Tantost demande l’aigue, s’assirent au soper :
Molt i ot venoison [et] vins viez et clarez,
S’orent grues et gantes et paons empevrez,
Isopé, bogu[e]rastre, piment et eluné.
Quant il orent mengié et beü a plenté,
Si chantent et violent et rotent li jugler ;
Cele nuit ont grant joie a loisir demené ;
Et li lit furent fait, si sont couchier alé.
Quant tens [et lius] en iert bien savrons repairier ;
Si vos dirai du duc, de son grant encombrier :
Tant a norri Malingre qu’il le fist ch[eval]ier,
C’est li filz Audegour, cui Dieus dont encombrier.
Ot adobé Malingre, ne l’ama il noiant.
L’endemain par matin fu si ses malvoillanz
Que l’ala par haïne toz tens contralianz :
« Adoubez sui, beaus sire, merci Dieu le poissant !
« Or se gardent tuit cil cui je suis mal voillanz !
« Dame Olive de France ne voil pas que se vant
« Qu’elle soit conreée dès cest jor en avant
« De totes celes terres qu’a vos sont apendant ».
Quant l’entendi li dus, a po ne pert le sen :