Tomile de Coloigne fist il puis del chief blos
Et gehir par la gueule le pechié orguillos
Com il mena sa mere par ses granz traïsons.
La suer le roi de France fu molt forment irée ;
Ou ele vueille ou non, [de] la tor l’avalerent.
Ele crie et huche a molt grant alenée :
« Haï ! Pepins de France, por quoi faites ce, frere,
« Que de l’onor me getes que m’avoies donée ? »
En France s’en reva Pepins nostre emperere,
E Do li Alemanz en la sue contrée ;
Sa suer ne son nevo n’en laissa il denrée.
La suer le roi fu molt dolente et corrocie ;
Ou ele vueille ou non, l’ont jus de la tor mise.
Quant ele ist dou palais, si huche et si crie :
« Haï ! Pepins de France, por quoi ce faites, sire,
« Que de l’onor me getes ou tu m’avoies mise ?
« Certes, tot [ce] me fait li traïtres Tomiles.
« Diex m’en face venjance, li filz sainte Marie. »
.I. ostel li ont quis la desus en la vile ;
Chascun jor a .ij. pains : tele fu sa devise ;
Illuec se desduira come .j. autre chaitive.
Nostre emperere s’est en France repairiez,
La desus a Paris, en son demoine fié,
