Le premier acte du synode nocture (éd. 1608)/Harangve de Sœur Diaphonia
HARANGUE DE SŒUR
Diaphonia.
T quoy ? Sperme infernal, engence de viperes, fleau
du genre humain, abiſme de malediction, mes freres
& ſœurs, ſommes-nous iuſques à ce iour ſi peu leurez
aux familiaritez des tempeſtes, orages, fouldres,
& eſclairs des peres Diables, nos bons maiſtres,
& conducteurs en toutes nos affaires, que la palle
crainte nous ſaiſiſſe aux moindres accents de leur
voix ? Sommes-nous donc de la bourbe & limon de
ces eſprits rabaiſſez, infirmes & rauallez qui à la
ſeule viſion d’vn ſimple ſpectre, & fantoſme perdent
& font naufrage de tous leurs ſens, courages
& aſſeurances ? O humeur timide, debile & enfantine,
qu’vn corps materiel & eſſentiel ſe donne en
proye à l’appréhenſion de ſon ombre, comme ſi
nous n’eſtions pas paiſtrys d’aſſez forte paſte &
complexion, & ſi nous n’auions iamais monté ſur
l’ours pour gagner cette victoire ſur nous meſmes,
en la deſroutte de ces noſtres folles & tendres terreurs !
le long temps qu’il y a que nous vſons de ces
mets infernaux deburoit auoir pieça accouſtumé
noſtre palais à leur gouſt, & reſtons encore ſoubs
la baguette idiots apprentis, & de nulle valeur que
nous ſommes : non, les Enfers deburoient auoir les
oreilles cloſes & cirées aux importunes imprecations,
que nos vengeances leur aboyent iournellement,
cela me donnant de l’admiration de ce qu’ils
ſe rendent ſi volontaires à nos affections & deſirs,
dequoy nous deburions rougir de honte, & faut
croire que nous ſommes de leurs plus grands amis,
puiſque au moindre de nos mandements ils acquieſcent
auec vne tant viſte promptitude. He
qu’il nous faut bien terraſſer toutes ces coüardes
timiditez maintenant qu’il nous eſt beſoin de les
rechercher iuſques au centre de leurs obſcurs &
hideux manoirs, pour nous fournir de meſdiſances
contre ce Sarrazin paßionné de Calianthe, qui ſe veut
faire croire, temeraire qu’il eſt, d’emporter de haulte
lutte par le moyen de ſes chetifs parents & de ſes
merites ceſte Nymphe Cloris, honneur de noſtre ville :
Combien tu es eſloigné de tes ridicules & chimeriques
pretentions, yurongne Magicien, endebté, valet
amoureux, oyſon bridé, & desbauché que tu es, que tu
comptes bien ſans ton hoſte, lubricque, paillard, &
corrupteur de ieuneſſe : Car ie me lance à trauers deux
cents vingt-ſept legions des plus noirs Diables à
poil griſon, qui ſoyent és concauitez des abiſmes ſi
quand ie ſerois toute ſeule auec l’vn de mes ramonneurs,
ie ne trouue bon & ample moyen de te faire
donner du nez en terre à la renuerſe au milieu de ta
carriere : ie ne me vante point, mais ie ſuis certaine
que mes feux ſont ſeuls capables de reduire en cendre
toutes tes conceptions pour ce regard. Qui
ſont ceux qui ignorent la frequentation que mon
impudẽce m’a acquiſe auec le bon homme ? qui m’auoit
voué iuſques à là tant d’affection qu’il fut tout
preſt vn iour de rompre ſon bois Mouſſu dans mes
publiques barrieres, contract pendu au cul, n’euſt eſté
ce petit accident d’vrine oſſelée qui interuinſt : par mõ
ame il eſtoit toutefois bien de loiſir de retarder ſes
deſſeins pour ſi peu de choſe, & veu que i’auois
deſia (aſſez de temps y auoit) & accompagnée
chaſſé par tant de fois aux beſtes à vingt ongles.
Qui ceux-là qui doubtent que moy & le compere
Diaulus que voicy ne luy facions entrer dans la
fantaſie toutes ſortes de deffiances pour le tenir en
perpetuelle bride ? & cependant rompre coup à ſes
reſolutions, ſi d’auanture elles eſtoient tant ſoit
peu enclines du coſté de l’autre coſté, ie me perſuade
que c’eſt vn bruit commun du traffic que nous
menons le compere ſuſdict & moy, c’eſt pourquoy ie
ne vous en veux point eſtourdir les entendoires,
mais ie ſçay bien qu’au plus fort du combat ie luy
feray promettre, & ſigner, s’il en eſt beſoin, tout ce
qui me plaira : & le compere faiſant d’autre chemin
par ſon induſtrie tomber dans ſes toilles quelque
friand morceau, charnu, blanc & droict, rien ne
nous ſera refuſé ie vous en donne parolle. Nous ne
deſirons point, au reſte tirer de ſeruice des faicts
Angeuins que noſtre pere Conſequutus nous vient
fraiſchement de deſduire, ils ſont trop anciens, &
de peu de conſequence : ce ſont traicts de pieces de
† Grauis malæ conſciẽtiæ lux eſt.beuf communs & triuiaux. † Nuict eſtoillée, mere
du repos, fidelle recelleuſe, diſſimulatrice & coupable
des humaines meſchancetez, que tu r’apporterois
bien vne entiere Iliade de mes flammes mõſtrueuſes
de plus d’appetit, & ſauoureuſe venaiſon que
tout cela. O poulies ; ô locquets, ô faulſes perruques, ô
deſguiſements, ô mots du guet ſacrez, & cheris ; mais
combien dauantage, O allée du cocq, O tour de murailles,
O guiſchet, O pont, O barriere, O iardin, O gué fault, O
palliſſade, & O ie ne veux pas dire, en mettriez vous
en lumiere de plus ſuperlificoquentieux en toutes
formes ? Ceux-la auſſi, à la verité, ne ſeroient pas de
miſe, il nous en eſt bien arriué de plus modernes il
y a peu, & plus peſants à la balance, Tholoſains, Querſinois,
Bordelois, Berruiers, & Orleannois, qui ſont
beaucoup plus de monſtres & de meilleure ſoye.
Mon Pere ; reſtablez vos iuments de plat pays, nos
rouſſins d’Eſpagne ont la ſemence trop noble
pour la ſeringuer, & eiaculer dedans leur matrices :
Et certes ie me chatouilleray de cette creance
que ce ſont coups de Ciel que ces nouuelles icy, aucune
choſe ne donnant plus grand branſle à toute
noſtre affaire que les immenſes deſbauches farcies
de tant de deſpences, dont il eſt encores redebuable
dans Thoulouſe de douze cents eſcus, autant dãs
Orleans, & autres, d’vne non moindre ſomme. Ce
poinct, Tribades cacozelez, eſt l’vnique Braquemart qui
detranchera du fil de ſon acier tout ce qui pourroit
y auoir dés cette heure denoüé, & d’eſtrainct : cette
clauſe eſt la ſeule plume qui rayera, & biffera toutes
les conditions que meſme vn notaire auroit
caracterées deſſus ſon parchemin, n’en queſmandons
point d’autres, & n’appellons aucun ſecours
eſtranger pour auoir de ſi puiſſantes forces chez
nous meſmes & qui meurent d’enuie d’eſtre employées,
& veoir le camp contraire afin que l’on iuge
de leur energie. Ce ſera ſoubs mes enſeignes
qu’ils marcheront & combattront, ſi noſtre mere
Niobé me veut de tant honorer, que de m’en donner
la conduitte, comme ſeule capable du milieu
de vous autres d’vne tant onereuſe charge. Ie n’ay
point crainte de recepuoir aucun reproche & deſhonneur,
ſi i’ay l’entrée en ces glorieuſes pretentions,
au contraire, mon ame courageuſe & forte en
cette ſorte de perils n’en rapportera qu’vn ſuperbe
triomphe, ou vne vertueuſe mort me terraſſera au
plus eſpois des bataillons ennemis : Ie le vous iure
& promets par ce flambeau baigné de ſang humain
que ma dextre brandiſt par les rages & furies qui
m’aſſiſtent & portent ayde en tout ce que ie vois
monopolant contre Calianthe, & par l’immuable
volonté qui me bourrelle l’eſprit iournellement
en la vengeance que ie pretends en bref aſſouuir
aux deſpends de ſes biens, de ſon honneur, & de ſa vie :
Tel fut le Diateleſe des effectuelles proteſtations pathetiques de cette Erinnys Diaphonienne auquel Niobé, & chacun des aſſiſtans monſtra vne grande allegreſſe pour l’animoſité que l’on congneut, dont elle eſtoit pouſſée en cette affaire, & par vn commun applaudiſſement ils luy donnerent deſlors leurs voix en general de la Lieutenance qu’elle ambitionnoit : raſſiſe qu’elle fut de corps, & tant ſoit peu d’eſprit, & ayant des ongles attiedy vn mordãt Prurit qui s’eſtoit naturaliſé à ſon Comment à nom, de fortune eiaculatrice, pour valider ce dicton chirurgique que vbi vulnus, ibi manus : le Maſtrope Diaulus ſentant que ſon ordre anorme eſtoit venu, ſes gregues Albanoiſes, eduuettées à poinct, ſa Mouſtache retrouſſée en Dom Diego de Camaraſſa ſaſtago, ſes cheueux mignonnellement frizottez par ondelettes pour mieux complaire à ſon Vrinal Done Chironomarche qui eſtoit là preſente au reſte.
Plus fringant, & eſperlucat
Et cent fois plus gay que Perrot
Ou le valet d’vn Aduocat.
Ayant mis deux ou trois fois la main à ſon Baudrier
qui luy demangeoit commencea ainſi.