Car enracinés fi d’amoureusse racine,
Car ausi bien que feus par force l’or afine
Estoit Bruns afinés d’amour lealle et fine,
Tourmens, paines, griestés en lui pas ne decline,
Et ce li pourchassa de Morgue la cousine.
Or commancent de Brun et paines et grietés
De la dame pour qui il fu enamourés.
S’en langui longuement ainsi com vous orrés,
Se l’istoire ne ment et vous bien m’escoutés.
Par moy vous ert li fais desraigniés et contés.
Tant fu Bruns en la tour longuement demourés
Qu’il estoit de chascun conneüs et privés,
Et si en estoit moult prisses et honnorés.
Mais il estoit d’amour si forment afolés
Que si tost qu’il estoit de celle regardés,
Ses vïaires estoit tains et puis enflambés,
N’il ne savoit comment il estoit demenés.
Ainsi et nuit et jour il estoit atournez,
Pour ce qu’en lui avoit tant d’amoureus pensés.
Or avint a un jour qu’il se fu apensés
Qu’a la dame diroit ses amoureus secrés,
Pour vivre ou pour mourir plus ne seroit celés.
Ce fu a .j. juesdi que jours fu avesprés,
Chascun des chevaliers fu en gibier alés,
Et Bruns estoit tous seulz en la sale remés,
En une chambre entra ou dame[s] ot assés.
Si tost qu’il celle vit pour qui fu enbrassés,
Il an ala seoir près de lui lés a lés.
Et quant il fu assis il fu moult regardés,
Pour ce qu’il fu en plus de .vj. couleurs mués.
Avant qu’il fust assis est en la chambre entrés.
Adont d’une autre dame a esté apellés,
- ↑ — 3666. vit celle. — 3667. il l’an. — 3670. est, corr. et ?
