Le Roman du Renart - D. M. Méon - 1826/14
De l’Ours et du Lou et du Vilains qui monstrerent lor cus.
Ge vos voil un vers commencier,
Mès je vos criens moult anuier ;
Se vos volez je me teré,
Et se volez je parleré
Conment avint à Ysengrin
Qui se leva par un matin.
Dame Hersent l’ot bien gardé
Et de ses dolors respassé.
Ore est tot cras et revelous,
Fel et hardiz et orgueillous :
Grant aléure s’en aloit
Par mi cel bois où il estoit ;
Enmi sa voie a encontré
Un vilain qui avoit trové
Un bacon qui estoit chaüz
De la charrete à deux recluz.
Il le tenoit devers la hart.
Ysengrin vint de l’autre part :
Où vas, dist-il ? Esta ileuc.
Por qoi, fait-il ? Par foi por euc ;
Où as-tu cel bacon enblé ?
Par foi, fait-il, ainz l’ai trové.
Trové ! dont i auré-je part
D’outre en outre jusq’à la hart.
Dist li vilains, en moie foi,
Sire Ysengrin, et je l’otroi.
Acompaignié sont li baron
En poi d’eure por le bacon ;
Endementiers que il parloient
Et que il departir voloient,
Estes-vos maintenant un Ors
Qui lor est venuz à plain cors.
Si con il fu ileuc venuz,
Sor le bacon s’est arestuz :
Et qui est cil bacon, danz Lous ?
Sire, dist-il, c’est à nos dous.
J’en voil, dist-il, ma part avoir
Par amistié, non par pooir,
Dist li vilains, et je l’otroi :
Et je, ce dist li Leus, par foi :
Or en soion donc conpaingnon,
Tuit troi et bien le departon.
Seignor, dist-il, vostre merci,
Conquis m’avez à vostre ami ;
Or le metez-ci sor mon dos,
Je l’enporteré en cel bos,
Qar tiez i porroit sorvenir
Qui tost le nos voudroit tolir.
Atant li ont sor le dos mis,
El bois se sont ariere mis ;
Sor l’erbe jetent le bacon,
S’en parolent li compaingnon
Conment il soit partiz à droit.
Li Ors qui plus sages estoit,
Lor dist qu’il n’i est arestez :
Seignor, se mon conseil créez,
En huimès le leron pendant
A cest fou qui est bel et grant,
Et le matin ci revendron,
Trestuit trois nos cus mosterron,
Et cil qui graingnor cul aura,
Le bacon tout en portera.
Ce dist li Leus, et je l’otroi ;
Et je, dist li vilains, par foi.
Le bacon ont en haut levé,
Et puis s’en sont tuit troi allé.
Li vilain vint en sa meson
Où l’atendent si enfançon :
Où estes-vos, dist-il, dame Ame ?
Je sui ci, sire, dist sa fame,
Por quoi avez tant demoré ?
Suer, dist-il, que je ai trové
Un bon bacon enz en cel bos,
Ainz de mes eulz ne vi si gros,
Mès nos somes troi conpaingnon ;
Sez conment nos le partiron ?
Le matin iron là tuit troi,
Si mosterron nos cus tuit troi :
Qui graingnor cul porra mostrer,
Le bacon en porra porter.
Seignor, fame est et fole et sage,
Et moult est fole de corage :
Fole est que ne se set partir
D’une chose qu’a en desir ;
Et sage est, car qant on li rove,
Tost a trové une controve,
Et verité dist por mençonge
S’ele en a metier et besongne.
Ce nos dient cil fol musart,
Plus que déables a un art ;
Mès je di ce en ma partie,
Que sage et fole est par mestrie.
Moult fu sages cil qui ce dist
Et qui en son livre le mist :
Selon les eures et le tens,
A bien mestier folie et sens.
Moult est fame de parfont sens,
Et ceste prist moult bon porpens,
Si a raconté son seignor
Que se il velt, demain au jor
Que ses garnemens vestira,
Et por le bacon s’en ira,
Et se ce vient as cus mostrer,
Grant fendace porra mostrer,
Li vilain l’ot et si s’en rit,
Par Dieu, fet-il, moult as bien dit.
Qant vint au jor, levé se sont,
Et par le bois andui s’en vont ;
Il li ensaigne bien la voie
Jusqu’à l’estre parmi l’arbroie ;
Et qant ele i est parvenue,
Por le vilain l’ont connéue
Li dui baron qui l’atendoient
Desouz le fou o il estoient.
Il li ont dit, sire Vilain,
Dame Dieu vos doint hui bon main !
Premier parla Patous li Ors,
Seignors, fet-il, jà est granz jors :
Faites tost, foi que me devez,
Seignors, fet-il, vos cus mostrez.
Sire, dist-il, moult volentiers,
Or me dites conment premiers.
Son cors estent où par devant,
Puis par deriere en estupant,
Lieve sa qeue, le cul bée :
Jusque laiens parmi l’entrée
Li puet-on véoir es boiax,
Tant par est larges li tuiax.
Sire Ysengrin, ce dist Patous,
Moult est voz cus grant et estous :
Vilain, dist-il, or estupez,
Le vostre cul remosterrez.
Cele a ses braies avalées
Qu’ele avoit à son cul fermées,
Ele a fait large enforchéure,
Por bien mostrer cele nature,
Son chief mist bas por estuper.
Cil la prenent à regarder ;
Tant s’en est Patous merveilliez,
De son pié destre s’est saingniez.
Nomini Dame, dist li Leu,
A cest cul devisent tuit treu,
Se ice là est trestout cus,
Contre cela ne se prent nus.
Il m’est avis, se dist li Leus,
Par foi que g’i voie deus treus.
Ce dist Patous, garde de près
Se del’ véoir es si engrès ;
Je n’i ai soing d’aboester,
Ne m’i estuet point alumer.
Cele lor dist, or escoutez,
Mes cus est touz acostumez
Sovent de son col afichier,
Por ce l’ai-ge tot tens plus chier.
Ce dist Patous, Ysengrin, fui le,
Alon-nos en, clamons li quite.
Vilain, dist-il, pren le bacon
Et si l’en porte en ta meson.
Ele si fist et lieve sus :
De ceste branche n’i a plus.