Les Souspirs amoureux de F B de Verville 1589/Comme l’an se renouvelle
ODE.
Comme l'an se renouvelle
Ceste amoureuse estincelle
Qu'allumant en moy vos yeux,
S'excite en plus grande flame
Au plus beau lieu de mon ame,
Et la font esperer mieux.
Mon cœur qui n'a autre vie,
Que celle qu'il a ravie
Des feux de vostre beauté,
Seur d'une amour nouvellle
Vous jure amour eternelle,
En toute fidelité.
Permettez luy donc de vivre,
Au desir qu'il veut poursuivre,
Tant que la loy de mon sort
Qui tient en vous arrestee
L'heure de ma destinee,
Marque l'instant de la mort.