Les Souspirs amoureux de François Beroalde de Verville/Je veux braver le sort, et je luy suis sujet
Les Souspirs amoureux de François Beroalde de Verville 
, Texte établi par Nicolas Le Digne , Raphael du Petit Val, 1606 (p. 16).
, Texte établi par Nicolas Le Digne , Raphael du Petit Val, 1606 (p. 16).XXV.
Je veux braver le sort, & je luy suis sujet,
Je veux forcer le ciel, & il peut sur ma vie,
Je veux contraindre amour, il m’a l’ame asservie,
Je veux vaincre la mort, & je suis son objet.
Je me veux d’une sorte & par divers effets,
Vous le voulez aussi, moy par la douce envie
Qui rend sous vos beautez mon ame assujettie,
Et vous usant vers moy d’un amour trop discret.
Je me moquois du sort, il m’a monstré sa force,
Le ciel m’a maistrisé & l’amoureuse amorce
M’a mis jusques au cœur les horreurs de la mort.
Mais vous esprouverez & vaincrez la puissance,
De la mort, de l’amour, & du ciel, & du sort,
Selon que vous aurez conduit mon esperance.