Les Œuvres de Mesdames Des Roches/Catherine des Roches/Response au dernier sonnet de Charite
Abel L'Angelier, (p. 115).
Responce au dernier sonnet de Charite.
egardez vous en moy, Charite ma Deeſſe,
Regardez voſtre front, heureux ſiege d’amour,
Regardez voz beaux yeux, ma lumiere, & mon jour,
Qui commandent mon cueur d’une œillade maiſtreſſe.
Regardez l’or friſé de voſtre blonde treſſe,
Regardez voz sourcils courbez d’vn demi-tour,
Regardez mille traicts recelez à l’entour
Pour ſervir le tyrant de ma ieune allegreſſe.
Mais ſurtout regardez voſtre gracieux ris,
Qui par ſa grand’douceur ouvre le Paradis,
Où veullent demeurer les bien-heureuſes ames :
Ha n’y regardez plus, Madame, car i’ay pœur
Que vous reconnoiſſant ſi parfaicte en mon cueur,
Vous meſme ne brulez dans voz propres flammes.