Le Roman du Renart - D. M. Méon - 1826/13
Si conme Renart fist avaler Ysengrin dedenz le puis.
Or me covient tel chose dire
Dont je vos puisse fere rire,
Qar je sai bien, ce est la pure,
Que de sarmon n’avez-vos cure,
Ne d’un cor saint oïr la vie,
De ce ne vos prent nule envie,
Mès de tel chose qui vos plaise,
Or gart bien chascun qu’il se taise,
Qar de bien dire sui en voie,
Et bien garniz, se Dex me voie ;
Se vos me voliez entendre,
Tel chose porriez aprendre
Qui bien feroit à retenir,
Si me seut-l’en por fol tenir,
Mès j’ai oï dire en escole,
D’aucun fol hons sage parole.
Lonc prolongues n’est point à fere,
Or dirai, ne me voil plus tere,
Une branche et un sol gabet
De celui qui tant set d’abet,
C’est de Renart, bien le savez,
Et bien oï dire l’avez.
De Renart ne va nus à destre,
Renart fet tot le monde pestre ;
Renart atret, Renart acole,
Renart est de moult male escole ;
De lui n’a nul corroies ointes,
Jà ne sera si ses acointes.
Moult par est sages et voiseus
Renart, et si n’est pas noiseus,
Mès en cest monde n’a si sage
Qui à la foiz n’aut au folage.
Or vos dirai quel mesestance
Avint Renart et quel pesance.
L’autrier estoit alé porquerre
Sa garison en autre terre
Con cil qui avoit grant soufraite
Et grant fein qui moult le deshaite.
Si con il vint en une arée,
Si s’en entra en une prée,
Puis s’en vint droit en une broce
Moult dolent, et moult se corouce
Que il ne puet chose trover
Qu’il puist mengier à son soper.
Il n’i voit riens por sa pasture,
Lors se remet en l’ambléure
Fors del bois et vint en l’oraille ;
Arestez est, de fain baaille.
Maigres estoit et moult chaitis,
Grant fain avoit en son païs :
D’eures en autres s’estendeille,
Et ses ventres si se merveille,
Et si bouel qui sont dedenz,
Que font ses poes et ses denz,
D’angoisse gient et de destrece,
Et de la fain qui moult le blece ;
Lors dist qu’il fait malvès atendre
En leu où l’en ne puet riens prendre.
A icest mot par un sentier
S’en corut un arpent entier ;
Onques ne volt aler le pas
Tant que il vint à un trespas.
Si con il ot le col bessié,
Si a choisi en un plessié,
Par encoste d’unes avaines,
Une Abaïe de Blans Moines,
Et une granche par dejoste
Où Renart velt fere une joste.
La granche fu moult bien asise,
Li mur furent de roche bise
Moult fort, ne vos en mentiron,
Et furent clos tot environ
D’un fossé dont haute est la rive
Si que ne lor puet riens qui vive
Tolir par force nule chose
Puis que la porte est ferme et close.
Plenté i a de norreture,
Qar ele est en bone pasture ;
Moult par estoit riche la granche,
Mès à aucuns estoit estrange :
Assez i a de tel viande
Con Renart li Gorpis demande ;
Gelines, chapons, coz, anez.
Renart est cele part tornez,
Parmi la voie a fet un saut
Toz abrivez de fere asaut.
Onques ne fu ses frains tenuz
Tant qu’il est as chapons venuz.
Sor le fossé s’est arestez
De gaaingnier toz apretez
Et de gelines asaillir ;
Mès il n’i pooit avenir.
Cort et recort entor la granche,
Mès ne trove ne pont, ne planche,
Ne pertuis. Moult se desconforte :
Lors s’acropi devant la porte
Et vit le guichet aovert
Et le pertuis à descovert :
Cele part vint, outre se lance.
Or est Renart en grant balance
Que s’il puéent aparcevoir
Que il les voille decevoir,
Li moine retendront son gage
Ou li méismes en ostage,
Qar felon sont à desmesure.
Cui chaut ? Tot est en aventure.
Or vet Renart par le porpris,
Grant péor a d’estre sorpris ;
Vint as gelines, si escoute,
C’est veritez que moult se doute,
Que bien set qu’il fet musardie :
Retornez est par coardie,
Grant péor a qu’on ne le voie,
Ist de la cort, s’entre en la voie
Et se conmence à porpenser
Que besoing fet vielle troter,
Et la fain tant le par tormente,
Ou bel li soit ou se repente,
Le refet arieres fichier
Por les gelines acrochier.
Or est venuz Renart ariere,
En la granche entre par deriere
Si coiement que ne se murent
Les gelines, n’en aparçurent.
Sor un tref en ot troi juchies
Qui estoient à mort jugies,
Et cil qui est alez en fuerre,
S’en monta sur un tas de fuerre
Por les gelines aprouchier.
Les gelines sentent hochier
Le fuerre, si en tresaillirent
Et en un angle se tapirent,
Et Renart après eus s’en torne,
S’es a prises toutes à orne
Là où il les vit enanglées,
Toutes troi les a estranglées.
Des deus en fet ses grenons bruire,
La tierce vodra porter cuire.
Qant ot mengié, si fu aaise,
De la granche ist par une haise
Et la tierce geline en porte ;
Mès si con il vint à la porte
Si ot moult grant talent de boire,
Cil qui bien sot la gent deçoivre
Se porpensa que il feroit
Et conment à boivre averoit.
Un puis avoit enmi la cort,
Renart le vit, cele part cort
Por sa soif que il volt estaindre,
Mès il ne pot à l’eve ataindre.
Or a Renart cel puis trové,
Moult par le vit parfont et lé :
Dedenz ne volt-il pas saillir,
Péor ot de soi maubaillir,
Ne il ne put engin savoir
Conment il puist de l’eve avoir.
Seignors, or escoutez merveilles :
En cel puis si avoit deus seilles ;
Qant l’une vient et l’autre vet,
Et Renart qui tant a mal fet,
Desus le puis s’est acoutez
Grains et marriz et trespensez.
Dedenz conmence à regarder
Et son ombre à aboeter :
Or l’ont déable decéu,
De son ombre qu’il a véu
Cuida que ce fust Hermeline
Sa fame q’aime d’amor fine,
Qui herbergie fust laiens.
Renart fu pensis et dolens ;
Il li demanda par vertu,
Di moi, là dedenz que fès-tu ?
La voiz du puis vint contremont,
Renart l’oï, drece le front ;
Il la rapele une autre foiz,
Contremont resorti la voiz.
Renart l’ot, et moult se merveille,
Ses piés a mis en une seille,
Onc n’en sot mot, si vint à mal.
Or li est encontré moult mal,
Qant il fu en l’eve chaüz
Lors sot bien qu’il est decéuz
Qant sa fame n’i a tenue
Que il cuidoit avoir véue.
Or est Renart en male frape,
Maufez l’ont mis en cele trape.
Acostez s’est à une pierre,
Bien vosist estre mors en biere :
Li chaitif sueffre grant hachie,
Or a sovent la pel moillie ;
Or est miex qu’en fers ne en gés,
A bon droit est-il conchiez,
Que tot jors il met son pooir
En tot le monde decevoir.
Or ne set Renart trover guise
En quel manière du puis isse ;
Or est à aise du peschier,
Nus nel’ porroit esléescier.
De grant ire est tout esméuz
De ce qu’einsi est decéuz,
Ne prise deus botons son sens.
Seignor, il avint en cel tens,
En cele nuit et en cele eure
Qu’Ysengrin sanz nule demeure
S’en est issuz d’une grant lande,
Que querre li covint viande,
Que la fain le griève forment.
Tornez s’en est iriéement
Devant la meson as Renduz,
Les granz galoz i est venuz ;
Le païs trova moult gasté,
Ci conversent, fet-il, maufé
Qant l’en n’i poot trover viande
Ne riens nule que l’en demande.
Tornez s’en est tot son passet,
Corant en vint vers le guichet ;
Par devant la rendacion
S’en est venuz tot le troton ;
Le puis trova enmi sa voie
Où Renart le rous s’esbanoie.
Desor ce puis s’est aclinez
Grains et marriz et trespensez ;
Dedenz conmence à regarder
Et son ombre à aboeter.
Con plus i vit, plus esgarda,
Tot ensi con Renart ovra :
Con il se coucha sus adenz,
De son ombre qu’il vit dedenz
Quida ce fust dame Hersent
Qui herbergie fust laiens
Et que Renart fust avec li.
Sachiez pas ne li abeli
Et dist, moult par sui maubailliz,
De ma fame vilz et honiz
Que Renart li rous m’a fortraite,
Et avec lui çaiens a traite.
Moult est ore traïtre lerre
Qant il deçoit si sa conmere,
Si ne me puis de li garder,
Mès se jel’ pooie atraper,
Si faitement m’en vengeroie
Que jamès crieme n’en aroie.
Lors a ullé par grant vertu,
A son ombre dist, qui es-tu ?
Que pense-tu, putain provée
Qant o Renart t’ai ci trovée ?
La voiz resorti contremont,
Si li semble qu’il li respont.
Lors a ullé une autre foiz,
Contremont resorti sa voiz.
Que qu’Isengrin se dementoit
Et Renart trestoz coiz estoit,
Qant assez l’ot lessié uller,
Puis si l’a pris à apeler.
Qui est-ce, Diex ! qui là parole ?
Jà tien-ge ça dedenz escole.
Qui es-tu, va, dist Ysengrin ?
Jà sui-je vostre bon voisin
Qui fu jadis vostre compere,
Plus m’amiez que vostre frere ;
Mès l’en m’apele feu Renart
Qui tant savoit d’engin et d’art,
Mès or sui mort, la Dieu merci,
Ma penitance faz ici.
Dist Ysengrin, c’est mes conforz :
Dès quant ies-tu, Renart, dont morz ?
Et il li respont, dès l’autrier :
Nus hons ne s’en doit merveillier
Se je sui morz, aussi morront
Trestuit cil qui en vie sont.
Parmi la mort les covendra
Passer au jor que Diex voudra.
Or atent m’ame nostre sire
Qui m’a jeté de cest martire,
De cest puant siecle où j’estoie ;
Mès que Diex à la mort vos voie,
Je vos pri, biau compere douz,
Que me pardonez les oourouz
Que l’autrier éustes vers moi.
Dist Ysengrin, et je l’otroi,
Or vos soient tuit pardoné,
Compere, et ci et devant Dé ;
Mès de vostre mort sui dolenz.
Dist Renart, et j’en sui joianz.
Joianz, amis ! Voire, par foi.
Biau compere, di moi porqoi.
Que li miens cors gist en la biere
Chiés Hermeline en sa tesniere,
Et m’ame est en paradis mise,
Devant les piez Jhesu assise :
Compere, ne vos merveilliez
Se de ce sui joianz et liez,
Bien sachiez que ce est savoir,
Et si vos di sanz decevoir
Que j’ai trestot quanque je voil.
Je n’oi onques cure d’orgoil,
Et si te di bien sanz fauser
Que moult me déussiez amer,
Car onques voir ne te mesfis,
N’onques se bien non ne te fis,
Si en sui joianz en mon cuer :
Et si vos di que à nul fuer
Mal ne vos voudroie avoir fet,
Je sui ci que que j’aie fet.
Se tu es el rêgne terrestre,
Je sui el paradis celestre ;
Céanz sont les gaaingneries,
Les bois, les plains, les praieries ;
Céanz a riche pecunaille,
Céanz puez véoir mainte aumaille
Et mainte oeille et mainte chievre,
Céanz puez-tu véoir vint lievre
Et bués et vaches et moutons,
Espreviers, ostors et faucons.
Ysengrin jure saint Sevestre
Que il voudroit là dedenz estre.
Dist Renart, ce lessiez ester,
Céanz ne povez-vos entrer :
Paradis est celestiaus,
Mès n’est mie à toz conmunaus.
Moult as esté toz jors trichierres,
Fel et traïtres et boisierres,
De ta fame m’as mescréu,
Par Dieu et par sa grant vertu
Onc ne li fis descovenue,
N’onques par moi ne fu croissue.
Tu dis que tes filz avoutrai,
Onques certes ne le pensai
Par cel Seignor qui me fist né,
Que t’en ai dit la verité :
Serement en as toute voie
Sanz ce que point ne t’en devoie.
Dist Ysengrin, bien vos en croi,
Sel’ vos pardoin à ceste foiz ;
Mès fetes moi laiens entrer.
Renart respont, lessiez ester,
Céanz n’avon cure de noise,
Là povez véoir cele boise :
(Au doi li a mostré la seille)
Ore escoutez une merveille ;
Renart sot bien son sens espandre,
Por voir li a-il fet entendre
Que les seilles qui là estoient,
Qui à la poulie pendoient,
Poisez sont de bien et de mal
Par Dieu le pere esperital.
Dant Renart qui tot set trichier,
Qui le béoit à conchier,
Li a dit par itel esgart
Que qant l’ame du cors se part,
Ou bon li sache, ou mal li griet.
En une boise bien s’asiet,
Et Dieu par est issi puissanz,
Se li hons est bien repentanz
Il s’en devale çà de jus,
Et li max remaint toz lassus ;
Mès hons, s’il n’a confesse prise,
Ne porroit jà en nule guise
Ci avaler, je le te di.
Ysengrin respons, or me di
Einssi t’i mist Sains Esperiz,
As-tu tes pechiez regehiz ?
Oïl, fet-il, à un viez lievre
Et à une barbue chievre
Moult très bien et moult saintement,
N’aura mès m’ame dampnement
Por chose que au siecle ai fete,
Ne porchacie ne portrete.
Si vos volez ci avaler,
Aussi vos estuet confesser
De voz pechiez et repentir,
Qar nus ne puet çaienz venir
Se confesse ne li amaine.
Compains, jà por ce ne remaine
Que je là aval à vos n’aille,
Savez qu’il m’avint hui sanz faille :
J’encontrai hui enmi ma voie
Si conme mon chemin tenoie,
Dant Hubert l’Escofle volant,
A lui me confessai courant,
Que onques n’il voil plus atendre,
De li voil penitance prendre
Et volentiers la me donna,
Touz mes pechiez me pardonna
Dont je cuidai avoir grant joie.
Biau compere, se je cuidoie
Que ce fust voirs que vos me dites
Et de vos pechiez soiez quites,
Au Roi proieroie celestre
Que il vos dont céanz vostre estre
Où vos seriez liement.
Compere, or tost hastivement
Me fetes là dedenz entrer,
Qar moult i desire à aler ;
Par foi que doi Sainte Apetite
La verité vos en ai dite,
Por Dieu pensez de moi tenser.
Renart li conmence à crier,
Or vos estuet dont Dieu proier
Et moult saintement gracier
Que il vos face vrai pardon
De vos pechiez remission,
Issi i porriez entrer.
Ysengrin ne volt plus ester,
Son cul torna vers Oriant
Et sa teste vers Occidant,
Et conmença à orguener
Et moult doucement à uller.
Renart qui fet mainte merveille,
Estoit aval en l’autre seille
Qui el puis estoit avalée ;
Ce fu par pute destinée
Que Renart s’est dedenz couchiez,
Ysengrin est par tens iriez.
Dist Ysengrin, j’ai Dieu proié.
Et je, dist Renart, gracié,
Vos vendrez aval sanz demore.
Il estoit nuit à icele hore
Et les estoiles cler paroient
Et en l’eve del puis luisoient.
Renart à qui tarde l’issue,
Li avoit fet une treslue :
Ysengrin, vois-tu ces merveilles,
Que devant moi ardent chandoiles ?
Jhesu te fera vrai pardon
Et moult bonne remission.
Passion le fiere en la chiere,
N’i avoit ne feu ne lumiere,
Ainz i avoit assez froidure
Et oscurté et grant laidure.
Ysengrin qui onc n’ot savoir,
Cuide Renart li die voir,
Adonc s’esforce, adonc estrive
Au séel abatre de rive,
Il joint les piez, si saut dedenz.
Ysengrin fu li plus pesanz,
Si se devale contreval.
Or escoutez le batestal,
Et puis se sont entrecontré,
Ysengrin l’a araisoné :
Compere, porqoi t’en vas-tu ?
Et Renart li a respondu,
N’en fetes jà chiere ne frume,
Bien vos en diré la costume ;
Qant li uns va, li autres vient,
C’est la costume qui avient ;
Je vois en Paradis lasus,
Et tu vas en Enfer là jus.
Moult es à grant honte livrez,
Et j’en sui hors, bien le sachiez,
Par Dieu le Père esperitable :
Là jus conversent li Déable.
Dès que Renart vint à la terre,
Moult s’esbaudist de cele gerre :
Ysengrin est en male trape,
Se il fust pris devant Halape,
Ne fust-il pas si adolez
Que qant el puis fu avalez.
Seignors, or oez des Renduz
Con il perdirent lor vertuz ;
Lor feves furent trop salées
Que il orent mengié crevées,
Si orent trop dormi le soir.
La nuit dormirent conme loir,
Li serjanz furent pereceus
Et d’eve furent sofreteus ;
Mès il avint del cuisinier,
Celui qui gardoit le mengier,
Qu’il ot sa force recovrée,
Au puis en vint la matinée,
Si menoit un asne Espanois
Et compaingnons de si a trois :
Au puis en viegnent li troton
Trestuit li qatre compaingnon.
L’asne acouplent à la polie
Qui de trere pas ne s’oblie ;
Li Rendu le vont moult ferant
Et li asnes forment tirant.
Li Leus par grande mesestance
Estoit où puis plus d’une lance,
Dedenz le séel s’est coulez,
Et l’asne fu si adolez
Que il ne pot n’avant n’ariere,
Ne por force que l’en le fiere,
Qant uns Renduz s’est apuiez
Qui delez le puis s’est couchiez,
Si prent dedenz à regarder
Et Ysengrin à aviser.
As autres dist, que fetes-vous ?
Par Dieu le Pere glorious
Ce est le Leu que vos traiez.
Estes-les-vos toz esmaiez,
Si s’en tornent tuit vers meson
Plus que le pas et le troton,
Mès la polie ont atachie.
Ysengrin suefre grant hachie,
Li frere apelent lor serjanz,
Par tens ert Ysengrin dolanz.
Li Abés prent une maçue
Qui moult estoit grant et cornue,
Et li Prieur un chandelier.
Il ne remest Moine el mostier
Qui ne portast baston ou pel,
Tuit sont issu de lor ostel.
Au puis en prenent à venir
Et s’aprestent de bien ferir.
L’asne font trere qui là fu,
Si li aïdent par vertu
Tant que la seille vint à rive.
Ysengrin n’atent mie trive,
Un saut a fet moult avenant,
Et li gaignon le vont suiant ;
Descirent li son peliçon,
Amont en volent li flocon,
Et li Rendu l’on atrapé
Qui l’ont moult durement frapé.
Li uns le fiert parmi les rains,
Ysengrin est en males mains ;
Sovent li ont la pel percie,
Ysengrin soufre grant hachie :
Illuec s’est qatre foiz pasmez,
Moult par est grains et adolez,
Tant qu’il est couchiez sor le bort,
Illeques fet semblant de mort.
Atant estes-vos le Prior
Qui Diex otroit grant desenor ;
Il mist la main à son coutel,
Si en voloit prendre la pel ;
Toz estoit prest de l’acorer
Quant l’Abé dist, lessiez ester,
Assez a sa pel despecie
Et sofferte mortel hachie :
Ne fera mès à nului gerre,
Apesiée en est ceste terre.
Tornons nos en, lessiez ester,
Ysengrin n’a talent d’aler.
Chascuns Renduz a pris son pel,
Si retornent à lor ostel.
Ysengrin voit n’i a nului,
Qui a soufert moult grant anui ;
Fuiant s’en va à grant hachie
Que il a la crope brisie.
A un buisson en est venuz,
Mès tant est son crepon batuz
Qu’il ne se puet resvertuer.
Devant lui voit son filz aler
Qui li demanda entresait,
Biau pere, qui vos a ce fait ?
Biau filz, Renart qui est murtrier,
En un puis me fist trebuchier,
Ne me sai à cui conseillier,
Ne me porré jamès aidier.
Qant cil l’oï, moult s’en aïre,
Dieu jure qui soufri martire,
Se il as poins le puet tenir
Il li fera ses jeus puir ;
Sel’ puis tenir, je vos plevis
Que il n’estordra mie vis,
Que devant moi croissi ma mere,
Si compissa moi et mon frere ;
Mès je l’en rendrai gerredon,
Jà n’en aura se la mort non.
Atant s’en reva en sa terre
Ysengrin, et fet mires querre
Qui de lui se sont entremis.
Avec lui furent ses amis
Qui li ont mecine donée
Par quoi sa force a recovrée.
Ysengrin est gariz et forz,
Se Dant Renart passe les porz
Et il le tient dedenz sa marche,
Sachiez qu’il li fera domage.