Le Roman du Renart - D. M. Méon - 1826/15
De Renart, si coume il conchia le Corbel du froumage.
Entre deuz monz en une plaingne,
Tout droit au pié d’une montaingne,
Desor une riviere à destre,
Là vit Renart un moult bel estre
En mi le pré de l’autre part,
Si conme l’eve les depart ;
Là vit Renart un fou planté
Que les genz n’ont gueres hanté.
L’eve passe outre et vint tot droit
Là où li fou planté estoit.
Entor le fou à fet la tresche,
Puis se coucha sor l’erbe fresche.
Vostrez s’i est et refroidiez,
A bon ostel est herbergiez ;
Jà ne le quesist rechangier
S’il éust assez à mengier.
Li séjorner i estoit biax,
Et Dant Tiecelin li Corbiax
Qui moult ot jéuné le jor,
N’avoit cure de tel sejor ;
Par besoing ot le bois lessié,
Et vint volant à un plessié,
Privéement en un detor,
Toz aprestez de fere estor.
De fromaches vit un millier
Qu’en avoit fet asoleillier :[1]
Cele qui garder les devoit,
En sa meson entrée estoit ;
Ele ert entrée en sa meson.
Tiecelin vit qu’il ert saison
De gaaingnier, si lesse corre,
Un en a pris por le restore.
Sailli la vielle en mi la rue ;
Tiecelins vit que vers li rue
Qaillous et pierres, si s’escrie,
Vassax, vos n’en porterez mie.
Tiecelin la vit auques fole,
Vielle, fet-il, s’en en parole ;
Dites que je l’en ai porté,
La male garde pest le pré :
Bien poez dire ge l’en port,
Ou soit à droit, ou soit à tort.
Del’ prendre en ai éu le leu,
La male garde pest le Leu ;
Le remenant gardez plus près,
Cestui ne r’aurez-vos jamès,
Ainz en ferei mes barbes rere
Moult liement à bele chere,
En aventure de lui prendre
Me mis por ce que gel’ vi tendre,
Jaunet et de bone savor.
Tant ai del vostre par amor,
Sel’ puis porter jusqu’à mon ui
De cuit en eve et de rosti
En mengerai tot à mon chois,
R’alez-vos en, quer je m’en vois.
Atant s’en torne, si vint droit
Au fou où Dant Renart estoit :
Ensemble furent à cele heure,
Renart desoz et cil deseure ;
Mès de tant i a desevraille,
Li uns menjue, l’autre baille.
Li fromaches fu auques mox,
Et Tiecelins i fiert granz cox
De son bec, si que il l’entame,
Mengié en a maugré la fame
Et del plus jaune et del plus tendre,
Qui tel anui li fist au prendre.
Tiecelin fiert à une hie,
Ainz n’en sot mot que une mie
L’en est à la terre chéue
Devant Renart qui l’ot véue.
Il connut bien si fete beste,
Si en crola deus foiz la teste :
Il lieve sus por miex véoir,
Tiecelin vit lasus séoir
Qui son compere estoit de viez,
Le bon fromache entre ses piez.
Premierement l’en apela,
Por les Sains Dieu que voi-ge là ?
Et Diex vos saut, sire compere,
Bien ait l’ame vostre bon pere
Dant Rohart qui si sot chanter !
Mainte foiz l’en oï vanter
Que n’en avoit son per en France :
Vos méismes en vostre enfance
Vos en souliez moult pener,
Séustes onques orguener ?
Chantez moi une rotruenge.
Tiecelin entent la losenge,
Ovre la bouche et giete un bret,
Et dist Renart, ce fu bien fet :
Miex chantez que ne soliez,
Encore, se vos voliez,
Iriez plus haut une jointe.
Cil qui de chanter se fait cointe,
Conmence de rechief à brere.
Diex ! dist Renart, con or est clere
Et con espurge vostre voiz !
Se vos vos gardissiez de noiz
Au miex del monde chantissoiz,
Chantez encore une autre foiz.
De chanter velt avoir le pris,
Si l’a de rechief entrepris,
Si s’escria à haute alaine,
Ainz n’en sot mot que qu’il se paine,
Que li piez destre li desserre,
Et li fromaches chiet à terre
Tot droit devant les piez Renart.
Li lechierres fremist et art
Et tot se frit de lecherie,
Mès n’en touche une seule mie,
Qar encor, s’il puet avenir,
Voudra-il Tiecelin tenir.
Le fromache li gist devant,
Il leva sus en solevant,
Le pié tent avant dont il cloche,
Et la pel qui encor li loche,
Et la jambe et le pié maumis
Qui el braon fu entrepris,
Bien velt que Tiecelin le voie.
Hé Diex ! fait-il, com poi de joie
M’a Diex doné en ceste vie !
Mès je ne sai que je en die,
Cist fromaches me put si fort
Et flere si, jà m’aura mort ;
Si ai tel chose qui m’esmaie,
Que fromaches n’est preuz à plaie,
Ne de lui talent ne me prent,
Car fisicle le me defent.
Ha ! Tiecelin, car descendez
Et de cest mal me delivrez :
Certes jà ne vos en priasse,
Mès l’autrier oi la jambe qasse
En un broion par meschéance,
Là m’avint ceste mesestance :
Onques ne me poi destorner.
Or me covient à sejorner,
Enplastre metre et renoer
Tant que je puisse respasser.
Tiecelin cuide que voir die
Por ce que emplorant li prie ;
Il descent jus, à terre saut,
Mès miex li venist estre en haut,
Se Dant Renart le puet tenir.
Tiecelin n’ose pas venir,
Il va traiant le cul arriere,
Moult doute que Renart nel’ fiere.
Renart le voit acoarder,
Sel’ conmence à aséurer :
Por Dieu, fait-il, ça vos traiez,
Quel mal vos puet fere un plaiez ?
Compere, traiez-vos en çà.
Li fox qui trop se desvoia,
Ainz n’en sot mot que il sailli,
Prendre le volt, mès il failli,
Et neporqant qatre des pennes
L’en remestrent entre les quennes.
Tiecelin saut tos esmaiés
Qui dut estre moult mal paiés ;
Derrers et devant se regarde,
Hé Diex, dist-il, si male garde
Ai hui prise de moi-méisme !
Jà ne cuidé que féist eme
Cil fel, cist ros et cist contret
Qui qatre des tuiax m’a tret
De la destre ele et de la qeue,
Li siens cors ait à male veue !
Faus et traïtres est por voir,
Or m’en puis bien aparcevoir.
Or est Tiecelin moult plain d’ire
Et Renart s’en volt escondire,
Mès Dant Tiecelin l’entrelet
Qui n’a plus cure de son plet,
Ainz dist, li fromaches soit vostre,
Huimès n’averez point du nostre :
Je fis que fox qui vos créoie
Por ce que plorer vos véoie.
Tiecelin parla et grondi,
Renart un mot li respondi,
Alez-vos ent, tenez vo voie
Et je remaindré en l’erboie.
Souef en a le duel vengié,
Que le fromache a tot mengié
Dont forment s’aloit delechant.
Moult fu iriez, je vos créant,
De ce qu’il li est eschapez
Et que il ne l’a atrapez ;
Puis dist en terre que il sache
Ne vit-il mès si bon fromache.
Bien li valut une poison,
N’en plaint que la male foison :
Onques sa plaie n’en fu pire.
Atant s’en va, ne volt plus dire,
Qar bien est son plet definez,
Et Renart est d’iluec tornez.
- ↑ Al. Asorillier.