— Dame, » ce dit Butor, « par la vierge Marie
« Le fait et l’aventure est drois que je vous die.
« Hier soir que vous savés, quant la nuit fu serie,
« J’envoiai grant partie de ma chevalerie
« Ou bois de Bersillant en la forest fueillie
« Ou il y a souvent repair de faierie ;
« Dont .iiij. chevaliers, sans autre compaignie,
« En portérent l’enfant dont estes acouchie
« Desus une fontaine assés gaie et jolie,
« Dont la gravelle estoit noble [et .......] ;
« Et s’i avoit entour mainte flour espanie,
« Et bouloit li sourjons par moult grant melodie.
« Onques chose ne fu de li miex agencie :
« Il sembloit qu’elle fust toute d’orfaverie
« Tant estoit bien ouvrée et gentement polie.
« Dame, » ce dit Butor, « c’est bien chose certaine
« Que quant li chevalier vindrent a la fontaine,
« Qui est plus clére assez que n’est l’iave de Saine,
« Ou non de Jhesucrist et la vierge hautaine
« Il laissiérent l’enfant qui moult souffri de paine,
« Car il n’avoit en lui a paines point d’alaine
« Que ne li fust grevés de grief doulour grevainne.
« Li chevalier aussi n’avoient chascun vaine,
« De la grande paour, qui fust pas granment saine.
« Or ala avenir si qu’aventure amainne,
« Et que la destinée evureusse pourmaine,
« Par la vertu de Dieu qui est trés souverainne,
« Qu’il laissiérent l’enfant sur l’eur de la fontaine.
