ur, très hault et très puissant prince et mon très redoubté
seigneur le Duc de Bretaigne, vostre cousin, vous envoye ycy les blazons de huit chevaliers et escuiers en ung roolle de parchemin, à celle fin que des huit en eslisez quatre de ceulx qui mieulx vous seront agréables pour juges
diseurs.
Cela dit au Duc par le Roy d’armes, il lui monstrera ledit roolle de parchemin, lequel il prandra, et regardera les blazons à son plaisir ; puis respondra audit Roy d’armes :
Quant aux juges diseurs dont vous me monstrez ycy les
blazons, les seigneurs de tel lieu et de tel, me plaisent très bien pour chevalier, s’il leur plaist ; et les seigneurs de tel lieu et de tel aussi pour escuiers. Et pour ce vous leur porterez lettres de créance de ma part ; et aussi prierez à mon cousin le Duc de Bretaigne qu’il leur vueille escripre de la sienne qu’ils soient contens de ce accepter, et que le plus tost qu’il leur sera possible, me facent savoir le jour dudit Tournoy, et le lieu
aussi.
Ycy aprés est pourtraictie la façon et la manière comment le Roy d’armes monstre audit duc de Bourbon les huit blazons des chevaliers et escuiers.
Nota que incontinent que ledit Duc de Bourbon aura esleu les quatre juges diseurs, que le Roy d’armes doibt envoyer en toute diligence deux poursuivans, l’ung devers le seigneur appellant pour avoir ses lettres aux juges diseurs, qu’il pense qu’ils doivent estre loing l’ung de l’autre, en leur suppliant par ses lettres qu’ils se vueillent tirer ensemble en aucune bonne ville telle qu’ils adviseront, ad ce que honnorablement il leur présente les lettres desdits seigneurs appellant et deffendant.
Cela dit, fera bailler le Duc de Bourbon au Roy d’armes, deux aulnes de drap d’or, ou de veloux veluté, ou satin figuré cramoisis du moins, sur lequel il fera mettre les deux seigneurs chiefs dudit Tournoy, faiz
