Les Œuvres de Mesdames Des Roches/Madeleine des Roches/Sonnet 16
Abel L'Angelier, (p. 34).
Cambiſes, & Brenus, deuindrent maniacles.
L’un bleſſant à Memphis le Dieu Egyptien,
L’autre pillant aux Grecs le temple Delphien
Où Apollon rendoit le vain de ſes oracles.
Des vaiſſeaux profanez les ſacre-ſaincts miracles
Oſterent vie & regne au Babylonien
Artrayctes volant le ſepulchre ancien
En lieu profane où ſainct n’eut de ſeurs receptacles.
Si ce grand Dieu permit l’effect de ſa vengeance,
Pour ce qui n’a de foy vertu, force, ou puiſſance,
Saincte ceremonie, eſperance, ny foy :
Ne vous punira il, violeurs des ſaincts temples,
Qui auez des Payens pris les cruels exemples
Offençant l’Eternel, le pays, & la Loy ?