Les Chroniques de Sire Jean Froissart/Livre II/Chapitre XIV
CHAPITRE XIV.
Alexandre Ramesay et ses gens qui échellé avoient le château de Bervich, et qui trop bien cuidoient avoir exploité, et aussi avoient-ils fait, car ils eussent été seigneurs de la ville, si Jean Bisset n’y eût pourvu de conseil, prirent et occirent de ceux de là dedans desquels qu’ils voulurent, et les prisonniers enfermèrent en la tour, et puis s’ordonnèrent et dirent : « Allons jus en la ville, car elle est nôtre : nous en prendrons tout l’avoir et ferons apporter céans par les bons hommes de la ville ; et puis bouterons le feu en la ville, car elle n’est pas à tenir pour nous ; et dedans trois ou quatre jours nous viendra secours d’Escosse, par quoi nous sauverons tout notre pillage ; et au départir nous bouterons le feu en ce châtel : ainsi paierons-nous notre hôte. » À ce propos s’accordèrent tous les compagnons, car ils désiroient à gagner. Si restreignirent leurs armures, et prirent chacun le glaive au poing, car ils en avoient là dedans trouvé assez, et ouvrirent la porte et puis avalèrent le pont. Ainsi que le pont chéy, les cordes qui le portoient rompirent, car le pont n’eut point d’arrêt ni de soutenue ; car le banc sur quoi il devoit cheoir étoit ôté et les planches défaites au lez devers la ville. Quand Jean Bisset et ceux de la ville qui en la place étoient virent ce convenant, si commencèrent tous d’une voix à huer et à dire : « Tenez-vous là, Escots, sans faillir n’en partirez sans notre congé. » Quand Alexandre Ramesay en vit le convenant, si perçut bien que ceux de la ville avoient été avisés de eux mettre ens ou parti où ils se trouvoient. Si refermèrent la porte sur eux pour le trait[1] et s’enfermèrent là dedans. Si entendirent à garder leur châtel et mirent hors tous les morts ens ès fossés, et les prisonniers enfermèrent-ils en une tour. Bien se sentoient en forte place assez pour eux tenir là, tant que secours leur seroit venu d’Escosse, car les barons et les chevaliers faisoient leur amas à la Morlane[2] et là environ, et jà étoit le comte Douglas et messire Arcembaut Douglas partis de Dalquest[3] et venus à Dombarre. Or parlerons de l’écuyer Jean Bisset, comme il vint à Anvich[4] devers le seigneur de Percy et lui signifia cette aventure.