Le Songe de la pucelle
Pour les autres éditions de ce texte, voir Le songe doré de la pucelle.
Leure du ſonge dore
Lors que laube du iour ſe creue
Quon ſe treuue tout-eſſore
Sommeil dune nuẏt aſſez griefue
Mendormẏ pour la faire briefue
Ce fut tout a la fin de maẏ
En ieuneſſe na point deſmaẏ
Si touſt que ie fuz endormẏe
Deulx perſonnes ie viz venir
Qui me diſoient ma belle amye
Il te fault aultre deuenir
Reprens ung nouueau ſouuenir
Car denfance tu es deliure
Laage enſeigne comme on doibt viure
Tu es moult belle freſche et ferme
Et de tous membres auenue
Ce diſt lune ie te afferme
Autant que aultre ſoubz la nue
Soit deſſoubz robe ou de corps nue
Blanche.neufue.dure.et reſaicte
Choſe de faczon eſt parſaicte
Iamais plus gente ie ne tins
Plus dure ne en meilleur point
Beau viſaige gent corps tetins
Qui ſont ozes en meilleur point
Car tu es daẏmer droit apoint
Lon te tient pour vng chief deupure
Bon eſt loupurier qui mieulx eupure
Tu as aſſez dentendement
Et ſens pour fille de ieune aage
Il nẏ fault point damendement
Ne querir aultre perſonnaige
Tu es nee de bon lignaige
Ainſi comme iaẏ entendu
Bien quon ne congnoiſt eſt perdu
Croẏ de vroẏ ſi ie fuſſe homme
Je te priaſſe pour ma dame
La ſinguliere es en ſomme
Qui oncques fut aimee dame
Car ie te aſſeure ſur mon ame
Que tu es belle tout adroit
Qui a belle dame il a droit
La pucelle
La firent vng poẏ dinterualle
Ses deux ſemblances que ie vẏ
Lune monte lautre deualle
Chaſcun aſſez bien ſe cheuy
Et ſur ma foy ie vous pleuẏ
Que ie dormẏ iucques alẏe
Bien dort qui na merencolẏe
Ainſẏ que perſonne qui ſonge
Me ſembla bien quant ie mauiſe
Des deux figures de mon ſonge
Cognoiſtre ſelon leur deuiſe
Labit meſmez les me deuiſe
En grouſſe lettre a poẏ de plet
Touſiours choſe nouuelle plaiſt
Ie prins les lettres a eſpelir
Ainſi que fame mal lyſant
Lune apres lautre reculir
Pour veoir quilz alloẏent diſant
Et tant les alle auiſant
Que de leurs mains ie fiz leſpreuue
Ie croẏ qui bien ſerche bien trouue
Ie trouue que lune auoit nom
Amours richement atournee
Comme dame de grant reuom
A bien porter ſon atournee
Lautre fut apart deſtournee
Ce fut honte qui ſe baubit
Selon la perſonne labit
Amours me print a raiſonner
Si fiſt honte puis a ſon tour
Moult bien me ſceurent ſermonner
Et me venir tout alentour
Elles menerent quant eſtour,
Par parolles bien aſſaillans
Il neſt aſſault que de vaillans
Diſt amours qui parla premiere
Ma ieune fille gente et tendre
Ieuneſſe eft touſiours couſtumiere.
De tout ſon temps ioye tendre
Pour ce me vueil les biens entendre
De moẏ nes pas encore quicte
Il fault que ieuueſſe ſaquitte
Adonc honte reſpont tout court
Ma belle fille non feras
Car vng mauluais monde ſi court
Certes que trop te meſferas
Si touſt quamoureuſe ſeras
Je te tien pour fame eſperdue
Fame ſans honneur eſt perdue
Amours
Honte de paour engendree
Auec cette fille vergongne
Oncques ne fiſt bonne cendree
Diſt amours qui honte ſermonne
Et ſi le te dit et gergonne
Pour faire ton bec claqueter
Veilles ne font que quaqueter
Honte
Haa belle fille que feras tu
Se tu croẏz cette malle fame
Ton fait ne vauldra vng feſtu
Folle demourras et infame
Pour dieu garde toẏ belle dame
Ne pers pas ta virginite
Pucelle eſt grant dignite
Amours
Si honte croẏz cette affollee
Iamais ne vauldras vng oignon
Tu es a prandre ta vollee
Pour auoir bien ou iamais nom
Choyſis quelque beau compaignon
Mais quil ſouffiſe a ta plaiſance
Il neſt treſor que ſcuffiſance
Honte
Croẏre conſeil ſi deligier
Et puys en prendre maladie
A grant peine peut aligier
Puẏs quil conuient que le vous die
Tantoſt aẏmer a leſtourdie
Ne ſeroit point bonne acointance
Haſter engendre repentance
Amours
A ieune pucelle appartient
Deſtre fricque ioẏeuſe et gente
Et quant en ce point ſe maintient
Ceſt nobleſſe qui ẏ regente
De ce ne doẏs eſtre indigente
Dancer voller comme vne aronde
On na que ſa vie en ce monde
Honte
Las auiſe ſe tu taſſers
Tu ſeras vne eſſeruellee
Teſte leuee comme vng ſerfs
De tout le monde rauallee
Soẏez ma fille entalentee
Touſiours ſimple et coẏe te tien
En pucelle na que maintien
Amours
Aẏme ma fille car ſans faille
Tu peux aẏmer ſecretement
En bien en honneur ne te chaille
Priſee en ſeras haultement
Huchee en tout eſbatement
En grans feſtes et atournoẏz
Trop craindre ne vault vng tournoẏs
Honte
Crainte en ieuneſſe ce me ſemble
Ceſt vng ſigne bien a priſer
Et ſi doibuent aller emſemble
Ou len ſe feroit meſpriſer
Ceſt enſeignement ia prins hier
Treſtout ainſi que ie le compte
Tout noble cueur doit craindre honte
Amours
Eſt ce honte deſtre ioẏeuſe
Ne de faire les gens valoir
Sans plus eſtre dautruẏ enuieuſe
Car du ſourplus ne doit chaloir
Mectre ſon temps ſans bien auoir
Ceſt fait de trop laſche couraẏge
Toſt ou tart le ſcaẏ fait louuraẏge
Honte
Faire valoir pour valoir moẏns
Les autres ne ſeroit pas ſens
Je te iure de mes deux mains
Tu es folle ſe tu te aſſens
A monſtrer a milliers ou a cens
Franche comme beſte ſauuage
Malle eſt eaue hors de riuaige
Amours
Veulx tu plus honneur ne aſſence
Que de veoir ces gentilz galans
Courir cheuaulx ferir de lance
Et eſpinguer ſans et galotz
Dauant toẏ qui auras le los
Que pour lamour de toẏ le font
Cueur amoureux en ioẏe font
Honte
Veulx tu plus eſtre diffamee
Que dauoir nom deſtre amoureuſe
Dun qui te dit ſa bien amee
Touteſfoiz quil vient maleureuſe
Garde toẏ poure doloreuſe
De te bouter en ſe haſart
Buche vert pas a pas art
Amours
Recognoys les biens que nature
Ta donnez et ſi largement
Et faict ſi belle creature
Que ceſt vng eſioẏſſement
Se ſi non au grant iugement
En rendras compte et reliqua
On doit garder le reliqua
Honte
Tant mieulx ta nature formee
Et de toute beaulte remplie
Tant plus doibz eſtre infourmee
Et de grans vertuz acomplie
Et ton cueur a mal faire plẏe
Ton compte ne ſeroit pas bon
Qui vouloir a nactendre bon
Amours
Sil teſtoit viſible a iamais
Ie ne ten vouldroye ſemondre
Ne te mouuoir a cecẏ mais
Les grans ſi te pouent reſpondre
Toutes aẏment ſans en eſcondre
Vne tant ſoẏt haulte princeſſe
Il ne faict pas bon eſtre en preſſe
Honte
Pluſeurs foẏz ſe ſont contentees
Aulcunes dames par amours
Qui puis ſen ſont bien repenties
Et en ont fait maintes clamours
Mieulx te vault faire tes ramours
Que toẏ repentir ſi dieu maẏde
A choſe faicte na remide
Amours
Ne fut celle du roẏ artus
Ẏſeus medee.pollixenne.
Et maintes plaines de vertuz
Qui aẏmerent de teſte ſaẏne
Ie te demande en bonne eſtraine
De ce faire qui les blaſma
Oncques neut ioẏe qui naẏma
Honte
Qui liroit iuſques en la fin
La fin nen fut point honnorable
Mais douloreuſe a la parfin
Ainſi me ſcoit dieu ſecourable
Pourtant ny ſoẏez fauorable
De exemple nẏ fault vng ne deux
Amours dune ioẏe a cent deulx
Amours
Narciſus qui ne voult aẏmer
Fut noẏee dens la fontaine
Par iugement qui ſut amer
Des dieux de ce ſuẏs ie certaine
Pource ne ſoẏez ſi haultaine
Que tu naẏmes qui taẏmera
Haẏne mortelle trop amer ha
Honte
Suſanne fut de dieu merie
Car ne voult aymer follement
Gardee feut deſtre perie
Pour garder honneur ſeullement
Selle eut mal du commencement
La fin fut bien victorieuſe
Dieu craindre eſt vie glorieuſe
Amours
On peut bien aẏmer ſans follie
Ne quil en viengne deſhonneur
Si villain pencer le foul lẏe
Ia dieu ne luẏ ſcoit pardonneur
Aẏme ma fille car honneur
Ad ce par nature ſeſprent
Qui fait ce quil doẏbt ne meſprent
Honte
Lentree eſt doulce et atraẏant
Ceſt fiel amer de miel confit
Dont lon neſt iamais retraint
Si touſt que ſe faict deſconfit
Non ẏ entrer eſt de prouffit
A tout le ſexe feminin
En la queue giſt le venin
Amours
Quant lon treuue vng homme ſecret
On le peut aẏmer ſeurement
Et quil ſoit loẏal et ſecret
Pour bien aẏmer entierement
Ainſi garde on legierement
Sa plaiſance iuſques au bout
On ne peut pas aẏmer par tout
Honte
Si neſt choſe tant ſoit ſecrete
Quen la parſin bien on ne ſaiche
Touſiours neſt pas fame diſcrete
De bien ſauoir couurir ſa taiche
Quant lun la boute lautre la chace
Cliner la fault de quelque part
Amours a ſa guiſe depart
Amours
Eſcoute la mamẏe neſt ce
Grant oultraige a ceſte ypocrite
Que feras tu de ta ienneſſe
La veulx tu perdre dune ſuẏte
Veulx tu amours mectre en fuẏte
Sans faire ton loẏal deuoir
On peut bien trop ſouuent deuoir
Honte
Ma ſeur aẏmer ſans nul fatras
Seroit bonne amour et loẏalle
Mais apres le coup du matras
Au long aller neſt pas fealle
Car humanite cordialle
Si fourre trop a lauenture
A peine oublie on ſa nature
Amours
Sa nature ſe veult forfaire
Dame raiſon eſt par deſſus
Pour la corriger et retraẏre
Affin quon·ne ſoit pas deceuz
Pour ce peut on et ſus et ius
Qui veult reſiſter ſe maiſt dieux
Raiſon domine ſoubz les cieulx
Honte
Qui ſeroit ſeur de la raiſon
On pourroit·tout auenturer
Mais veoir bruſler aultruẏ maiſon
Faict bon la ſienne procurer
Que feu nẏ puiſſe poſturer
Et quelle ne ſoit deſbaſtie
Saige hom par aultruẏ ſe chaſtie
Amours
Chacun ſcait bien et neſt pas bourde
Que pucelle qui na amẏ
Toute ſa uie eſt ſote et lourde
Et ne ſcait du bien a demy
Ains a touſiours lueil endormẏ
Sans faczon ne maniere auoir
Ceſt belle choſe que ſauoir
Honte
Sauoir pucelle ſobrement
Donc ſans vouloir eſtre ſubtille
Ceſt la maniere proprement
Ou faillir pourroit coup et quille
Tout ne vault pas vne coquille
Quant de langaige ſentremect
Qui parle trop menſonge ẏ mect
Amours
On dira ce que lon vouldra
Mais ſi pucelle na du bien
Nullẏ damer ne laſſauldra
Par dieu cel a ſauez vous bien
Pour ces graces laẏme on bien
Que dautrement elle ſoit belle
Fame ne doit eſtre rebelle
Honte
Aẏes honte dauant les ẏeulx
Quant tu ſeras damer eſprinſe
Le monde ten aẏmera mieulx
Et nen ſeras de dieu reprinſe
Conduy ſagement ton emprinſe
A dieu ie taẏ dit mon meſſaige
Qui conſeil croit il fait que ſaige
La pucelle
Adonc les prins a mercier
De ce que me vouldrent aprendre
Et diz peut on pacifier
Ie me garderaẏ de meſprendre
Lors me vint le grant iour ſourprendre
Quant plus riens ny vẏ meſueille
Maint ſonge plaiſent a merueille
Et quant ie fu bien eſueillee
Pence a ce que ouẏ auoẏe
Beaucoup ſonge a la veillee
Et en me pourmenant la voẏe
Et anſi comme le ſauoẏe
Recorde tout deulx ou troẏs foẏz
Songes ſont vroẏs aucuneſfoiz
Ialle dauenture trouuer
Vng qui ſauoit lire et eſcripre
Et meſſaẏe de leſprouuer
Sil vouldroit mes ſonges deſcripre
Il ſacorda ie luẏ diz ſire
Pour dieu que vos mains ſoient legieres
Danger eſt daller ſur riuieres
Je luẏ recite mot a mot
Ainſẏ que lauoye retenu
Selon que tout eſtoit dit mot
Et que deſſus eſt contenu
Si iaẏ faillẏ ne ſoit tenu
En meſprins ie vous en ſupplẏe
A paine eſt perſonne acomplie
Et ſil ẏa riens tant ſoit peu
Qui ſoit digne deſtre en memoẏre
Et dont en doẏe eſtre repeu
On fera bien ſon le voult croẏre
Et qui vouldra de ceſte ẏſtoire
Que le nom point ne le vous cele
Ceſt le ſonge de la pucelle
Cẏ finiſt le ſonge de la pucelle imprime par Robin Foucquet et Iehan cres ſoubz noble et puiſſant ſeigneur Iehan de rohan ſeigneur du gue de liſle[1] Du moẏs de Ianuier mil iiiic iiii vingts et quatre.
- ↑ Note de Wikisource : Jehan de Rohan du Gué de l’Isle (~1425-1493)