Les Œuvres de Mesdames Des Roches/Madeleine des Roches/Sonnet 32
Abel L'Angelier, (p. 42).
Ô Dame de clair ſang honnorable & inſigne,
Qui luiſez entre nous comme un autre ſoleil,
Vn ſoleil de Vertus qui n’a point de pareil,
De ſaincte pieté & chasteté le ſigne.
Olda pour expoſer la parolle diuine
Seconde Delbora en Prudence & conſeil,
Sizare voit briſer ſon guerrier appareil
Au ſon de voſtre voix agreable & benine.
Madame ce grand Dieu dont vous eſtes venue,
Voulant que vous fuſſiez diuine reconnue
Par voz doctes eſcrits & ſainctes actions :
Vous donna vn beau corps du ſang Royal de Frãce,
Vn esprit plein de foy, grace & intelligence,
Comme vn ſacré ſeiour de ſes perfections.