Le Tiers Livre/38

La bibliothèque libre.
Sauter à la navigation Sauter à la recherche

Comment par Pantagruel & Panurge est Triboullet blasonné.

Chapitre XXXVIII.


Par mon ame (respondit Panurge) ie le veulx. Il m’est aduis que le boyau m’eslargit. Ie l’auois nagueres bien serré & constipé. Mais ainsi comme auons choizy la fine creme de Sapience pour conseil, aussi vouldrois ie qu’en nostre consultation præsidast quelqu’vn qui feust fol en degré souuerain. Triboulet (dist Pantagruel) me semble competentement fol. Panurge respond. Proprement & totalement fol.

pantagrvel.
Pantagruel f. fatal.
f. de nature.
f. celeste.
f. Iouial.
f. Mercurial.
f. Lunaticque.
f. erraticque.
f. ecentricque.
f. æteré & Iunonien.
panvrge.
Pa. f. de haulte game.
f. de b quarre & de b mol.
f. terrien.
f. ioyeulx & folastrant.
f. iolly & folliant.
f. à pompettes.
f. à pilettes.
f. à sonnettes.
f. riant & Venerien.
pantagrvel.
f. arcticque.
f. heroicque.
f. Genial.
f. prædestiné.
f. Auguste.
f. Cæsarin.
f. Imperial.
f. Royal.
f. Patriarchal.
f. Original.
f. loyal.
f. ducal.
f. banerol.
f. seigneurial.
f. palatin.
f. principal.
f. pretorial.
f. total.
f. eleu.
f. curial.
f. primipile.
f. triumphant.
f. vulguaire.
f. domesticque.
f. exemplaire.
f. rare & peregrin.
f. aulicque.
f. ciuil.
f. populaire.
f. familier.
f. infigne.
f. fauorit.
panvrge.
f. de soubstraiste.
f. de mere goutte.
f. de la prime cuuée.
f. de montaison.
f. original.
f. Papal.
f. consistorial.
f. conclauiste.
f. buliste.
f. synodal.
f. Episcopal.
f. Doctoral.
f. Monachal.
f. fiscal.
f. extrauaguant.
f. à bourlet.
f. à simple tonsure.
f. cotal.
f. gradué nommé en follie.
f. commensal.
f. premier de sa licence.
f. caudataire.
f. de supererogation.
f. collateral.
f. alateré alteré.
f. niais.
f. passagier.
f. branchier.
f. aguard.
f. gentil.
f. maillé.
f. pillart.
pantagrvel. f. Latin.
f. ordinaire.
f. redoubté.
f. transcendent.
f. souuerain.
f. special.
f. Metaphysical.
f. ecstaticque.
f. Categoricque.
f. predicable.
f. decumane.
f. officieux.
f. de perspectiue.
f. d’Algorisme.
f. d’Algebra.
f. de Caballe.
f. Talmudicque.
f. d’Alguamala.
f. compendieux.
f. abreuié.
f. hyperbolicque.
f. antonomaticque.
f. allegoricque.
f. tropologicque.
f. pleonasmicque.
f. capital.
f. cerebreux.
f. cordial.
f. intestin.
f. epaticque.
f. spleneticque.
f. venteux.
panvrge.
f. reuenu de queue.
f. griays.
f. radotant.
f. de soubarbade.
f. boursouflé.
f. supercoquelicantieux.
f. corollaire.
f. de leuant.
f. soubelin.
f. cramoisy.
f. tainct en graine.
f. bourgeoys.
f. vistempenard.
f. de gabie.
f. modal.
f. de seconde intention.
f. Tacuin.
f. heteroclite.
f. Sommiste.
f. Abreuiateur.
f. de morisque.
f. bien bullé.
f. mandataire.
f. capussionnaire.
f. titulaire.
f. Tapinois.
f. rebarbatif.
f. bien mentulé.
f. mal empieté.
f. couilart.
f. grimault.
f. esuenté.
pantagrvel. f. legitime.
f. d’Azimuth.
f. d’Almicantarath.
f. proportionné.
f. d’architraue.
f. de pedestal.
f. parraguon.
f. celebre.
f. alaigre.
f. solennel.
f. annuel.
f. festiual.
f. recreatif.
f. villaticque.
f. plaisant.
f. priuilegié.
f. rusticque.
f. ordinaire.
f. de toutes heure.
f. en diapason.
f. resolu.
f. hieroglyphicque.
f. autenticque.
f. de valleur.
f. precieux.
f. fanaticque.
f. fantasticque.
f. lymphaticque.
f. Panicque.
f. alambicqué.
f. non fascheux.
panvrge. f. culinaire.
f. de haulte fustaie.
f. contrehastier.
f. marmiteux.
f. catarrhé.
f. braguart.
f. à xxiiij. caratz.
f. bigearre.
f. guinguoys.
f. à la Martingualle.
f. à bastons.
f. à marotte.
f. de bons bies.
f. à la grande laise.
f. trabuchant.
f. susanné.
f. de rustrie.
f. à plain bust.
f. guourrier.
f. guourgias.
f. d’arrachepied.
f. de Rebus.
f. à patron.
f. à chapron.
f. à double rebras.
f. à la Damasquine.
f. de tauchie.
f. d’azemine.
f. barytonant.
f. mouscheté.
f. à espreuue de hacquebutte.

Pant.
Si raison estoit pourquoy iadis en Rome les Quirinales on nommoit la feste des folz, iustement en France on pourroit instituer les Triboulletinales.
Pan.
Si tous folz portoient cropiere, il auroit les fesses bien escorchées.
Pant.
S’il estoit Dieu Fatuel, du quel auons parlé, mary de la diue Fatue, son pere seroit Bonadies, sa grande mere Bonedée.
Pan.
Si tous folz alloient les ambles, quoy qu’il ayt les iambes tortes, il passeroit de vne grande toise. Allons vers luy sans seiourner. De luy aurons quelque belle resolution, ie m’y attends.

Ie veulx (dist Pantagruel) assister au iugement de Bridoye. Ce pendent que ie iray en Myrelingues, (qui est dela la riuiere de Loyre) ie depescheray Carpalim pour de Bloys icy amener Triboullet. Lors feut Carpalim depesché. Pantagruel acompaigné de ses domesticques Panurge, Epistemon, Ponocrates, frere Ian, Gymnalle, Rhizotome, & aultres print le chemin de Myrelingues.