Les Souspirs amoureux de F B de Verville 1589/Le Ciel et la beauté dessus tout ont puissance
XLVIII.
Le Ciel & la beauté dessus tout ont puissance,
Le Ciel fait comme il veut de vostre volonté,
De mesme vous rangez dessous vostre beauté
Ceux qui vivront heureux en vostre obeissance.
Le Ciel peut dessus tout par sa juste influence,
La beauté peut sur tout par la fatalité,
L'influence & le sort sont un poinct arresté
En la loy de ce tout d'une mesme ordonnance.
Ainsi d'un mesme sort le Ciel vous destina
Pour estre ma maistresse, & le mesme ordonna
Que pour vostre beauté un jour je vous servisse.
Il nous faut obeir humbles à leur grandeur,
Soyez moy donc maistresse, & benigne & propice,
Et vous m'aurez fidele & loyal serviteur.