Les Œuvres de François Rabelais (Éditions Marty-Laveaux)/Gargantua/30
![](http://upload.wikimedia.org/wikipedia/commons/thumb/4/49/Rabelais_marty-laveaux_02_%28page_057_crop%29.jpg/400px-Rabelais_marty-laveaux_02_%28page_057_crop%29.jpg)
Comment Ulrich Gallet fut envoyé devers Picrochole.
Chapitre XXX.
es lettres dictées et signées, Grandgousier ordonna que Ulrich Gallet, maistre de ses requestes, homme saige et discret, duquel en divers et contencieux affaires il avoit esprouvé la vertus et bon advis, allast devers Picrochole pour luy remonstrer ce que par eux avoit esté decreté.
En celle heure partit le bon homme Gallet, et, passé le gué, demanda au meusnier de l’estat de Picrochole, lequel luy feist responce que ses gens ne luy avoient laissé ny coq ny geline, et qu’ilz s’estoient enserrez en La Roche Clermauld, et qu’il ne luy conseilloit poinct de proceder outre, de peur du guet, car leur fureur estoit enorme. Ce que facilement il creut, et pour celle nuict herbergea avecques le meusnier.
Au lendemain matin se transporta avecques la trompette à la porte du chasteau, et requist es guardes qu’ilz le feissent parler au roy pour son profit.
Les parolles annoncées au roy, ne consentit aulcunement qu’on luy ouvrist la porte, mais se transporta sus le bolevard, et dist à l’embassadeur : « Qu’i a il de nouveau ? Que voulez vous dire ? »
Adoncques l’embassadeur propousa comme s’ensuit :
![](http://upload.wikimedia.org/wikipedia/commons/thumb/7/79/Rabelais_marty-laveaux_02_%28page_052_crop%29.jpg/80px-Rabelais_marty-laveaux_02_%28page_052_crop%29.jpg)