Qui ne pooit foillier n’amors ne s’i puet prendre :
La dame se pasma, que molt iert sage fame :
Landris ne puet avoir le secors qu’il demande.
« Haï ! Landris, beaus filz, com por vos sui dolente !
« Jamais je ne verrai vostre bele jovente. »
Quatre foiz se pasma desoz l’ombre de l’ente.
« Haï ! Landris ; beaus filz ; molt me poise de vos :
« Jamais ne vos verrai ne vos moi ne je vos ».
Et li enfes servoit au riche empereor,
Droit a Costentinoble enz ou palais gregnor.
Asses et Guinemanz furent bien de la cort.
Une guerre sordi au riche empereor :
Paien et Sarrazin, li cuvert orguillos,
Li ont tolu Lalice, les palaiz et les tors,
S’en ont getés Hermins, les gardains pris trestoz.
Ainz que fausi[s]t la guerre ot Landris ses ados :
Li rois li ceint l’espée, voiant ses barons toz,
Et si li dona armes et chevaus merveillos.
Bien furent emploiées au noble poigneor ;
Puis en ferit .M. cous sor paiens a baudor,
Et desconfist paiens et si prist lor seignor,
Sil rendit Alixandre sanglant et vergondos.
Ceste bataille et autre[s] voirement fist Landris ;
El est tote provée de veoir et d’oïr,