Les Chroniques de Sire Jean Froissart/Livre II/Chapitre CXCIV
CHAPITRE CXCIV.
Bien savoit le roi de France et les seigneurs qui de-lez lui étoient et qui sur les champs se tenoient, que les Flamands approchoient, et que ce ne se pouvoit passer que bataille n’y eût ; car nul ne traitoit de la paix, et aussi toutes les parties en avoient grand volonté. Si fut crié et noncié le mercredi au matin parmi la ville de Yppre que toutes manières de gens d’armes se traissent sur les champs de-lez le roi et se missent en ordonnance, ainsi qu’ils savoient qu’ils devoient être. Tous obéirent à ce ban fait de par le roi, de par le connétable et de par les maréchaux : ce fut raison ; et ne demeura nuls hommes d’armes ni gros varlets en Yppre quand leurs maîtres furent descendus. Mais toutefois ceux de l’avant-garde en avoient grand’foison avecques eux, pour les aventures du chasser et pour découvrir les batailles ; à ceux-là besognoit-il le plus que il ne faisoit aux autres. Ainsi se tinrent les François ce mercredi sur les champs assez près de Rosebecque ; et entendoient les seigneurs à leurs besognes et à leur ordonnance.
Quand ce vint au soir, le roi donna à souper à ses trois oncles, au connétable de France, au sire de Coucy et à aucuns autres seigneurs étrangers de Hainaut, de Brabant, de Hollande et de Zélande, d’Allemagne, de Lorraine, de Savoie, qui l’étoient venus servir ; et les remercia grandement, et aussi firent ses oncles, du bon service qu’ils lui faisoient et montroient à faire. Et fit ce soir le gait pour la bataille du roi, le comte de Flandre ; et avoit en sa route bien six cens lances et douze cens hommes d’autres gens. Ce mercredi au soir, après ce souper que le roi avoit donné à ces seigneurs, et que ils furent retraits, le connétable de France demeura derrière, et dernièrement au prendre congé, pour parler au roi et à ses oncles de leurs besognes. Ordonné étoit du conseil du roi ce que je vous dirai : que le connétable, messire Olivier de Cliçon, se desmettroit pour le jeudi, lendemain, car on espéroit bien que on auroit la bataille, de l’office de la connétablie ; et le seroit seulement pour ce jour en son lieu le sire de Coucy, et il demeureroit de-lez le roi. Et avint que, quand le connétable prit congé au roi, le roi lui dit moult doucement et amiablement, si comme il étoit enditté de dire : « Connétable, nous voulons que vous nous rendiez votre office pour le jour de demain ; car nous y avons autre ordonné, et voulons que vous demeurez de-lez nous. » De ces paroles, qui furent toutes nouvelles au connétable, fut-il moult grandement émerveillé : si répondit et dit : « Très cher sire, je sais bien que je ne puis avoir plus haut honneur que de aider à garder votre personne ; mais, cher sire, il venroit à grand contraire et déplaisance à mes compagnons et à ceux de l’avant-garde, si ils ne m’avoient en leur compagnie ; et plus y pourriez perdre que gagner. Je ne dis mie que je sois si vaillant que par moi se puist achever celle besogne ; mais je dis, cher sire, sauve la correction de votre noble conseil, que depuis quinze jours, en çà, je n’ai à autre chose entendu, fors à parfournir à l’honneur de vous et de vos gens mon office, et ai endittés les uns et les autres comment ils se doivent maintenir ; et si demain que nous nous combattrons, par la grâce de Dieu, ils ne me véoient, et je les défaillois d’ordonnance et de conseil, qui suis usé et fait en telles choses, ils en seroient tout ébahis, et en recevrois blâme. Et pourroient dire les aucuns que je me serois dissimulé, et que couvertement je aurois tout ce fait et avisé pour fuir les premiers horions. Si vous prie, très cher sire, que vous ne veuilliez mie briser ce qui est fait et arrêté pour le meilleur ; et je vous dis que vous y aurez profit. »
Le roi ne sçut que dire sur celle parole : aussi ne firent ceux qui de-lez lui étoient, et qui entendu l’avoient, fors tant que le roi dit moult sagement : « Connétable, je ne dis pas que on vous ait en rien desvéé que en tous cas vous ne soyez très grandement acquitté, et ferez encore ; c’est notre entente : mais feu monseigneur mon père vous aimoit sur tous autres et se confioit en vous ; et pour l’amour et la grand’confidence qu’il y avoit, je vous voulois avoir de-lez moi à ce besoin et en ma compagnie. » — « Très cher sire, dit le connétable, vous êtes si bien accompagné de si vaillans gens, et tout a été fait par si grand’délibération de conseil, que on n’y pourroit rien amender ; et ce vous doit bien et à votre noble et discret conseil suffire. Si vous prie, que pour Dieu, très cher sire, laissez-moi convenir en mon office ; et vous aurez demain, par la grâce de Dieu, en votre jeune avénement, si belle journée et aventure, que tous vos amis en seront réjouis, et vos ennemis courroucés. »
À ces paroles ne répondit rien le roi, fors tant qu’il dit : « Connétable, et je le vueil ; et faites, au nom de Dieu et de Saint Denis, votre office, je ne vous en quiers plus parler ; car vous y voyez plus clair que je ne fais, ni tous ceux qui ont mises avant ces paroles : soyez demain à ma messe. » — « Sire, dit le connétable, volontiers. » Atant prit-il congé du roi, qui lui donna liement : si s’en retourna à son logis avecques ses gens et compagnons.