Les oeuvres poétiques de Clovis Hesteau de Nuysement 1578/M'as-tu esprouvé tel
XVIII.
M'as-tu espouvé tel que ce Troyen parjure,
Qui fuyant le tranchant des Gregeois coutelas,
Fut receu de Didon triste, affamé, & las,
Cerchant parmy les flots sa chetive avanture.
Ay-je pour te tromper controuvé quelque augure,
Ay-je feint qu'en songeant le cher nepveu d'Atlas,
M'ait chanté mon destin : & t'ay-je encor (helas,)
Payee ainsi que luy de mainte & mainte injure.
Non, non, (ô sort cruel) tu m'as trouvé ce Roy,
Cest Hiarbe loyal qui l'ayma plus que soy,
Et qui sous elle avoit sa puissance asservie :
Mais toy en ton mal-heur ainsi qu'elle obstinee,
Tu refuses mon vœu pour celui d'un Ænee :
Qui laschera au vent ton honneur & ta vie.