Le Roman du Renart - D. M. Méon - 1826/10
Si conme Renart et Primaut vendirent
les vestemens au Prestre por un Oyson.
Entre Renart et dant Primaut
Jurent ensemble en un gaut
Jusqu’à tant que l’aube creva
Et que le souleil haut leva.
Lors se sont andui esveillié,
Si ont moult bien apareillié
Conme marchéanz lor fardel,
Et Primaut a pris un hardel,
Et si l’a à son col pendu.
Andui s’en vont col estendu
A la foire, si font grant joie.
Si conme il vindrent enmi la voie,
Si voient venir un Provoire
Qui estoit méuz à la foire
Por achater un vestement ;
Mès il devoit privéement
Chiés un son conpaignon aler
Et avec lui devoit mengier
Privéement en sa meson,
Si fesoit porter un oison.
Renart l’avait apercéu,
Conpains, fet-il, bien est chaü,
Ci voi un Provoire venir ;
Se por fol le poons tenir
Qu’il achatast ces garnemenz,
Que je cuit et croi par mes denz
Que ce sera savoir del vendre ;
Et il porte un oison tendre,
Son soit se le poons avoir,
Car l’en nos feroit pendre, espoir,
S’à la foire les portions :
Si vos di bien que porrions
Escoter de si à la mort.
Et dist Primaut, je m’i acort
Qu’il soient venduz orendroit.
Atant vint li Prestres tot droit
Son chemin et si les salue ;
Son mantel sor s’espaule rue :
Seignors, fet-il, et Diex vos saut !
Renart lieve la teste en haut
Qui de l’oison fu convoitos,
Sire, Diex benéie vos,
Fet-il, et vostre compaingnie !
Si lor a dit, quel vent vos guie,
Dont estes-vos, de quele terre ?
Marchéanz somes d’Engleterre.
Et quele part alez à foire ?
Garnemenz portons à provoire
Si conme l’aube et l’amit,
Bele chasuble de samit,
Et fanon, estole et sorçaintes
Dont nos vendons ensor à maintes
A ces chanoines de mostier ;
Et se vos en avez mestier,
Grant marchié vos en ferion
Tel conme fere porrion.
Et en avez-vos nul ici ?
Oïl, sire, la Dieu merci,
Uns garnemenz avons moult biax
Qui sont liez en noz fardiax.
Fet li Prestres, or soit véuz,
Que por el n’i sui-je venuz,
Se voulez je l’achateré.
Fet Primaut, et je les vendré
Se del avoir avez talent.
Lors a mis son fardel avant,
Si a mostré le vestement,
Et li Prestres li dist briément,
Or me dites, se Diex vos saut
(Longue[1] parole riens ne vaut)
Por combien les porroie avoir.
Volez le, dist Primaut, savoir,
Je sui plus gent, si le diré
Que jà de mot n’en mentiré,
Et si diré, ce cuit, reson :
Se vos m’en donez cel oison,
Porter les porriez touz quites.
Par foi, dist li prestres, bien dites,
Bien m’i acort et ainsi aille.
L’oison prent tost et si li baille :
Primaut le prent, si le soupoise,
Grant joie fait et moult s’envoise.
Sor son col le met, si s’en fuit,
Et Renart, qant corre le vit,
Bien en cuidoit avoir sa part,
Mès jà n’en aura que la hart :
Se Primaut puet, tot son sera,
Primaut prendra et partira.
Einsi s’en vont li dui ami
Qui par tens seront anemi
Mès qu’au partir soient venu.
Lor chemin ont tot droit tenu
Vers un bois qui d’eus estoit près,
Primaut devant, Renart après.
N’ont cure d’acost de vilain,
Por fol tienent le chapelain
Qui les aornemenz enporte.
Renart s’en jeue et s’en deporte,
Et Primaut méismes s’en gabe.
Que vos feroie longue fable ?
Tant ont fet qu’el bois sont entré :
Ambedui se sont aresté
Desoz un chesne en une place.
Primaut qui fu de male estrace,
Prend l’oison, à terre l’a mis,
Si a Renart à raison mis.
Conpains, bien fumes decéu,
Bien en éussions deus éu
Se les éusson demandez :
Renart, fet-il, or m’entendez,
Et l’en boutez les chaz el feu,
Par la foi que je doi saint Leu
Jà de cestui ne mengerez.
Ha ! sire, jà ce ne ferez
Que me jetez de compaingnie,
Ce seroit trop grant vilanie,
Et si seroit pechié et honte.
Renart, fet Primaut, que ce monte ?
Ne m’alez pas ci sermonant,
Et ne m’alez pas ramponant,
N’en ai cure par saint Martin.
Se volez mengier à matin,
Si alez en cel bois tracier,
Où vos vos alez porchacier
Aussi con vos souliez fere.
Renart voit qu’il n’en puet plus fere,
Ne à lui ne se veut combatre,
Grant est, si le porroit bien batre ;
N’a soing de jouer ne de rire,
Des eulz plore, du cuer soupire.
Sa lecherie le demaine,
De lui se part à moult grant paine,
Si li a dit, Primaut, par foi,
Ne me portez pas bone foi ;
Foi que je doi mon filz Rovel,
C’est la compaingnie Tassel
Que vos me fetes voirement.
Puis dist en bas tot coiement,
A droit ai-ge descovenue,
Trop vos ai loiauté tenue ;
Déable m’ont fet si loial
Envers traïtor desloial,
Mès foi que je doi ceus d’Arraz,
S’engin ne me faut et baraz
Dont je sai plus que bués d’arer,
Je le vos feré comperer,
Filz à putain, lerres traïtres,
Ce sont ore bones merites
Que j’auré de la compaingnie
Que vos ai si loial fornie.
Renart s’en va tot sanz arest,
Et let Primaut en la forest
Qui l’oison tient entre ses piez.
Moult fet grant joie, moult est liez,
Moult se conforte et fet grant feste.
Bien li cuide tenir la teste,
Mès ne set pas c’à l’oil li pent :
Fox ne garde devant qu’il prent,
Ne cuide pas qu’en tot le monde,
Tant con il dure à la réonde,
Éust nus hons qui li tolsist.
Lors à asaillir l’oison prist,
Mengier le cuide maintenant.
Estes-vos le voltor volant,
Seignor Mouflart qui queroit proie,
Choisi Primaut enmi sa voie
Qui tient l’oison entre ses piez.
Si coume il vint tot eslessiez,
Las de voler et maz de fain,
Et si avoit tot le cuer vain,
Giete la pate, si le hape.
Primaut tire, si li eschape
La proie et le voltor ensemble.
Li lechieres fremist et tremble
Qant son oison en voit porter,
N’est riens qui le puist conforter.
Après va regardant en haut,
Mès ce nule riens ne li vaut,
Que jà nul bien ne li fera,
Sire Mouflart le mengera
Qui en avoit moult grant mestier.
Ne volt fere autre mestier,
Por mengier s’asist sor un chesne,
Et Primaut vers lui se desresne
Et si l’avoit à raison mis.
Sire Mouflart, il m’est avis
Par Dieu ce est grant desreson
Et avez fet grant mesprison,
Qui m’avez ma proie tolete :
Je ne la vos éusse fete
Por cent livres, se Diex me saut ;
Mès or fetes ça jus un saut,
Et si soiomes bon ami,
Et si partons l’oe par mi,
Si en ait chascun la moitié,
Por Dieu de mi aiez pitié
Que la fain durement me bote.
Primaut, fait Mouflart, riens ne monte,
Onques ore ne vos en chaille,
Cist est miens à la conmençaille,
Et li autre soient tuit vostre.
Je diré une patenostre
Jesui ait de s’ame merci
De cil qui l’aporta ici,
Car il est et cras et rovez.
Ha ! sire, et car m’en donnez,
Fet Primaut, au mains une quisse.
Jà Dieu ne place que je puisse
Voler de ça jus là aval.
Se jà vos fet ne bien ne mal,
Fet Moflart, en lieu que je sache,
De ce n’aurez pas grant dommage,
Que des autres aurez assez ;
Mès je estoie trop lassez
De voler et matez de fain,
Que je ne finai dès hui main ;
Fox seroie par Saint Germain,
Se ce que je tieng en ma main
Metoie deriere mon dos.
La char mengeré, mès les os
Aurez qui sont et cras et tendre.
Vos les aurez s’es volez prendre,
Je les vos geteré là jus.
Primaut voit que il n’i a plus,
Et que il tient tout à vanvole
Certes son dit et sa parole,
Il s’est desoz l’arbre couchiez.
Moult est dolenz et corouciez
Qu’il a einsi Renart servi,
Moult l’amast miex avoir parti,
S’en éust chascun la moitié ;
Mès il avoit tot convoitié,
Si voit or bien tot en apert
Que qui tot covoite, tot pert.
Or lairon de Primaut le conte
A qui Moflart a fet tel honte,
Si vos diron de l’autre part
La contenance de Renart
Qui s’en va parmi ces sentiers.
Certes moult préist volentiers
Chose que il péust mengier
S’il la pouist escobichier,
Et si aloit fort coloiant ;
Mès il n’i a trouvé noient,
Si en est forment corociez.
Par un sentier s’est adreciez
Tout droit au chemin de la foire,
Ne set que dire ne que fere :
Illeques, ce dist, atendra
Savoir se aucuns hons vendra
Dont péust avoir à mengier,
Car il en aroit grant mestier.
De toutes parz va agaitant,
Et qant il ot agaitié tant,
Vit charretiers par aventure
Qui venoient grant aléure :
De poisson chargiez estoient
Que il à la foire menoient,
Si conme harenz et plaïz.
Renart ne fu pas esbahiz
Certes qant il les voit venir,
Du chemin ne se volt foïr,
Ainz se porpense qu’il aura,
Jà li marchéant nel’ saura.
Lors se muce par ces séuz,
Qu’il ne volt pas estre véuz.
El chemin se met de travers,
Si s’estoit couchiez à envers,
Et prent les denz à rechinier
Por plutost la gent enginier.
Si a son balevre retret,
Les eulz clot et la langue tret :
En l’ardille s’est tooilliez
Tant que il estoit toz soilliez.
A merveille resemble mort,
Et cil vienent à grant esfort
Qui le poisson vendre menoient.
Devant eus gardent et si voient
Renart le nain tout estendu,
Et cil qui primes l’a véu,
Esta, fet-il, Renart voi ça,
Je cuit qu’il nos aquitera
Sa pel enquenuit nostre escot,
Ele est bone à metre en sorcot,
Si vos en donré volentiers
Trois sols ou quatre de deniers.
Par foi, dist l’autre, ce est voir,
Je cuit que ce sera savoir :
Vez con a blanche la gorgete.
Or le metez en la charete,
Car ele n’est pas trop chargie,
Moult bien souferra la hachie.
Par foi, compains, bien avez dit,
Or le charge se Diex t’aït,
Nos osterons sempres la pel
A la pointe de mon coutel
Qant nos seromes herbergié.
Et le charretier l’a chargié,
Si l’a covert d’une banastre,
Et tantost se mist à la frape ;
Et si i avoit un panier
Où il avoit bien deus millier
De harens frès : à bone estraine
Mengié en a une dozaine
Tant que tot ot le ventre plain ;
Ni a marchéant ne vilain
Qui s’en soit point aparcéuz.
Et qant Renart fu bien péuz,
Si se conmence à porpenser
Conment il porra eschaper ;
Mès ainz se pense qu’il fera,
Et conment il se vengera
De Primaut qui l’ot enginié.
Un harenc frès a empoingné
Que il en portera, ce dit.
Lors n’i atent plus de respit,
Il joint les piez et fet un saut,
Au charretier dist, Diex te saut !
Bien puis huimès tenir ma voie
Que j’ai fet ce que je voloie.
De fain estoie sormenez,
Et bien me sui desjéunez
De voz harenz à bone estraine ;
Mengié en ai une douzaine,
Bien sai qu’il sont de grant bonté,
Bien valent ce qu’il m’ont costé :
Je vos lez tot le remanant,
Si m’en vois, à Dieu vos conmant
Qui m’a arrivé à cest port ;
Un harenc solement enport,
Ne plus ne mains, bien le sachiez.
Lors s’en va Renart eslessiez,
N’a plus cure de leur acost,
Et cil qui avoir leur escot
Cuiderent, qant ce ont oï,
Esperdu sont et esbahi.
Bien voient que sont decéu,
Et qant se sont aparcéu,
Tuit ensemble le vont huiant.
Et celui qui s’en va fuiant,
N’avoit de lor parole cure,
Vet s’en le trot et l’ambléure
Par valées et par montaingnes,
Et puis par bois et puis par plaingnes,
Tant que il est venuz au leu
Où il lessa Primaut le Leu.
Qant Primaut l’a véu venir,
De plorer ne se pot tenir
Por ce que forfet li avoit,
Car il pensoit bien et savoit
Que il en estoit corouciez.
Lors s’est en son estant dreciez,
Et est encontre lui alé ;
Et qant il furent lez à lez,
Si l’a salué en tremblant.
Et Renart li a fet semblant
Que ne l’ait oï ne véu.
Primaut se tient por decéu
Qant voit que ne li velt mot dire :
Ha ! fet-il, biau très doz sire,
Respondez moi se vos volez,
Ne soiez pas si adolez
Por rien que je vos aie fet ;
Mès se je vos ai rien forfet,
Je sui tot prest deI amender
Si con le vodrez demander,
Jà n’en iré encontre vos.
Par Dieu, ce dist Renart li rous,
Primaut, que ne me gabez mie,
Se vos avez par glotonnie
Tot par vos mengié vostre oison,
Ne m’en dites pas desraison,
Car ce ne seroit pas savoir,
N’en croistriez pas vostre avoir,
Ne vostre avoir ne vostre pris :
Se vos avez vers moi mespris,
Bien sai que vos l’amenderez
Toutes les eures que vodrez,
Et il en sera tans et Leus.
Sire, ce dist Primaut li leus,
Se Diex me gart, je m’en recort
Que fet vos ai anui et tort,
Bien en doi estre ledengiez ;
Mès bien avez esté vengiez,
Car si con mengier le voloie,
Moflart qui aloit querant proie,
Garda, si le me vit tenir,
Vers moi conmença à venir,
Giete la pate, sel’ hapa,
Voirs est que l’oison m’eschapa.
Lors soi-je bien et puis savoir
Li vilain dit reson et voir,
Qui dit qu’entre bouche et quillier
Avient sovent grant enconbrier.
De ce ne me donnoie garde,
Et li voltor point ne se tarde,
Sor un chesnes est avolez.
J’alai après touz aroutez,
Si le proié par amistié
Que il m’en donnast la moistié.
Il dist que mon françois gastoie,
Et que jamès n’en mengeroie
Par haïne ne par amor :
Onques se Diex me doint henor,
Por proier ne por sermonner
Ne m’en volt un petit donner.
Einsi en ai esté trichiez,
S’en sui dolent et corouciez
Qant je onques vers vos mespris,
Si en sui dolens et pensis ;
Ne sui pas sages con vos estes.
S’un fox a ses folies faites,
Après si en vient-il à chief :
Por Dieu, sire ne vos soit grief,
Et si en fesomes l’acorde,
De pecheor misericorde,
En vostre merci me metrai.
Par foi, dist Renart, je l’otroi :
Tort me féistes voirement,
Si le vos pardoing bonement
Puis que vos en metez sor moi,
Je en voudré avoir la foi :
Bone loiauté me rendroiz
D’ore en avant, et il est droiz,
Et vos aurez la moie aussi.
Dist Primaut, je l’otroi issi.
N’i ot plus parlé ne tencié,
Ainz se sont entrefiancié,
Mès se Renart puet voirement
La foi faudra prochainement.
Qant li dui baron ont pès fete,
Primaut qui de fain se deshete,
Garde, si a choisi et voit
Le harenc que Renart tenoit.
Conpains, par le cors Saint Germain,
Qu’est-ce que tu tiens en ta main ?
C’est un harenc, ce dist Renart,
Mengié en ai, se Diex me gart,
A grant plenté et à foison,
Car je trovai un charreton
Qu’en portoit une charretée
Dont j’ai bien ma pance forrée :
Mengié en ai à grant plenté
Certes tout à ma volenté.
Biax compains, car le me donez,
Fet Primaut, foi que me devez,
Que je ne mengai dès hier main,
Si sui tout deshaitié de fain.
Renart un poi se pourpensa,
Dist que volentiers li donra :
Vos l’aurez, fet-il, volentiers,
Jà ne seré si pautonniers :
Atant li tendi le harenc.
Primaut le prist et dist ahenc,
Bien puisses-tu estre venuz !
Moult m’en est or bien avenuz
Que je me moroie de fain,
Ne je ne mengai dès ier main,
Je le vos di tot sanz gaboie.
Cestui mengeré toutevoie,
Si serai plus asouagié
De la fain dont je sui chargié.
Lors l’a maintenant devoré,
Puis a Renart araisonné :
Renart, fet-il, enseigne moi,
Por Dieu et por l’amor de toi,
Conment tu ces harens éus ;
Sans engin avoir nés péus,
Que se je encore en avoie,
Moult volentiers en mengeroie.
Dist Renart, sachiez sanz mentir
Qant vi la charrete venir,
Por ce que trop grant fain avoie,
Je me couchié enmi la voie ;
Si tenoie la teste en tort
Aussi conme se fusse mort.
Sitost conme li charretier
Me virent gesir el sentier,
Si cuiderent à escient
Que je fusse mort vraiement.
Il me pristrent, il n’i ot el,
Que moult desirroient ma pel,
Si me jetent el charretil,
Et je le fis si conme cil
Qui estoit et preuz et legiers.
Si m’en ving tantost as peniers,
Si menjai tant conme je poi,
Et qant assez mengié en oi,
Si sailli jus à tout cestui
Que je vos ai aporté ci ;
Et se tu en veus plus avoir,
Va après, si feras savoir,
Et si t’apareille autresi.
Je cuit et croi par Saint Remi
Que il feront autel de toi.
Par foi, dist Primaut, je l’otroi,
Je vos afi que ge i vois ;
Mès atendez moi dans cest bois,
Et ge irai endementiers.
Par foi, dist Renart, volentiers.
Atant s’en est alé Primaut
Le trot, l’ambléure, le saut
Et le pas que point ne delaie.
La charrete vit en la voie
Qui ert jà de la foire près,
Tote plaine de harens frès ;
Et qant la vit, s’en fu moult liez,
Enmi la voie s’est couchiez,
Trestout estendu là se tint
Tant que le charretier i vint.
Et qant véu l’a, si s’escrie :
Ha ! ha ! le Leu ! aïe, aïe !
Seignors, pensez tost de venir,
Jà le porrons as poins tenir :
Il nos cuide enginier, ce croi,
Autresi con Renart, ma foi ;
Ore venez à grant effort,
Si sarez se Primaut est mort.
Et lors viengnent à grant frapier
Trestuit li autre charretier.
Li marchéant qui erent loing,
Cuidierent que ce fust besoing
Qant il les oïrent crier :
Atant se prenent à haster
Et vindrent à eus les granz sauz,
Mès onques ne se mut Primauz.
Si se sont sor lui enbatu
Là où gisoit tout estendu.
Il est mors, fet li uns : non est ;
Par la cervele Dieu, si est.
Non est, fet li autre, il se faint.
Adonc l’a del baston empaint
Durement, mès il ne se mut.
Un charretier i acorut
A tot un levier en ses mains,
Si l’a feru par mi les rains
Si grant coup q’à poi ne l’a mort,
Et Primaut le sent, si gient fort,
Mès onques ne se remua.
Un des marchéanz l’esgarda
Qui l’avoit véu soupirer,
Lors a pris s’espée à tirer
Du fuerre, si l’en volt ferir.
Et qant Primaut le vit venir,
Si joint les piez et torne en fuie,
Et chascun en après le huie.
Moult est iriez, moult est dolenz,
Bien est batuz por les harenz
Dont il cuida avoir sa part.
Ne fina, si vint à Renart
Qui se gisoit desoz un chesne,
Devant lui vient et si l’aresne :
Renart, fet-il, bien sui traïz,
A poi que n’ai esté honniz,
Li charretier m’ont asailli.
Conment, Primaut, as-tu failli ?
N’as-tu pas des harens mengié ?
A poi n’ai esté mahaingnié ;
Li charretier m’ont malmené,
Onques mès hons de mere né
N’avint en si faite aventure,
Trop m’ont batu à desmesure.
Mal dahez ait li charreton !
N’ont pas esté chier li baston,
A poi que n’ai esté tuez,
Se ne me fusse remuez,
Bien sai ne fusse mès en poine
De ma pel porter des semaines,
Car un marchéant tret s’espée
Qui la m’éust el cors boutée.
Jà ne se fust arestéuz
Se je ne me fusse méuz ;
Mès issi tost con je le vi,
Je sailli sus, si m’en foui
Au plus tost que poi durement.
Il m’ont atorné malement,
Il m’ont tot depiqué le dos ;
Tant me delt la char et les os,
S’ainsi me tient par Saint Germain,
Jamès nul jor ne serai sain.
Compains, dist Renart, vos que chaille ?
Vilain sont déable sanz faille,
Voir de vilain n’est-il nul conte,
Car l’en n’en puet conter me conte.
Vilain si est sanz amistié,
Vilain si n’a d’ome pitié.
Moult cuit que vous estes bleciez,
Mais qant vos estes repairiez,
Vos en devez Dieu aorer :
Car vos venez ci reposer
Un petit, et puis en irons
Savoir se trover porrions
Chose que péussiez mengier,
Bien sai que en avez mestier.
Renart, ce dist Primaut, bien dis,
Issi m’aït Sainz Esperis,
Il me fust ore bien mestier
De reposer et de mengier.
Lors s’est assis joste Renart
Tot souef à senestre part :
Moult se demente et moult se plaint,
Que la fain forment le destraint,
Et si a esté moult batuz
Là où il se fu enbatuz
Devant la voie as charretons.
Et Dant Renart qui deus boutons
Ne donroit pas en son afere,
Se couche un petit au derriere,
Si met son groing entre ses piez
Con cil qui bien est aaésiez,
Car il avoit assez mengié.
Un petitet a someillié
Tant que il fu près de la nuit :
Ne cuidiez pas que il anuit
A Primaut qui lez lui estoit,
Qui la fain forment demenoit.
Qant Renart ot dormi assez,
Et Primaut qui estoit lassez,
Le boute et il est esveilliez,
Et Renart s’est moult merveilliez
Qant se vit de la nuit si près.
Cil qui fu de la fain engrès,
Et qui malement le tormente,
Trestot maintenant li demande :
Renart, fet-il, car me conseille
Par quel engin, par quel merveille
Ge péusse avoir à mengier,
Car moult en ai voir grant mestier.
Renart conmence à porpenser
Conment porra vers lui tenser :
Lors li a dit, foi que vos doi,
Vos en aurez par tans, ce croi,
A grant planté et à foison,
Que ci près a une meson
A un vilain là de delez,
Qui a quatre bacons salez,
Et je sai bien, par Saint Simon,
Par quel endroit i enterron,
Si en aurez en moie foi
Se vos volez venir o moi.
Dist Primaut, la vostre merci :
Or vos levez donques de ci,
Certes car rien tant ne desir
Conme je i puisse venir :
A cest ostel, si con je pens,
Je n’i cuit jà venir à tens,
Ne que j’aie ma pance emplie.
Si ferez par Sainte Marie,
Fet Renart, se me volez croire :
Or venez après moi grant erre.
Renart maintenant si se leve,
Et sachiez que pas ne li grieve
De Primaut que si tost deçoit,[2]
Et li chaitis ne s’aperçoit,
Ançois le sieut grant aléure.
Vers la meson vont l’ambléure,
Bien ont le droit chemin tenu
Tant q’à la meson sont venu.
Renart qui savoit tous les estres,
Regarde par unes fenestres
Si eles estoient fremées,
Mès il les voit toutes barrées,
Et li huis devant clos estoient,
Et cil de laiens se dormoient
Et trestote voir la mesnie.
Renart qui volt fere haschie
Sofrir à Dant Primaut le Leu,
Si s’apensa lores d’un jeu
Que l’autre jor avoit véu.
Bien l’ont visité et véu
Qu’en la meson ot un pertuis
Qui estoit droit deriere l’uis
Du cortil ; cele part s’en vet,
Primaut le sieut à grant esploit
Tant qu’il ont le pertuis trové.
Meintenant sont dedens entré,
Et le pertuis petit estoit,
Et Primaut qui de fain moroit,
Si i entra à grant destrece.
Et Renart au lardier s’adrece,
Qui bien sot le lieu et la place ;
Et Dant Primaut le sieut par trace
Tant qu’il sont as bacons venuz.
Primaut, or t’est bien avenuz,
Fet Renart, que mengier povez
Tant que vos soiez saoulez :
Vez-ci ce que vos ai pramis,
Or del mengier, biax doz amis.
Cil qui estoit de fain destroiz,
A une part s’estoit retroiz,
Si a mengié moult durement.
Ha ! ha ! fet Renart, voirement,
Primaut, vos me servez d’eschar,
Se ne menjus de ceste char,
Dont fui-je fox, par Saint Simon :
Bien puis mengier après poisson
Puis que je sui venu el leu,
Et que je en ai tans et lieu.
Lors ne se volt plus atargier,
Del bacon conmence à mengier.
Primaut menjue d’une part,
Et de l’autre sire Renart
Qui savoit assez plus d’engin
Que Primaut le frere Ysengrin.
Durement menjuent et tost,
Que il estoient en repost,
Et du vilain avoient doute.
Renart si oreille et escoute,
A escouter fu ententis
Qu’il ne volt pas estre sorpris
Se par aventure avenist
Que li ort vilain s’esperist.
Primaut menjue sanz dangier,
A riens n’entent fors à mengier.
Il a tant mengié del bacon
Que il est plus gros qu’il n’est lonc :
Renart, fet-il, qant vos vodroiz
Fors de céanz si nos metroiz,
Que tant ai mengié plus ne puis.
Lors s’en vont droit vers le pertuis,
Et Renart si s’est lanciez hors,
Et Dant Primaut si fu tan gros
Qu’il ne pot le pertuis outrer,
Et lors se prist à dementer
Qant il voit qu’il n’en puet issir.
Ha ! Diex, que porré devenir,
Fet se-il, et que porré fere ?
Renart li dist, q’as-tu, biau frere ?
Que j’ai, fet-il ? par Saint Richier
Tout outre ne me puis fichier.
Fichier, fet Renart, tu te menz.
Et non faz, fet-il, par mes denz,
Je n’en puis issir, jel’ te di.
Or boute ta teste par ci,
Fet Dant Renart, por essaier
Se tu ici la puez fichier
Ne bouter en nule maniere.
La passion au cuer te fiere,
Plus le haoit que nule rien,
Il nel’ disoit pas por son bien,
Ainz le disoit, se Diex me saut,
Por fere li un mauvès saut.
Primaut n’i entendi nul mal,
Adonques s’abessa aval,
Et el pertuis sa teste mist.
Renart at oreilles le prist,
Si sache durement et tire,
A poi le cuir ne li descire.
Il sache en bas et puis en haut,
Et puis desoz, mès ne li vaut
Rien, que il ne set tant tirer
Que d’iluec le péust oster.
Renart, fet Primaut, sache fort,
Se je remaing, c’est sanz confort,
Que je te di sanz decevoir,
Se li vilains pooit savoir
Que je fusse ci enserré,
Je cuit j’aroie trop alé,
Jà envers lui rescous n’aroie.
Et dist Renart, or ne t’esmoie,
Je te dis se je onques puis,
Tu t’en istras par cest pertuis.
A itant d’ilec se depart
Et va el bois fere une hart
Qu’il li volt metre entor la teste.
Qant il l’ot bien torte et bien fete,
Si est arriere repairiez
Conme cil qu’est joianz et liez
Q’a Primaut voit si mal avoir,
Et bien set de fi et de voir
Que ançois qu’il en issi fors
Sera-il corouciez del cors.
Lors li a la hart el col mise,
Primaut, fait-il, en nule guise,
Sachiez, ne vos leroie ci.
Sire, dist-il, vostre merci :
Or tost, por Dieu, et si sachiez,
Gardez morir ne m’i lessiez.
Non feré, fet-il, par ma foi.
Del pié s’apuie à la paroi,
Si sache tant con il plus puet,
Et Primaut del pertuis ne muet,
Ainz le semont de bien tirer.
Et Renart prent à soupirer
Et à gembre moult durement,
Mès ne li vaut néis noient,
Que por riens que il puisse fere
Ne le puet hors del pertuis trere,
Et de sachier ne se recroit.
Diex ! dist Renart, ice que doit
Saint Esperiz et que feron ?
Leré-je ci mon compaignon ?
Nenil que je puisse sanz dote.
Lors r’a conmencie sa rote
Et de tirer et de sachier
Et de tordre et de soufachier,
Que du col jusqu’au haterel
Li a reborsée la pel
Et la char qui dure estoit.
Primaut si a geté un brait,
Que bien sent que il est bleciez,
Et li vilain s’est esveilliez,
Si est sailliz hors de son lit :
Primaut aura jà male nuit
Se li vilains le puet tenir.
Qant Primaut l’a véu venir,
Adonques ot péor de soi :
Ha ! Renart, fet-il, lesse moi,
Que je ne voil ci plus atendre,
Vers le vilain m’estuet deffendre
Ou il m’aroit jà mahaingnié.
Renart l’oï, si l’a lessié,
Qui n’en a pas le cuer dolent :
D’ilec se part, plus n’i atent,
Ne li chaut conment il aviengne
Mès que le vilain ne le tiengne.
Primaut remest en mauvès leu
Li vilains est coruz au feu,
Si a esprise une chandoile,
Et en sa main prist une astele
Et si est venuz à Primaut.
Et Primaut si a fait un saut
Un petitet en loing de lui,
Et cil giete, sel’ consui
Si que desus le dos l’ataint,
A itant la chandoile estaint.
Qant la chandoile fu estainte,
Primaut qui paine a éu mainte,
Est au vilain sore coruz.
Li vilain est au feu venuz
Por sa chandoile ralumer.
Primaut où n’a que à irer,
Le vit au feu boute-culant,
Si est vers lui venu errant :
Par la nache du cul l’a pris,
Et cil à escrier s’est pris,
Aïde ! aïde ! bone gent.
Et sa fame saut erraument
Et prent sa quenoille en sa main.
Et Primaut qui tient le vilain,
Qui ses denz en sa char li boute,
Ne la crient gueres, ne ne doute,
Ne se remue, ne se muet.
Et cele vient qant qu’ele puet
A deus mains hauce le baston,
Sel’ vet ferir sor le crepon.
Boute, sache, tire et empaint,
Et sachiez que pas ne se faint,
Mès tout ice riens ne li vaut,
Car à Primaut gueres n’en chaut,
Por son ferir, por menacier
Ne volt li vilains pas lessier,
Ainz le tient moult bel et moult gent.
Suer, fet-il, apele la gent,
Que je plus endurer ne puis.
Cele s’en part, si ovre l’uis,
A haute voiz durement crie,
Ha ! bone gent, aïe ! aïe !
Céanz sont venu li maufé ;
Jà auront mon seignor tué.
Qant Primaut choisi l’uis ouvert,
Qui le vilain fel et cuivert
Tenoit par les naches as denz,
(Toutes i ot mises dedenz)
Et voit que bien s’en puet aler,
Lors let toute sa force ester,
Si sache que la piece enporte,
Fouiz s’en est parmi la porte :
La fame a sor le sueil boutée,
Si l’a en la boue tornée.
Vers la forez s’en va le cors,
Si a trouvé Renart le rous
Qui en la forez l’atendoit
Et durement se dementoit
Par traïson et par envie ;
Neporqant sachiez que sa vie
N’aime-il gueres ne n’a chiere,
Et si li fesoit bele chiere,
Que ne velt que il s’aperçoive :
Et je crien que il en reçoive
Males soudées en la fin.
Et Primaut ne prist onques fin
Tant que il est à lui venu.
Et Renart qui l’avoit véu
Pensis et si descoloré,
Chiere fesoit d’ome adolé.
Primaut le prent à aresnier,
Renart, dist-il, vels-tu mengier ?
Mengier ! fet-il, par le cuer Dé,
Tu as bien le vilain gabé.
Or me di par l’ame de toi,
S’il t’a blecié. Nenil, par foi,
Fet Primaut, ce sache de voir,
Et si puez bien de fi savoir
Que je li ai fet grant domage,
J’ai une piece de sa nache
Que je t’ai ici aportée.
Lors li a el giron boutée,
Tenez, fet-il, et si mengiez,
Char de vilain si est daintiez,
Ele vaut plus que je n’apel.
Primaut, dist Renart, par ma pel
Et foi que je doi Malebranche,
Char de vilain noire ne blanche
Si n’est preuz en nule saison.
J’ameroie plus un oison
Que à mengier char de vilein :
Que jà ne voie-je demein,
Qui la mangera que je soie,
Car il a là lez une haie
Que vos véez lez ce plaissiez,
Un tropé d’oison encrassiez
Qui trestuit sont et grous et gras.
O est-ce, par saint Nicholas,
Fet Primaut ? ensengne le moi.
Volentiers, foi que je te doi,
Fet Renart qui plain est de mal.
Delez cele haie, el val
En poés trover un tropé,
Il n’i a borgne n’esclopé,
Et sont granz et gras et pesanz,
Si les i garde uns païsanz :
Il t’est bien avenu sanz faille.
Par foi g’irai conment qu’il aille,
Jà ne fineré jusqu’à eus,
S’en aporterai un ou deus
Qu’entre moi et toi mengeron,
Et aten moi lés ce boisson.
Moult volentiers, ce dist Renart,
Par mon seignor Saint Liénart,
Fet Renart, or saches de fi
Que je ne me movrai de ci
Por nule chose que je voie,
Et t’atendrai en cele voie.
Primaut s’en va, Renart remeint,
Ne quit mie que se demeint
Con esbahi ne conme fol,
Et sovent en jure son col
Que Primaut sera mal venus
Se il i puet estre tenus.
Atant s’asist enmi la voie,
Et Primaut s’en va totevoie.
Con il fu près, cele par saut,
Un en a pris que pas ne faut :
Il s’en voloit metre au retor,
Mès tost l’aperçut le pastor,
Et li a hué deus mastins.
Primaut li freres Ysengrins
Les aperçut, si s’en fuit,
Et li chien corent après tuit,
Tuit esleissié et si l’aeinnent ;
Por un petit que nel’ mahanent.
A moult grant paine lor estort,
Fuit-s’en delivrement et tost
Tant que li chien l’orent perdu ;
Droit à Renart en est venu.
Renart, fet-il, par le cuer bé,
Tu m’as hui honi et gabé
Qui m’envoias o les chiens :
Il ne t’en puet venir biens,
Et grant mal t’en pot avenir.
Adonques le corut saisir,
Et li a dit, sire Renart,
Vos savez trop engin et art,
Se je ne vos reng entreset
Le mal que l’en m’a par vos fet.
Vos m’envoiastes as oisons,
Vos i saviez les gaingnons,
Por ce n’i voliez venir.
A icest mot le va ferir
De sa pate delez la face.
Dit Renart, se Diex bien me fache,
Vos n’estes mie bien senés
Qui ci ilueques me batés
Sans forfet, ce est mesprison.
Par ce se je sui petit hom
Si me batés et ledengiés,
Si m’aït Dex, ce est pechiés,
Et par la foi que je vos doi
Je m’en irai clamer au Roi
Et à la Roïne et à touz.
Par qoi estes-vos si estoz
Et qui vos a forfait néent ?
Vos me vendés le mautalent,
Pechés est et desloiauté,
Se Dame-Dex me doinst santé,
Fet Primaut, vos estes honis,
Par vos ai esté escharnis
Et batu et mal atorné,
Jà ne vos sera pardoné,
Jà ne morrés que par ma mein,
Se Dex me doint véoir demein.
Renart li respondi en haut,
Par ma foi, mon seignor Primaut,
Ce seroit folie et grant tort,
L’en vos demanderoit ma mort
Se vos m’aviés ore ocis ;
Je ai enfans et de grant pris
Qui bientot, se il le savoient,
L’ame de ce cors vos trairoient
Se hors du païs ne fuiés,
Jà raençon n’i auriés.
Qant Primaut s’oï menacier,
Si n’ot en lui que coroucier :
Par la cheveçaille l’a pris
Conme cil qui est d’ire espris ;
Contre terre l’a trebuchié,
Sor le ventre li a marchié,
Durement li foie la pance.
Or est Renart en grant dotance,
Moult a grant péor de morir,
Et Primaut conmence à ferir
Durement qui ne se faint mie ;
Et Renart doucement li prie
Merci por Dieu et por son non,
Si li doint Diex confession,
Que onques riens ne li forfist.
A Primaut grant pitié en prist
Qant l’a oï merci crier,
N’a talent de lui plus foler :
De ce q’a fet moult se repent,
Renart, fet-il, à moi entent,
Tu m’as fet moult mal atorner,
Au vilain m’as fet mal-mener
Primes aval et puis amont ;
Mès, par trestos les seinz du mont
Qant vos de moi escaperoiz,
Jamès autre ne gaberoiz.
Si redit Renart, saches bien
Que je n’i savoie nul chien,
Ne rien née fors le vilein ;
Se Dex me doinst véoir demein
N’i savoie nul destorbier
Par quoi me déussiez tochier ;
Mès se de ci puis escaper,
Je m’en irai au Roi clamer
Et à mes fils et à ma fame,
Et à la Roïne ma dame.
Qant Primaut l’a oï parler
Del Roi à qui s’ira clamer,
Durement en fu effréé :
Renart, or te soit pardoné,
Fet Primaut, ce que tu m’as fet ;
Je te pardoins le tuen meffet,
Et je te leré ore atant.
Se jà Dex à nul bien m’amant,
Se icestui m’est pardoné
Jamès jor ne te mesferé,
Ice te di-je tot por voir.
Se je ce pooie savoir
Que jamès ne me forferoie,
Certes mes bons amis seroie
A trestos les jors de ta vie.
G’en ai, dit Primaut, grant envie,
Et bien t’en aséureré,
Un serement te jureré
Par quoi tu à itant me croies.
Se tu ce, dit Renart, fesoies,
Bien t’en seroies aquité.
Foi que doi seinte Charité,
Fet Primaut, je moult volentiers :
Où sera trové li mostiers
Où ge feré le serement ?
Renart respont, par seint Climent,
Je vos metrai bien à la voie
Se Dex bien et conseil m’envoie.
Atant s’est pris à porpenser
Conment il le puist vergonder.
Lors se pense qu’il le menra
A un piege que grant pieça
Savoit en ce plaissiez laenz ;
Si avoit dit entre ses denz
Que se iloc prendre le pot,
Don a-il ce que li estot,
Que ne demande autre rien née.
Primaut, dit Renart, bien m’agrée
Que l’acordance sera fete.
Renart, dit Primaut, moult me hete
Qu’el sera fete demanois ;
Or en alon donc en cel bois,
Si sera fet le serement.
Moult volentiers, se Diex m’ament,
Fet Primaut, et à bele chiere,
Que vostre amor ai-je moult chiere.
Atant se metent à la voie
Renart et Primaut à grant joie,
Tot gentement et tout en pès,
Primaut devant, Renart après.
Tant ont alé et tant venu
Qu’il sont à un piege venu
Que Renart i savoit devant.
A Primaut dist, venez avant,
Ici endroit gist un cors saint
Qui est el ciel avec les sains,
Bon martirs et bon confessors,
Ci illeques en gist le cors,
L’ame est en la Dieu conpaingnie.
Il fu preudons de sainte vie,
Si a toz jors Diex hounoré,
De bon cuer servi et amé.
Hermites a esté lonc tans
Ci fu mis qant fini son tans,
Ci gist et moult fet à amer.
Ici povez sor sains jurer
Que par vos n’iere plus batu,
Mon ami serez et mon dru :
Se nel’ fetes, je n’en puis mès.
Par la foi que doi sainte Agnès,
Ce dist Primaut, jel’ feré bien,
Ne vos estuet douter de rien,
Mès veraiement le sachiez.
Dist Renart, dont vos abessiez
Et vos agenoilliez ici :
Puis a andeus ses piez fléchi,
Et mist sor le piege sa main,
Et dist, si m’aït saint Germain
Et trestous les sains de cest mont,
Et trestous ceus qui ici sont,
Que jamès jor de mon aé
A dant Renart mal ne feré
N’a home qui soit de sa part,
Ainz ameré toz jors Renart.
Atant s’est Primaut abessiez,
Sor le piege s’est apoiez
Tot souavet et belement ;
Lever se voloit durement,
Le pié met sus, la clef destort
Si souef c’onques n’en sot mot,
Avoit pris par le pié Primaut.
Qant Renart l’a véu, si saut
D’autre part, et Primaut s’escrie,
Sire Renart, aïe ! aïe !
Aïdiez moi, saint Lienart.
Tu es parjure, dist Renart,
Par qoi le cors saint te detient ;
De toi aidier à moi que tient,
Qant Diex en velt venjance prendre ?
Por toi aidier n’i voil main tendre.
Or remains ci, qar je m’en vois,
N’ai plus cure de ton jenglois,
Je me sui bien de toi vengiez,
Diex le set que moult en sui liez.
Atant s’en vet delivrement
Et let Primaut el tornoiant,
Qui moult grant paines i soufri.
Le pié illeques li rompi,
Et dant Renart li forsenez
S’en est tot maintenant tornez,
Et si s’en est tornez ariere
En Malpertuis en sa tesniere.
En sa voie prist un oison
Qu’il trova lez une meson
A un vilain où il passoit,
Moult en est liez, grant joie en fet.
Encontre lui vint Hermeline
Qui l’aime d’amor enterine,
Et grant joie en font si enfant
Qui moult en sont lié et joiant.
Renart à Hermeline conte
Con il a fet à Primaut honte,
Et qu’il fist à Tybert le Chat
Sa qeue perdre par barat
En la huche où humoit le let.
Cele s’en rit, grant joie en fet,
Avis li est tout a trouvé
Qant son baron a recovré.