Le Roman du Renart - D. M. Méon - 1826/9
Si coume Renart fist Primaut le frere Ysengrin prestre.
Or escoutez une autre estoire,
Si vos conteron d’un Provoire
Qui passoit au travers d’un plain :
Une boiste porte en son sain
Qui toute estoit d’oublées plaine.
Li Prestres passoit à grant paine
Une soif que à passer ot,
Et la boiste, qu’onques nel’ sot,
Li chaï qu’einz ne s’en parçut.
Renart qui cele part corut
Trove la boiste, si la prent,
En son sain la mist justement,
Onques n’en fist noise ne bruit,
Toz en travers les chans s’en fuit
Tant qu’il fu bien loin de la voie.
Lors dist Renart, se Diex me voie,
Je verré jà que ici a.
La boiste ovri, si i trova
Moult bien cent oublées ou plus,
Et il les menja sanz refus,
Toutes fois quatre qu’il enporte.
En tost aler moult se deporte :
En sa bouche tient les oublées
Qui furent en deus plois doublées.
Atant s’en monte un tertre haut,
Garda avant, si vit Primaut
Le Leu qui fu frère Ysengrin,
Qui s’en venoit tot un chemin
Et de tost aler s’esvertue.
Si voit Renart, si le salue :
Sire Renart, bien veniez-vos.
Primaut, Diex benéie vos,
Fet Renart, et bon jor aiez :
Dont venez-vos si eslessiez ?
Où alez ? por chanter m’en vois
A un moustier outre cel bois,
Por mengier i sui aroutez ;
Mès que est-ce que vos portez ?
Par foi, ce dist Renart, gastiax
De mostier moult bons et moult biax.
Gastiax ! fet Primaut, par Saint Gile,
Où les préistes-vos, biax sire ?
Où ? par foi là où il estoient,
Nul autre fors moi n’atendoient.
Donez les moi, biax amis chiers.
Par foi, sire, moult volentiers,
Fet Renart qui ne fu pas yvres,
S’eles valoient cinc cent livres.
Atant li a Renart donées
A bele chiere les oublées.
Moult furent bones à Primaut,
Renart, fet-il, se Diex te saut,
Où les préis ? en as-tu mès ?
Nenil, fet Renart, mès ci près
Les pris-ge dedenz un moustier.
Moult par sont bones à mengier,
Fet Primaut, se plus en avoie
Moult volentiers en mengeroie,
Foi que doi à l’ame mon pere,
Que je sent la fain trop amere
Qui me destraint : par Saint Germain
Ne menjai hui ne char ne pain,
Ne poisson ne autre vitaille,
Péor ai le cuer ne me faille.
Tout ce, dist Renart, n’a mestier,
Vien, si iron à un mostier
Où il en a encor assez
Tant que tu soies respassez
De la fain qui si mal te trace,
Tu en auras par Saint Romacle.
Tele viande huimès auras,
A ta volenté en prendras.
Renart, fet-il, gari m’avez,
Por Dieu se tant fere povez
Que je peusse ma pance enplir,
Encor le vos porré merir
Tele ore que besoing auroiz.
Par mon chief et vos en auroiz,
Fet Renart, se me volez croire,
Tout maugré le nés au provoire :
Le moustier si est ici près,
Alez avant, g’irai après.
Atant se metent à la voie
Renart et Primaut à grant joie ;
Bien ont le droit chemin tenu
Tant qu’il sont au mostier venu
Dont li Prestres fu Chapelains
Dont la boiste chaï des mains.
Qant Primaut le vit, si fu liez,
Soz le soil as mains et as piez
Font fosse desoz un degré ;
Tot maintenant sont enz entré.
A grant plenté i ont trovées
Oublées bien envelopées
Dedenz une blanche toaille.
Primaut qui durement baaille
Por la fain qui si le destraint,
La toaille prent, s’es ataint ;
Si les ot plus tost desnoées
Que l’en éust ses mains tornées,
La boiste en a bien delivré.
Renart, fet-il, bien as ouvré
Que tu m’as ma volenté fete,
Mès cist mengiers moult me deshaite,
Car qant je plus en mengeroie,
Et ge voir grenor fain aroie ;
Mès je voi une huche là,
Espoir aucune chose i a
Qui bone seroit à mengier.
Alons la huche despecier,
Si saron que il a dedenz,
Ce seroit savoir, par mes denz.
Alons, fet Renart, de par Dé,
Et si n’i ait plus demoré,
Que je l’otroi bien et gréant.
Et lors en vont tot maintenant,
Si sont à la huche venu.
Primaut qui plus veziez fu,
Prist la huche et à quelque paine
En a brisiée la moraine.
La huche ovrirent moult trestot,
Dedenz ot li prestres repost
Pain et vin et char et poisson.
Renart, dist Primaut, or avon
Assez à mengier, Dieu merci,
Or estent la toaille ci
Que tu voiz desus cel autel,
Et si aporte ça del sel,
Si mengeron de ceste char :
Ne tieng pas celui à eschar
Qui ici mucié l’avoit.
Or menjons, que Diex nos avoit
Tout estrié, ce est bien fet.
Primaut a de la huche tret
Le pain, le vin et la char tenre,
Et andui s’asient à terre,
Si ont andui mengié ensemble
Pain et vin et char, ce me semble,
A grant plenté et à foison.
Se il fussent en lor meson,
N’éussent-il pas grenor joie.
Renart dist souef qu’en ne l’oie,
Primaut, moult es ore haitiez,
Mès se Diex ait de moi pitiez,
Ge metrai engin et entente.
Primaut, fet-il, moult m’atalente
Que si bien estes conréez,
Versez du vin et si bevez,
Et n’aiez péor de nului,
Moult vos est bien avenu hui.
Dist Primaut, sachiez sanz mentir,
Assez en bevron par leisir,
Car assez en avon, ce croi,
Se estion encore troi,
A grant foison et à plenté.
Tant burent à lor volenté
Qu’à Primaut le cervel bolut.
Renart qui moult bien l’aparçut,
Li dist, conpains, riens ne feson
Qant du vin assez ne bevon,
Car en bevez, sire Primaut,
Et si soiez joiant et baut.
Si faz-ge, dist-il, par ma foi ;
Et tu, Renart, verse, si boi.
Si faz-ge, dist Renart, assez,
Mès vos, biau doz amis, bevez,
Que trop vos voi de boire lent,
Bevez un poi plus durement :
De boire vos voi recréu.
Dist Primaut, je boif plus que tu.
Non fez, dist Renart, par ma foi,
J’en ai bien béu plus que toi
Qui vaut la monte d’un fer d’asne,
Mès tien le henap, si di, have,
Conpaingnon, je te di guersai.
Par foi, dist Renart, je l’otrai,
Or verron qui est recréuz,
Et par qui ert plus tost béuz
Le vin, et le henap vuidiez.
Renart, fet-il, vos me cuidiez
De vin mater, mès non ferez,
Or verrai conment vos bevrez.
Vidiez le henap que tenez,
Puis l’emplez, si le me rendez,
Jà n’en iré à vos faillant.
Renart fet de boire semblant,
Tout le vin giete en son sain.
Cil qui n’a pas le cervel sain,
De rien nule ne s’aparçoit,
Renart le remple, et cil boit
A moult grant joie et à grant feste,
Li oil li luisent en la teste
Autresi com un vif charbon,
Noble cuide estre le Lion
Et Renart soit de sa mesnie.
Renart fet bele chiere et lie,
Et sovent à boivre li done,
Por noient fust delez la tone ;
Et Primaut bevoit durement.
Renart si li forre souvent
Autresi con s’il fust à feste :
Le vin est montez en la teste
A Primaut, tant en a béu.
Renart, fet-il, avez véu
Que Diex nos a amené ci,
Moult avon bien esté servi,
La merci Dieu, à cest souper
Se nos fuson maior ou per,
Ne péussons pas estre miex :
Or vos di-ge bien par mes ieux
Que je voil orendroit aler
A cest autel messe chanter,
Et je voi tot prest sor l’autel
Le vestement et le mesel.
Por ce i furent mis sanz doutance,
Et je me recors de m’enfance,
Apris à chanter et à lire,
Jà m’en orrez del plus bel dire.
Qant Renart la parole oï,
Dedenz son cuer s’en esjoï
Que asotez est vraiement.
Primaut aura son paiement,
Si que il sera moult dolenz
Ançois qu’il isse de laienz,
Tu porroies bien tel chant fere
Qui te torneroit à contrere ;
Chanter ne doit nus, bien le sez,
Devant que il soit ordenez
Ou soit prestres, ou chapelains,
Ou il soit coronez au mains.
Foi que je doi Saint Lienart,
Vos dites voir, sire Renart,
Fet Primaut qui ainz n’ot savoir,
Je cuit et croi vos dites voir ;
Jà por ce n’ert li dez changiez,
Mès por Dieu car me conseilliez
Qui me porroit corone faire.
Ne voil pas lessier cest afaire,
Ma parole m’estuet sauver,
Vespres m’estuet ici chanter,
Vigilles et messe sanz faille,
Tot ce feré ainz que m’en aille.
Sez-tu qui corone me face ?
Dist Renart, se Diex bien me face,
Se je puis un rasoir trover,
Je vos vodré bien coroner,
Et vos metré au col l’estole
Tot sanz le congié l’Apostole ;
Je méismes d’autorité
Vos don de chanter poesté.
Jà autre Evesque n’i arez,
Maintenant coronez serez,
Bien en puis estre vostre mestre,
Autresi fui-je jadis prestre.
Vos dites voir, ce dist Primaut,
Tot maintenant en estant saut,
Et Renart et Primaut aussi
Par le moustier s’en vont andui,
Si cherchent angles et fenestres.
Et Primaut qui volt estre prestres,
Si s’en va par laiens chantant
Et par ces piliers apoiant ;
Et Renart qui moult sot de frape,
Garde derrier l’autel Saint Jasque,
Tantost a trovée une aumoire
Si con nos trovons en l’estoire :
Sachiez, c’est verité aperte,
Maintenant l’a Renart overte,
S’a dedenz un rasoir trové
Qui moult estoit bien afilé,
Et uns cisiax et un bacin
De laton bon et cler et fin :
Maintenant l’a saisi Renart.
Et Primaut dist, se Diex me gart,
Bien vos est, fet-il, avenu,
Diex vos a hui cest jor véu,
Moult fet bien vostre volenté,
Car ostiex avon à plenté,
Cisiax bien trenchanz et bacin,
Et un rasoir et bon et fin,
Ne nos faut qu’eve solement.
Et celui qui moult poi entent
A chose que Renart li die,
Coiz se tient, si ne respont mie.
Renart qui moult set de mal art,
Si regarde de l’autre part,
Et a pris garde tot entor,
Si a véu desouz la tor
Les fonz trestoz sanz coverture,
Si s’en torna grant aléure,
Et fet grant senblant d’omelie.
Dedenz a le bacin puisie
Au plus belement que il pot,
Si c’onques Primaut ne le sot ;
Onques garde ne s’en dona,
A lui vint, si l’araisona.
Conpains, dist-il, entendez çà,
Je cuit que Diex vos aidera,
Ce nos est venuz en souait,
Je cuit que granz vertuz i ait.
Renart, par ce povez savoir
Que Diex velt mon service avoir,
Et il l’aura sanz plus d’afere,
Venez moi tost corone fere.
Par foi, dist Renart, volentiers,
Je voi bien qu’il en est mestiers.
Lors s’est Primaut à terre asis,
Et Renart l’a entre mains pris ;
L’eve sor la teste li rue,
Cil ne dist mot ne ne remue,
Ainz se tient tot qoi et en pès,
Et Dant Renart si l’avoit rès
Que il n’i donoit pas deus billes,
Corone fet jusqu’as orilles,
Et qant l’ot fete, si li dist :
Primaut, fet-il, se Diez m’aïst,
Tu me doiz savoir moult bon gré
De ce que je t’ai coroné.
Si faz-je, à la foi que doi :
Ai-je corone ? oïl, par foi,
Se ne m’en créez, tastez i.
Moult volentiers, par Saint Remi,
Fet Primaut, trestot soavet
Tot maintenant la main i met.
La corone a bien detastée,
Si la trova et grant et lée,
De leus en leus entrepelée ;
Lors a grant joie demenée,
Puis li a dit, Renart biau mestre,
Par mon chief or sui-je bon prestre.
Or ne voil-je plus demorer
Que je n’aille messe chanter,
Jà n’i aura plus atendu.
Et Renart li a respondu :
Primaut biax amis, non feras,
Les sains tot avant soneras,
Car on ne doit messe chanter
Devant qu’ait fet les sains soner ;
Sonez les, si ne vos soit grief.
Vos avez bien dit, par mon chief,
Fet Primaut, je les soneré.
Et puis après si chanteré.
Atant s’en est venuz as sainz
Si grant oirre con il pot ainz,
Et les cordes corut saisir,
Les sains sone de grant aïr
A glaz, à treble, à carenon.
Et Renart a pris son giron
Qui de rire ne se tenist,
Se toz ses parenz mors véist,
Sa bouche en estoupe d’un pan,
Puis dist, amis, ahan, ahan,
Sachiez bien les cordes, sachiez.
Si faz-ge, dist-il, ce sachiez,
Onques mès par nul ordené
Ne furent saint si bien soné
Conme cil seront, se je puis.
Et Renart respont, biax amis,
Tirez les deus cordes ensemble,
Trop sonent petit, ce me semble ;
Cele eschielete par delà,
Et Diex, com très bon son ele a !
Sachiez la corde, si orroiz.
Par foi, dist Primaut, ce est droiz.
Qui donc le véist efforcier
Les cordes tirer et sachier,
Ne se péust tenir de rire,
Jà soit ce que il oïst dire
Que ses peres fust en la biere.
Et Renart qui fet bele chiere,
Et tant fu sages et pensez,
Et de barat bien doctrinez,
Si li a dit, Primaut, amis,
Je vos ai en grant paine mis,
Lessiez ester, car trop sonez.
Cil respont, qant vos le volez
Il me vient moult bien à plaisir ;
Atant a fait le glaz fenir
Qui moult avoit fet longue lesse,
Et toz jors à l’autel s’eslesse
Au plus tost que il pot venir,
S’ala des vestemenz vestir
L’aube et l’amist tot sanz dangier,
Et Renart li curut aidier ;
Moult fierement li aïda,
La sorceinte baillié li a,
Et puis le fanon et l’estole.
Renart rit de ce qu’il l’afole,
Tot belement dit qu’en ne l’oie,
Primaut, encor aurez grant joie
Qant on vos roillera le dos :
Déable vos ont fet tant os,
Miex vos venist peschier au truble.
Atant Primaut prent la chasuble,
Tot maintenant l’a endossée :
La corone qu’iert grant et lée,
A aplaniée de sa main,
Et à l’autel vint tout de plain
Tot maintenant qu’il n’i ot el,
Et si a overt le mesel :
Les foilles a pris à torner.
Renart n’a soing de séjorner,
Qu’il avoit d’encontre péor,
Por ce n’ot cure de séjor ;
Par là où il estoit entrez
S’en est issuz tot adentez.
La fosse qui ert grant et lée,
A tot maintenant estopée,
La terre avoit ariere mise.
Et Primaut remest en l’Iglise
Tot revestu devant l’autel :
Son penser a mis à chanter,
Durement ulle et brait et crie.
Li Prestres a la noise oïe
Et si avoit les sainz oïz :
De son lit saut toz estordiz,
Si a une chandoile prise,
Au feu en vient si l’a esprise,
Si escrie son clerc Gilain,
Et sa fame et son Chapelain,
Et si prent la clef du mostier
Et à son col porte un levier.
La Dame i porta une grouge,
Et li Chapelains la coorge,
Et li Clers a pris une mace,
Qui fu hardiz conme limace,
Et tuit sont de l’ostel issu,
Droit au mostier en sont venu.
Li Prestres qui moult sot d’aguet,
Par un pertuis fist son aguet,
Si voit Primaut qui ulle et crie,
Et sachiez qu’il nel’ conut mie
Por la teste qu’il vit pelée,
Et la corone grant et lée.
L’uis fet sovent clorre et ovrir,
Et si l’ot uller et glatir
Aussi conme se fust déable.
Ne cuidiez pas que ce soit fable,
Que si grant péor a éue,
Tote l’en trouble la véue ;
S’est à terre pasmé chaü,
Et la Dame l’a connéu,
Conmence à crier et à brere,
Et li Clerc ne se volt plus tere,
Par la vile s’en va criant,
Les vilains va toz esveillant.
Or sus, fet-il, or sus, or sus,
Armez-vos, si n’atendez plus ;
Fetes vos cors apareillier,
Déables sont en cel mostier
Qui nos ont mon seignor tué,
Devant l’uis l’ont-il mort rué,
A poi ne somes tuit traï.
Et li vilain qui l’ont oï,
De lor liz saillent et s’atornent,
Et tot droit au mostier s’en tornent.
Qui donc véist vilains saillir
Et droit à cel mostier venir,
Bien li membrast de grant aïe :
Li uns endosse sa cuirie,
L’autre prent son chapel de fer
Que il semble venu d’enfer,
Trop avoit géu en fumiere :
Li autre prent sa forche fiere
Dont devoit espandre son fiens,
Et li autre maine ses chiens :
Une autre tient espée en main,
Bien furent quatre cent vilain
Qui sont de moult très male estrace.
Chascun porte baston ou mace,
Ou flael, ou maçue ou hasche,
Bien conbatront à la limace ;
Et cil qui estoit el mostier,
Il le vodront mal atirier
Se il povoit estre tenuz.
Et li Prestres ert revenuz
De paumoison et relevez,
Vers eus en vint trestoz desvez,
Si lor escrie durement,
Seignors, venez hastivement,
Déable nos ont aguetiez
Qui s’est mis en nostre moustier.
Lors acorent li vilain tuit,
Et li Prestres si ovri l’uis,
Si entrent enz à une hie.
Et Primaut a la noise oïe
Et se merveille que puet estre :
Au pertuis vint, si ne s’areste,
Si l’a trové de terre plain.
Vers l’autel s’en revet à plain
Conme cil qui fu esgarez
Et qui fu moult très mal menez,
Puis s’en vint enmi le moustier.
Le Prestre tenoit un levier,
Et à deus mains le feri si
Que par un poi ne l’abati.
Qant Primaut se senti feru,
Envers le Provoire est coru
Tot hors du sens et esragiez :
Jà fust li Provoires mengiez,
Mès li vilain trop li anuient,
Que trestuit ensemble le huient,
Si li donent des cox assez,
Tant que tot à le col quassez,
Et moult a éu de la honte.
Li uns le fiert, l’autre le boute
Li uns le fiert en la poitrine
Et li autre desus l’eschine.
Bien voit qu’il est à mal venuz,
A poi que il n’est retenuz ;
Mès qant vit ne porroit durer,
Durement se prist à irer.
Lors vosist-il bien el bois estre,
Si a choisi une fenestre
Bien haute dix piez et demi,
Il s’escosse, si saut par mi.
Moult fu dolenz et corociez
De ce que il est si bleciez ;
Mès en soi de ce se conforte
Que il les vestemens en porte.
Mès quant il fu hors, grant joie ot,
Fuiant s’en va plus que le trot
Envers le bois le col bessié,
Et li vilain tout eslessié
Après lui vont plus que le pas,
Mès il ne le véoient pas,
Car la nuit si estoit oscure,
Et il s’en vet grant aléure.
Ne s’est gueres arestéu,
En la forest s’en est venu ;
Le Provoire va menaçant
Qui ore l’aloit si batant,
Et dist que bien se vengera,
Que se il puet, ne li laira
Aignel ne brebiz, se il puet.
Einssi le dit que plus n’en puet,
Il le metra à povreté,
Mar l’a si malement frapé :
A tot le mains, fet-il, sanz faille
En ai-je bone conmençaille
De lui fere anuiz et corroz,
J’enporte ses vestemenz toz :
Se il velt demain chanter messe,
Praingne le chainse à la prestresse,
Ou sa chemise et aube en face,
Car se Diex bien encor me face,
Ceste n’aura mès que je puisse.
Diex dont qu’encor tot sol le truisse,
Que il soit venuz as chans fors,
Honte li feroie del cors ;
Foi que je doi Hersent ma fame,
Je li toudroie du cors l’ame,
Que il n’i leroit autre gage.
Et Renart qui Diex doint hontage,
Qui en son mostier me mena,
Puis s’en foui et me lessa
Qant il oï la gent venir,
Mès se jel’ puis as point tenir,
Je le feré en mon Dieu croire,
Jà ne m’estovra clamor fere
Devant Dant Noble le Lion
Por ce que m’a fait traïson,
Ainz en prendré tele venjance
Que l’en en parlera par France,
Jamès nus n’en ert conchiez.
Bien déusse estre chastiez,
Tant a fete honte à mon frere ;
Mès foi que doi l’ame mon pere,
Je l’en feré le cuer douloir
Se je le tiens en mon pouvoir.
Sachiez qant il m’eschapera
Jamès nus hons n’engingnera.
Einsi s’en aloit dementant,
Garde, voit Renart qui l’atent
Soz un chesne où il gesoit,
Et grant duel par semblant fesoit :
Les eulz ot par devant moilliez.
Devant Primaut s’est eslessiez
Qui moult ert d’ire angoissos :
Sire, fait-il, bien veniez-vos,
Conment venez-vos si grant pas ?
Renart, je ne vos salu pas,
Fet Primaut. Ha ! sire, por qoi ?
C’ai-je forfet ? dites le moi.
Par foi, por ce que me lesastes
Tot sol, et si vos en alastes
Por ce qu’issir ne m’en péusse,
S’en vos alast, tot mort i fusse.
Moult m’avez fet male barate,
Tout sol me convint à conbatre :
Filz à putain, nain descréuz,
Maint autre avez-vos decéuz
Par vostre enging, par vostre boule,
Mès foi que je doi à ma goule
Se ce ne me fust por pechié,
J’en fusse jà si bien vengié,
Jamès hom ne coroucissiez,
Ne honte ne li déissiez.
Qant Renart voit que velt tencier,
Sa parole prent à gracier,
Et si fet de péor semblant,
Si li respondi en tremblant :
Sire, fet-il, por Deu merci,
Entre moi et vos somes ci
Tot sol à sol en cest repere,
Bien voi honte me povez fere ;
Mès foi que je doi m’espousée
Herme la franche, la loée,
Et Malebranche et Percehaie,
Je ne me recort pas que j’aie
Envers vos nule riens mesfet,
Par qoi vos me movez tel plet ;
Et foi que doi Sainte Marie,
Le pertuis n’estoupai-je mie,
Mès li Prestres qui vos oï
Si l’estoupa, car je le vi.
Onques por moi nel’ volt lessier,
Si li conmençai à huchier
Que por Dieu ne l’estoupast mie,
Et il me dist tel vilanie
Qu se il me povoit tenir
Qu’il me feroit son gieu puir.
Et qant je vi que il s’armoit
Et que point ne m’aséuroit,
Et qu’à vos ne povoie aler,
Lors si m’en pris à devaler
Par ces destroiz les sauz menuz
Tant que au bois m’en sui venuz.
Onques n’i ot tenue resne,
Atendu vos ai soz cest chesne,
Tot plain d’ire et de mautalent,
Que bien pensoie voirement
Que li Prestres vos feroit batre,
Et qu’à lui coviendroit conbatre
Et tout endurer et soufrir,
Par el n’en poviez partir.
Foi que je doi Sainte Esperite
La verité vos en ai dite,
Parole n’en dis jusques ci
Voire n’en fust, à Dieu l’afi ;
Onc puis ne finai de plorer
Que je vos vi tant demorer.
Grant péor oi, se Diex me saut,
Que vos n’éussiez fet un saut,
Et que ne fust si avenu
Que vos éussent retenu ;
Mès non ont, si conme me semble.
Einsi s’escuse cil qui tremble,
De péor que cil ne l’asaille.
Et Primaut li respont sanz faille
Qui grant pitié en a éu
Por ce que plorer l’a véu,
Et dist, Renart, bien vos en croi,
Or ne soiez pas en effroi
Et n’aiez de nului péur,
Mès soiez trestout aséur
Je feré au Prestre domage,
Au mains en ai-ge grant corage.
J’ai l’aube, la chasuble painte,
L’amist, le fanon, la sorçainte,
Qant il vodra messe chanter,
Autre li estuet enprunter,
Car foi que je doi Saint Protès,
Il ne les avera jamès
Ces vestemenz que ci véez.
Par foi, sire, se me créez,
Je vos diré que nos ferons,
Fet Renart, nos les porterons
Demain à matin à la foire,
Tot maugré le nés au Provoire,
Bien les vendrons si con je croi.
Renart, dist Primaut, je l’otroi ;
Mès or escoute, ne t’anuit,
Reposon-nos ci mès anuit,
Que grant mestier ai de repos :
Moult me delt la char et les os,
Por ce qu’ai esté tant batuz,
Et des coux que j’ai recéuz.
Si nos reposon ci aclin,
Et demain si levon matin
Tot droit einsi à l’ajornée,
Si con l’aube sera crevée,
Si en alon droit à la foire :
S’en voie trovon le Provoire
Qui par achat les voille avoir,
Vendon les, si feron savoir,
Et debonairement parton
Ice que nos deus en auron
Si que l’un soit vers l’autre quites.
Par foi, dist Renart, moult bien dites.