si est et puissans et riches,
Velt devenir vostre home liges.
Qant Renart le vilain entent
Qui si fort pleure et se repent,
Et dist que il a grant pesance
De l’outrage et de la viltance
Et de la honte qu’il li fist,
Pitié l’emprent et si li dist :
Tes-toi, vilain, ne plore pas,
A ceste foiz mal n’i auras,
Mès garde-toi de renchaoir,
Que si puisse-je mès véoir
Ne ma fame ne mes enfanz,
Nus hons ne te seroit garanz
Nel’ te féisse comperer ;
Mès ançois que te lesse aler,
Vilain, me bailleras ta foi
Que par les tiens ne que par toi
N’auré ne honte ne domage,
Et que tu me feras homage
Si tost con je lessié t’auré,
Et que tu à ma volenté
Metras tot ton avoir et toi.
Et dist li vilains, je l’otroi
Tout issi conme vos le dites ;
Issi m’aït Sains Esperites
Que je n’aim riens tant ne desir
Con de fere vostre plaisir.
A icest mot sa foi li tent
Li vilain, et Renart la prent.
Or sachiez que bien le pot croire
Trestout aussi con un provoire,
Qar li vilains estoit entiers.
Si ne m’en tort pas volentiers,
Vilain, ce dist Renart, entent,
Tu me fiances loiaument
Que tu feras à mon esgart.
Voire, si ait Diex en moi part
Con je volentiers le feré,
Que por nului je nel’ leré,
Ainz le feré du tout en tot.
Puis que dit l’as, je point n’en dot,
Fet Renart, qar tu es prodom,
Au mains en as-tu le renon,
Moult ai oï de toi parler.
A cest mot l’a laissié aler.
Cil qui avoit esté grevez,
A grant paine s’en est levez,
Et puis devant lui s’agenoille,
De ses lermes les piez li moille
Si li fait homage en plorant,
Qu’il n’i ala plus demorant.
Envers le mostier sa main tent,
Si li a fait le sairement
Con estuet à fere à homage,
Et li amende tot l’outrage
Que il l’en avoit fet devant.
Moult l’en a bien fet son créant
Con cil qui estoit péouros,
Puis li dist, sire, or direz-vos
Trestot ice qui vos plaira,
Et je sui cil qui le fera
Si conme voudrez à devise,
Tot à mon pooir sanz faintise.
Or dont, dist Renart, vien avant,
Si me deslace tout avant
De ton reseus qui trop me grieve.
Maintenant li vilain se lieve,
Si a fet tout à sa devise ;
Et Renart qui en mainte guise
Engingne la gent et deçoit,
Deslié l’a, si le conjoit.
Encor n’a-il pas oublié,
Amis, tu m’as ore afié,
Fait-il, que trestot mon voloir
Me feras selonc ton povoir ;
Mès certes tu en seras quites
Por mains assez que tu ne quides :
Je te feré bien ton feret,
Aporte moi ton coc noiret
Que j’ai hui toute jor gaitié,
Se tu veus avoir m’amistié,
Si le me baille par le col ;
Par la foi que je doi Saint Pol,
Jamès riens plus ne te querré,
Ainz te di que je te feré
Seignor de moi et de ma terre.
Bertoult qui ne volt pas la guerre,
Li dist, sire, vos dites mal,
Que par le Pere esperital
Li cos est trop dur à mengier,
Se vos le volez eschangier,
Il a bien deus ans trestoz plains ;
Mès je vos donré de mes mains
Trois poucins tendres, se voulez,
Dont vos serez bien saoulez,
Et vos feront à vostre cuer
Greignor bien, foi que doi ma suer
Dame Litouis de la Monjoie :
Qar li cos a, se Diex me voie,
Et les ners et la char trop dure.
Vilain, fait Renart, je n’ai cure
De tes poucins, tuit soient ton,
Mès se tu veus fere mon bon
J’auré le coc que je demant.
Sire, fet-il, vostre conmant
Ferai par droit et par raison,
Que je sui vostre liges hom :
Par mon chief orendroit l’auroiz
Puis que vos tant le desirrez.
Atant let li vilains le plet,
Et maintenant au coc s’en vet,
Si l’a chacié par le porpris,
Et tant chaça que il l’a pris
Et vint à Renart, si li baille :
Tenez, sire, se Dex me vaille
Ne foi que je doi Saint Mandé,
Miex vosisse que demandé
M’éussiez deus de mes gelines
Que véez là sor ces espines :
Qar je l’amoie durement
Por ce que menu et sovent
Les me chauchoit l’une après l’autre ;
Mès puis que vos ne volez autre,
Il est bien droiz que vos l’aiez.
Vilain, or ne vos esmaiez,
Que par mon chief bon l’avez fait
L’omage que m’aviez fait,
Vos claim d’ore en avant tot quite.
Sire, dist Bertout, la merite
Vos en puisse Diex rendre à l’ame,
Et Sainte Marie ma Dame.
A icest mot si se depart
Bertoult de mesire Renart,
Si le conmande moult à Dé.
Et Renart qui bien l’a gabé
Et pris le coc et si s’en vet
Droit à Malpertuis son recet.
Illec cuide rungier l’eschine
Entre lui et Dame Hermeline
Sa fame que il tant amot ;
Mès encore ne sot-il mot
De ce que il li pent à l’ueil.
Si con il vint desoz un tueil
Qui ert lez le chemin à destre
Desoz une vile champestre,
Garde et oï le cos qu’il porte
Qui durement se desconforte :
Des eulz pleure moult durement,
A Renart grant pitié en prent,
Si li enquiert por qoi il pleure.
Por qu’or maléoite soit l’eure,
Fet li cos, que onques fui nez,
Moult m’est or bien guerredonez
Le servise que je ait fait
A l’ort vilain mesel deffet
Que je ai longement servi ;
Mal soit l’eure que je le vi !
Qar bien sai que j’auré la mort.
Par Dieu, fet Renart, tu as tort
Qant por ce te vas dementant :
Par l’ame ton pere ore entent.
N’est-il bien droiz en tote place
Que li sires par raison face
De son serjant sa volenté ?
Oïl, par ma crestienté,
Il se doit bien lessier morir
Por le son seignor garantir
De mort se il est à meschief :
Or n’aies péor, par mon chief,
Ne puet avoir honor greignor
Con de morir por son seignor.
Malbailliz fust et malmenez
Se il ne se fust rachetez
Envers moi de toi seulement,
Si aie-je amendement,
Je l’éusse ocis tot froit mort.
N’aies péor, mès pren confort,
Q’ausinc avoies à morir,
Nus hom ne t’en pooit garir ;
Si te vient miex morir issi
Que autrement, je le t’afi,
Que qant por ton seignor morras,
Avec les Anges t’en iras
Lasus en la Dieu compaingnie
Où auras pardurable vie.
Sire, fet li cos, bien le croi,
Ne sui pas por mort en effroi
Que j’aie à avoir, ce sachiez,
Mès de ce sui plus corrociez
Que li chapon et li gelines
Que véistes lez les espines,
Seront à grant joie mengies,
N’en seront lor ames plus lies
Et du soulaz et de la feste,
Et j’aurai croissue la teste.
Mès grant soulaz me féissiez
S’une chançon me chantissiez :
Ne me chausist qant je morusse,
Bien sai que plus souef en fusse
Assis en la Dieu compaingnie.
Et dist Renart, et je l’otrie :
Est-ce por ce que tu ploroies ?
Et por qoi ne le me disoies ?
Jà por ce ne fai laide chiere,
Foi que je doi ma fame chiere
Moult volentiers la vos diré
Au meillor endroit que sauré
Sanz[3] plus por toi reconforter.
Adonc conmença à chanter
Une chançonnete novele ;
Et qant cil qui par sa favele
L’amuse, sent la bouche ouvrir,
Des êles commence à ferir
Et à batre, et s’en va volant
Desus un orme haut et grant
Qui de l’autre partie estoit.
Et quant Renart ce aparçoit,
Si sot qu’il estoit decéuz.
Desoz l’orme est acoréuz,
Si dist, sire, guilé m’avez.
Renart, dist-il, or le savez,
Devant ne le saviez pas :
Par la foi que doi Saint Thomas
Miex vos venist estre téuz ;
Se vos estes or decéuz
Par trop chanter, si vos tesiez
Qant vos en serez aaésiez
Une autre foiz, se vos en proie,
Et vos alez querre autre proie,
Qar à ceste avez-vos failli.
Renart se tient por escharni,
Ne set que dire ne que fere,
Bien voit que miex li venist tere
Qu’avoir chanté à cele enpainte,
Noiret, fet-il, foi que doi Sainte
Anne qui fu de bone vie,
Bien voi que biau chanter anuie
Et nuit aucune foiz ensemble.
Voir dist li vilain, ce me semble,
Qui dist qu’entre bouche et cuillier
Avient sovent grant encombrier :
Or en sui bien certains et fiz.
Sages fu Catons et recuiz,
Qui ensaigna son filz petit
Q’à son mengier parlast petit ;
Mès ne l’ai pas bien retenu,
Bien voi que mal m’est avenu
De trop parler a ceste foiz.
Or m’en iré, car il est droiz,
En autre lieu moi porchacier,
Ci ne puis-je riens gaaingnier.
Ha ! puant rous de pute estrace,
Alez-vos ent, jà Diex ne place,
Fet soi li cos, ne ses vertuz,
Que ne soiez ars ou penduz
Ançois que li mois soi passez,
Jà m’éussiez les os qassez
Moult putement, jel’ sai de voir,
Se par enging ou par savoir
Ne me fusse de vos estors.
Alez-vos ent, qar par le cors
Saint Marcel, se plus atendez
Vos peliçon ert amendez.
Que qu’il aloient si parlant
Quatre levrier vienent bruiant
Après un porc à grant alaine
Tot contreval par la champaingne ;
Es un brachet après venant ;
Li venéor lor cors cornant
Lesqex vont durement sonant,
Tot le païs vont estonant
De lor huier, de lor corner.
Tant entent au coc à parler
Renart li rous que max feus arde,
Que onques ne se dona garde,
Ainz li sont sor le col chéu.
Adonc se tint por decéu,
Aval les chans s’en vet fuiant,
Li venéor le vont huiant :
Haha, haha, font-il, Renart !
Jà Dex n’ait en vostre ame part !
Se ne fusson si emblaé,
Jà vos éusson effréé,
Que si bien ne vos gardissiez
Que la cote n’i lessissiez :
Trop séussiez certes de frape
Se ne nos lesissiez la chape,
Mès or n’avez garde de nos.
Et cil s’en vet tout péoros
Qui n’a cure de lor acost,
Dedenz un terrail s’est repost
Tant que li chien se sont outré.
Et cil s’en vont tout arouté
Après corant, et font grant noise :
Ne finerent de corre à toise
Qu’il sont entré en la forest.
Qant ce voit Renart, si li plest,
Et dist foi que il doit s’amie,
Que cele part n’ira-il mie
Qu’il puist, ne que il biau li soit :
Bien set se uns d’eus le tenoit,
Que il li donroit el que pain.
A cest mot est venu au plain
Et let le coc dont moult li poise,
Si s’en va fuiant à grant toise
Par un sentier entre deus blez,
Encor se crient d’estre encontrez
Ou de levrier ou de gaignon.
Du blé s’en ist le grant troton
Si se feri en la forest,
Ce est li leus qui plus li plest
Et où il a mains de péur.
Or est aaise et aséur,
Se ne fust la fain qui le grieve.
Sovent garde s’il véist lievre
Ne connin que il péust prendre :
Moult est iriez qant li remembre
Du coc qui si l’a decéu,
Et dist que mal li est chéu ;
Ne prise tot son sens un œf,
Fait se il, se il fussent nœf,
Si les déusse engingnier toz.
Chascuns dist que je sui si proz
Et que j’ai tant sens et savoir :
Certes il ne dient pas voir.
N’a pas grant sapience enclose
En moi qant si petite chose
Con est un cochet m’a boulé ;
Miex vosisse voir qu’afolé
M’éust-l’en d’un pié ou d’un oil.
Mès si puissé-je mès le suoil
De ma meson passer à joie,
Se Diex done que mès le voie,
Je li ferai chier comperer.
Je disoie que buef d’arer
Ne savoit tant con je de guile,
Et un petit cochet de vile
M’a engingnié et decéu :
Ne vodroie qu’il fust séu
Por l’ennor de Costentinoble
Dedenz la Cort mesire Noble ;
Foi que je doi touz mes enfanz
Je en seroie trop dolenz.
Se nus hons le me reprochoit,
Nel’ vodroie por riens qui soit.
Einssi s’en aloit dementant,
Et toutevoies aguetant
Savoir se jà chose véist
Dont sa fame lie féist
Qui en sa meson se demente
Por la fain qui si la tormente,
Et il méismes en baaille,
Mès ne voit chose qui li vaille,
De qoi il est forment irez.
N’est pas trois arpenz mesurez
Alez avant, ce sai de voir,
Qant se prent à aparcevoir
Mon Seingnor Noble et Ysengrin
Qui venoient tot le chemin
Très parmi le bois déduiant.
Es Renart cele part venant,
Et dist et pense en son corage
Qu’il fera Ysengrin domage
Se il puet en nule maniere.
Atant s’en vint à bele chiere
Devant le Roi, si le salue :
Or ça que bien soit hui venue,
Fet Renart, ceste compaignie.
Li Rois ne puet tenir ne rie
Qant il voit Renart devant lui :
Bon jor, fet-il, aiez-vos hui,
Renart, barat qu’alez querant ?
Sire, je vois proie querant,
Fait se-il, par ici entor,
Ne finai dès le point du jor
Por ma fame qui est ençainte,
Et je n’ai mie encor atainte
Chose que li puisse porter
Dont la péusse conforter,
Por la fain qui la destraint fort.
Renart, fet Noble, par la mort,
Bien fez tes afferes sanz nos.
Sire, fet-il, foi que doi vos,
Je ne vos os viande offrir,
Qar ne daingneriez soufrir
Que si petiz hom con je sui
De cors et de force autresi,
Alast o vos en compaingnie :
Miex amez la grant baronie
De vostre Cort avecques vos,
Si con est sire Bruns li Ors,
Baucent et Rooniax li vautres,
Seingnor Ysengrin et ces autres ;
N’avez cure de povre gent.
Renart, fet li Rois, bel et gent,
M’alez gabant, si con moi semble,
Mès or vendrez o nos ensemble,
Se il vos plet et il vos siet,
Et si vos pri qu’il ne vos griet,
Tant que proie puissons trover
Dont nos puissons desjéuner
Entre nos trois, se Diex me voie.
Sire, fait-il, je n’oseroie
Por mesire Ysengrin le Leu
Qui est o vos, que par Saint Leu
Bien sai que il m’a contre cuer ;
Il ne m’ameroit à nul fuer,
N’onques ne li fis par mon chief
Que je sache qui li fust grief.
De sa fame m’a mescréu,
Mès par Dieu et par sa vertu
Onques encor jor de ma vie
Ne li requis-je vilanie
Ne nule chose à ma conmere
Que ne requisisse à ma mere,
Si ne le quideroit-il pas.
Renart, fet li Rois, c’est tout gas,
Ne péust pas estre averé
Qu’en ne vos i éust trové,
Se tant l’éussiez maintenue :
Or n’i ait pas desconvenue,
Orendroit la pès en feron.
Sire, fet-il, le guerredon
Vos en puist rendre Diex à l’ame !
Que foi que je doi à ma fame,
Il a tort et je ai le droit.
Ysengrin amis, ce que doit,
Fait li Rois, que Renart haez,
Par Dieu fox estes qui créez
Tel vilanie de Renart :
Se Dame Diex ait en moi part,
Je ne quit pas qu’il le féist
Qu’en nule guise requéist
Vostre fame de vilanie :
Faites ore une cortoisie,
Pardonez li vo maulalent,
Si serez sauf mon escient,
Que par mon chief grant tort avez,
Que vos ice que ne savez
Fors seulement par oïr dire,
Li portez ne corroz ne ire ;
N’est pas maniere de sage home.
Foi que doi Saint Pere de Rome
Je conois bien Renart à tel
Que nel’ féist por le chastel
L’Emperéor Otovien.
Sire, fet-il, je le croi bien,
Fait se il, qant le tesmoingnez ;
Or donques si ne porloingniez
Et de bon cuer li pardonnez
Le mautalent q’à lui avez.
Ysengrin respont, je l’otroi,
Je li pardoing en bone foi
Ici illeques devant vos,
Jamès n’ere vers lui iros
Jor que la vie el cors me soit,
Ainz voil que mes bons conpains soit.
Après cest mot s’entrebesierent
Cil qui onques ne s’entr’amerent,
Ne jà jor ne s’entr’ameront,
Dire puéent ce qu’il vodront ;
Mès por ce ne remue droit,
Pès ont fete quele que soit :
Devant le Roi l’ont fiancée,
Mès moult aura corte durée,
Que ne pooit estre à nul fuer
Li[4] uns n’ait l’autre contre cuer,
Ne jà ne seront sanz rancune.
Ne donroie pas une prune
En cele pès, se Diex me gart,
Voirs est que c’est la pès Renart
Qui onc ne fina de trichier,
Encor ne le velt pas lessier.
Einssi ont fet pès, ce me semble,
Renart et Ysengrin ensemble,
Après se sont mis au chemin
Nobles avant et Ysengrin,
Et puis en après Dant Renart
Qui moult par est plains de mal art.
Renart, dist Nobles, que feron ?
A ton conseil nos maintendron :
A cest point seras nostre mestres,
Que bien sai que tu sez les estres
De cest bois et toutes les sentes ;
Mès or gar que tu ne me mentes,
Se tu sez nul lieu ci entor,
Ne pré ne pasture en destor
Où nos péussons trover proie,
Qar nos i maine droite voie,
Se tu le sez, se Diex t’avoit,
Chose que li ton cuer covoit,
Lors m’auras à mon gré servi.
Et dist Renart, par Saint Remi,
Je nel’ sai pas certainement
En quel pasture ne conment
Nos truisson proie qui riens vaille,
Mès de tant me recort sanz faille
Que il a çà une valée
Entre deux mons et une prée
Où l’en amaine sovent pestre
L’aumaille de cele champestre
Vile qui est ici delez :
Alons cele part se volez
Por savoir et por esprover
Se porrions chose trover
Que péussons mengier tuit troi.
Par foi, fet Noble, je l’otroi.
A itant s’en vont cele part
Entre seignor Noble et Renart
Et Ysengrin son bon ami,
Mès se Diex plest et Saint Remi,
L’amor aura corte durée.
Si s’en vont la voie ferrée,
Et tant ont le chemin tenu
Qu’il sont dedenz le pré venu
Que Dant Renart lor avoit dit.
Ysengrin regarda, si vit
El chief del pré moult bele proie ;
Or sachiez qu’il en ot grant joie,
Que moult estoit de fain grevez.
Or cuide bien estre arivez
En lieu où il emplist sa pance,
Mès jà n’en soit-il en béance,
Que se l’estoire ne nos ment,
Je cuit qu’il ira autrement.
Lors a aresonné le Roi,
Sire, fet-il, foi que vos doi
Nos avons bon chemin tenu,
Je cuit bien nos est avenu,
Qar je voi ici, ce me semble,
Un tor et une vache ensemble
Qui a avec lui son véel
Laïs et chief de cest prael.
Ceste auron-nos que que il griet,
Mès je vos lo se il vos siet,
Ainz que nos aillons cele part,
Que vos i envoiez Renart
Por oïr et por espier
S’il i a mastin ne bovier,
Ne chose qui nos puist mal fere :
Tost porrions avoir contrere
Se nos issi desporvéu
Estions sor eus embatu ;
Mès il est grelles et menuz,
Si n’iert mie si tost véuz
Come je et vos serions.
Vos dites bien, fet li Lions,
Il est sages et veziez,
Si les aura tost espiez.
Atant a aresnié Renart,
Renart, fet-il, se Diex vos gart,
Sages estes et decevant
Et de toz max aparcevant :
Qar alez et si espiez
Savoir se là jus verriez
Vilain, ne bovier deputaire
Dont nos péust venir contraire,
Qar por noient voir irions
Se nostre preu n’i fesions.
Sire, fet Renart, volentiers.
A itant s’est mis es sentiers
Grant aléure aval le pré.
Tant a et coru et troté
Qu’il est venu au leu tot droit.
Tot entor li garde, si voit
El chief du pré joste l’oraille
Le vilain qui gardoit l’aumaille,
Qui se dormoit desoz un orme.
Tot maintenant cele part torne
Trestout le pas le col bessant,
Durement se va porpensant
Dedenz son cuer que il fera
Et conment il engingnera
Le vilain qu’il ne l’aparçoive.
Souef estuet qu’il le deçoive,
Qar il set bien, s’il le tenoit,
Que malement l’atorneroit,
Sel’ féist volontiers chaoir
Là où ne se péust movoir,
Où povoir n’ait en nule guise.
Adonc a une branche prise
De l’orme, et saut isnelement
Desus issi très belement,
Que onques cil ne s’esveilla,
Et dant Renart qui tant mal a
Pensé et fet puis qu’il fu nez,
S’en est de branche en branche alez
Tant que vint endroit le vilain,
Si jure Dieu et Saint Germain
Que il li fera encui honte.
Que vos feroie plus lonc conte ?
Renart fait conme pute beste,
Qant il li fu desus la teste,
Drece la queue et aler lesse
Tot contreval une grant lesse
De foire clere à cul overt,
Tout le vilain en a covert.
Et il qui l’a sentue s’esveille,
Taste à son vis et se merveille
Que ce est qui si li chiet chaut
Sor son vis de lasus en haut ;
Si prent à regarder amont,
N’i voit nule chose del mont,
Qar li arbres iert trop foilliez,
Et Renart s’estoit tooilliez
En foilles si que n’i paroit.
Et qant li vilains riens n’i voit,
Lors quide que ce soit fantosme
Dont taste à sa main et si osme
Et sent que c’est merde qui put,
Ne fu pas liez qant s’aperçut,
Ainz li anuie moult et grieve.
Tot maintenant d’ilec se lieve
Et s’en cort droit à un fossé
Qui estoit enz el chief del pré,
Si ot bien vint piez de parfont,
Et fu plain d’eve jusqu’amont,
Et jure et dist, se Diex le saut,
Qu’il saura qui est là en haut
Sitost con il ert revenuz.
Qant il est à l’eve venuz,
Si s’acropi por soi laver.
Renart qui bée à le grever,
Saut jus à terre au miex qu’il pot,
Vers lui en est venu le trot
Par derrier que ne l’aparçoive,
Que talent a que le deçoive
A ceste foiz moult malement,
Et si le velt si soutilment
Fere que il ne puist foïr :
Si con il vint de grant aïr,
Li est desus le dos sailliz.
Or est li vilains malbailliz,
Qar ainz qu’il fust aparcéuz
Est-il dedenz l’eve chéuz :
Il ot grant péor de noier,
Si conmença à patojer,
Que volentiers en issist fors,
Mès ainz aura anui del cors.
Se Renart puet en nule guise,
Il est venuz à son juise,
N’en istra mès sanz beste vendre.
Enmi le pré cort Renart prendre
Une pierre qu’il a véue
Grant et quarrée, si li rue
Desus le col par tel aïr
C’onques cil ne se pot tenir
Que il ne soit au fonz alez.
Ysengrin qui se jut delez,
A mesire Noble mostré
Que il n’i avoit demoré,
C’on se delite là aval
Non pas por bien, mès por le mal,
Que onques ne le pot amer ;
Son ami le pot-il clamer,
Mès jà de cuer ne l’amera,
Bel semblant espoir li fera,
Si vodroit-il qu’il fust lardez.
Sire, dist-il, or esgardez
De Renart con est mal voisins,
Bien nos tient or por ses cosins,
Qui tant nos fet ci acorber.
Déables le puist asorber
Qant il nos fet tant de mal trere,
Que il ne vient ne ne repere !
En lui avon bon mesagier
Por querre la mort et cerchier,
Que il revendroit moult à tart.
Qar alon ore cele part,
Si sauron por qoi il ne vient
Et quex essoine le detient.
Je le voi là, ce m’est avis,
Lez le fossé tout ademis,[5]
Où il se gieue et cort et saut,
Moult petitet de nos li chaut :
Il a espoir trové pasture
A son eus, si n’a de nos cure,
Por que il est bien saoulez.
Alons cele part se voulez,
Si sauron qu’il fet et por qoi
Il est remès là. Je l’otroi,
Fait soi Nobles, vos dites bien,
Foi que je doi saint Julien ;
Je li feré comperer chier
Ce que nos fet tant ci juchier :
Se il le fait por nul despit,
Jà n’en aura point de respit,
Ne nus ne l’en sera garant
Se il n’i a cause aparant.
Atant se sont d’ilec levé,
Cele part s’en vont abrivé
Toz plains d’ire et de mautalent.
Et li vilain qui va balant
En l’eve, que Renart destraint,
Avoit jà le cuer si ataint,
Tant l’avoit dant Renart batu,
Que n’avoit force ne vertu.
Jà ot deus foiz au fons esté,
Et Renart qui onc n’ot bonté,
Se barat non et tricherie,
Se pense que moult li anuie
Que tant le fet illuec atendre :
Lors garde entor lui, si cort prendre
Des motes tot plain son giron,
Si li rue tot environ,
Et desus le dos et encoste ;
Li vilains a en lui mal oste
Qui si durement li meffet.
Que vos diroie ? Tant a fet
Renart, et tant li a gité
Motes et pierres à plenté,
Que tierce foiz au fonz afonde,
Qui que soit bel ne qui que gronde.
Or est morz, bien se puet vanter
N’en orra mès nus hons chanter
Male chançon d’ore en avant.
Renart qui le cors Dieu cravant,
S’en est delivrez en tel guise.
Or puéent fere lor devise
De la proie tot sanz péur,
De cestui sont-il aséur
Que jamès mal ne lor fera,
Ne riens ne lor contredira.
Qant Renart ot fet ce qu’il quist
Si conme li plot et li sist,
Et ot feni tot son estor,
Lors se volt metre à son retor,
Qant il voit Noble le Lion
Et dant Ysengrin le felon
Qui tot droit vers lui s’en venoient :
Voie ne sentier ne tenoient,
Par les prez vienent à travers,
Et il fu sages et apers.
Sitost con les aparcéuz,
Encontre va les sauz menuz,
Si les salue gentement :
Bien vaingniez, sire, voirement,
Fet-il, et vostre compaingnie !
Renart, je ne vos salu mie,
Fet Noble, l’en vos déust pendre
Qant vos m’avez fet tant atendre
Sanz venir et sanz repairier.
Sire, foi que doi ma moillier,
Fet soi Renart, je n’en puis mès,
Qar j’ai éu un entremès
Du vilain qui gardoit l’aumaille
Que je trové là en l’oraille
De cel pré dormant conme loir :
Si m’apensai et soi de voir
Que s’il vos savoit ou véoit,
Qu’il vos nuiroit se il povoit,
Si l’ai tant mené, Dieu merci,
Par mon enging que or sui ci
Sains et haitiez et preuz et fors
Et il gist en cel fossé mors
Tot estendu con une raine.
Mès moult en ai éu grant paine ;
Mès toutevoie ai tant ovré
Que nos en somes delivré.
Se d’atendre estes anuiez,
Ne m’en merveil pas, ce sachiez,
Car demoré ai longement,
Et moult anuie qui atent,
Ice dist-on, et il est voirs ;
Mès foi que je doi à mes oirs,
Se vos le voir en saviez
Jà mau-gré ne m’en sariez,
Ainz m’en ameriez, ce croi.
Ore escoutez, je vos diroi
Tot de chief en chief sanz mençonge.
Et il de maintenant li conte
Conment il monta sor l’ormel
Et il chia seur le musel
Au vilain tant que s’esveilla,
Et puis conment il s’en ala
Laver en l’eve du fossé,
Et il a son panel trossé,
Et je sailli à terre après :
Si conme je vin à eslès,
Sailli sus lui à quatre piez
Là où il estoit abessiez
A l’eve por son vis laver,
Si qu’el fossé le fis voler
La teste avant, le cul desus.
Que vos diroie, fet-il, plus ?
Qant je l’oi en l’eve enbatu,
Tant le feri, tant l’ai batu
Que il n’en levera jamès.
De lui auron ore tel pès
Que jamès mal ne nos fera,
Ne chose ne nos desdira
Que nis un de nos fere voille.
Li Rois l’escoute et se mervoille,
Et bat ses paumes et fet feste,
Et jure ses eulz et sa teste
Q’ainz mès ne fu véu tel gieus.
Par foi, dist Ysengrin li Leus,
Tel borde ne fu mès oïe
Ne je ne le creroie mie
Certes se je ne le véoie.
Et dist li Rois, se Diex me voie,
Renart, dis le me tu por voir ?
Il n’i a tel con de véoir,
Fet-il, se vos ne m’en créez,
Alez là et si le véez.
Dahez ait, dist Noble, qu’ira
Et qui jà tant s’en lassera !
Je n’ai mie vilain tant chier ;
Autant ameroie à touchier
A un ort vessel de venain
Con je feroie à un vilain.
Or soit illec et si se gise
Et nos feron à nostre guise
De nostre preu se nos savons
De la proie que nos avons.
Certes grant tort en aurions
Moi et Ysengrin qui disions
Que vos nos voliez trichier ;
Mès or voil-je bien afichier
Que n’a si loial ne si sage
En ma cort, ne de tel corage :
Conme vos n’en a autel beste,
Bien avez la besoingne fete,
Moult miex assez que ne diroie.
Mès or alons à nostre proie,
Si soit partie maintenant.
Ysengrin, or venez avant,
Si festes ceste partisson,
Trop i auroit grant mesprison
Se chascuns n’en avoit sa part.
Et dist li Leus, par saint Maart,
Sire, qant vos vient à plaisir
Il n’est riens que je tant desir.
Qar aussi ai-ge fain moult grant,
Et il me semble tot avant
Que nos avon ci un torel
Et une vache et un véel,
De ce devon partisson fere.
Lors prent en son cuer à retrere
Ce que l’en dit auques sovent,
Que cil qui bien voit et mau prent,
S’il s’en repent, c’est à bon droit ;
Et puis dist que il miex vodroit
Qu’il fust penduz à une hart
Que jà Renart i éust part :
S’il puet, du tout l’en gitera
Si que il jà n’i partira,
Si s’aut porchacier autre part.
Sire, fet-il, se Diex me gart,
Le miex si est or que g’i voie,
Que vos de ceste bele proie
Retenez à vostre eus cest tor
Et icele genice encor ;
A ma dame la Orgueilleuse
Bone sera et savoreuse,
Qar ele est moult et grasse et tenre :
Et je qui ne voil pas tot pranre,
Si auré sanz plus cet véel,
Et cil garz rous de pute pel
Qui n’a de cel viande cure,
Si aut aillors querre pasture.
Moult à grant chose en seignorie,
Qar tot veut fere à sa devise,
De riens ne veut à part venir,
Tout velt à son eus retenir.
A ce déust avoir gardé
Ysengrin, foi que doi à Dé,
Ainz que n’éust partison fete.
Noble a croléun poi la teste
Qant la parole a entendue,
Ne li fu pas à gré venue,
Qar il savoit bien tot de voir
Qu’à son eus voloit tot avoir,
Que que il éust dit avant.
Deus pas avoit passé avant,
Si a haucié la destre poe,
Si fiert Ysengrin lez la joe
Si durement que le charnal
En a abatu contreval,
Si l’a fait durement saingnier.
Renart emprist à aresnier,
Si li a dit, vos partiroiz,
Ore orrons que vos en direz,
Sire Renart qui tant savez,
Or en dites ce qu’en pensez.
Certes je di en verité,
Foi que doi sainte Charité,
Vers vos ne doi-je part avoir,
Mès prenez à vostre voloir
Et nos donez ce que voudroiz,
Qar bien savez, et si est droiz
Que tote la proie soit vostre.
Foi que doi sainte Patenostre,
Fait noble, si n’ira-il mie,
Je voil que ele soit partie
Ançois que de ci vos movez.
Sire, puis que vos le volez,
Fait Renart, je la partirai.
Il m’est avis, au sens que j’ai,
Issi con Ysengrin disoit,
Que ce est le miex qui i soit
Que ce tor à vostre eus aiez,
Miex sera en vos enploiez
Que il ne sera à nul ame,
Et la vache sera ma dame
Qui est crasse et tendre et juénete,
Et vostre filz qui mès n’alete,
Qui a en cest an esté nez,
Aura, se vos si le volez,
A son mengier cel véelet
Qui est tendre et est de let ;
N’aura encor huit mois demain,
Car entre moi et cel vilain
Irons en autre leu chacier
Por nostre vivre porchacier.
Li Rois l’entent, si li fu bon,
Qant il oï que tot fu son,
S’en a de joie fet un saut.
Renart, fet-il, se Diex me saut,
Or me di voir, ne me mentir,
Qui t’aprist primes à partir ?
Sire, fait-il, par Sainte Luce,
Cel vilain à cel rouge aumuce,
Je n’en oi onques autre mestre :
Ne sai s’il est ou clers ou prestre
Qui si porte rouge corone,
Mès bien sai se il est persone,
Qu’il est ou Pape ou Cardonax.
Renart, fait-il, moult par es max,
Tu sez el que ton pain mengier,
Fox est qui de toi fet bergier,
Que par mes eulz ne par ma teste
Il n’a plus vesiée beste
Conme tu es en tout l’Empire.
Bien retiens ce que tu os dire,
Et cil reprent la meillor voie
Qui par autrui sens se chastoie,
Et tu as bien fet, ce me semble.
Or remanez ici ensemble
Entre vos deus, que je m’en part ;
Dit Ysengrin que il se gart
Que une autre foiz parte à droit,
Espoir à tel afere auroit
Qui li feroit encore pis.
Or demorez, que je ne puis
Demorer ici, je m’en vois,
Et vos, porchaciez par ces bois,
Se vos volez, vostre disner,
Qar en voil ma proie mengier.
Toi et Ysengrin, sanz mentir,
Par mon chief bien savez partir ;
Bien m’en acort à vostre dit,
Vos n’en aurez jà contredit
De nul home que biau m’en soit.
Or alez querre que que soit
Se volez, que vos mengerez,
Que jà de cest ne gouterez.
Ha ! sire, fet Renart, ne dites,
Seront-ce donques les mérites
De ce que ci vos amené ?
Certes s’aucun petit n’en é
Poi me porrai de vos loer :
Se vos ne m’en volez doner,
Sire, à cel vilain en donez
Tant qu’il en soit desjéunez,
Qar il est si mal atornez
Que à paine se puet ester.
Miex li venist que l’éussiez
Fet eschacier de l’un des piez,
Se le lessiez si fameilleus.
Ce poise moi, si m’aït Dieus,
Que je ne li ai que doner
Dont jel’ face desjéuner :
Je li donasse volentiers,
Que moult en est mes cuers tendriers,
Por ce que si le voi blecié :
Moult li avez mal despecié
Son chaperon delez la joe.
A cest mot li a fait la moe
Si que ne l’aparçut ne vit.
Noble l’esgarda, si s’en rit
Et dist, Renart, moult sés de bole,
Tu ies issuz de mainte escole,
Diex set bien de quel covenant
Tu me vas ici sarmonant ;
Plus le diz por pitié de toi
Que ne faiz de li, par ma foi :
Car je sai bien, se Dex me voie,
Jà sitost tornez n’en seroie
Con tu li toudroies sa part
Et s’en mosterroies la hart,
Qu’il ne se porroit revenchier.
S’il s’en devoit vis esragier
N’en aroit-il point, par mes eulz ;
Mès je le feré assez miex,
Que foi que doi Saint Esperit,
Jà n’en metré où li chien chit
Ne por vos fez ne por vos diz,
Ainz vos en ferai si oniz
Que jà l’un de vos par raison
Ne gabera son compaignon
D’espaule, de pié ne de cuisse,
Ne d’un ne d’el que conques puisse.
A icestui mot si s’en part
Et lesse enmi le pré Renart
Qui moult fesoit le couroucié
Por Ysengrin qu’il vit blecié,
Et si en avoit-il grant joie ;
Si li a dit, se Diex me voie,
Compere, bien somes guilé,
Bien vos a li Rois afolé
Trestot sanz droit et sanz reson :
Si voise-je en ma meson,
Grant mal a fet et grant outrage,
Bien i porra avoir domage
Espoir encor en aucun tens ;
Et qui voudroit, selon mon sens,
Encontre lui debat ovrer,
Moult bien le porroit comperer,
Je cuit, ou auprès, ou au loing.
Son ami voit-on au besoing
Au miex que s’en puet conseillier,
Et je m’en voil bien traveillier
Por tant que vengiez en soiez.
J’en seroie certes moult liez
Se li véoie anui avoir.
S’en lui éust point de savoir,
Ne de bien ne de cortoisie,
N’éust pas la proie saisie
Si tote que n’en éusson.
Honni somes se nos lesson
A lui issiques defoler,
Qar tost nos porroit afoler
Se nos ne l’osion desdire.
Si lo c’ainz que la chose enpire
Que nos queron et art et guile
Par qoi la venjance soit prise
Por vos trestot premierement
Qu’il a mené si malement
Par la force que il a faite,
Que nostre part nos a tolaite
La proie qui estoit conmune.
Ne se déust fere si brune,
Por ce s’il est par desus nos,
Qar par la foi que je doi vos
Qui estes mes comperes chiers,
Ne sera si mal ne si fiers
Que bien n’en aion la venjance.
Ysengrin ot la covenance
Que Renart li dist et presente,
Que se il velt selonc s’entente
Ovrer et selonc son savoir,
Il l’en fera venjance avoir
De ce que il l’a mal mené
Et il le het plus c’ome né
Por le mal qu’il li avoit fet
Sanz ce que ne li avoit fet
Chose por qoi il le déust
Si mal mener : se il péust,
Il li féist volentiers fere
Chose qui li déust desplere
En tel guise, ce sai de voir,
Que ne s’en puist aparcevoir
Devant que la chose fust fete.
Il s’apense que sa retrete
Ne sera à fin, n’acomplie
Sa pensée, s’il n’a aïe
Et durement ne se porchace
A un home qui auques sache
Et puist dire séurement,
Trut, fet se il, je me dement :
De noient je voi mon compere
Qui plus m’aime ne fet son frere,
Et plus set de barat toz seus
Certes ne sevent vint et deus
Des meillors de la Cort le Roi,
Et je ne li descoverroi
Mon cuer ! Non, qar je n’oseroie ;
Péor ai, se je li disoie,
Qu’il ne m’encusast au Lion,
Qu’il a en lui moult mal cion,
Ce dist-on par tot le païs
Dont il est estraiz et naïs.
Por ce si ne m’i os fier,
Mès ne cuit pas qu’il aut crier
A cort ce que j’ai enpensé.
Avoi ! or ai-je fol pensé
Envers mon compere Renart,
Je ne cuit pas, se Diex me gart,
Que il me mesféist por rien,
Il est preudon, ce sai-ge bien.
Pieça que je l’ai esprouvé,
Et encore l’ai-je trouvé
Jusques ici moult loial home.
Foi que doi Saint Pere de Rome
A son conseil me maintendrai,
Il est mes comperes en lai,
Si pens que ne me mesferoit,
Ne mal ne me porchaceroit.
Issi à lui méismes tence,
Et en la fin de sa sentence
S’acorde à ce qu’il li dira
Et à son conseil en fera
Conment que li aferes aut,
Qar nus tant ne set ne ne vaut
A nul besoing conme Renart.
Lors conmence à dire par art
Paroles con bien afaitiez,
Et si a dit par amistiez :
Biax doz amis, biax doz conpere,
Conseilliez moi si qu’il i pere,
Que vostre conseil m’a mestier.
Jà ne verrai mès l’anuitier
Se de Noble ne sui vengié
Qui si m’a le vis escorchié
Que le cuir en est aval mis :
Por ce le vos di, biaus amis,
Que por moi tant vos travailliez
Qu’à bone foi me conseilliez.
Si feré-je, ce dist Renart,
Par le baron Saint Lienart ;
Mès orendroit n’en est saison,
Alez ent en vostre meson,
Si le lesson ester huimès.
Atant est le conseil remès,
Si vet Renart à son repere,
Et Ysengrin son chier compere[6]
Est retornez à son manoir.
Ici fait Pierres remanoir
Le conte où se volt traveillier,
Et lesse Renart conseillier.
- ↑ Il est nommé Bertoult ci-après.
- ↑ Al. Tempestoit.
- ↑ Voir l’errata
- ↑ Voir l’errata
- ↑
En cel fossé où il s’est mis. - ↑ On lit dans le manuscrit Delavall, no 2718 :
Et Ysengrin le deputaire
Est venus à son domicile,
Sa femme trueve et sa famile.
Chi fait Perrins remanoir
Le livre de Renart pour voir
Duquel s’est volus travillier :
Ysengrin laist à consillier ;
Se par ce meschiet Ysengrin
Li blames en ert sus Perrin.
Chi faut li romans de Renart,
Bien li chiet cui sa fraude n’art.