Sinon de bois ou pierre, que ne mente ;
Mais s’une fois la vraye m’apparoist,
Vous n’y perdrez seulement que l’attente.
Prince du Lys, qui à tout bien complaist,
Que cuidez-vous, comment il me desplaist
Quand je ne puis venir à mon entente ?
Bien m’entendez, aydez moi, s’il vous plaist :
Vous n’y perdrez seulement que l’attente.
Allez, Lettres, faictes un sault,
Combien que n’ayez pied ne langue :
Remonstrez, en vostre harengue,
Que faulte d’argent si m’assault.
Tant grate chèvre que mal gist ;
Tant va le pot à l’eau qu’il brise ;
Tant chauffe-on le fer qu’il rougist ;
Tant le maille-on qu’il se debrise ;
Tant vault l’homme comme on le prise ;
Tant s’eslongne-il qu’il n’en souvient ;
Tant mauvais est qu’on le desprise ;
Tant crie l’on Noel qu’il vient.
Tant raille-on que plus on en rit ;
Tant despend-on qu’on n’a chemise ;
