Le Songe doré de la pucelle
Pour les autres éditions de ce texte, voir Le songe doré de la pucelle.
Cy commence le ſonge dore de la pucelle.
Leure du ſonge dore
Lors q̃ laube du iour ſe lieue
Quon ſe treuue trop eſſore
Souuant dune nuyt aſſes griefue
Mendormis pour la faire briefue
Treſtout le premier iour de may
En ienneſſe na point deſmay
Sitoſt que ie fus endormie
Deux perſonnages uis uenir
Qui me dirent. Ma belle amye
Il te fault autre deuenir
Reprens ung nouueau ſouuenir
Car denfance tu es deliure
Laage enſeigne com on doit uiure
Tu es moult belle freſche et ferme
Et de tous membres auenue
Et diſt lune ie le tafferme
Autant quautre deſſoubz la nue
Soit deſſoubz robe ou corps nue
Blanche.ſouefue.dure et refaite
Choſe de ſaiſon eſt parfaite
Jamais pluſgaÿe ne te tiens
Plus drue ne en meilleur point
Beau uiſage. gent corps te tiens
Qui font ores leur premier point
Du ſurplus dire ne fault point
Car on te tient par ung chief deuure
Bel eſt louurage qui mieulx euure
Tu as aſſes dentendement
Et ſens pour fille de ienne aage
Je ny uoy point damendement
Ne querir autre perſonnage
Tu es nee de bon lignage
Comme puis auoir entendu
Bien quon ne congnoiſt eſt perdu
Se cõme femme ie fuſſe homme
Je te priaſſe pour ma dame
La ſinguliere ceſt en ſomme
Qui oncques fut nee de femme
Car ie taſſeure ſur mon ame
Que tu es belle tout a droit
Qui a belle dame il a droit
La firent ung peu dinterualle
Ces deux ſemblables que ie uis
Lune monte lautre deualle
Chaſcune aſſes bien ſe cheuiſt
Et ſur ma foy ie uous pleuis
Que dormis iuſques a la lie
Bien dort qui na melencolie
Ainſi que perſonne qui ſonge
Me ſemble bien quant ie mauiſe
Des deux perſonnes de mon ſonge
Congnoiſtre ſelon leur deuiſe
Labit meſmes le me deuiſe
En groſſe lettre a peu de plait
A des choſe nouuelle plait
Je prins aux lettres exemplir
Ainſi que femme mal liſant
Lune apres lautre recueillir
Pour ueoir quelles alloyent diſant
Et tant les alay auiſant
Que de leurs noms ie fis leſpreuue
Je croy qui bien charche bien treuue
Je trouuay que lune auoit nom
Amours richement atournee
Comme dame de grant renom
A bien porter ſon atour nee
Lautre fut a part deſtournee
Ce fut honte qui ſeſbaudit
Selon la perſonne labit
Amours me print a raiſonner
Si fit puys honte a ſon tour
Moult bien me ſceurent ſermonner
Et me uenir tout a lentour
Elles menerent grant eſtour
Par parolles bien aſſaillans
Il neſt aſſault que de uaillans
Amours
Ceſt amours qui parle premiere
Ma ienne fille gente et tendre
Amours eſt touſiours couſtumiere
De tout ſon temps a ioye tendre
Pource uueilles moy bien entendre
De moy nes pas encores quitte
Il fault que ienneſſe ſacquitte
Honte
Adonc reſpond honte tout court
Ma belle amye non feras
Car ung ſi mauuais monde court
Certes que trop te meſferas
Sitoſt quamoureuſe ſeras
Je te tiens pour toute eſperdue
Femme ſans honneur eſt perdue
Amours
Honte queſt de paour engendree
Auecq celle faulce uergoigne
Oncques ne fit bonne cendree
Mais touſiours eſt pleine de groigne
Faiſant une mauuaiſe troigne
Pour faire ſon bec clacqueter
Uielles ne font que cacqueter
Honte
Haa ma fille que feras tu
Se tu trois ceſte male femme
Ton fait ne uaudra ung feſtu
Folle deuiendras et infame
Pour dieu garde ta belle fame
Ne pers point ta uirginite
Pucellage eſt grant dignite
Amours
Se honte croys tu es affollee
Jamais ne uaudras ung oignon
Tu es a prendre ta uolee
Pour auoir ioye ou iamais non
Choiſis quelque beau compaignon
Mais quil ſouffiſe a ta plaiſance
Il neſt treſor que ſouffiſance
Honte
A croire conſeil de legier
Et puys en prendre maladie
A grant peine peut aleger
Puys quil conuient que ie le die
Tantoſt aimer a leſtourdie
Ne ſeroit pas bonne accointance
Haſter engendre repentence.
Amours
A ienne pucelle appartient
Deſtre friſque ioyeuſe et gente
Et quant en ce point ſe maintient
Ceſt nobleſſe qui la regente
De ce ne doit eſtre indigente
Dance et uole com une aronde
On na que ſa uie en ce monde
Honte
Las auiſe ſe tu taſſers
Tu ſeras une eſſeruellee
Teſte leuee com ung ſers
De tout le monde rauallee
Soyes en maniere attellee
Touſiours ſimple et coye te tien
En pucelle na que maintien
Amours
Aime ma fille car ſans faille
Tu peux aimer ſecretement
En bien et honneur. ne te chaille
Priſee en ſeras haultement
Huchee en tout eſbatement
En grans feſtes et en tournoys
Trop craĩdre ne uault ung tournois
Honte
Craindre en ienneſſe ſe me ſemble
Est ung ſigne bien a priſer
Et ſi doiuent aller enſemble
Ou lon ſe feroit meſpriſer
Ceſt enſeignement ie prins hier
Treſtout ainſi que ie le compte
Tout noble cueur doit craindre honte
Amours
Eſt ce honte deſtre ioyeuſe
Ne de faire les gens ualoir
Sans plus riens deſtre enuieuſe
Car du ſurplus ne peut chaloir
Quant on ſe met en nonchaloir
Ceſt trop fait de laſche courage
Toſt ou tard leſte fait aurage
Honte
Faire ualoir pour ualoir moins
Les autres ne ſeroit pas ſens
Je te iure de mes deux mains
Tu es folle ſe tu laſſens
Monſtree a milliers et a centz
Seras comme beſte ſauuage
Male eſt eau hors de riuage
Amours
Ueulx tu plus dõneur ne dauance
Que de ueoir ces gentilz falotz
Courir cheuaulx bondir la lance
Et eſpinguer ſaultz et galopz
Deuant toy qui auras les loz
Que pour lamour de toy le font
Noble cueur en ioye ſe fond
Honte
Ueulx tu plus eſtre diffamee
Que dauoir nom deſtre amoureuſe
Dun qui te dit ſa bien aimee
Touteſfoiz il ment maleureuſe
Garde toy pouure douleureuſe
De toy bouter a tel azard
Buſche uerte pas a pas ard
Amours
Recongnoys les biẽs que nature
Ta donne et ſi largement
Faite ſi belle creature
Que ceſt ung grant engagement
Si que non au grant iugement
En rendras compte et reliqua
Il fault garder le rebeca
Honte
Tant plus ta nature formee
De toutes uertuz acomplie
Tant plus tu dois eſtre informee
Et de treſtous grans biens remplie
Se ton cueur a mal faire plie
Ton compte ne ſera pas bon
Qui uolee a nattende bon
Amours
Se nulle neuſt aime iamais
Je ne ten uoudroye ſemondre
Ne teſmouuoir a cecy mais
Les grandes ten peuent reſpondre
Toutes aiment ſans en eſcondre
Une tant ſoit haulte princeſſe
Quant uiẽt leſte le primtẽps ceſſe
Honte
Pluſeurs foiz ſe ſont conſentues
Aucunes dames par amours
Qui puis ſen ſont bien repentues
Et en ont fait maintes clamours
Mieulx te uault faire tes rimours
Que ten repentir ſe dieu maide
A choſe faite na remede
Amours
Ne fut celle du roy arthus
Et medee et polliſſaine
Et maintes pleines de uertus
Qui aimarent de teſte ſaine
Pourtant ne ſoyez ſi haultaine
Que tu naimes qui taimera
Amer morcel trop amer a
Honte
Qui liroit iuſques a la fin
La fin nen fut pas honnourable
Mais douleureuſe a la parfin
Ainſi me ſoit dieu ſecourable
Pourtant ny ſoyes fauorable
Dexemple ny fault ung ne deux
Amours dune ioye a cent deulz
Amours
Narciſus qui ne uoult aimer
Fut neye dedens la fontaine
Par iugement qui fut amer
Des dieux. de ce ſuis ie certaine
Je te demande en bonne eſtraine
Ne fut bien martyr ceſtuy la
Oncques neut ioye qui naima
Honte
Suſanne fut de dieu amye
Qui ne uoult aimer follement
Gardee fut deſtre perie
Pour garder honneur ſeulement
Selle eut ung dur commencement
La fin fut bien uictorieuſe
Dieu craindre eſt uie glorieuſe
Amours
On peut bien aimer ſans follie
Ne quil en uieigne deſhonneur
Se uillain penſer le fol lie
Ja dieu ne luy ſoit pardonneur
Aime ma fille car donneur
Est qui par nature treſprent
Qui fait ce quil doit ne meſprent
Honte
Lentree eſt doulce et attrapant
Car ceſt miel de uenin confit
Dont on neſt iamais attrayant
Sitoſt quon ſe ſent deſconfit
Non y entrer eſt du prouffit
A tout le ſexe feminin
En la queue giſt le uenin
Amours
Honte trop lourdement teſtrange
Il ny fault point tant deſtriuees
Celles qui font tant de leſtrange
Sont bien ſouuãt les plus priuees
Et quant elles ſont deſriuees
Dauoir trop tarde ſe repentent
Beaucoup de choſes femmes tẽptent
Honte
Sages ſont celles qui ſe gardent
Daller en lieu pour faire eſcoutes
Car ſi bien a point ny regardent
Toſt y ſeront iuſques aux coutes
Ces parolles prens et eſcoutes
Enſuir telz eſbatz neſt pas mocque
Tel flatte autruy q̃ puys ſen mocque
Amours
Quant on treuue ung hõme diſcret
On le peut aimer ſeurement
Mais quil ſoit loyal et ſecret
Pour bien aimer entierement
Ainſi garde on legierement
Sa plaiſance ſi eſt friuolle
Fol eſt qui attent loyſel qui uole
Honte
Il neſt choſe tant ſoit ſecrete
Qua la parfin on ne la ſache
Touſiours neſt pas femme diſcrete
De bien ſauoir couurir ſa tache
Quant lun boute et lautre ſache
Sauoir le fault de quelque part
Amours a ſa guiſe deſpart
Amours
Helas mamye ce neſt pas ce
Ne croyes pas ceſt ypocrite
Que feras tu de ta ienneſſe
Queſt ſi belle et ſi bien eſcripte
La ueulx tu perdre toute fritte
Sans faire ton loyal deuoir
On peut mainteſfoiz trop deuoir
Honte
Deuoir trop ou peu qui emprunte
Sur ſon honneur blaſme ou reproche
Ja nacquittera ceſte emprunte
Celle qui ſoymeſmes reproche
Plus ſeſloigne et moyns ſaproche
Deſtre par tout bien renommee
Jamais ne meurt la renommee
Amours
Dõt uient renom fors q̃ des preux
Dõt uiennent les preux q̃ des dames
Par amours qui ſe ſert entre eulx
Qui font eſprouuer ſes heaulmes
Si q̃ ung tout ſeul uault .x. royaulᐥ
Pour une a q̃ ſeruãt ſe clame mes
Proueſſe double a cueur qui aime.
Honte
Ma ſeur a iouer ſans nul fatras
Seroit bonne amour et loyale
Mais apres le cop du matras
Au long aller neſt pas fiable
Car humanite cordiale
Sy fourre trop a lauenture
A peine oublie on ſa nature
Amours
Se nature ſe ueult forfaire
Dame raiſon eſt par deſſus
Pour la corriger et retraire
Affin quil nen ſoit pas deceuz
Pource peut on et ius et ſus
Qui reſister ueult ſi maiſt dieux
Raiſon domine ſoubz les cieulx
Honte
Qui ſeroit ſeur de la raiſon
On pourroit tout auenturer
Mais ueoir bruler autruy maiſon
Fait pour la ſienne procurer
Que feu ny puiſſe paſturer
Et quelle ne ſoit deſbaſtie
Sage par autruy ſe chaſtie
Amours
Chaſcũ ſcet biẽ ce neſt pas bourde
Que pucelle qui na amy
Toute ſa uie eſt ſotte et lourde
Et ne ſcet ne bien ne demy
Et touſiours a lueil endormy
Sans peu de contenance auoir
Ceſt belle choſe que ſauoir
Honte
Sauoir pucelle ſobrement
Doit ſans uouloir eſtre ſuttile
Ceſt ſa nature proprement
Ou faillir pourroit cop et quille
Tout ne uault pas une coquille
Quant de languager ſentremet
Qui trop parle menſonge y met
Amours
Trop de bien ſauoir ne peut on
Ne de mal mais que lon nen uſe
Qui riens ne ſcet ceſt ung mouton
Une brebis ou une buſe
Chaſcune foys on ſe rabuſe
Quant on ne ſcet ſon entregent
Ung mot eſt bel quant il eſt gent
Honte
Parler a point quant il eſt heure
Neſt pas uice ie le confeſſe
Combien que femme ſen eſmeuue
Si doit de parler faire ceſſe
Chaſcune neſt mye maiſtreſſe
Quen elle on ne treuue a redire
Mieulx ſe uault taire que mal dire
Amours
On dira ce que lon uoudra
Mais ſen pucelle na du bien
Nully daimer ne laſſaudra
Pardieu cela ſauez uous bien
Pour ſamour laime lon. combien
Que dautrement elle ſoit belle
Femme ne doit eſtre rebelle
Honte
Rebelle neſt qui ſe defend
Pour ſon honneur entregarder
Soymeſmes courrouce et offend
Celle qui ne ſe ſcet garder
Tant ſe peut on bien meſgarder
Que le chat ſe prent au fromage
Sens eſt de fouyr ſon dommage
Amours
Il neſt ma ſeur mye beſoing
Que toutes celles qui bien aiment
Soyent gettees pres ne loing
Saucuns pour dames les reclamẽt
Trop y en auroit qui ſe clament
Bonnes et uaillans preudefemmes
Gens meſdiſans ſont trop infames
Honte
Dangier. enuie. malebouche
Sont tout par tout faulx helequins
Garde que leur fait ne te touche
Car ilz ualent pys que coquins
Pys font que donner les boucquins
Pour ce prens garde a ton affaire
Nully neſt blaſme de bien faire.
Amours
Peche ſeroit de toy blaſmer
Et te mettre uillain chappel
Se les gens te ueulent aimer
Doys tu de ce faire ung appel
Non non ſe ieſtoy en ta pel
La uoudroye ie condeſcendre
Amours fit dieu du ciel deſcendre
Honte
Lamour de dieu et la mondaine
Ne ſe mettent point en ung compte
Lune eſt bonne lautre eſt fredaine
Lune paye lautre meſconte
Ceulx qui ueulent narrer ce compte
Se coeuurent bien dun ſac moille
Beau drap ne doit eſtre ſoille
Amours
Ceſt bonne amour q̃ bien uouloir
A ung autre com a ſoymeſmes
Et ce ung galant a ce uouloir
De tant quil la te met a meſmes
Ne luy dois tu uouloir ce meſmes
Ainſi dois tu ton honneur ſauue
Bonne femme quant ueult ſe ſauue
Honte
Qui ueult eſcheuer le peril
Il doit fouyr loccaſion
Pucelle nette craint uenin
Toute ordure et corrupcion
Affin que par communion
Ne ſe puiſt trouuer entachee
Blanche couleur eſt toſt tachee
Amours
Je ne ſauroye tant preſcher
Mais aime bien ſe tu men croys
Vers moy tu te doys adreſſer
Par le dieu qui pend en la croix
Ja bien nauras ſe ne me croys
Ne plaiſance en iour de ta uie
Aimer autruy neſt pas enuie
Honte
Commẽt tes ſecretz uergoigneux
Pourras a honneur deſcouurir
Qui doiuent eſtre ſi ſoigneux
Deſtre bien gardez de courir
Tu ne doys iamais loeil ouurir
Pour regarder ung hõme en chere
Honneur eſt doreure bien chere
Amours
Homme et femme ſont tout ung
Dune meſmes maſſe creez
Pource doiuent eſtre commun
Sans honte en tous lieux aſſeurez
Deux ſont en une chair encrez
Silz ſentraiment ceſt raiſonnable
Toute choſe aime ſon ſemblable
Honte
Ma ſeur tant que ſeras honteuſe
Et auras crainte de faillir
Jamais ne ſeras ſouffraiteuſe
Biens ne te pourront defaillir
Ne te ſeuffre trop aſſaillir
De ces ioliz fringuans uerboys
Bon fait auoir ung oeil aux boiz
Amours
Fille tu es a ta franchiſe
Fais ce que bon te ſemblera
Tu as temps de uiure a ta guiſe
Eſpoir riens on ne temblera
Ton fait dautres reſſemblera
Sur le col la bride ten laiſſe
Jenne chien enuis ua en laiſſe
Honte
Honte auras deuant tes yeulx
Quant tu ſeras damours eſpriſe
Le monde ten aimera mieulx
Et nen ſeras de dieu repriſe
Conduys ſagemẽt ton empriſe
Sur le col la bride ten laiſſe
Jenne chien enuis ua en laiſſe
La pucelle
Donc les prins a mercier
De ce q̃ me uoudrent aprendre
Et dis pour les pacifier
Que me garderay de meſprendre
Lors me uint le grant iour ſurprẽdre
Quãt plus riens ne uis ie meſueille
Maintz ſonges plaiſent a merueille
Et quant ie fus bien eſueillee
Je penſay a ce que iauoye
Beaucoup bruge a la ueillee
En moy pourmenant par la uoye
Et ainſi comme ie ſauoye
Recorday tout deux ou troys foiz
ſonges ſont uraiz aucuneſfoiz
Jalay dauenture trouuer
Ung qui ſauoit lire et eſcrire
Si meſſayay de leſprouuer
Et ſi luy dis. Amy beau ſire
Uoulez uous point mon ſonge eſcrire
Que iay ſonge preſentement
Maint ſonge donne alegement
Je luy recitay mot a mot
Ce que deſſus eſt contenu
Selon ce queſte me dit ot
Lequel la treſbien entendu
Se iay failly ne ſoit tenu
A meſpris ie uous en ſupplie
A peine eſt perſonne accomplie
Et ſil y a riens tant ſoit peu
Qui ſoit digne deſtre en memoire
Et dont on doiue eſtre repeu
On fera bien ſon le ueult croire
Et qui uoudra de ceſt yſtoire
Que le nom point ie ne uous celle
Ceſt le ſonge dune pucelle
Cy finiſt le ſonge dore
autrement appelle dune
pucelle.
R uoy ie bien q̃ mon dueil renouuelle
Et que ma ioye prent ſon definemẽt
Quant il me fault partir de la treſbelle
Qui a mon cueur a ſon commandement
Si ne ſay pas la maniere comment
Uiure puiſſe longuement ſans mourir
Puys quil me fault de ma dame partir
Car tãt mon cueur dedens moy eſtincelle
Et iour et nuyt fremiſt ſi aſprement
Quen moy paour par dangier ſi ſe reueille
Et deſespoir qui dun conſentement
Sont aliez pour me faire torment
Si ne luy pas qui me puiſt garentir
Puys quil me fault de ma dame partir
Mort uien a moy ſi me prens ie tappelle
Car iaime mieulx mourir prochainement
Que receuoir ſi treſmale nouuelle
Com de mamour faire deppartement
Mais ſans ſeiour iay le definement
Deſtrains mon cueur et le uien aſſaillir
Puys quil me fault de ma dame partir
Prince ie uous ſupply treſhumblement
Que me uueillez donner alegement
Car grief douleur fait mon cueur eſpartir
Puys quil me fault de ma dame partir